Makapambilay Kay Andi-Anggaan!

1. Antoy epekto no dalepdepen tayoy sipan nen Jehova ya bilay ya andi-anggaan?

INSIPAN nen Jehova ya ikdan toy “bilay ya andi-anggaan” iramay maunor ed sikato. (Roma 6:23) No dalepdepen tayo itan ya sipan, sikatoy mas naar-aro tayo. Isip mo pa ’ya: Talagan inar-aro itayo nen Jehova​—agto labay ya napultot so relasyon tayod sikato kanian ikdan to tayoy bilay ya andi-anggaan.

2. Akin et makatulong no lanang tayon sankanonot so bilay ya andi-anggaan?

² Lapud amta tayo ya diad arapen et manbilay tayo na andi-anggaan, nasasarag tayo ray subok ya dadalanen tayo natan. Anggano taktakoten itayo na saray onkokontra ed pandadayew tayod si Jehova, desidido tayon manmatoor ed sikato. Amta tayo ya anggano ompatey itayo, paolien to tayo lanlamang tan walay pag-asa tayon aglan balot ompatey. (Juan 5:28, 29; 1 Cor. 15:55-58; Heb. 2:15) Pero, akin et segurado tayo ya posible so bilay ya andi-anggaan? Amtaen tayo so pigaran rason.

ANDI-ANGGAAN SO BILAY NEN JEHOVA

3. Akin et segurado tayo ya sarag itayon ikdan nen Jehova na bilay ya andi-anggaan? (Salmo 102:12, 24, 27)

³ Segurado tayo ya sarag itayon ikdan nen Jehova na bilay ya andi-anggaan ta sikato so Subol o Lapuan na bilay, tan sikatoy agbalot ompatey. (Sal. 36:9) Ibabaga na pigaran teksto ed Biblia ya anggapoy gapoan nen Jehova tan anggapo met so anggaan to. Nabasa ed Salmo 90:2 ya si Jehova et “manlapud andi-anggaan ya anggad andi-anggaan.” Mipara met ed satan so ibabaga na Salmo 102. (Basaen so Salmo 102:12, 24, 27.) Tan onia met so insulat nen propetan Habacuc tungkol ed si Aman Jehova: “Agta wala ka la manlapud andi-anggaan, O Jehova? O Dios ko, say Masanton Dios ko, agka ompatey.”​—Hab. 1:12.

4. Akin et agtayo mapaga no agtayo tanton natatalosan ya si Jehova et anggapoy gapoan tan anggapoy anggaan to? Ipaliwawa.

⁴ Kasin naiirapan kan talosan ya si Jehova et Dios ed “anggad angga”? (Isa. 40:28) Agka mapaga ta ontan met so nalilikna na arum. Imbaga nen Elihu ya “saray taon [nen Jehova] et agnausisa” o agnatalosan. (Job 36:26, paimanod leksab) Pero, aliwan lapud agtayo natatalosan so sakey ya bagay et aliwa la itan ya tua. Singa bilang, kasin lapud agmo natatalosan no panon ya onggagana so kuryente et isipen mo ya aliwan tua ya walay kuryente? Siempre andi. Ontan met ed pakatalos tayod si Jehova. Ompan agtayon masyadon natatalosan no akin ya anggapoy gapoan tan anggapoy anggaan to. Pero aglabay ya ibaga na satan ya imposiblin andi-anggaan so bilay na Dios. Say katuaan tungkol ed Amalsa et ag-akadepende ed no antoy natatalosan tayo. (Roma 11:33-36) Diad tua, wala la si Jehova antis nin niwala so uniberso, kaiba la ray amin ya wadtan, singa say agew. Ibabaga na Biblia ya “sikato so amalsa na dalin” tan sikato met so “angibilkag ed tawen.” (Jer. 51:15; Gawa 17:24) Anto ni sakey ya rason ya manisia tayon sarag itayon ikdan nen Jehova na bilay ya andi-anggaan?

PINALSA ITAYO NA DIOS PIAN MANBILAY NA ANDI-ANGGAAN

5. Anton ilalo so inter na Dios ed inmunan sanasawa?

⁵ Amin ya mabilay a bengatla ya pinalsa nen Jehova diad dalin et ompatey lanlamang diad ilabas na panaon, pueray too. Nen pinalsa to so too, inikdan toy ilalo ya manbilay na andi-anggaan. Pero, oniay impasakbay nen Jehova ed si Adan: “Agka nepeg a mangay bunga na kiew na pikakabat ed maong tan mauges, ta diad agew a pangan mo ed satan et seguradon ompatey ka.” (Gen. 2:17) No unoren itan nen Adan tan Eva, ag-ira ompatey. Tan diad ilabas na panaon, ompan iyabuloy lanlamang nen Jehova ya mangan ira ed “kiew na bilay” bilang garantiya ya labay to ran “manbilay na andi-anggaan.”b​—Gen. 3:22.

6-7. (a) Anto ni arum ya prueba ya ag-itayo pinalsa na Dios pian ompatey lanlamang? (b) Anto ray labalabay mon gawaen diad balon mundo? (Nengnengen so litrato.)

⁶ Adiskobre na pigaran scientist ya melag labat ya porsiento na utek tayo so nauusar tayo legay bilay tayo. Nen 2010, nabasa ed sakey ya artikulo ed journal ya Scientific American Mind ya say utek tayo et sarag ton kargaen so manga 2.5 milyon ya gigabyte na impormasyon odino 3 milyon ya oras (masulok ya 300 taon) ya palabas ed TV. Diad tua, ompan kulang ni ingen itan ed aktual ya nakarga na utek tayo. Ipapanengneng na satan ya say impanggawa nen Jehova ed utek tayo et aliwa labat ya 70 o 80 ya taon so sarag ton kargaen ya impormasyon.​—Sal. 90:10.

⁷ Pinalsa itayo met nen Jehova ya labay tayoy tuloytuloy ya manbilay. Ibabaga na Biblia ya nen pinalsa na Dios iray totoo, “inyan to . . . so andi-anggaan ed puso ra.” (Ecl. 3:11) Atan so sakey ya rason no akin ya kabusol tayo so patey. (1 Cor. 15:26) Di ba, no walay graben sakit tayo, agtayo bastabasta onsusuko? Manpadoktor tayo tan oninum tayoy tambal pian onabig tayo. Diad tua, gawaen tayoy amin ya remedyo pian ag-itayo ompatey. Tan no walay inad-aro tayon ompatey, balanglan ugaw ni o matatken la, di ba nasakisakitan tan maer-ermen tayo? (Juan 11:32, 33) No say gagala na Dios nen pinalsa toy too et pian ompatey lanlamang, di aliwa komon ya ontan so reaksion tayo, awa? Mapatpatnag sirin ya pinalsa nen Jehova so too pian manbilay na andi-anggaan. Pero wala ni arum ya rason no akin ya segurado tayon sarag tayoy manbilay na andi-anggaan. Pantongtongan tayo natan no anto ray ginawa nen Jehova nensaman tan no anto ray gagawaen to natan pian nasumpal so orihinal ya gagala to.

AG-ANGUMAN SO GAGALA NEN JEHOVA

8. Antoy ipapaseguro na Isaias 55:11 tungkol ed gagala nen Jehova parad too?

⁸ Anggano nankasalanan si Adan tan Eva tan impatawir day patey ed saray ananak da, ag-anguman so gagala nen Jehova. (Basaen so Isaias 55:11.) Siansia nin labay to ya manbilay na andi-anggaan iray totoo ya maunor ed sikato. Segurado tayod satan ta wala la ray imbaga tan ginawa nen Jehova nensaman pian nasumpal so gagala to.

9. Antoy insipan na Dios? (Daniel 12:2, 13)

⁹ Insipan nen Jehova ya paolien to iray inaatey tan ikdan to ra na tsansan manbilay na andi-anggaan. (Gawa 24:15; Tito 1:1, 2) Segurado si Job ya labalabay nen Jehova ya paolien iray inaatey. (Job 14:14, 15) Amta nen propetan Daniel ya saray totoon inatey et walay pag-asa dan nabilay lamet tan walay tsansa ran manbilay na andi-anggaan. (Sal. 37:29; basaen so Daniel 12:2, 13.) Amta met na saray Judio diad panaon nen Jesus ya seguradon ikdan nen Jehova na “andi-anggaan a bilay” iray matoor ya lingkor To. (Luc. 10:25; 18:18) Aminpiga met ya inulit nen Jesus iyan sipan, tan anggan sikaton mismo et pinaoli na Ama to.​—Mat. 19:29; 22:31, 32; Luc. 18:30; Juan 11:25.

10. Antoy prupruebaan na saray agawan impamaoli nensaman? (Nengnengen so litrato.)

¹⁰ Si Jehova so Lapuan na bilay tan walay pakapanyari ton bilayen iray inaatey. Nensaman, inikdan toy pakapanyari si propetan Elias ya paolien imay anak na biyuda ya taga Zarepat. (1 Ara. 17:21-23) Inikdan met na Dios si propetan Eliseo na pakapanyarin paolien imay anak na biin Sunamita. (2 Ara. 4:18-20, 34-37) Papatunayan na saratan tan arum nin impamaoli nensaman ya walay pakayari nen Jehova ya bilayen iray inaatey. Nen wadiad dalin si Jesus, impanengneng to ya sikatoy inikdan na Ama to na pakapanyarin paolien iray inaatey. (Juan 11:23-25, 43, 44) Natan et wala lad tawen si Jesus tan niiter lad sikato so “amin a pakauley ed tawen tan diad dalin.” Kanian sarasarag to lan tooren imay sipan ya “amin a walad pakanodnonotan iran lubok” et paolien tan walay tsansa ran manbilay na andi-anggaan.​—Mat. 28:18; Juan 5:25-29.

11. Akin ya importante so dondon pian magmaliw ya posible so bilay ya andi-anggaan?

¹¹ Akin et inabuloyan nen Jehova ya ompatey so inad-aro ton Anak? Impaamta nen Jesus so ebat nen imbaga ton: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16) Inter na Dios so Anak to pian dondonen to tayo tan bayaran iray kasalanan tayo, kanian nagmaliw ya posible ya manbilay itayo na andi-anggaan. (Mat. 20:28) Impaliwawa nen apostol Pablo iyan gagala na Dios nen insulat to: “No panon a say ipapatey et niwala diad panamegley na sakey a too, say kioli na saray inaatey et diad panamegley met na sakey a too. Ta no panon ya ompapatey so amin lapud si Adan, bilayen met so amin lapud Kristo.”​—1 Cor. 15:21, 22.

12. Antoy papel na Panarian pian nasumpal so gagala nen Jehova parad totoo?

¹² Imbangat nen Jesus iray papatumbok to ya ipikasi ran onsabi la komon so Panarian na Dios tan nagawa la so linawa na Dios diad dalin. (Mat. 6:9, 10) Kaiba ed gagala na Dios ya manbilay na andi-anggaan iray totoo diad dalin. Pian nagawa itan, tinuro nen Jehova so Anak to pian magmaliw ya Ari ed Panarian. Titiponen la na Dios so 144,000 ya totoon manlapu diad dalin ya nakaiba nen Jesus pian nasumpal so gagala To.​—Apo. 5:9, 10.

13. Antoy gagawaen nen Jehova natan, tan antoy dapat mon gawaen?

¹³ Titiponen met la natan nen Jehova so “baleg ya ulop” na saray totoo tan ipapasal to la ra no panon so manbilay bilang sakop na Panarian to. (Apo. 7:9, 10; Sant. 2:8) Anggano manbibilay ira ed mundo ya saray totoo et manbubusolan tan manggi-guerra, pansasagpotan dan aroen so kapara dan too. Singa da la ‘pipitpiten iray espada ra pian gawaen ya tarem na lukoy.’ (Miq. 4:3) Imbes ya miguerra ira, tutulongan da iray totoo pian naalmo day “tuan bilay” diad pangibabangat dad sikara tungkol ed tuan Dios tan ed gagala to. (1 Tim. 6:19) Lapud susuportaan day Panarian na Dios, ompan kontraen ira na saray kapamilya ra odino onmelag so almoen dan kuarta. Pero seseguradoen nen Jehova ya nitarya iray pankaukolan da. (Mat. 6:25, 30-33; Luc. 18:29, 30) Amin iratan et prueba ya tua so Panarian na Dios tan tuloytuloy ya sumpalen na satan so gagala nen Jehova.

BALIBALI SO NAGAWA ED ARAPEN

14-15. Kapigan nasumpal imay sipan nen Jehova ya naandi lay patey?

¹⁴ Si Jesus et Ari la natan diad Panarian na Dios diman ed tawen tan akaparaan lan sumpalen so amin ya sipan nen Jehova. (2 Cor. 1:20) Manlapu nen 1914, ginapoan lan taloen nen Jesus iray onkokontra ed Panarian. (Sal. 110:1, 2) Asingsingger lan sumpalen nen Jesus tan saray kakaiba ton manuley so panatalo ra tan magano da lan deralen so amin ya mauges.​—Apo. 6:2.

¹⁵ Legan na Sanlibon Taon ya Uley nen Jesus, paolien to iray inaatey tan magmaliw ya perpekto so amin ya maunor ya totoo. Kayari na unor ya subok, saramay ipasen nen Jehova ya matunong et “tawiren day dalin, tan manbilay ira ditan diad andi-anggaan.” (Sal. 37:10, 11, 29) Sa wakas, ‘say unor a kabusol, say patey, et naandi la’!​—1 Cor. 15:26.

16. Anto dapat so manunan motibo tayo diad panlilingkor tayod si Jehova?

¹⁶ On, say ilalo tayon manbilay na andi-anggaan et akabase ed Biblia. Satan ya ilalo so ontulong ed sikatayon manmatoor anggano mairap so kipapasen na bilay diad sayan kaunoran iran agew. Balet agtayo manlilingkor pian labat nawalaan na bilay ya andi-anggaan. Naliketan si Aman Jehova tan si Jesus no say manunan rason no akin ya manmamatoor tayod sikara et lapud inar-aro tayo ra. (2 Cor. 5:14, 15) Atan ya panangaro so mamakiwas ed sikatayon aligen ira tan maseseg ya ipulong ed arum so ilalo tayo. (Roma 10:13-15) No aliwa tayon makasarili tan maiter tayo ya singa si Jehova, labalabay to tayon magmaliw ya kaaro diad andi-anggaan.​—Heb. 13:16.

17. Antoy determinasyon mo? (Mateo 7:13, 14)

¹⁷ Kasin sakey kad saramay manbilay na andi-anggaan? Si Jehova lay nanggawa na paraan pian naawat mo itan. Akauley ka balet no kasin mansiansia ka ed dalan ya paarap ed bilay. (Basaen so Mateo 7:13, 14.) Antoy kipapasen na bilay tayo no agtayo lan balot ompatey? Amtaen tayoy ebat diad onsublay ya artikulo.