Naliknam so Kareenan Anggano Mair-irap so Situasyon

1. Anto ’tay “kareenan na Dios,” tan antoy epekto no wala itan ed sikatayo? (Filipos 4:6, 7)

WALAY klase na deen ya agnalilikna na saray totoo ed sayan mundo. Atan imay ibabaga na Biblia ya “kareenan na Dios.” Ontutukoy itan ed inkakalmado ya nalilikna na sakey ya lingkor nen Jehova lapud maap-apit so liknaan to ed Ama tod tawen. (Basaen so Filipos 4:6, 7.) No walad sikatayo so kareenan na Dios, panatag so loob tayo ta amta tayo ya kaaro tayoy Aman Jehova, “say Dios na kareenan.” (1 Tes. 5:23) Tan lapud satan, kaaro tayo met iramay mangaaro ed sikato. No pantiwalaan tan unoren tayoy Aman Jehova, say kareenan na Dios so manpakalma ed puso tayo anggano mair-irap so situasyon.

2. Akin et segurado tayo ya posible ya nalikna tayoy deen anggano mair-irap so situasyon?

² Posible kasi ya nalikna tayoy kareenan na Dios anggano mair-irap so situasyon? Panon to no walay onkakalat ya sakit, walay kalamidad, guerra, o imbawal na gobierno so kimey tayo? Natural labat ya onaburido odino ontakot tayo no nagawa iratan. Pero oniay imbaga nen Jesus ed saray papatumbok to: “Agyo aabuloyan a nagonigon odino ontakot so kapusoan yo.” (Juan 14:27) Makapaliket ta inyaplika itan na saray agagi tayo. Diad tulong nen Jehova, alikna da nin siansia so kareenan nen dinmalan ira ed nanduruman subok.

NO WALAY ONKAKALAT YA SAKIT

3. Antoy epekto ed sikatayo no walay epidemic o pandemic?

³ Apektadon maong so bilay tayo no walay epidemic o pandemic. Isip mo pay epekto na COVID-19. Diad sakey ya survey, masulok ya kapaldua ed saray tinepetan et imbaga ran ag-ira makakaugip legay pandemic. Amayamay so naaburidon maong tan a-depress. Dinmakel so nagmaliw ya buanges tan angusar na drugs. Inmatagey met so kaso na panag-abuso tan panagmaltrato ed pamilya. Tan base ed report, dinmakel so bilang na saramay sinali day manbikkel. No walay onkalat ya sakit ed lugar yo, antoy gawaen mo pian agka aburidon maong tan naliknam so kareenan na Dios?

4. Akin et mangiter ed sikatayo na deen imay impropesiya nen Jesus tungkol ed kaunoran iran agew?

⁴ Impasakbay nen Jesus ya diad kaunoran iran agew et wala ray salot o sakit “diad nanduruman pasen.” (Luc. 21:11) Akin et makatulong itan ya imbaga to pian nalikna tayoy deen? On ta agtayo la nabigla no walay nabalitaan tayon onkakalat ya sakit. Kaiba itan ed saray imbaga nen Jesus ya nagawa diad panaon tayo. Kanian ‘agtayo natatakot’ ta amta tayon nagawa iratan diad panaon na anggaan.​—Luc. 21:9.

5. (a) Base ed Filipos 4:8, 9, antoy ipikasi tayo no walay onkakalat ya sakit? (b) Antoy epekto ed sakey ya sister kada no ondengel na audio recording na Biblia, tan antoy naaralan mo ed satan ya ginawa to?

⁵ No walay onkakalat ya sakit, ompan naaburido tayon maong o man-panic tayo ni ingen. Ontan so agawa ed si Sister Desi.b Inatey so uncle, kapinsan, tan anggan say doktor to lapud COVID-19. Kanian natatakot ya ompan naalisan met na virus tan naipasa to itan ed maedad lan nanay to. Aburido met ya ompan lapud pandemic et naekal ed trabaho. Kanian sankanonot to no iner la kasi pangalaan toy pambilay da tan say ibayar ed renta na abung. Nambabangil lay iisipen to kanian aga makaugip. Anto balet so ginawa to pian ondeen so nonot to? Diad pikakasi tod si Jehova, espisipiko ton imbaga ya tulongan to komon ya magmaliw ya kalmado tan makapannonot na positibo. (Basaen so Filipos 4:8, 9.) Dinmengel met si Sister Desi na audio recording na Biblia pian narengel toy “ibaga” nen Jehova ed sikato. Oniay imbaga to: “Mauy-uyamo so boses na saray manbabasa kanian onkakalma ak tan napapanonotan ak ya maar-aroy Aman Jehova.”​—Sal. 94:19.

6. No walay onkakalat ya sakit, akin et makatulong so pan-personal study tan iyatendi ed aral?

⁶ No walay onkakalat ya sakit, ompan naapektoan so rotina tayo. Pero agka komon ompapayag ya naapektoan met so personal study’m tan pipiaral mo. Napaseseg ka ed eksperiensya na saray agagi ya walad publikasyon tan video tayo ya manmamatoor irad si Jehova anggano wala ray subok. (1 Ped. 5:9) No lanang kan miaral, dakel so naaralan mod Biblia, napaseseg mo ray agagi, tan napaseseg da ka met. (Roma 1:11, 12) Dalepdep mo no panon ya tinulongan nen Jehova iray lingkor to nen mansasakit, natatakot, o nadi-depress ira. Seguradon ombiskeg so pananisiam tan magmaliw kan kombinsido ya tulongan to ka met.

7. Antoy naaralan mo ed si apostol Juan?

⁷ Agmo pupultoten so komunikasyon mo ed saray agagi. No walay onkakalat ya sakit, ompan kaukolan tayoy man-physical distancing tan agtayo nakaiban lanang iray agagi. No ontan so situasyon, maka-relate ka ed alikna nen apostol Juan. Makakailiw ed kaaro ton si Gayo tan labalabay to lan nanengneng. (3 Juan 13, 14) Pero amta to ya aliwa nin posible ed saman, kanian sinulatan to lay Gayo. No aliwan posible ya napasyar mo ray agagi, marakep no tawagan, i-video call, o i-chat mo ra. No tuloytuloy so komunikasyon mod saray agagi, mas kalmado ka tan panatag so loob mo. No nanaaburido kan maong, kontak mo ray elder tan ibagam ya kaukolan moy panamaseseg.​—Isa. 32:1, 2.

NO WALAY NAGAWAN KALAMIDAD

8. Antoy epekto ed sikatayo no walay nagawan kalamidad?

⁸ No walay nagawan delap, yegyeg, o pool, ompan na-trauma tayo tan mair-irap tayon nalingwanan so agawa. No lapud kalamidad et inateyan ka na kapamilya o kaaro, tan aderal so abung tan arum nin apundar yo, natural labat ya nasakitan tan manermen kan maong o mananap kay tetelen mo. Pero agto labay ya ibaga ya materyalistiko ka o makapuy so pananisiam. Diad tua, agla makapabigla no ontay reaksion mo ta dinmalan ka ed graben subok. (Job 6:3) Pero antoy gawaen mo pian naliknam nin siansiay deen?

9. Antoy imbaga nen Jesus ya makatulong pian agtayo la nabigla ed saray kalamidad?

⁹ Tandaan tayo ya impropesiya la nen Jesus ya wala ray nagawan kalamidad antis ya onsabi so anggaan. Kanian agtayo la nabibigla, aliwan singa saray totoo ed mundo ya iisipen dan ag-iran balot naapektoan na kalamidad. Impaamta la nen Jesus ed saray papatumbok to ya wala ray nagawan “maksil a yegyeg” tan arum ni ran kalamidad. (Luc. 21:11) Impropesiya to met ya ‘ondakel so kaugsan.’ Talagan nagagawa la itan natan ta amayamay so krimen, gulo, tan terorismo. (Mat. 24:12) Ag-imbaga nen Jesus ya say apektado labat ed saraya et saray agmanlilingkor ed Dios. Diad tua, dakel ya matoor a lingkor nen Jehova so biktima met na kalamidad. (Isa. 57:1; 2 Cor. 11:25) Tua ya agla manggagawa si Jehova na milagro pian nipaliis tayo ed saray kalamidad, pero tutulongan to tayo pian ondeen so nonot tayo tan mansiansia tayon kalmado.

10. Akin et pakapatnagan ya walay tiwalam ed si Jehova no manpaparaan ka la natan parad onsabin kalamidad? (Proverbio 22:3)

¹⁰ No walay nagawan kalamidad o emergency, mas kalmado tayo no akaplano lay gawaen tayo tan akaparaan tayo la. Pero no ontay gawaen tayo, labay to kasin ibaga et anggapoy tiwala tayo ed si Jehova? Andi. Diad tua, pakapatnagan itan ya walay tiwalam ed sikato. Akin et nibaga tayo itan? On ta sikaton mismo so manbibilin ed sikatayo ya manparaan tayo pian makapaliis tayo ed saray peligro. (Basaen so Proverbio 22:3.) Uusaren to met so organisasyon to pian amta tayoy gawaen tayo no walay emergency.c Lanang itayon napapanonotan ed saray artikulo ed magasin, diad saray aral, tan diad saray announcement. Ipapanengneng tayon walay tiwala tayod si Jehova no unoren tayo la natan so bilin to tan saray panonot na organisasyon to, antis nin onsabi so kalamidad.

11. Antoy naaralan mo ed alimbawa nen Sister Margaret?

¹¹ Makaaral tayo ed alimbawa nen Sister Margaret. Nen walay agawan wildfire ed lugar da, ingganggan na gobierno iray totoo ya man-evacuate iran tampol. Lapud dakdakel so mani-evacuate, traffic ed karsada. Makapakapal tan agaylay deket na asewek, kanian apilitan si Sister Margaret ya mansiansia labat ed luluganan ya pigay oras. Maong labat ta sikatoy akaparaan ed onia ran emergency. Aka-ready la ed melag ya bag to so mapa ya pakanengnengan no iner iray posiblin dalanen to. Diad tua, sinali to lay man-drive ed saratan ya rota pian amta to lay laen to no emergency. Lapud aka-ready si Sister Margaret, akaligtas ed sayan kalamidad.

12. Akin et importante ya unoren tayo ray safety protocol?

¹² Diad panaon na kalamidad, ompan wala ray ganggan na gobierno tungkol ed curfew, pan-evacuate, tan arum ni ra parad safety na amin. Pero wala ray totoo ya agda labay so onunor o manaalangan ira ta agda labay ya taynanan so abung o arum nin kaykayarian da. Sikatayo ran Kristiano balet ey? Oniay bilin na Biblia ed sikatayo: “Nisengeg ed Katawan, manpasakop kayo ed amin ya autoridad ya inletneg na too.” (1 Ped. 2:13, 14) Wala met iray instruksion ya iiter na organisasyon tayo parad safety tayo. Singa bilang, lanang da tayon papanonotan ya iter tayod saray elder so updated ya contact information tayo pian mainomay da tayon nakontak no walay emergency. Kasin ginawam la itan? Sakey ni, ompan mangiter met so organisasyon na instruksion tungkol ed ag-iyalis ed abung, pan-evacuate, pangala na relief, no antoy gawaen tayo pian natulongan tayoy arum tan no kapigan tayo itan gawaen. No agtayo iratan unoren, ompan iiyan tayod peligro so bilay tayo tan anggan say bilay na saray elder. Manpasakop tayo ed sarayan matoor ya brother ta sikaray tinuro nen Jehova ya mangasikaso ed sikatayo. (Heb. 13:17) Oniay imbaga nen Sister Margaret: “Maong labat ta inunor koy instruksion na saray elder tan say organisasyon kanian akaligtas ak.”

13. Antoy akatulong ed saray agagi pian nalikna day liket tan deen anggano tinaynan day abung da?

¹³ Dakel so agagi ya apilitan ya taynan so abung da lapud kalamidad o guerra ed lugar da. Anggano mana-adjust ni ra ed inalisan dan lugar, agda pinaulyanan so panaglingkor da ed si Jehova. Tuloytuloy dan “iyaabawag so maong a balita,” ya singa ginawa na saray inmuunan Kristiano ya nitaytayak ed nanduruman lugar lapud graben isusumpa. (Gawa 8:4) Anggano mair-irap so situasyon na sarayan agagi tayo, akatulong ed sikara so panagpulong pian akapokus ira ed Panarian, aliwan diad saray problema ra. Kanian ag-abalang so liket da tan nalilikna da nin siansiay deen.

NO IBAWAL NA GOBIERNO SO KIMEY TAYO

14. Antoy epekto ed sikatayo no ibawal na gobierno so kimey tayo?

¹⁴ Baleg so nitutulong na saray espiritual ya aktibidad tayo pian nalikna tayoy deen. Kanian no ibawal iratan na gobierno, baleg so epekto tod sikatayo. No anggapoy panagbawal, malikeliket tan eksayted tayon miaral, manpulong, o gawaen iray inagew-agew ya rotina tayo. Pero no walay panagbawal, natatakot tayo la ta ompan arestoen da tayo. No ontan so situasyon, ompan mapaga tayon maong ta agtayo amtay onsublay ya nagawa. Normal met labat itan, pero dapat labanan tayoy takot tayo. Ta no andi, ompan atan laingen so rason ya onkapuy lay espiritualidad tayo. (Juan 16:1, 2) Anto sirin so gawaen tayo pian mansiansia tayon kalmado anggano ibawal na gobierno so kimey tayo?

15. Akin et agtayo dapat natatakot anggano ibawal na gobierno so kimey tayo? (Juan 15:20; 16:33)

¹⁵ Ibabaga na Biblia: “Amin a malabay a manbilay a walaay debosyon ed Dios bilang disipulo nen Kristo Jesus et napasegsegang met.” (2 Tim. 3:12) No tandaan tayo itan, mas akaparaan tayo ed panamasegsegang. Imanoen so eksperiensya nen Brother Andrei. Nen imbawal na gobierno ed bansa ra so kimey tayo, singa agto natanggap ya amin ya lingkor na Dios et napasegsegang. Inisip to, ‘Amayamay so Tasi ed bansa mi, imposible ya naaresto kamin amin.’ Pero imbes ya ondeen so nonot to, lanang ya aburido. Naobserbaan to balet iray arum ya brother ya kakkalmado labat ira. Amta ra ya posiblin naaresto met ira, pero lapud mantitiwala irad si Jehova, ag-ira masyadon aburido. Kanian inalig nen Andrei so alimbawa ra tan inaral toy manmatalek ed si Jehova. Lapud satan, agla masyadon aburido tan maliket nin siansia anggano wala ray subok. On, tandaan tayo imay imbaga nen Jesus ya napasegsegang so amin ya Kristiano, pero impaseguro to met ya sarag tayoy manmatoor.​—Basaen so Juan 15:20; 16:33.

16. Anto ran instruksion so naawat tayo no walay panagbawal, tan akin et importantin unoren tayo iratan?

¹⁶ No walay panagbawal, walan-walay naawat tayon instruksion manlapud branch office tan diad saray elder. Nayarin tungkol itan ed safety, no panon tayon tuloytuloy ya makaawat na espiritual ya naakan, tan no panon tayon ituloy so panagpulong a kimey anggad posible. Gawam so anggaay nayarian mon unoren iratan ya instruksion, anggano agmo natatalosan no maminsan no akin ya onmay instruksion da. (Sant. 3:17) Agmo met bastabasta ibabaga ed arum iray impormasyon tungkol ed saray agagi odino saray gagawaen ed kongregasyon, lalo la no agda met itan kanepegan ya naamtaan.​—Ecl. 3:7.

17. Singa saray apostol, anto met so determinasyon tayo?

¹⁷ Sakey ed saray manunan rason no akin ya kakalabanen nen Satanas iray lingkor na Dios et lapud gagawaen day “kimey a panagtasi nipaakar ed si Jesus.” (Apo. 12:17) Agmo tatakotan si Satanas tan sayan mundo to. Anggano walay isusumpa, ituloy moy manpulong tan mangiyaral na Biblia, ta atan so mangiter ed sika na liket tan deen. Aligen tayo ray apostol. Nen ingganggan ira na opisyales na saray Judio ya agla ran balot manpupulong, imbaga ra ya say Dios so unoren da, aliwan saray totoo. Lapud intuloy day nampulong, malikeliket ira. (Gawa 5:27-29, 41, 42) Siempre no walay panagbawal, dapat maalwar tayo ed panagpulong. (Mat. 10:16) On tua, aliwa itan ya mainomay. Pero no gawaen tayoy anggaay nayarian tayo, mareen so nonot tayo ta amta tayon napapaliket tayoy Aman Jehova tan ipapaamta tayo ed arum so mensahe ya makapangiliktar ed bilay da.

KAIBAM SO “DIOS NA KAREENAN”

18. Siopa labat so makapangiter na tuan deen, tan akin et nepeg tayon tandaan itan?

¹⁸ On, anggano mair-irap so situasyon, nalikna tayo nin siansia so deen. No walay onkakalat ya sakit, walay kalamidad, o ibawal na gobierno so kimey tayo, tandaan tayo ya say klase na deen ya kakkaukolan tayo et say kareenan na Dios. Si Jehova labat so makapangiter na ontan ya deen. Mantiwala kad sikato tan ed organisasyon to. Manpokus ka ed saray bendisyon ya ipaparaan to parad sika. No ontay gawaen mo, kalmado ka labat ta antam ya kaibam so “Dios na kareenan.” (Fil. 4:9) Pantongtongan tayo ed ontumbok ya artikulo no panon tayon natulongan iray agagi tayo pian nalikna day kareenan na Dios no ondadalan irad subok.