No Antoy Epekto ed Sikatayo na Guerra tan Panlalaban

Bigla labat ya onggagapoy guerra tan panlalaban ed saray lugar ya dati et mareen met. Anggan saray ararawi lan bansa et apektado nin siansia ed satan, kaiba lay ekonomya. Tan anggano tinmunda lay guerra, mabaybayag so aliwliwan epekto to. Nia ray pigara ed saratan:

• 

  Eras. Base ed World Food Programme, “say guerra so manunan rason no akin ya walay eras, 70 percent ed saray naeerasan ed mundo so manaayam ed lugar ya walay guerra tan panlalaban.”

• 

  Problema ed pisikal tan mental. Nalikas ni labat na totoo ya mankaguerra la, na-stress la ra tan ag-ondeey nonot da. Diad saramay walad mismon guerra balet, aglabat ira nasakitan o nasugatan, noagta posiblin mankaproblema met ira ed isip. Tan mabetbet ya anggapoy napampadoktoran da.

• 

  Kapilitan ya taynan so ayaman. Base ed United Nations High Commissioner for Refugees, kagapo na Setyembre 2023, apilitan so masulok ya 114 milyon ya totoo ed interon mundo ya taynan so ayaman da. Say manunan rason et lapud guerra tan panlalaban.

• 

  Irap na bilay. Lapud guerra, onirap so bilay na totoo ta ombili sasaliwen. Naapektoan met ira no amay pundo ya para komon ed panagpatambal tan edukasyon et usaren na gobierno parad pundo na militar. Magasgastos met so pangapiger ed saray aderalderal kayari guerra.

• 

  Aderal ya kalikasan. Nairapan iray totoo no aderalderal so lugar da. Tan lapud polusyon ed danum, dagem, tan dalin, makala ray nanduruman sakit ya mabayag ya natambal. Insan anggano abayag lan asumpal so guerra, no wala ni ray atilak ya bomba, ompan nasabogan ira.