Iyapit Tayoy Liknaan Tayo ed Saray Agagi

1-2. Antoy importantin maong ed si Jehova, tan antoy labay ton gawaen tayo?

IMPORTANTIN maong ed si Jehova no panon tayon tratratoen so kapara tayon too. Imbangat nen Jesus ya kaukolan tayon aroen so arum ya singa pangaaro tayod sarili tayo. (Mat. 22:​37-39) Anggan saramay agmanisia ed si Jehova et nepeg tayo met ya aroen. No panengnengan tayo ray kaabigan, aaligen tayoy Jehova ya “papasinagen toy agew to ed saray mauges tan maong a totoo tan papepelagen toy uran ed saray matunong tan agmatunong.”—Mat. 5:45.

² Anggano inaro nen Jehova so amin ya totoo, espisyal balet so panangaro to ed saray lingkor to ta maunor irad sikato. (Juan 14:21) Kanian labay to ya espisyal met so panangaro tayo ed saray agagi. Bibilinen to tayo ya ipanengneng tayoy “aralem a panangaro” tan “masimoon a panamabli” ed sikara. (1 Ped. 4:8; Roma 12:10) Kasin walay kapamilyam o kaarom ya maap-apit so liknaan mod sikato? Ontan so labay nen Jehova ya turing tayo ed saray agagi. Labay to ya maap-apit so liknaan tayod sakey tan sakey.

3. Antoy tandaan tayo nipaakar ed panangaro?

³ Tandaan tayo ya say panangaro et singa tanaman. Kaukolan ya asikasoen pian tuloytuloy ya ombaleg. Oniay impaseseg nen apostol Pablo ya gawaen tayo: “Mantultuloy kayon manaaroan bilang sanaagi.” (Heb. 13:1) Labay nen Jehova ya tuloytuloy tayon pabiskegen so panangaro tayod saray agagi. Pantongtongan tayo ed sayan artikulo no akin ya kaukolan tayon iyapit so liknaan tayod saray agagi, tan no panon tayon tuloytuloy ya nagawaan itan.

NO AKIN YA KAUKOLAN TAYON IYAPIT SO LIKNAAN TAYO ED SARAY AGAGI

4. Antoy gawaen tayo pian agtayo nibaliwala so marakdakep ya ulopan tan pankakasakey tayon sanaagi? (Salmo 133:1) (Nengnengen met so litrato.)

⁴ Basaen so Salmo 133:1. Talagan tua imay imbaga na salmista ya “agaylay abig” tan “makapaliket” so mikaaro ed saramay mangaaro ed si Jehova. Pero ompan agtayo nalilikas ya agtayo la manaya naaapresya so marakdakep ya ulopan tayo tan say pankakasakey tayon sanaagi. Singa onia ’tan ay: Diad sakey ya lugar, walay balbaleg tan marakdakep ya kiew, pero lapud inagew-agew itan ya nanenengneng na saray tagad man, singa baliwala labat ed sikara. Nayarin ontan met so nagawa ed apresasyon tayod saray agagi. Lapud mabetbet tayo ran nanenengneng diad loob na sakey simba, ompan nibabaliwala tayo met la ra. Anto sirin so gawaen tayo pian agnabawasay panamabli tayod sikara tan lalo tayo ran aroen? Marakep no isipen tayo ya kada agi et mabmabli ed kongregasyon tan importante ra ed sikatayo.

5. Antoy epekto ed saray interesado no nanengneng day aroan tayo?

⁵ Walay ray interesado ya nen first time day akiaral, pambiliban dan maong so aroan tayo, tan lapud satan et akombinse ira ya nalmo da lay katuaan. Duga imay imbaga nen Jesus ya: “Diad saya et naamtaan na amin a sikayo iray disipulok—no manaaroan kayo.” (Juan 13:35) Imanoen so eksperiensya nen Chaithra, sakey ya kolehyo ya inyaralan na saray Tasi nen Jehova. Balbaleg kunoy epekto ed sikato na inyatendi to ed in-person ya regional a kombension tayo. Kayari na unonan agew, oniay imbaga to ed samay mangiyaaral ed sikato: “Agak lalakapen na atateng ko, pero diad kombension yo, 52 lan tampol so linmakap ed siak diad unonan agew ni labat. Alikliknak ya inar-aro ak nen Jehova. Labay koy magmaliw ya parte na pamilya to.” Inmaligwas ed espiritual si Chaithra tan abautismoan nen 2024. On, no nanengneng na saray interesado so kaabigan ya gagawaen tayo, pati say aroan tayo, nayarin atan so rason pian napakiwas iran manlingkor ed si Jehova.—Mat. 5:16.

6. Akin et proteksion so maapit ya relasyon tayod saray agagi?

⁶ Proteksion ed sikatayo so maapit ya relasyon tayo ed saray agagi. Oniay imbaga nen Pablo ed saray kapara ton Kristiano: “Itultuloy yon pasesegen so sakey tan sakey diad kada agew.” Antoy rason? Kuan to: “Pian anggapod sikayoy magmaliw ya anawet so puso to lapud mapalikdon pakayari na kasalanan.” (Heb. 3:13) No naiirapan tayon gawaen no antoy duga, tan aliwa lay aarapen tayo, nayarin usaren nen Jehova so sakey ya agi ya mamaseseg tan mansimbawa ed sikatayo pian napaliisan tayoy makagaway kasalanan. (Sal. 73:​2, 17, 23) Kanian no walay mansimbawa ed sika, tandaan mo ya parad pankaabigan mo itan.

7. Panon ya mankonektaan so panangaro tan pankakasakey? (Colosas 3:​13, 14)

⁷ Amin tayo et mansasagpot pian ipanengneng so panangaro ed sakey tan sakey. (1 Juan 4:11) Balibali resulta to ’tan! Singa bilang, lapud inaro tayoy sakey tan sakey, ‘mantetepelan’ itayo, tan lapud satan et walay pankakasakey tayo. (Basaen so Colosas 3:​13, 14; Efe. 4:​2-6) Kanian kada aral, malikeliket tayon nakaiba iray agagi. Anggapo lay arum ya grupo ed mundo ya miparad ulopan tayo!

IPANENGNENG TAYOY GALANG ED SAKEY TAN SAKEY

8. Panon to tayon tutulongan nen Jehova pian walay pankakasakey tayo?

⁸ Nibagan sakey ya milagro so pankakasakey na saray Tasi nen Jehova ed interon mundo. Anggano agtayo perpekto, walay pankakasakey tayo lapud tulong nen Jehova. (1 Cor. 12:25) Ibabaga na Biblia ya ‘imbangat itayo la na Dios ya aroen so sakey tan sakey.’ (1 Tes. 4:9) Uusaren nen Jehova so Biblia pian nibangat to tayo no anto ray nepeg tayon gawaen pian lalo tayon onapit ed sakey tan sakey. Anto sirin so gawaen tayo pian nipanengneng tayon papaibangat tayod sikato? Aralen tayoy Salita to tan iyaplika tayo ray nababasa tayo ditan. (Heb. 4:12; Sant. 1:25) Atan so pansasagpotan ya gawaen na kada sakey ya Tasi nen Jehova.

9. Antoy naaralan tayo ed Roma 12:​9-13 nipaakar ed pangipanengneng na galang ed sakey tan sakey?

⁹ Panon ya makatulong so Biblia pian lalo tayon onapit ed sakey tan sakey? Laen tayo pan alimbawa imay insulat nen Pablo ya nabasad Roma 12:​9-13. (Basaen.) Naimano yo imay imbaga to ya “idaulo yo so pangipanengneng na galang ed sakey tan sakey”? Antoy labay ton ibaga? Sikatayo lay unonan mangipanengneng na kaabigan ed arum. Singa bilang, sikatayo lay unonan mamerdona, mamarawes, tan mangiter. (Efe. 4:32) No labay mon nakaaro so sakey ya agi, agmo la aalagaren ya iyapit toy liknaan to ed sika. Sika lay unonan manggaway paraan pian onapit so liknaan yo ed sakey tan sakey. No ontan so gawaen mo, napruebaan mon tua imay imbaga nen Jesus ya: “Mas makapaliket so mangiter nen say mangawat.”—Gawa 20:35.

10. Antoy gawaen tayo pian magmaliw tayon makuli ed ‘pangipanengneng na galang ed sakey tan sakey’? (Nengnengen met so litrato.)

¹⁰ Naimano yo met no anto may imbaga nen Pablo kayari ton imbaga ya idaulo tayoy pangipanengneng na galang? Kuan to: “Magmaliw kayon makuli, aliwan mangiras.” Nibagan makuli so sakey ya too no maseet tan impasyan mankimey. No walay ipagawam ed sikato, nailaloan mo ya sumpalen ton sumpalen. Antoy gawaen tayo pian magmaliw tayon makuli ed pangipanengneng na galang ed sakey tan sakey? Oniay ibabaga na Proverbio 3:​27, 28: “Agmo isisiblet so kamaongan ed saramay nepeg mon pangiteran no walay pakayarim ya ontulong.” On, no anengneng tayon mankakkaukolan so sakey ya agi tan wala met so pakayari tayon ontulong, tulongan tayon tampol. Agtayo la ipapanabuas tan agtayo dapat iisipen ya ayos labat anggano agtayo la tulongan ta walan-walay agin ontulong ed sikato.—1 Juan 3:​17, 18.

11. Antoy sakey ed saray sekreto pian lalo tayon onapit ed saray agagi?

¹¹ Say sakey nin paraan pian nipanengneng tayoy galang ed saray agagi et no perdonaen tayo ran tampol no asakitan da tayo. Oniay ibabaga na Efeso 4:26: “Agyo aabuloyan ya onselek so agew a wala ni pasnok yo.” Akin et ontan so bilin na Biblia ed sikatayo? On ta no pinunuyan tayoy pasnok tayo tan agtayo mamerdona, ibabaga na bersikulo 27 ya “iikdan [tayoy] pankanawnawa so Diablo.” Diad Biblia, aminpigan imbaga nen Jehova ya manpeperdonaan tayo. Papasesegen itayo na Colosas 3:13 ya “itultuloy [tayon] mabulos a perdonaen so sakey tan sakey.” Diad tua, atan so sakey ya sekreto pian lalo tayon onapit ed saray agagi. No mabulos tayon mamerdona, walay nitutulong tayo pian ‘mansiansiay pankakasakey tayo tan manbilay tayo ya walay kareenan.’ (Efe. 4:3) On, baleg so nitulong na satan pian mansiansiay deen tan pankakasakey ed organisasyon tayo. Mamerdona tayo sirin!

12. Panon to tayon tutulongan nen Jehova pian mabulos tayon mamerdona?

¹² No maminsan balet, ompan nairapan tayon mamerdona. Pero antoy makatulong pian mabulos tayon mamerdona? Say masanton espiritu nen Jehova. Kayarin imbaga nen Pablo ya “ipalikna yoy masimoon a panamabli ed sakey tan sakey” tan “magmaliw kayon makuli,” imbaga to: “Magmaliw kayon marlang ed espiritu.” Say toon “marlang ed espiritu” et ampetapetang o manleppua so seseg tan ligsa to ya gawaen so duga, ta walad sikatoy masanton espiritu na Dios. (Nengnengen so study note na Roma 12:11 ya “maging masigasig kayo dahil sa banal na espiritu” diad nwtsty-TG.) On, pakiwasen itayo na masanton espiritu na Dios ya aroen tan mabulos ya perdonaen so sakey tan sakey. Lanang tayo sirin ya ipikasi ed si Jehova ya ikdan to tayoy masanton espiritu to.—Luc. 11:13.

“NEPEG YA ANGGAPOY INKAAPAG-APAG ED SIKAYO”

13. Antoy nayarin pansengegan na inkaapag-apag ed kongregasyon?

¹³ Say kongregasyon et bubuoen na “amin a klase na totoo,” kanian nandurumay binalegan tan apasalan tayo. (1 Tim. 2:​3, 4) Lapud satan, nandurumay labay tan agtayo labay—singa diad panangawes tan panag-ayos, panagpili na libangan, tan no anton klase na panagpatambal so awaten tayo. Personal itan ya desisyon na kada sakey. Pero no agtayo manalwar, ompan pansengegan itan na inkaapag-apag. (Roma 14:4; 1 Cor. 1:10) Antoy makatulong pian ag-itan nagawa? Tandaan tayo ya ibabangat itayo na Dios ya aroen so sakey tan sakey. Kaiba ed satan so panrespeto tayo ed desisyon na arum. Agtayo sirin ipipilit ed sikara so opinyon tayo, tan agtayo papapawayen ya mas maong iray desisyon tayo.—Fil. 2:3.

14. Antoy pansagpotan tayon gawaen, tan akin?

¹⁴ Anto ni sakey ya makatulong pian napaliisan so inkaapag-apag ed kongregasyon? Seguroen tayo ya makapaseseg tayo ed saray agagi. (1 Tes. 5:11) Diad imbebeneg ya taon, dakel so inaktibo tan nakal ed kongregasyon ya pinmawil la ed si Jehova. Antoy gawaen tayo no walay ontan ed kongregasyon tayo? Malikeliket tayo ran i-welcome! (2 Cor. 2:8) Imanoen so eksperiensya na sakey ya sister ya samploy taon ya inaktibo. Nen first time to lamet so akiaral ed Kingdom Hall, onia kunoy nanonotan ton agawa: “Kaloob ko, malikeliket tan akaimis iray agagi, tan pinasamanoan da ak ya amin.” (Gawa 3:19) Anggano simpli labat itan ya ginawa na agagi, antoy epekto to ’tan ed samay sister? Kuan to: “Aliknak ya singa sankabembenan nen Jehova so limak, tan labay to ya magmaliw ak lamet ya maliket.” On, no pansagpotan tayoy magmaliw ya makapaseseg ed amin, usaren itayo nen Jesus pian ‘nainawaan iramay nabebelatan.’—Mat. 11:​28, 29.

15. Anto ni sakey ya paraan pian mansiansiay pankakasakey tayo? (Nengnengen met so litrato.)

¹⁵ Say sakey nin paraan pian mansiansiay pankakasakey tayo et no apipigeren tayoy panagsalita tayo. Oniay ibabaga na Job 12:11: “Agta susuboken na layag iray salita a singa panataway na dila ed kakanen?” Di ba, say sakey ya kusinero, tawayan to ni inluto to antis ton iparungo pian naseguro ton mananam itan? Ontan met ed panagsalita. Nonoten tayo nin maong so ibaga tayo antis tayon mansalita. (Sal. 141:3) Akin ey? On ta labay tayon seguroen ya makapaseseg tan makaligliwa so ibaga tayo tan “nagunggonaan iray ondedengel ed satan.”—Efe. 4:29.

16. Siopa ray espisipikon bibilinen na Biblia ya nepeg dan asisikasoen so panagsalita ra?

¹⁶ Espisipikon bibilinen na Biblia iray asawan lalaki tan saray atateng ya nepeg dan asisikasoen so panagsalita ra. (Col. 3:​19, 21; Tito 2:4) Ontan met iray elder. Sikara so aturon pastol ed kongregasyon, kanian kaukolan dan seguroen ya makapaseseg tan makaligliwa iray ibabaga ra pian nainawaan iray karnero nen Jehova. (Isa. 32:​1, 2; Gal. 6:1) Tandaan tayo iyan ibabaga na Biblia: “Say salitan imbalikas ed dugan panaon et alay abig!”—Pro. 15:23.

MANGARO “DIAD GAWA TAN KATUAAN”

17. Antoy gawaen tayo pian naseguro tayon say panangaro tayod saray agagi et nanlapud puso?

¹⁷ Papasesegen to tayo nen apostol Juan ya “mangaro itayo, aliwan diad salita odino diad dila, noagta diad gawa tan katuaan.” (1 Juan 3:18) Komon ta say panangaron ipapanengneng tayo ed saray agagi et nanlapud puso. Panon tayon nawalaan na ontan ya panangaro? Marakep no lanang tayo ran kaiba. No dakel so panaon tayo parad sikara, lalon onelet so aroan tayo tan lalon onapit so liknaan tayo ed sakey tan sakey. Kanian sambot mo iray pankanawnawa ya nakatongtong ira, singa diad aral o diad ministeryo. Iyeskedyul mo met so ipasyar ed sikara. No ontan so gawaen tayo, ipapanengneng tayo ya ‘papaibangat itayo ed si Jehova ya aroen so sakey tan sakey.’ (1 Tes. 4:9) Tan lalo tayon napruebaan ya tua imay ibabaga na Biblia ya: “Agaylay abig tan makapaliket a saray sanaagi et saniiban manaayam a walay pankakasakey!”—Sal. 133:1.