Sikayo ran Kabataan ya Brother, Alig Yoy Marcos tan Timoteo

1-2. Antoy nayarin alikna tan naisip nen Marcos tan Timoteo ya akaamper komon ed panaglingkor da?

SIKAYO ran kabataan ya brother, kasin labay yo nin aruman so nagagawaan yo parad si Jehova tan parad saray agagi ed kongregasyon? Amta mi ya ontan so labalabay yon gawaen. Makapaliket ya nanengneng iray kabataan ya brother ya mabulbulos ya manlilingkor! (Sal. 110:3) No sakey kan kabataan ya brother, ompan labalabay mon palaknaben so ministeryom. Pero ompan wala ray makakaamper. Seguro naisip mo, ‘No ontan so gawaen ko, antoy pansumpalan na bilay ko ey?’ Odino no bilang ta akaawat kay asainmin, ompan naisip mo, ‘Singa agko ni kaya ta ugaw ak ni.’ Diad tua, agmo bukbukor so ontan.

² Alikna met itan nen Marcos tan Timoteo. Pero pinili da nin siansia so manpausar ed si Jehova anggano amta ra ya manguman so bilay da, tan anggano say pakalikna ra et kulang ni eksperiensya da. Isip mo pay situasyon nen Marcos. Nen intagar nen apostol Pablo tan Bernabe ya mila ed panmimisionero da, nayarin wala nid pudir na ina to tan mainaway bilay da. (Gawa 12:​12, 13, 25) Amta nen Marcos ya makaarawi ed si nanay to, pero mabulbulos ya akilad sikara pian napalaknab to ni ministeryo to. Say unonan angitagaran dad sikato et diad Antioquia. Insan akilad sikara diad mas ararawin lugar. (Gawa 13:​1-5) Halos parehoy situasyon nen Timoteo ed si Marcos. Wala met nid pudir na atateng to nen intagar nen Pablo ed panmimisionero to. Kabataan ni labat ed saman si Timoteo, kanian ompan say pakalikna to et aliwan kualipikado. (Ikompara so 1 Corinto 16:​10, 11 tan 1 Timoteo 4:12.) Pero anggano ontan so alikna to, agto tinanggian so imbitasyon nen Pablo, kanian dakdakel so bendisyon ya naawat to.—Gawa 16:​3-5.

3. (a) Akin et nibaga tayo ya naar-aro nen Pablo si Marcos tan Timoteo? (2 Timoteo 4:​6, 9, 11) (Nengnengen met so litrato.) (b) Anto ran tepet so pantongtongan tayo ed sayan artikulo?

³ Diad inlabas na panaon, dakel so naaralan nen Marcos tan Timoteo. Kanian anggano kabataan ni ra, nimatalek lad sikara iray ambelat ya responsabilidad diad kongregasyon. Naar-aro iran dua nen Pablo, kanian nen amta to ya asingger lay ipatey to, binagaan to ra ya pasyaren da pian nanengneng to ni ra. (Basaen so 2 Timoteo 4:​6, 9, 11.) Akin et naar-aro nen Pablo si Marcos tan Timoteo? Panon ya naalig na saray kabataan ya brother natan so alimbawa ra? Tan anto met so naaralan na saray kabataan ya brother ed saray maaron bilin nen Pablo?

ALIG MOY MARCOS—MABULOS KAN MANLINGKOR

4-5. Panon tayon nibaga ya mabulbulos si Marcos ya manserbi ed arum?

⁴ Kaukolan so sakripisyo pian makapanlingkor o makapanserbi tayod arum. Say toon maserbi et mabulos tan ag-onsawan ontulong anggano mairap. Ontan ya ontan si Marcos, maset-serbi ed arum. Panon tayon nibaga? Wala may agawa ya agla labay ya ipila nen Pablo si Marcos diad komaduan impanbiahe to bilang misionero. Seguro adismaya tan asakitan ya maong si Marcos. (Gawa 15:​37, 38) Pero kasin binmeleng tan aman la so rason pian agto la panlingkoran iray agagi? Andi.

⁵ Akila nin siansia si Marcos nen intagar na kapinsan ton si Bernabe diad arum ya teritorya. Tan kalabas na manga 11 ya taon, sakey si Marcos ed saray tinmulong tan amaseseg ed si Pablo nen apriso diad Roma. (Filem. 23, 24) Misatsalamat ya maong si Pablo ed tulong to. Imbaga to ni ingen ya sikatoy ‘aligliwan maong’ nen Marcos.—Col. 4:​10, 11.

6. Antoy epektod si Marcos nen akakkaiba to ray maespiritual ya brother? (Nengnengen so paimanod leksab.)

⁶ Akaaral ya maong si Marcos ed impiulop to ed saray maespiritual ya brother. Seguradon dakel so naaralan tod si Pablo legan ton aasistian diad Roma. Kayari to man, linmay Marcos ed Babilonia pian naibaan to met si apostol Pedro. Nagmaliw iran malet ya sankaaro tan talagan inmapit so liknaan dad sakey tan sakey. Diad tua, tinawag ni ingen nen Pedro si Marcos ya “ana’ko.” (1 Ped. 5:13) Legan iran saniba, seguradon dakel so naistorya nen Pedro ed si Marcos nipaakar ed bilay tan ministeryo nen Jesus. Atan so rason no akin et dakel so makapainteres ya detalye ya insulat nen Marcos ed Ebanghelyo to.a

7. Panon ya inalig nen Seung-Woo so alimbawa nen Marcos? (Nengnengen met so litrato.)

⁷ On, tuloytuloy ya nanlingkor si Marcos tan lanang ya akiulop ed saray maespiritual ya brother. Panon mon naalig si Marcos ey? Kasin labay moy makaawat na kaaruman ya responsabilidad ed kongregasyon pero anggad natan et agka ni aturo ya ministeryal a lingkor odino elder? Singa si Marcos, anosan moy sarilim. Manisip kay paraan no panon mo nin napanlingkoran si Jehova, tan agka onsasawan ontulong ed saray agagi. Ontan so ginawa nen Seung-Woo, ya natan et manlilingkor la bilang elder. Nensaman, lanang to kunon ikokompara so sarili to ed arum ya kabataan ya brother. Mas akauna ran akaawat na responsabilidad ed kongregasyon nen say sikato. Asakitan kuno ta say pakalikna to et singa aga naiimano. Pero maong labat ta imbaga tod saray elder iman ya nalilikna to. Balibali may advice na sakey ya elder. Imbaga tod si Seung-Woo ya gawaen to labat so anggaay nayarian to ya tulongan iray agagi, anggano anggapoy makakaimano. Inunor nen Seung-Woo iman ya advice. Nanggaway paraan pian natulongan to ray maedad tan arum ni ran mankakkaukolan ya agagi diad kongregasyon da. Singa bilang, ilulugan to ra paonlad aral. No pawilen to kuno man ya panaon, oniay nibaga to: “Diman ko atalosan no anton talagay labay ya ibaga na panserbi ed arum. Apatunayan ko ya talagan makapaliket so ontulong.”

ALIG MOY TIMOTEO—AROM TAN IMALASAKIT MO IRAY AGAGI

8. Akin et si Timoteo so apili nen Pablo ya kaiba to ed pambiabiahe to bilang misionero? (Filipos 2:​19-22)

⁸ Nen plano la nen Pablo so ompawil ed saramay syudad ya nampulongan to, kaukolan toy mangitagar na makpel ya brother ta dakel so kinmontra ed impanpulong to diad saratan ya lugar. Say unonan impila to et sakey ya eksperiensyadon agi, si Silas. (Gawa 15:​22, 40) Ag-abayag, intagar met nen Pablo si Timoteo ed pambiabiahe to bilang misionero. Akin et si Timoteo so apili to? Say sakey ya rason et kabkabat ya maomaong ya brother si Timoteo. (Gawa 16:​1, 2) Tan anengneng nen Pablo ya talagan inar-aro tan imamalasakit nen Timoteo iray agagi.—Basaen so Filipos 2:​19-22.

9. Akin et nibaga tayo ya talagan inar-aro nen Timoteo iray agagi?

⁹ Diad gapo ni labat na impaniba nen Pablo tan Timoteo bilang misionero, anengneng ya tampol nen Pablo ya talagan sankanonot nen Timoteo so pankaabigan na arum nen say sarili to. Kanian nen wala ra ed Berea tan kaukolan la nen Pablo so onalis, agnan-alangan ya itilak si Timoteo ta amta to ya sarasarag to lan asikasoen so balon kongregasyon diman. (Gawa 17:​13, 14) Atilak met ed Berea si Silas, kanian seguradon akaaral ya maong si Timoteo ed sikato. Sinmabi balet so panaon ya bukor la nen Timoteo so imbaki nen Pablo ya onlad syudad na Tesalonica pian pabiskegen iray agagi diman. (1 Tes. 3:2) Kalabas na 15 taon, lalon naar-aro nen Timoteo iray agagi. Kanian no maminsan, ‘makaakis’ met no nanenengneng to ran onaakis tan maniirap. (Roma 12:15; 2 Tim. 1:4) Panon ya naalig na saray kabataan ya brother so alimbawa nen Timoteo?

10. Antoy ginawa nen Woo Jae pian mas nipanengneng toy malasakit ed saray agagi?

¹⁰ Imanoen so eksperiensya nen Brother Woo Jae no panon ton naaralan ya ipanengneng so malasakit ed saray agagi. Nen kabataan ni si Woo Jae, nanairapan kuno ya mitongtong ed saray agagi ya mas matatken nen say sikato. Kanian diad Kingdom Hall, ibano to labat ira insan la onalis. Pero walay balibalin advice ed sikato na sakey ya elder. Imbaga tod si Woo Jae ya marakep no sikato lay mangigapo na tongtongan, tan ibalikas tod saray agagi no antoy naapresya tod sikara. Pinaseseg na sayan elder si Woo Jae ya isipen to la no anto ray nayarin labay ya pantongtongan na saray agagi. Inyaplika to iraman ya advice. Natan et elder lay Woo Jae, tan oniay imbaga to: “Matmainomay ko la natay miistoryaan ed saray agagi anggano antoy edad da. Kanian nanaamtaan ko no anto ray dadalanen dan subok. Lapud mas natatalosan koy situasyon da, amtak la no panon ko ran natulongan.”

11. Antoy nagawaan na saray kabataan ya brother pian nipalikna day malasakit ed saray kakongregasyon da? (Nengnengen met so litrato.)

¹¹ Sikayo ran kabataan ya brother, pansagpotan yo met komon ya ipanengneng so malasakit ed saray kakongregasyon yo. Komon ta anggapoy pipilien mon katongtongen antis tan kayari na aral. Miistoryaan ka anggan diad saramay mas matatken odino mas ugaw nen say sika. Kumustam ira tan dengel kan maong ed ibaga ra. Atan so sekreto pian naamtaan mo no panon mo iran natulongan. Singa bilang, ompan naamtaan mo ya agni manaya kabisadon usaren na maedad lan sanasawa ed kongregasyon yo so JW Library^® odino kaukolan da manayay nakaiba diad ministeryo. Lapud antam lay situasyon da, sarag mo ran ibangat ed pangusar na gadyet da odino mitrato ka lad sikara pian nakaulop mo ra ed ministeryo. No sika lay unonan manggaway paraan pian natulongan iray agagi, magmaliw kan maong ya alimbawa ed kongregasyon.

MAKAARAL KA ED SARAY MAARON BILIN NEN PABLO

12. Antoy gawaen na saray kabataan ya brother pian minabang met ira ed saray bilin nen Pablo ed si Timoteo?

¹² Singa la anak so turing nen Pablo ed si Timoteo. Kanian binilibilin to pian maong so pansumpalan to tan niiter toy sankaabigan to ed si Jehova. (1 Tim. 1:18; 2 Tim. 4:5) No sakey kan kabataan ya brother, para met ed sika iraman ya bilin nen Pablo. Kanian anto kasi no basaen mo may duaran sulat nen Pablo ed si Timoteo tan ipasen mo ya singa sulat to met man ed sika? Legan mo itan ya babasaen, nengneng mo no panon mon niyaplika iray bilin to diad mismon bilay mo. Pantongtongan tayo pay pigaran bilin ya nabasa ditan.

13. Antoy makatulong pian makapanmatoor tayod si Jehova?

¹³ “Ipasal moy sarilim, a say gagalam et nipatnag moy debosyon ed Dios.” (1 Tim. 4:7b) Antoy labay ya ibaga na “debosyon ed Dios”? Say toon walay debosyon to ed Dios et matoor ed si Jehova tan labalabay ton napaliket so Dios. Pero amay onian klase na katooran tan debosyon et agnisipor ed sikatayo. Kaukolan tayo itan ya pankimeyan. Panon tayo itan ya gawaen? Makala tayoy ideya ed samay imbaga nen Pablo ed si Timoteo. Kuan to: “Ipasal moy sarilim.” Say Griegon salita ya inusar dia nen Pablo et ontutukoy ed impasyan panti-training na saray atleta antis iran onsabak ed contest. Labay day manalo kanian kaukolan day disiplina ed sarili. Anto sirin so punto nen Pablo? Kaukolan tayo met so disiplina ed sarili pian napasalan tayon gawaen iray bengatla ya makatulong ed sikatayon manmatoor ed si Jehova.

14. Anto dapat so gagala tayo no manbabasa tayo na Biblia? Mangiter na alimbawa.

¹⁴ Say sakey ed saray kaukolan tayon napasalan ya gawaen et say inagew-agew ya pambasay Biblia. Tandaan ya kada no manbabasa tayoy Biblia, say gagala tayo et pian lalo tayon onapit ed si Jehova. Singa bilang, kunwari et babasaen mo may salaysay ed Marcos 10:​17-22. Atan may nen katongtong nen Jesus imay mayaman ya manuley. Manisia iyan kabataan ya laki ya si Jesus so Mesias. Pero mapatnag ya kulang so pananisia to ta agto inawat imay imbitasyon nen Jesus ya magmaliw ya patumbok to. Anggano kulang balet so pananisia to, nanengneng ed bersikulo 21 ya inaro nin siansia nen Jesus. Maomaong so impitongtong nen Jesus ed sikato. Mapatpatnag ya labalabay ton tulongan imay laki pian makapandesisyon na duga tan pian maong so pansumpalan to. Isip mo pa: No onman so alikna nen Jesus ed samay laki, di onman met so alikna nen Jehova. (Juan 14:9) Legan mon dadalepdepen iyan salaysay, tepetan moy sarilim: ‘No inar-aro ak nen Jehova, anto met so gawaen ko ey pian lalo ak ya onapit ed sikato tan mas niiter koy sankaabigan ko ed kongregasyon?’

15. No sakey kan kabataan ya brother, akin et importante ya pansagpotan moy magmaliw ya maong ya ehemplo ed arum? Mangiter na alimbawa. (1 Timoteo 4:​12, 13)

¹⁵ “Magmaliw kan ehemplo ed saray matoor.” (Basaen so 1 Timoteo 4:​12, 13.) Pinaseseg nen Pablo si Timoteo ya paaligwasen toy abilidad ton manbasa tan manbangat, pero binilin to met ya magmaliw ya maong ya ehemplo diad pangipanengneng toy maong iran kualidad—singa say panangaro, pananisia, tan kalinisan. Akin et ontay bilin nen Pablo? On ta mas naiimano na arum so gagawaen na sakey ya too nen say ibabaga to. Singa bilang, panon to no niyasain kan manpaliwawa tan say topic mo et nipaakar ed pagmaliw ya maseseg ed ministeryo? No antam ed sarilim ya iiter moy sankaabigan mo ed ministeryo, agka nababaingan ya ipaliwawa itan ya tema, tan seguradon dengelen ka met na agagi ta amta ra ya gagawaen mon mismo iray ibabagam.—1 Tim. 3:13.

16. (a) Anto may limaran binitla nen Pablo ya kaukolan ya pankimeyan na saray kabataan ya Kristiano pian magmaliw iran maong ya ehemplo? (b) Antoy gawaen na sakey ya kabataan ya brother pian magmaliw ya ehemplo ‘diad panagsalita’?

¹⁶ No pawilen tayo may 1 Timoteo 4:​12, walay limaran binitla nen Pablo ya nepeg a pankimeyan na sakey a kabataan ya brother pian magmaliw ya maong ya ehemplo. Marakep no sansakeyen mon i-personal study iratan, tan isip mo no panon mo iratan ya nagawaan. Singa bilang, antoy gawaen mo pian magmaliw kan ehemplo ‘diad panagsalita’? Manisip kay paraan no panon mon napaseseg so arum. No wala ka nid pudir na ateng mo, anto kasi no pisalamatan mo ra ed amin ya gagawaen da parad sika? Kayari na aral, anto kasi no asinggeran mo iray agagi ya angipresenta na parte da, tan ibagam ed sikara no antoy agustoan mo ed presentasyon o paliwawa ra? Marakep met no mankomento kad aral diad sarilin salitam. No pansagpotan mon gawaen iratan, magmaliw kan ehemplo ed panagsalita. Tan pakapatnagan itan ya onaaligwas ka ed espiritual.—1 Tim. 4:15.

17. Antoy gawaen na saray kabataan ya brother pian naabot da ray espiritual ya goal da? (2 Timoteo 2:22)

¹⁷ “Arawian mo ray inuugaw a pilalek, balet seetan mon ipatnag so inkatunong.” (Basaen so 2 Timoteo 2:22.) Pinaseseg nen Pablo si Timoteo ya arawian to ray bengatlan makaamper ed panaglingkor to ed si Jehova tan nayarin mamakapuy ed espiritualidad to. Sika ey? Ompan wala ray gagawaen mo ya agmet mauges pero nanaupot lay panaon mo ya para komon ed saray espiritual ya goal mo. Singa bilang, isip mo pay karakel na panaon ya uusaren mod sports, pan-Internet, odino panggalaw na video game. Tua ya kaukolan mo met so manrelaks. Pero, anto kasi no bawasan moy oras ya uusaren mo ed saratan pian mas dakel so panaon mo parad si Jehova tan ed arum? Singa bilang, maabig no manboluntaryo kad panaglinis tan panagmintina na Kingdom Hall yo, tan suportaan moy cart witnessing na kongregasyon yo. No mas dakel so panaon mo parad espiritual iran bengatla, makalmo kay kakaaro ya mamaseseg ed sika ya abeten iray espiritual ya goal mo.

DAKEL SO NAAWAT MON BENDISYON NO MABULOS KAN MANLINGKOR

18. Akin et nibaga tayo ya na-enjoy nen Marcos tan Timoteo so bilay da?

¹⁸ Wala ray insakripisyo nen Marcos tan Timoteo pian niiter day sankaabigan da ed si Jehova tan napanserbian da iray agagi. Kasin singa ra asibletan lapud satan ya desisyon da? Andi. Na-enjoy da ingen so bilay da! (Gawa 20:35) Si Marcos, nanduruman bansa so nakar to pian pasesegen iray agagi. Pribilehyo to met ya isulat iray agawgawad bilay tan ministeryo nen Jesus diad dalin. Si Timoteo met ey? Balbaleg so nitulong tod si Pablo pian makabuo na kongregasyon ed nanduruman lugar, tan dakel ya agagi so atulongan tan apaseseg to. On, anengneng nen Jehova so amin ya sakripisyo nen Marcos tan Timoteo parad sikato, tan benendisyonan to ra. Seguradon pap-proud ed sikara!

19. Akin et nepeg ya ipapuso na saray kabataan ya brother iramay bilin nen Pablo ed si Timoteo, tan antoy resulta no ontan so gawaen da?

¹⁹ No basaen tan aralen mo imay duaran sulat nen Pablo ed si Timoteo, nanengneng mo ya talagan inar-aro toy Timoteo. Pero diad tua, si Jehova so amakiwas ed si Pablo ya isulat iray bilin ya wadtan. Kanian no sakey kan kabataan ya brother, tandaan mo ya patunay iyan duaran sulat ya sankanonot ka nen Jehova tan inar-aro to ka. Labay to ya maong so pansumpalan mo. Kanian komon ta ipapusom iray maaron bilin nen Pablo, tan gawam so anggaay nayarian mo ya panserbian so arum. No ontan so gawaen mo, na-enjoy moy bilay mo natan, tan “nabembenan [mon] malet so tuan bilay” diad arapen.—1 Tim. 6:​18, 19.