Panisiaan Mo ya Pinerdona Ka La nen Jehova

1-2. No amta tayon pinerdona to tayo la nen Jehova, antoy seguradon nalikna tayo? (Nengnengen met so litrato.)

INAMIN nen Arin David ya dakel so agawaan ton kasalanan, tan akonsiensian maong! (Sal. 40:12; 51:3; superskripsion) Pero nagbabawi si David kanian pinerdona nen Jehova. (2 Sam. 12:13) Malikeliket si David tan akainawan maong nen alikna to ya pinerdona la nen Jehova.—Sal. 32:1.

² Singa si David, makainawa tayo met no nalikna tayon kinasian tan pinerdona to tayo la nen Jehova. Maong labat ta say Dios tayo et mabulos ya mamerdona. Anggano ambelbelat ni tay kasalanan ya agawaan tayo, perdonaen to tayo basta magbabawi tayo, ipatua tayoy kasalanan tayo, tan gawaen tayoy anggaay nayarian tayo pian agtayo la itan naulit. (Pro. 28:13; Gawa 26:20; 1 Juan 1:9) Tan ipapaseguro nen Jehova ya no pinerdona to tayo la, talagan pinerdona to tayo la, ya singa anggapoy agawa.—Eze. 33:16.

3-4. Anto nin siansiay nalilikna na sakey ya sister anggano abautismoan la, tan antoy pantongtongan tayo ed sayan artikulo?

³ Pero no maminsan, ompan mairap tayon panisiaan ya pinerdona to tayo la nen Jehova. Imanoen so eksperiensya nen Jennifer. Binmaleg ed katuaan si Jennifer. Pero nen tinedyer la, nagmaliw ya doble so panagbilay to tan wala ray ginawa to ya aglabay nen Jehova. Kalabas balet na pigaran taon, pinmawil lanlamang ed si Jehova ya anggad nampabautismo. Oniay imbaga to: “Antis ak ya pinmawil, imoral so kabibilay ko, mainum ak, mipepetang so ulok, tan puros kuarta so sankanonot ko. Nagbabawian ko la iratan ya amin tan kinmerew ak met la na perdona ed si Jehova. Kanian diad isip ko, amtak ya pinerdona to ak la lapud dondon bagat nen Kristo. Pero say problema, agko nakombinse so pusok ya aperdona ak la.”

⁴ Sika ey? Kasin no maminsan et mairap mo met ya panisiaan ya pinerdona to ka la nen Jehova? Aglabay nen Jehova ya ontan so naliknam. Say labay ton naliknam et amay onman ed alikna nen David, amay kokkombinsido ka ya talagan pinerdona to ka la. Pantongtongan tayo ed sayan artikulo no akin ya importantin panisiaan tayo ya pinerdona to tayo la nen Jehova, tan no anto ray nepeg tayon gawaen pian agtayo pandudaan so panamerdona to.

AKIN YA IMPORTANTIN PANISIAAN TAYO YA PINERDONA TO TAYO LA NEN JEHOVA?

5. Antoy labay nen Satanas ya panisiaan tayo? Mangiter na alimbawa.

⁵ No manisia tayo ya pinerdona to tayo la nen Jehova, ag-itayo napatitan nen Satanas. Tandaan ya gawaen nen Satanas so amin pian napatunda to tayon manlingkor ed si Jehova. Say sakey ya gagawaen to et papanisiaen to tayo ya ag-itayo lan balot naperdona nen Jehova. Imanoen pa may agawa ed kongregasyon na Corinto nensaman. Walay lakin nakal ed kongregasyon ta akagawa na imoral. (1 Cor. 5:​1, 5, 13) Pero nen nagbabawi la iyan laki, agnaperdona na saray agagi. Labay nen Satanas ya ipalikna rad sikato ya agda labay ya awaten ed kongregasyon. No ontan, ompan isipen na samay laki ya sikatoy aglan balot naperdona nen Jehova. No ‘nadaeg na alablabas ya ermen,’ ompan ontunda la ed panaglingkor to. Ontan so labay nen Satanas ya nagawa. Tan anggad natan, uusaren to nin siansia itan ya patit. Maong labat ta “amta tayo iray pakana to.”—2 Cor. 2:​5-11.

6. Antoy gawaen tayo pian agtayo la nakonsiensia?

⁶ No manisia tayo ya pinerdona to tayo la nen Jehova, makainawa tayo la tan agtayo la nakonsiensia. No akagawa tayoy kasalanan, natural labat ya nakonsiensia tayo. (Sal. 51:17) Diad tua, maong so epekto to ’tan ta napakiwas tayon manguman tan ipetek so lingo tayo. (2 Cor. 7:​10, 11) Pero say makapuy et no nakokonsiensia tayo ni anggano abaybayag tayo lan nagbabawian imay kasalanan tayo. Akin et makapuy itan? On ta no nakokonsiensia tayo ni, matmainomay tayon nadismaya kanian ompan isipen tayoy ontunda la ed panaglingkor. Diad kabaliktaran balet, no awaten tayoy panamerdona nen Jehova, malinis lay konsiensia tayo kanian maliket tayo lan makapanlingkor ed sikato. Atan so labay nen Jehova ya nalikna tayo. (Col. 1:​10, 11; 2 Tim. 1:3) Anto sirin so makatulong pian nakombinse tayoy puso tayo ya pinerdona to tayo la nen Jehova?

ANTOY MAKATULONG PIAN PANISIAAN TAYO YA PINERDONA TO TAYO LA NEN JEHOVA?

7-8. Panon ya indeskribe nen Jehova so sarili to nen katongtong toy Moises, tan antoy epekto to ’tan ed sikatayo? (Exodo 34:​6, 7)

⁷ Isip mo no panon ya indeskribe nen Jehova so sarili to. Singa bilang, imanoen pa may imbaga nen Jehova ed si Moises diad Palandey Sinai.a (Basaen so Exodo 34:​6, 7.) Diad karakel na mararakep ya kualidad tan ugali nen Jehova, say sankaunaan ya imbaga tod si Moises et sikatoy “Dios a mapangasi tan maabagey.” Labay ton ibaga, aliwan anawet so puso to. No ontan ya klase na Dios si Jehova, kasin isiblet toy panamerdona to ed sakey ya lingkor to ya talagan magbabawi? Andi! Seguradon perdonaen to!

⁸ Agnayarian nen Jehova so mantila. Kanian no imbaga to ya sikatoy Dios ya mapangasi, talagan tua ya mapangasi. (Sal. 31:5) Kanian no anggad natan et agmo ni naperdona so sarilim lapud saray agawaan mon kasalanan nensaman, isip mo iya: ‘Kasin manisia ak ya talagan mapangasi tan maabagey si Jehova tan agton balot isiblet so panamerdona to ed anggan siopan makasalanan ya talagan magbabawi? No panisiaan ko ’tan, di panisiaan ko met sirin ya talagan pinerdona to ak la.’

9. Antoy naaralan tayo ed Salmo 32:5 nipaakar ed panamerdona nen Jehova?

⁹ Dalepdep mo iray impaisulat nen Jehova diad Biblia nipaakar ed panamerdona to. Singa bilang, imanoen so insulat nen David ya nabasad Salmo 32:5. (Basaen.) Oniay imbaga nen David ed si Jehova: “Pinerdonam iray kasalanan ko.” Diad Hebreon lenguahe, say labay ya ibaga na salitan “pinerdona” et “awiten,” “alsaen,” odino “sakbaten.” Nen pinerdona nen Jehova si David, singa to inalsa iray kasalanan nen David, kanian akainawa. (Sal. 32:​2-4) Ontan met so nalikna tayo no awaten tayo so panamerdona nen Jehova. No impapuso so panagbabawi tayo, makapantiwala tayo ya perdonaen o alsaen nen Jehova so kasalanan tayo, kanian makainawa tayo.

10-11. Antoy labay ya ibaga na samay nabasad Salmo 86:5 ya ‘akaparaan ya mamerdona’ si Jehova?

¹⁰ Basaen so Salmo 86:5. Imbaga nen David ya si Jehova et ‘akaparaan ya mamerdona.’ No panamerdona so pantongtongan, oniay inkomento na sakey ya reperensya nipaakar ed si Jehova: “Natural ed [sikato] so mamerdona.” Akin kasi et natural itan ed si Jehova? Say rason et wadman lanlamang ed Salmo 86:5. Say kuan to ditan: “Abalbaleg so matoor a panangarom ed amin ya ontatawag ed sika.” Singa naaralan tayo ed imbeneg ya artikulo, matoor so panangaro nen Jehova. Kanian agbalot manguman tan ag-onkupas so panangaro tod saray lingkor to. On, agan balot onikban ed sikara. Kanian anggano mankasalanan ira, ‘mabulos to ran perdonaen’ no magbabawi ira. (Isa. 55:​7, paimanod leksab) Kanian no mairap mon panisiaan ya pinerdona ka la nen Jehova, isip mo iya: ‘Kasin manisia ak ya akaparaan ya mamerdona si Jehova ed amin ya magbabawin nankasalanan ya mikakasi ed sikato tan onkekerew na perdona? No panisiaan ko ’tan, di panisiaan ko met sirin ya pinerdona to ak la nen akikasi ak ed sikato tan kinmerew ak na perdona.’

¹¹ Ibabaga met na Biblia ya kabkabat to tayo nen Jehova tan natatalosan toy situasyon tayo. Amta to ya sikatayo ran totoo et makasalanan. (Sal. 139:​1, 2) Atan so punto nen David nen insulat to may walad Salmo 103. Pantongtongan tayo sirin so pigaran bersikulo ed satan ya salmo ta makatulong met itan pian onlemew so liknaan tayo tan panisiaan tayo ya talagan akaparaan ya mamerdona si Jehova.

NONOT MO IMAY SANKANONOT NEN JEHOVA

12-13. Base ed Salmo 103:​14, antoy sankanonot nen Jehova, tan antoy gawaen to lapud sankanonot to itan?

¹² Basaen so Salmo 103:14. Nabasad dia so sakey nin rason no akin ya mabulos ya peperdonaen nen Jehova iray magbabawin lingkor to. Imbaga nen David ya ‘sankanonot nen Jehova ya dabok itayo.’ Diad arum ya salita, sankanonot to ya makasalanan tayo. Pantongtongan tayo pa ni iya pian natalosan tayon maong.

¹³ Imbaga nen David ya “amta [nen Jehova] so inkagawa tayo.” Ginawa nen Jehova si Adan “manlapud dabok.” (Gen. 2:7) Kanian amta to ya wala ray limitasyon nen Adan. Singa bilang, kaukolan toy mangan, onugip, tan oningas pian tuloytuloy ya manbilay. On, anggan say perpekton too et wala ray limitasyon to. Pero nen nankasalanan si Adan tan Eva, wala lay sananey ya labay ton ibaga may pagiging “dabok” na totoo. Nibagan “dabok” itayo ta atawir tayoy ag-inkaperpekto, tan matmainomay tayo lay manggawa na aliwa. On, dabok tayo ta makasalanan tayo. Amta itan nen Jehova. Pero unong ed samay imbaga nen David, aglabat itan amta nen Jehova, “sankanonot” to itan. Diad Hebreon lenguahe, no uusaren so salitan “sankanonot,” ontutukoy met itan ed panggaway aksion. Kanian nen imbaga nen David ya ‘sankanonot nen Jehova ya dabok itayo,’ oniay labay ton ibaga: Natatalosan nen Jehova ya makasalanan tayo kanian iilaloan to la ya makagawa tayon makagawa na lingo. Pero no magbabawi tayo, kasian tan perdonaen to tayo.—Sal. 78:​38, 39.

14. (a) Anto ni imbaga nen David nipaakar ed panamerdona nen Jehova? (Salmo 103:12) (b) Antoy naaralan tayod samay impamerdona nen Jehova ed si David? (Nengnengen met so kahon ya “No Mameperdona si Jehova, Lilingwanan To Met La Iray Kasalanan Tayo.”)

¹⁴ Anto ni naaralan tayo ed Salmo 103 nipaakar ed panamerdona nen Jehova? (Basaen so Salmo 103:12.) Imbaga nen David ya no peperdonaen to tayo nen Jehova, iyaarawi to iray kasalanan tayo. Panon kaarawi? Kuan nen David, singa “kaarawi na bubutayan na agew [bukig] manlapud seselekan to [sagur].” Say bubutayan na agew et arawrawin maong ed seselekan to. Antoy naaralan tayod satan? Oniay imbaga na sakey ya reperensya: “No arawrawi la imay kasalanan, ni ultimon angob tan bakat to ’tan et anggapo la. Talagan nalingwanan la!” Nasasalim may no walay nasingob mo et walay nanononotan mon agawad apalabas? Si Jehova ey, no mameperdona, wala ni kasi anggan daiset ya nasingob to ya mangipanonot ed sikato na samay kasalanan tayo? Anggapo la! Kanian agto tayo la singilen o dusaen lapud satan.—Eze. 18:​21, 22; Gawa 3:19.

15. Antoy gawaen tayo no nakokonsiensia tayo ni ed saray agawaan tayon kasalanan nensaman?

¹⁵ Panon ya makatulong imay imbaga nen David ed Salmo 103 pian panisiaan mo ya talagan pinerdona ka la nen Jehova? No nakokonsiensia ka ni ed saray agawaan mon kasalanan nensaman, nonot mo no anto may sankanonot nen Jehova, tan lingwanan mo met la iramay nilingwanan to la. Tandaan mo ya sankanonot ton makasalanan tayo ran totoo tan perdonaen ton perdonaen so sakey ya magbabawin nankasalanan. Tandaan mo met ya no mamerdona si Jehova, lingwanan to la imay kasalanan tan agto met la dusaen imay nankasalanan. On, makaseguro ka ya nilingwanan la nen Jehova imay kasalanan mo. Kanian lingwanan mo met la sirin. (Sal. 130:3) No awaten moy panamerdona nen Jehova, naperdonam met lay sarilim kanian agka la nakonsiensia tan nituloy moy maliket ya panlilingkor mod sikato.

16. Akin et delikado no sankanonot tayo nin siansia iray kasalanan tayo ya pinerdona la nen Jehova? Mangiter na ilustrasyon. (Nengnengen met so litrato.)

¹⁶ Imanoen iyan ilustrasyon. No sankanonot mo nin lanang iray kasalanan ya agawaan mo nensaman anta pinerdona la itan nen Jehova, singa ka manmamaneho na luganan pero nengneng ka lan nengneng ed rearview mirror. Duga met labat ya sagpaminsan kan onnengneng ed satan pian nanengneng mo iray walad benegan mo. Pero no ditan lan lanang so kawalaay matam, delikado! Mas ligtas so panmanehom no akapokus kad dalan. Mipadpara, duga met ya sagpaminsan et isipen tayo iray agawaan tayon lingo nensaman pian pakaaralan tayo tan agtayo la iratan naulit. Pero no atan lan lanang so sankanonot tayo, ompan matmainomay ya nabalang so liket tan seseg tayo ed panaglingkor. Kanian mas maabig no manpokus tayod dalan—say dalan ya paarap ed bilay tan ompugtad balon mundo, ya ditan et “agla nanonotan iray apalabas a bengatla.”—Isa. 65:17; Pro. 4:25.

ITULTULOY MON KOMBINSIEN SO PUSOM

17. Akin et kaukolan tayon tuloytuloy ya kombinsien so puso tayo ya inar-aro to tayo nen Jehova tan pinerdona to tayo la?

¹⁷ Kaukolan ya tuloytuloy tayon kombinsien so puso tayo ya inar-aro to tayo nen Jehova tan pinerdona to tayo la. (1 Juan 3:​19, paimanod leksab) Akin ey? On ta agto tayo tundaan nen Satanas. Gawaen toy anggaay nayarian to pian nakombinse to tayo ya agtayo karapat-dapat ya aroen o perdonaen. Labay to ya ontunda tayo lan manlingkor ed si Jehova. Diad tua, mamapasyan maong si Satanas ta amta ton antiktikey lay panaon to. (Apo. 12:12) Agtayo ompapayag ya nabiktima to tayo!

18. Antoy gawaen mo pian nakombinsim so pusom ya inar-aro ka nen Jehova tan pinerdona to ka la?

¹⁸ Pian napabiskeg moy pananisiam ya inar-aro ka nen Jehova, gawam iramay suhestion ya abitlad imbeneg ya artikulo. Pian nakombinsim so pusom ya pinerdona ka la nen Jehova, isip mo no panon ton indeskribe so sarili to. Dalepdep mo iray impaisulat tod Biblia nipaakar ed panamerdona to. Tandaan mo ya sankanonot nen Jehova ya agka perpekto, kanian kasian to kan kasian. Tandaan mo met ya no mameperdona si Jehova, talagan lingwanan to la imay kasalanan. No gawaen mo iratan ya amin, seguradon agmo pandudaan ya pinerdona ka la nen Jehova. Kanian naliknam met may alikna nen David, tan seguradon ibagam ya, “Salamat Aman Jehova ta ‘pinerdonam iray kasalanan ko’!”—Sal. 32:5.