MANTULTULOY A MANBANTAY!
Walad Krisis Iray Refugee—Minilyon so Tinmaynan ed Ukraine
Ginapoan ya atakien na militar na Russia so Ukraine nen Pebrero 24, 2022 kanian dakdakel ya totoo so niiyan ed peligro tan apilitan iran ontaynan a tampol pian makaarawi rad kawalaan na panlalaban.a
“Wala ray bomba tan wala ray narerengel min onsasabog. Makapataktakot, mair-irap ya ipaliwawa. Nen naamtaan min wala ray tren ya naluganan na saray malabay ya man-evacuate, nandesisyon kami lan onalis. Kaukolan min itilak ya amin ta sakey ya melag ya backpack labat so nayarin awiten na kada too. Say nawit mi labat et saray dokumento, tambal, danum, tan pantempey na eras. Intilak min amin tan linma kamid istasyon na tren legan ya onsasabog iray bomba diad kaliberliber.”—Nataliia, tagad Kharkiv, Ukraine.
“Agmi panisiaan ya walan talagay nagawan guerra. Anggad nen kien, arengel kon wala la ray onsasabog ed arum ya parte na syudad, tan manmayegmeg iray bintana. Nandesisyon ak lan onalis, say inawit ko labat et saray talagan importante. Inmalis ak ed abung na alas 8:00 ed kabuasan tan linmugan ak ed tren paonlad Lviv insan ak nan-bus paonlad Poland.”—Nadija, tagad Kharkiv, Ukraine.
Diad sayan artikulo
Anto ran talagay lapuan na sayan krisis ya dadalanen na saray refugee?
Ginmapo so krisis ya dadalanen na saray refugee ed Ukraine lapud inyataki na militar na Russia. Balet, ipapaamta na Biblia ya wala ni ray mas aralem ya rason no akin ya walad krisis iray refugee:
Agniiter na saray gobierno na too diad interon mundo iray pankaukolan na totoo. Kaslakan ya saramay walad posisyon et uusaren day autoridad da pian kontrolen tan pairapen iray totoo.—Eclesiastes 4:1; 8:9.
Iimpluensyaan nen Satanas a Diablo, say “manuley na mundo,” iray totoo pian manggaway mauges kanian ibabaga na Biblia: “Say interon mundo et walad pakayari na samay mauges.”—Juan 14:30; 1 Juan 5:19.
Likud ed saray problema ya mamapairap ed saray totoo diad nilasus lan taon, manbibilay tayo la natan ed samay panaon ya impasakbay na Biblia: “Diad kaunoran iran agew et onsabi iray mapeligro tan mair-irap a panaon.” (2 Timoteo 3:1) Tan ibabaga met na Biblia ya diad saratan ya agew et wala ray nagawan guerra, kalamidad, eras, tan salot—ya lapud saratan et napilitan iray totoo ya taynan iray kaabungan da.—Lucas 21:10, 11.
Iner so pakalmoan na saray refugee na ilalo?
Ipapaamta na Biblia ya say Amalsa ed sikatayo, si Jehova,b et Dios ya maaro tan mapangasi ed saray refugee tan saray totoon apilitan ya ontaynan ed kaabungan da. (Deuteronomio 10:18) Impromisa to ya solusyonan to iray problema na saray refugee panamegley na gobierno tod tawen, ya tatawagen ya Panarian na Dios, tan saya so onsalat ed saray gobierno na too. (Daniel 2:44; Mateo 6:10) Usaren nen Jehova so Panarian to pian deralen si Satanas ya Diablo. (Roma 16:20) Satan ya Panarian so magmaliw ya saksakey ya gobierno diad interon mundo, tan ekalen na satan so inkaapag-apag lapud saray ketegan na bansa. Mankakasakey la bilang pamilya so amin ya totoo diad interon mundo. Anggapo lan balot so napilitan ya ontaynan ed abung to ta oniay promisa na Biblia: “Onyurong so balang sakey diad silong na ubas to tan diad silong na kiew ton igos, tan anggapoy manaktakot ed sikara, ta sinalita iyan mismo nen Jehova na saray armada.”—Miqueas 4:4.
Say Panarian na Dios labat so makapangiter na permanentin solusyon ed saray krisis ya dadalanen na saray refugee natan. Usaren na Dios so Panarian to pian ekalen iray problema ya sengegan no akin ya wala ray refugee. Nia ray pigaran alimbawa:
Guerra. “Papatundaen [nen Jehova iray] guerra diad interon dalin.” (Salmo 46:9) Pian naamtaan no panon ya patundaen nen Jehova iray panlalaban, basaen so artikulon “Kapayapaan sa Lupa—Paano?”
Panagpairap tan karuksaan. “Iliktar [ira nen Jehova] ed panagpairap tan karuksaan.” (Salmo 72:14) Pian naamtaan no panon ya nauman na totoo iray nilamot lan aliwliwan ugali ra, basaen so serye na saray artikulo ya say title to et “Naekal so Pambubusolan!”
Irap na bilay. “Iliktar [nen Jehova] so mairap-bilay ya onkekerew na tulong.” (Salmo 72:12) Pian naamtaan no panon ya solusyonan na Dios iray pansesengegan na irap na bilay, basaen so artikulon “Posible Ba ang Isang Patas na Sistema ng Ekonomiya?”
Eras. “Dakdakel so anien ya ilik diad dalin.” (Salmo 72:16) Pian naamtaan no panon ya seguroen na Dios ya anggapo lay naerasan, basaen so artikulon “A World Without Hunger?”
Natulongan kasi na Biblia iray refugee natan?
On. Likud ed iiter na Biblia ya napantiwalaan ya ilalo ed arapen, makatulong met so Biblia ed saray probleman dadalanen da natan.
Prinsipyo na Biblia: “Say toon anggapoy amta to et manisia ed kada salita, balet samay makabat et dadalepdepen toy kada gawaen to.”—Proverbio 14:15.
Say labay ya ibaga: Nonot mo la ray peligro ya nayarin nagawa tan no anto ray gawaen mo pian naprotektaan moy sarilim. Manalwar ed saray mauges ya totoo ya sasamboten dan lokoen iray onsasabin refugee ta amta ran natatakot iraya tan lapud balobalo ni ra labat ed kawalaan dan lugar et agda ni kabisado so bilay ditan.
Prinsipyo na Biblia: “No walay naakan tan kawes tayo, mankontento tayo la ed saratan.”—1 Timoteo 6:8.
Say labay ya ibaga: Agka manpopokus ed saray materyal ya bengatla. No kontento ka la ed saray manunan pankaukolan mo, mas maliket ka.
Prinsipyo na Biblia: “Amin a labay yon gawaen na totoo ed sikayo, ontan met so nepeg yon gawaen ed sikara.”—Mateo 7:12.
Say labay ya ibaga: Mananos tan ipanengneng so kamaongan. Ontulong iratan ya kualidad pian respetoen tan awaten ka na totoo ed lugar ya kawalaan mo.
Prinsipyo na Biblia: “Agyo babalesen na mauges so siopaman a nanggaway mauges ed sikayo.”—Roma 12:17.
Say labay ya ibaga: Agka ombabawi lapud pasnok mo no bilang ta aliway impantratod sika na arum. Ta no andi, mas onloor laingen so problema.
Prinsipyo na Biblia: “Walay biskeg kon arapen so amin a bengatla lapud samay mangiiter ed siak na pakayari.”—Filipos 4:13.
Say labay ya ibaga: Gawam ya sankaimportantian ed bilay mo so Dios tan manpikasi kad sikato. Sarag to kan pabiskegen pian nasarag moy situasyon mo.
Prinsipyo na Biblia: “Agkayo mapagpaga ed antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say kareenan na Dios a palumbasan toy amin a pakatalos so manbantay ed saray puso tan nonot yo diad panamegley nen Kristo Jesus.”—Filipos 4:6, 7.
Say labay ya ibaga: Ipikasim ed Dios ya komon ta nawalaan kay mareen ya nonot tan kalmadon puso, antokaman so situasyon ya arapen mo. Nengnengen so artikulon “Filipos 4:6, 7—‘Huwag Kayong Mabalisa Tungkol sa Anumang Bagay.’”
a Sakey agew kayarin inmataki iray militar na Russia, imbaga na United Nations High Commissioner for Refugees (UNHCR) ya aya la so sankatageyan ya level na emergency. Diad loob labat na 12 agew, masulok ya duaran milyon ya refugee so tinmaynan ed Ukraine paonlad arum iran bansa, tan wala ni sakey milyon ya totoon tinmaynan ed kaabungan da tan linmad arum ya lugar ed Ukraine.
b Jehova so ngaran na Dios. (Salmo 83:18) Nengnengen so artikulon “Siopa si Jehova?”