2023: Taon ya Makapaaburido​—Antoy Ibabaga na Biblia?

Legan na 2023, dakdakel so agawad interon mundo ya ebidensyan manbibilay tayo la ed ibabaga na Biblia ya “kaunoran iran agew.” (2 Timoteo 3:1) Imano yo ray impasakbay na Biblia ya nagagawa ed panaon tayo.

Say ibabaga na Biblia tan saray nagagawa ed mundo natan

“Saray guerra tan balita nipaakar ed saray guerra.”​—Mateo 24:6.

• “Ondadakel iray maruksan panlalaban ed nanduruman pasen na mundo.”a

“Yegyeg ed nanduruman pasen.”​—Marcos 13:8.

• “Manlapud kagapo na 2023, walay agawan 13 ya yegyeg diad interon mundo ya mas maksil ni ed magnitude 7. Sayan taon so sakey ed saray sankarakelan ya walay agawan yegyeg manlapu la nen inggapon irekord iray yegyeg.”b

“Makapataktakot a nanengneng.”​—Lucas 21:11.

• “Aliwa labat lan ampetapetang so planetan dalin, noagta manlelwag lay interon mundo.”​—António Guterres, UN secretary-general.c

“Eras.”​—Mateo 24:7.

• “2023: Makapaaburido lamet iyan taon parad saramay naiirapan ya mangitarya na naakan ed saray pamilya da.”d

“Mapeligro tan mair-irap a panaon.”​—2 Timoteo 3:1.

• “Diad interon mundo, sakey ed kada waloran totoo so walay problema ed isip.”e

Antoy iilaloan tayon nagawa ed 2024?

Anggapoy makapangibaga no antoy nagawa ed 2024. Balet ipapanengneng na saray nagagawa ed mundo natan ya asingsingger lan salatan na Panarian na Dios, odino say gobierno To ed tawen, so gobierno na too. Solusyonan na Panarian na Dios so amin ya paniirap tan problema tayo.​—Daniel 2:44; Apocalipsis 21:4.

Legan tayon aalagaren itan, ompan manaburido tayo. Balet sarag tayoy onkerew na tulong ed Dios. Oniay ibabaga na Biblia:

“Sano natatakot ak, manmatalek ak ed sika.”​—Salmo 56:3.

Panon tayon nipanengneng ya mantitiwala tayo ed Dios? Maabig no aral mo ni ray arum nin promisa na Biblia tungkol ed nagawad arapen ya anggapo lay paniirap. Salim so libren interactive ya panag-aral na Biblia pian nanengneng mo no antoy nitulong na saray promisa na Biblia diad sika tan ed pamilyam.