TEPET NA SARAY KABATAAN
Talaga Kasin Sex so Oral Sex?
Inreport na U.S. Centers for Disease Control and Prevention ya kapaldua na amin ya ininterbyu ya mantaon na 15 anggad 19 et asali da la so oral sex. “No tepetan mo ray kabataan [tungkol ed oral sex] ibaga dad sika ya normal labat ’tan ya gagawaen,” so kuan nen Sharlene Azam, say author na libro ya Oral Sex Is the New Goodnight Kiss. “Diad tua, agda itan ituturing ya sex.”
Antoy nibagam?
Ebatan iraya na on odino andi.
Nayari kasin nalukonan so sakey lapud oral sex?
On
Andi
Delikado kasi so oral sex?
On
Andi
Talaga kasin sex so oral sex?
On
Andi
Antoy tua?
Ikomparam so ebat mo ed saraya.
Nayari kasin nalukonan so sakey lapud oral sex?
Ebat: Andi. Atan so sakey a rason no akin ya say amta na dakel et aliwan mauges so oral sex.
Delikado kasi so oral sex?
Ebat: On. Lapud oral sex, nayarin makala na sakit so sakey, singa say hepatitis (A odino B), genital warts, gonorrhea, herpes, HIV, tan syphilis.
Talaga kasin sex so oral sex?
Ebat: On. Anggan anton kagagawa ya nalalanor so pribadon parte na laman na sakey, kaibay pi-sex, oral sex, anal sex, tan pan-masturbate ed arum et sex.
Akin et importantin naamtaan?
Nengnengen ta so pigaran teksto ed Biblia ya walay koneksion tod topic ya oral sex.
Ibabaga na Biblia: “Linawa na Dios a . . . paliisan yoy seksual ya imoralidad.”—1 Tesalonica 4:3.
Say orihinal ya lenguahe ya in-translate ya “seksual ya imoralidad,” et ontutukoy ed amin ya klase na seksual ya pirerelasyon na aliwan sanasawa, kaibad satan so pi-sex, oral sex, anal sex, tan pan-masturbate ed arum. Anien na too ya mibibiang ed seksual ya imoralidad so mauges ya resulta, tan say sankagrabian et naderal so relasyon to ed Dios.—1 Pedro 3:12.
Ibabaga na Biblia: “Samay manggagawa na seksual ya imoralidad et mankakasalanan ed dilin laman to.”—1 Corinto 6:18.
Walay makapuy ya epekto na oral sex ed laman tan espiritualidad. Wala met so epekto na satan ed emosyon. Imbaga na libron Talking Sex With Your Kids: “Aliwan saray misi-sex labat so makakalikna ya inusar, magbabawi, odino pakaskasi ra . . . Pareho labat ya aliwliway nalikna na saramay mibibiang ed agmanepeg ya pisi-sex tan saramay manggagawa na arum nin klase na sex ya agmet manepeg. Say sex et sex.”
Ibabaga na Biblia: “Siak si Jehova a Dios mo, say mangibabangat ed sika pian nagunggonaan ka.”—Isaias 48:17.
Manisia ka ya nagunggonaan ka no unoren mo ray ganggan na Dios tungkol ed sex? Odino iisipen mo ya masyadon istrikto iratan? Pian naebatan mo iratan, imadyin mo pay sakey ya highway ya wala ray akapaskil ya speed limit, traffic signal, tan stop sign. Parad sika, restriksion kasi iramay sign tan signal, odino proteksion? Antoy nagawa no ibaliwalam iratan tan na arum ya driver?
Lapud batas trapiko, nalimitaan so panda-drive mo, pero naprotektaan ka. Ontan met, lapud ganggan na Dios, wala ray agmo sarag ya gawaen, pero nisalba so bilay mo
Ontan met iray estandarte na Dios. No ibaliwalam iratan, seguradon anien mo so resulta. (Galacia 6:7) “No ibaliwalam iray papanisiaan mo tan prinsipyom, tan manggawa ka na antam ya aliwan duga, nabawasan so respetom ed sarilim,” so imbaga na libron Sex Smart. Pero no unoren mo ray estandarte na Dios, nipanengneng mo ya atagey so estandartim ed moral. Aliwan satan labat, mansiansian malinis so konsiensiam.—1 Pedro 3:16.