Say Makapabilib ya Katitikyab na Apangat

No asalim lay amatey na apangat, antam ya mair-irap itan ya gawaen. Singa kapeles na kirmat so reaksion da kanian matmainomay da kan takasan.

Adiskobre na saray scientist so sakey ya klase na apangat a tatawagen ya fruit fly (Drosophila) ya sarag ton umanen so direksion to legan ya ontitikyab ya singa gagawaen na saray jet plane ya uusaren ed guerra. Pero sarag ton gawaen itan diad pigara labat ya millisecond. Anggano kapangiyanak ni ra labat, “eksperto la ran ontikyab,” so kuan nen Professor Michael Dickinson. “Singa ka angiyan na kapangiyanak ya ugaw ed jet plane insan anta to lan patikyaben itan.”

In-video na saray researcher so katitikyab na sayan apangat tan adiskobre da ya sarag ton ikulipaspas so payak to na 200 beses kada segundo. Pero anggano maminsan labat ya kulipaspas et sarag to lan umanen so posisyon na laman to pian makatakas.

Say kapeles na reaksion da balet ey? Adiskobre na saray researcher ya say reaksion na sarayan apangat no walay peligro et mas maples na 50 beses nen say ikirem na mata na too. “Sarag na sayan apangat ya kuentaen ya maples no iner ya direksion so tikyaban to pian naarawian toy peligro,” so kuan nen Dickinson.

Labay ya naamtaan na saray researcher no panon iyan nagagawaan na sayan apangat anta melmelanting so utek to.

Antoy nibagam? Kasin say makapabilib ya katitikyab na fruit fly et lapud ebolusyon? Odino walay nandesinyo?