Talaga Kasin Nambilay si Juan Bautista?
Nabasa ed Ebanghelyo so nipaakar ed lakin manngaran na Juan Bautista. Impulong na sayan laki so Panarian na Dios diad Judea. Duga kasi salaysay na Biblia nipaakar ed sayan laki? Imanoen tayo irayan detalye:
Oniay ibabaga na Biblia: “Sinmabi si Juan Bautista tan nampulong diad kalawakan na Judea, ya ibabaga to: ‘Magbabawi kayo, ta asingger lay Panarian na tawen.’” (Mateo 3:1, 2) Susuportaan kasi na saray sekular ya reperensya itan ya imbaga na Biblia? On.
Tinukoy nen Flavius Josephus, sakey ya historian nen inmunan siglo, so sakey ya lakin manngaray “Juan ya manapelyidoy Bautista,” “binilin na sayan laki iray Judio ya kaukolan day manbilay ya matunong,” “magmaliw iran makadios,” tan “manpabautismo ira.”—Jewish Antiquities, Book XVIII.
Nabasad Biblia ya diniretsa nen Juan si Herodes Antipas, say manuuley ed distrito na Galilea tan Perea. Ipapasen nen Herodes so sarili to ya sakey ya Judio ya manguunor ed ganggan nen Moises. Pero imbaga nen Juan ya aliway ginawa nen Herodes ta inasawa toy Herodias ya asawa na agi tod ama. (Marcos 6:18) Tan prupruebaan na sekular ya reperensya itan ya imbaga na Biblia.
Imbaga nen Josephus ya “akursunadaan nen Antipas si Herodias” tan “anggapoy baing ton imbaga ya labay ton asawaen.” Pinmayag met si Herodias ya manpakasal ed si Antipas kanian tinaynan toy asawa to.
Imbaga na Biblia ya “linmad [si Juan] iray totoo ed Jerusalem tan ed interon Judea tan ed amin a pasen ed kaliberliber na Jordan, tan binautismoan to ra diad Ilog Jordan.”—Mateo 3:5, 6.
Sinuportaan nen Josephus itan ya detalye ta insulat to ya linma iray “totoo” ed si Juan pian nanengneng da tan “apakiwas iran maong ed saray imbabangat tod sikara.”
Malinew sirin ya kombinsido iyan historian nen inmunan siglo ya talagan nambilay si Juan Bautista, tan kombinsido tayo met.