Apenepenek Ak ed Bilay Ko Bilang Missionary

Asumpal so guerra nen 1945, balet mair-irap so bilay kayari to man. German kami kanian pinaekal da kamid Czechoslovakia tan imbaki da kamid Germany, ya diman et aderal-deral iray syudad tan mair-irap so panagbilay na dakel ya totoo. No maminsan, sanlabin ompila iray auntiek pian labat makaala na daiset ya naakan. Wala ray panaon ya onla kamid katakelan pian mangala na blackberry tan oong, insan mi isalat ed tinapay. Datdaiset so rasyon ya naakan kanian mabetbet ya nababalang iray alagan ayayep ta tatakewen iratan na totoo pian walay naakan da. Maslak, onuugip kami ya narasan.

First-time Min Arengel so Katuaan Manlapud Biblia

Katoliko si lakik tan baik, balet anggapoy Biblia mi. Labay komon nen lakik so mangaliw na Biblia, balet aglabay ya lakoan na samay pari ed lugar mi ta ibabaga to ya dapat saray membro na simbaan et ondengel labat ed misa. Kanian dakdakel so agnaebatan ya tepet nen lakik nipaakar ed Dios.

Pitoray taon ko nen walay duaran Tasi nen Jehova ya linmad abung mi. Inusar day Biblia pian ebatan iray tepet nen lakik nipaakar ed Trinidad, impierno, tan kipapasen na saray inatey. Alinewan tan apenek si lakik ed saray ebat na Biblia. Kombinsido ya nalmo to lay katuaan. Kayari to man, amin mi et inyaralan na Biblia na sanasawan Tasi.

Nampili Ak na Aboten Kon Goal

Anggano nen ugaw ak ni, inarok lay Jehova. Labalabay kon basaen iray artikulon nipaakar ed saray missionary ya nanlingkor ed si Jehova diad ararawin pasen. Kuan ko, ‘Antoy klase na panagbilay da ey? Panon to kasi manpulong ed totoon agda nin balot nadngel so ngaran nen Jehova?’

Nen 12 lay taon ko, nandesisyon ak ya labay koy magmaliw ya missionary, tan ginapoan ko lan pankimeyan itan ya goal. Insan nen Disyembre 12, 1954, nampabautismo ak, tan asabi panaon et nagmaliw ak ya payunir. Asingger ko lan naabot so goal ko.

Amtak ya dapat makasalita ak na English pian makapan-aral ak ed Gilead School parad saray missionary, kanian nansagpotan kon aralen itan ya lenguahe. Diad saman et naisip kon panpraktisan iray Amerikanon sundalo ya walad Germany. Sakey ya agew, inasinggeran koy sakey ya sundalo tan imbagak ed sikato, “Kristo ak.” Ninengneng to ak tan mabait ya inmebat, “Seguro say labay mon ibaga ‘Kristiano ak.’” Say amtak marundunong ak lan man-English, andi ni manaya!

Nen masulok lan 20 so taon ko, inmalis ak ed England, nantrabaho ak diman bilang managkomis na ugaw kada kabuasan diad sakey ya Tasin pamilya. Kada ngarem balet manpupulong ak ed kaabungan, kanian balibalin pankanawnawa man pian napraktis koy man-English. Kayari sakey taon ed England, inmaligwas ya maong so panagsalitak na English.

Pinmawil ak ed Germany tan nen Oktubre 1966, naimbitaan ak ya manlingkor bilang special pioneer diad Mechernich. Balet agmangawat iray totoo ed saman ya teritorya. Ag-ira manpatuloy ed abung da anggano agaylay betel diad paway. Mabetbet kon ipipikasi ed si Aman Jehova, “No onsabi panaon ya makapanlingkor ak bilang missionary, komon ibaki yo ak ed ampetang ya lugar.”

Nabot Koy Goal Ko

Pigay bulan ak ni labat ya manlilingkor bilang special pioneer, inter la nen Jehova so pirawat na pusok! Naimbitaan ak ya manaral ed koma-44 ya klase na Gilead School parad saray missionary, tan nan-graduate ak nen Setyembre 10, 1967. Iner so asainmin ko ey? Diad balibalin ampetang ya bansan Nicaragua, diad Central America! Walay taloran kakaibak tan kasabi mi et maar-aro kamin inawat na saray missionary ya wadman la. Singa ak si apostol Pablo ya “akisalamat ed Dios tan apabiskeg” nen inmabet ed sikato iray agagi.—Gawa 28:15.

Niyasain ak ed mareen ya baley na León, tan determinado ak ya naaralan kon tampol so mansalitay Spanish. Nairapan ak ya aralen so lenguahe, anggano 11 ya oras kada agew ak manaaral diad loob na duaran bulan!

Nanonotan ko may aminsan ya walay apulongan kon iikdan to ak na fresco, atan so tawag na saray Nicaraguan ed iinumen ya gawad prutas. Say amtak ya inyebat ko ed sikato et “filtered water” labat so sarag kon inumen. Balet mankelaw may bii. Kayari pigaran agew, naamtaan ko ya lapud pikewet ni panag-Spanish ko, say nibagak manaya ed sikato et “holy water” labat so sarag kon inumen! Maong labat ta sinmabi panaon et inmaligwas lanlamang so panag-Spanish ko.

Kaslakan et interon pamilya so iyaaralan ko na Biblia. Maligen so liknaan ko diad León, kanian labalabay koy mangiyaral na Biblia diad labi, no maminsan anggad alas-10 ni ingen. Amtak so ngaran na amin lawarin taga diman. No pasempet ak la, ibanok tan pitongtongan ko iray makaaron kakaabay ya manpaparagem ed labi tan akayurong ed saray buabo da diad paway na abung da.

Diad León, pigara so atulongan kon naamtaan da so katuaan. Say sakey ed sikara et si Nubia, ya waloray anak ton lalaki ya angkelag ni. Inyaralan ko na Biblia ya anggad niyasain ak ed Managua nen 1976. Manlapud saman et anggapo lay kontak ko ed si Nubia tan ed ananak to diad loob na 18 ya taon, ya anggad nen pinmawil ak ed León pian onatendi ed sakey ya kombension. Legan na intermision, inasinggeran ak na pigaran lalaki—ananak ira manaya nen Nubia! Malikeliket ak ta apabaleg nen Nubia iray ananak to ed katuaan.

Say Bilay na Missionary Legan na Magulon Panaon

Diad sampot na 1970’s, wala ray agawan baleg ya pananguman diad Nicaragua tan nagmaliw ya magulogulo so kipapasen. Balet ginawa mi anggaay nayarian mi pian ag-ontunda so panagpulong a kimey. Diad teritorya ya niyasain ed siak—manlapud Masaya ya anggad south na Managua—lanang ya walay nababanaan min manproprotesta tan manggugulo. Sakey ya labi, legan na aral, kaukolan mi onkebkeb ed flooring na Kingdom Hall ta biglan nampapaltogan iray membro na Sandinista tan saray sundalo na gobierno.a

Diad sinmublay ya agew, legan ak ya manpupulong, walay sakey a membro na Sandinista ya walay sakob na lupa to tan papaltogen toy sakey ya sundalo. Sasalien koy ontakas, balet nitan la ray dakel nin lalaki ya walay sakob na lupa ra. Batik ak, balet anggapo lay naamotan ko. Insan nampauran na bala iray helicopter na gobierno. Balet biglan walay laki ya nilukasan toy puerta na abung to tan ginuyor to ak ed loob. Aliknak ya inliktar ak nen Jehova!

In-deport Da Kami!

Nanlingkor ak ed Masaya anggad Marso 20, 1982, tan agkon balot nalingwanan iman ya agew. Diad saman ya kabuasan, mangalmusal kami la komon kaibak iray limaran missionary. Balet walay anengneng min sakey ya grupo na armadon Sandinista ya linmoob ed sular na missionary home. Bigbigla labat iran linmoob ed papangakanan mi. Tan oniay masibeg ya ingganggan na sakey ed sikara: “Wala labat lay sakey oras yon man-impake, sakey labat ya bag kada too, tan mila kayo ed sikami.”

Inawit da kami diad sakey ya farm tan agda kami pinaalis diman na pigaran oras. Kayari to, apatira ed sikami so inlugan da ed melag ya bus paonlad border na Costa Rica, insan da kami pinaalis ed bansa. Diad saman, ami-amin et 21 ya missionary so in-deport da.

Pinatuloy kami na saray agagi diad Costa Rica, tan diad sinmublay ya agew et linma kami ed branch office diad San José. Balet agkami la diman nambayag. Kayari na samploran agew, walora ed sikami so nambiahe paonlad balon missionary assignment mi diad Honduras.

Say Impanlingkor Kod Honduras

Diad Honduras, niyasain ak ed Tegucigalpa. Legan na 33 ya taon na impanlingkor ko diman, nagmaliw ya walora so saksakey ya kongregasyon. Makapaermen balet ta diad inlabas na saray taon, tinmagey so krimen ed Tegucigalpa. Dakdakel so matakew, tan aminpiga ak ya a-hold up. Wala ra met iray membro na gang ya aalaan da ak na kuarta tan say tawag dad saman et “war tax.” Balet say ibabagak, “Mas importante ni nen say kuarta so iter kod sikayo,” insan ko la ra ikdan na tract odino magasin. Tan paulyan da ak met lan onalis!

Maslak ya totoo ed Tegucigalpa et mareen tan maomaong, tan wala rad sikaray atulongan ko ya manaral na Biblia. Singa bilang, natandaan ko si Betty, sakey ed saray iyaaralan ko na Biblia ya onaaligwas la ya anggad aminsan et imbaga to ya labay toy mila ed sakey ya evangelical church. Balet aliketan ak ta kayari na duay taon, tinaynan itan nen Betty tan nampaiyaral lamet na Biblia ed siak. Akin et pinmawil? Nailiw nen Betty so tuan aroan ya alikna to ed kongregasyon. (Juan 13:34, 35) Imbaga tod siak: “Duma kayo ta maliket yon aawaten so amin ya onaatendi ed saray pantitipon yo, mayaman man o mairap.” Sinmabi panaon, abautismoan si Betty.

Nen 2014, nansara so missionary home diad Tegucigalpa, kayari to et niyasain ak ed Panama. Natan et manaayam ak la ed sakey ya missionary home ya kaiba so apatira nin abayag met lan manlilingkor bilang missionary.

Malikeliket Ak ta Nabot Ko Iray Goal Ko

Natan et 55 taon ak lan manlilingkor bilang missionary. Balet natan, medyo kinmapuy so laman ko kanian aliwa lan singa dati so sarag kon gawaen. Balet tinulongan ak nen Jehova pian mansiansian aktibo ed pangibangat ed arum nipaakar ed sikato.

Nayari kasin duma la komon so angusaran koy bilay ko? On, sarag to. Balet no onman, seguradon apalampas ko iray dakdakel ya bendisyon ed siak! Masulok ya 50 so ananak ko ed espiritual ya atulongan kon naamtaan so katuaan, tan dakdakel met so nagmaliw ya kakaarok. Tan likud ed sayan “baleg ya pamilya,” wadtan met si Auntiek Steffi ya manaayam ed Germany ya maar-aro tan masuporta ed siak.

Anggano agak akiasawa, agko aliknan bukbukor ko. Agak balot pinaulyan nen Jehova. Dakdakel met so maomaong ya kakaarok, sakey la si Marguerite Foster, say partner ko ed panag-missionary diad loob na 17 ya taon. Dakdakel so balibalin eksperiensya mi, tan nansiansia kamin maapit ya sankaaro anggad natan.—Proverbio 18:24.

Say talagan panliliketan ko et amtak ya inusar koy bilay ko diad sankaabigan ya paraan—inter koy sankaabigan ko ed panaglingkor ko ed si Jehova. Nabot ko may pangarap ko nen ugaw ak ni, tan dakdakel iray makapaliket ya naeksperiensyak ed bilay ko! Tua so liket ya naliliknak tan labalabay kon panlingkoran si Jehova diad andi-anggaan.