Agak Balot Nisian na Prisoan ed si Jehova

Pinmawil so pamilya mi ed Ukraine nen 1966. Sakey ed saray agko nalingwanan ed inkaugaw ko et nen binisita mi lakik ed prisoan nen apat taon ko. Arawrawi so biniahe mi nen nanay ko, linmugan kamid tren manlapud Kryvyi Rih, Ukraine, ya anggad penal colony ed Mordovia ya walad central Russia. Duay oras mi labat ya nayarin nakaulop si lakik tan wala ray guardian mamapbantay ed sikami. Pero anggaman ontan, pinayagan day lakik ya akwalen to ak.

Tuloytuloy Ak ya Nantiwala ed si Jehova Diad Eskuelaan

Legan ya ontutuboy kalakal ko, aminpigapigan asubok so tiwalak ed si Jehova. Diad Ukraine, no pitoy taon la na sakey ya ugaw, onggapo lan onloob ed eskuelaan tan kaukolan ton isulong so uniform ya walay akapeket ya badge ya hugis star tan wadman so lupa na ugaw nin si Linen.a Kayari duay taon, kaukolan ya mansulong iray estudyante na ambalangan abel ed beklew da pian ipanengneng ya susuportaan da iray ideya nen Linen. Agak balot nansulong na ontan iran simbolo na politika ta amtak ya si Jehova labat so makanepegan na dayew tan galang tayo.

Tinulongan ak na atateng ko pian siak ya mismo so mandesisyon no kasin manlingkor ak ed si Jehova. Maan-anos dan impaliwawa ed siak iray importantin isyu ya singa say pansiansian neutral ed politika. Lanang da met ya ibabagad siak ya dapat manaral ak ya maong ed eskuelaan pian napagalangan koy Jehova.

Aminsan, walay linma ed eskuelaan mi ya reporter na magasin ya Nauka i religiia (Science tan Relihyon). Sakey itan ya magasin ya ibubunog ed interon bansa pian kombinsien iray totoo ya ag-ira dapat mantitiwala ed Dios odino relihyon. Pinayurong ak na saray madam ko diad arap legan ya manle-lecture imay reporter.

Kayari na lecture, inawit da ak ed beneg na stage pian ipakatongtong ed samay reporter. Tinepetan to ak no antoy relihyon ko, tan inmebat ak ya tampol, “Tasi nen Jehova ak.” Anggapo lay arum ya imbaga to noagta akisalamatan to ak ta madengedengel ak kuno legan ya mansasalita. Dismayadon maong iray madam ko!

Tuloytuloy Kamin Nantiwala ed si Jehova Bilang Pamilya

Nantiwala ed si Jehova so interon pamilya mi ya tulongan to kamin manimprinta na saray literatura ya nibase ed Biblia diad abung mi, insan mi iratan ibunog. Ontan met, nanlingkor si tatay ko bilang manangasikaso na sirkito ed central Ukraine kanian binisita to ray kongregasyon tan saray grupo.

Sakey ya ngarem nen Pebrero 1978​—manga duay agew labat antis ya niyanak so bolirek ya agik ya si Pavlik, kasempet ko manlapud eskuelaan, ataktakatak iray gamit ed abung mi. Wala ray pulis ya nan-imbestigad abung mi tan inaala day amin ya literatura mi.

Kaimbuasan to, makapalek ta grabe kalilinggis na saray mamaestro tan mamaestra ed sikami nen agik ya si Mykhailo ta say amta ra et ananak kami na saray espiya na Amerika. Pero atalosan lanlamang na dakel ed saray mamadam ko ya aliwan tua man. Wala ni ingen iray kaklasek ya nagmaliw ya Tasi!

Nen 1981, inimbestigaan lamet na saray pulis so abung mi. Tan anggano anggapo ni 18 ko, impatawag da ak ya kaibay tatay ko tan si lakik diad opisina na prosecutor. Sasalien ak ya taktakoten na samay sankatatkenan ya imbestigador. Ibabaga to ya napriso ak kuno, pero wala dimay sakey ya laki ya aga aka-uniform ya ibabaga ton no ompayag ak ed ibabaga ra, walay balibalin manatalaran ed siak. Makapalek ta singa amay sakey et tataktakoten to ak ya “leweten” to ak, amay sakey balet et singa to ak iikdan na “candy” pian nakuyong to ak. Labay ak ya kombinsien na saray pulis kanian impanonot dad siak iramay panaon ya aprisoy tatay ko, si lakik, tan saray uncle ko. Agda labat amta ya mas lalo da ak ya nakokombinse ya nasarag kon anosan so napriso ta tulongan ak nen Jehova.—Filipos 4:13.

Tuloytuloy Ak ya Nantiwala ed si Jehova Diad Prisoan

Sakey agew kayari na impan-18 ko, akaawat ak na sulat pian manlingkor ed militar. Pero lapud agko labay so mansundalo, impriso da ak legan kon aalagaren so panlitis da ed siak. Kanian inkulong da ak ed sakey ya baleg ya selda ya manga 85 ya lalaki so kaibak. Mansusublayan kamin onugip ed 34 ya dukolan, tan maminsan ed sakey simba kami labat nayarin manames.

Kaloob kod selda, alaltog so puerta tan linmingaw iran amin ed siak. Tinetepetan ak ya tampol na saramay lalakin walad bandad gilig no antoy kasok. Mannerbiyos ak! Pero anonotan ko may salaysay na Biblia nipaakar ed si Daniel, agbalot asakitan legan ya walad abot na saray leon. Akatulong iman ya salaysay pian mantiwala ak ya maong ed si Jehova tan mansiansia ak ya kalmado.—Isaias 30:15; Daniel 6:21, 22.

Kayari pandem, walay sakey ya priso ya biglan dakdakel so tepet to nipaakar ed pananisiak. Insan kalkalnan dinmeen so interon selda ta ondedengel met la ray arum ya priso ed pantotongtong mi. Impaliwawak ed sikara iray papanisiaan ko tan asabi mi manga apatira odino limaran oras. Misatsalamat ak ya maong ed si Jehova ta tinulongan to ak!

Antis ak ya nalitis, impikasik ed si Aman Jehova ya ikdan to ak na karunongan tan pakpel pian nidepensak iray papanisiaan ko. Labay ya pruebaan na prosecutor ya ibabaraan ko labat so pananisiak ed Dios pian natakasan koy panserbi ed militar. Sinalik ya kombinsien so korte ya no mansundalo ak, napaermen koy sankamakapanyarian ya Persona ed interon uniberso. Pero siansia ni ya nen 1982 senentensiaan ak na korte na duay taon ya pakapriso diad sakey ya penal colony.

Misatsalamat ak ta walay limaran Tasi ya akaibak ed saman ya penal colony. No maminsan, makakapantongtong kami na manga pigaran minuto. Maganggano labat itan pero lanang min sasamboten ya pantongtongan so sakey ya bersikulo na Biblia. Anggapoy anggan sakey ed sikami so walaan na Biblia, pero kaslakan et walan-walay teksto ya bibitlaen na saray kapamilya tan kakaaro mi no susulatan da kami​—tan no maminsan ingen, wala met iray nanenengneng min teksto diad saray sekular ya babasaen!

Tuloytuloy Ak ya Nantiwala ed si Jehova nen Adisgrasya Ak

Nen 1983, legan ak ya mankikimey diad prisoan, aksidente ya naplag na sakey ya crane so nantatapewan ya metal sheet ya say kabelat to et ngalngali 2,000 kilos. Kinmena itan ed benegan ko kanian niparukol ak, tan apitpit so kawigin bikking ko.

Impikasik ed si Jehova ya pabiskegen to ak pian nasarag koy graben sakit. Kuan to may nurse na prisoan ya mas maong no oneyag ak tan manayew ak pian nainawaan ak, pero say ginawak angansion ak na saray Kingdom song.

Pian makasabi kamid ospital, inlugan da ak ed truck, insan diad motorboat, insan dia lamet ed ambulansya. Inmabot ed anem oras so biahe kanian dakdakel so naandin dala ed siak. Segurado ak la ya operaan da ak, kanian nampikasi ak ya ikdan komon nen Jehova na karunongan iray doktor tan komon ta respetoen day base ed Biblia ya desisyon kon agmanpasaksak na dala. Nen ipapaliwawak iray papanisiaan ko ed samay doktor, agto ak labay ya dengelen, kanian akikasi ak ed sikato ya komon ta respetoen toy desisyon ko. Imbagak ed sikato ya awaten koy antokaman ya nagawa no agto ak saksakan na dala legan na operasyon. Maong labat ta pinmayag ya siansia ya operaan to ak ya agmangusar na dala. Nainawaan ak ya maong! Pero kaukolan ya putoten so kawigin salik.

Kayari na operasyon ko, kinmapuy ak ya maong. Pigaran simba ya say amta na saray doktor et ompatey ak la. Aminsan, wala tay sakey ya ngarem ya imbagad siak na nurse ya ikdan da ak kuno na mas masustansian naakan nen saramay kakanen ko ed prisoan pian onkasil ak ya tampol. Ikarga da itan ed sakey ya refrigerator ya asingger ed siak. Inagew-agew ya sarag koy mangan na sakey kutsaran honey, sakey ya iknol, tan sakey kutsaran butter. Nen naamtaan na saray atateng ko ya naaksidente ak, nanggawa ray paraan pian nipawit ed siak irayan naakan. Pero aminsan labat itan ya inawat na sergeant ya aka-assign ya mangawat na saray pawit.

Aliwan antiktikey so lima nen Jehova. (Isaias 59:1) Kayarin linisan na saray nurse so sugat ko, iikdan da ak na balon dan naakan. Insan da nengnengen no naupot la ra may naakan ko ed refrigerator ta kargaan da lamet. Anonotan ko laingen may salaysay na Biblia nipaakar ed samay balo ya agnauupotan na larak so kargaan to.—1 Arari 17:14-16.

Kalkalna ak ya inmabig. Aligliwa ak ya maong tan apaseseg ak ed 107 ya sulat ya naawat ko manlapud pamilyak tan kakaarok, tan inebatan kon amin iratan. Pinawitan ak ni ingen na regalo na saray agagi ya walad arum ya prisoan!

Kayari na duay bulan, akaames ak ya siansia! Tan labalabay ko lay ompawil ed prisoan pian nakaibak lamet iray agagi diman.

Legan ya ipaparaan na sakey ed saray doktor iray papeles pian makapaway ak lad ospital, impatawag to ak ed opisina to tan dakdakel so tinepet to nipaakar ed pananisiak. Kayari min nantongtong, imbaga tod siak ya komon ta nawalaan ak na biskeg pian makapansiansia ak ya matoor ed saray papanisiaan ko. Makapabigla man ya narengel ed sakey ya aka-uniform na parad militar!

Nen Abril 1984 linma ak ed sakey ya hearing pian nadesisyonan no kasin ibulos da ak la. Tinepetan da ak no kasin labay ko lay mansundalo. Pero inmebat ak ya natan ta saksakey lay salik tan akasaklay ak la, singa agla matukoy so tepet da. Insan tinepetan da ak lamet, “E, no bilang ta duara ni salim antoy gawaen mo ey?” Say kuan ko agak nin siansia mansundalo tan determinado ak ya mansiansian matoor ed Dios ko. Kanian inmebat ira ya seguroen da kunon nasumpal ko so datin sentensia ed siak. Pero diad tua, imbulos da ak lad prisoan duay bulan tan 12 agew antis na petsa na talagan kibulos ko.

Tuloytuloy Ak ya Nantiwala ed si Jehova nen Akapaway Ak lad Prisoan

Sakey taon kapaway kod prisoan, ginmapo ak lan mansulong na artipisyal ya sali. Aboten koy sakey oras pian naisulong ko itan kada kabuasan. No panaoy winter, mas mairap ya isulong itan ta agmakalikna so akeran bikking ko. Ag-ompepetang ta naiirapan ya ondaloy so dala. Say sampot ya imbatik ko et nen 19 ko ni labat kanian iimadyinen ko la ya ombabatik ak diad balon mundo.—Isaias 35:6.

Nairapan ak ya mananap na trabaho ta maslak ya amo et agda labay so mangalay disabled ya empleyado. Pero anggano artipisyal labat so salik, agak balot awalaan na trabaho ya akayurong ak labat. Wala may panaon ya nantrabaho ak bilang mekaniko tan nanduruman klase na luluganan so aapigeren ko. Insan nen kien nantrabaho ak met ed construction.

Nen 1986 nankasal kami nen Svitlana, sakey ya magangganan sister. Singa siak, Tasi met iray atateng tan laki tan bai nen Svitlana. Lanang ton ibabagad siak ya maong labat ta manlapu la nen saninaro kami ni labat, nantongtongan mi la ya si Jehova so lanang min iyuna ed relasyon min sanasawa.

Kada no aapigeren ko may daan ya abung ya nanayaman mi, tutulongan ak na ananak min si Olia tan Volodia kanian akaaral ira. Nen baleg la ra, labalabay day ontulong ed saray Kingdom Hall construction project tan nan-regular pioneer met ira. Natan et sakey lan construction servant si Olia, si Volodia balet et sakey ya elder.

Lanang ak ya susuportaan nen Svitlana kanian nagagawaan ko ray responsabilidad ko ed kongregasyon. Legan na 1990’s dakel ed saray kongregasyon ed Ukraine so walaan na masulok ya 200 ya manangipalapag pero sakey odino duara labat so elder da. Tan maminsan ed kada bulan, walay Sabado tan Simba ya mangaawit ak na saray literatura ed saray kongregasyon diad central Ukraine.

Tuloytuloy Ak ya Mantitiwala ed si Jehova ya Anggad Natan

Nen 2022 nandesisyon kami nen Svitlana ya taynan lay abung mi ed Kryvyi Rih. Natan et wala kami la ed sakey ya kongregasyon diad Austria.

Manlapu la nen ugaw ak, akaaral ak la ed alimbawa na saray Tasin kakanayon ko ya kokkontento ira anggano wala ray mair-irap ya dinalan da. Diad Biblia, mas nakakabat tayon maong so amalsa ed sikatayo tan makakatulong itan pian nawalaan tayoy maapit ya relasyon ed sikato. (Santiago 4:8) Satan ya relasyon so mangiiter na kabaliksan ed bilay tayo. Misatsalamat ak ta diad amin ya mairap ya dinalan kod bilay ko, niiter kod si Jehova so dayew tan galang ya kanepegan to.