Saray Proyekton Panagpaalagey ya Onsusuporta ed Panagpulong

Labalabay na Mananguley ya Ulop ya usaren iray donasyon pian mangipaalagey tan manmintina na saray pasilidad tayo. Makakatulong itan pian tuloytuloy tayon nipulong so mensahe na Panarian. Singa bilang, nen 2023 service year, masulok ya 500 milyon ya dolyar so ginastos na legal ya korporasyon ya uusaren na branch office na Saray Tasi nen Jehova pian mangaliw, mangipaalagey, man-renovate, tan manmintina na saray Kingdom Hall tan Assembly Hall diad interon mundo.a Agni kaibad saya so nagagastos na saray kongregasyon pian manmintina na saray Kingdom Hall da.

Uusaren met iray donasyon pian mangipaalagey tan manmintina na saray pasilidad na branch. Importante ’tan pian naorganisa tan nasuportaan so kimey ya panagpulong. Pinasimpli met iray kimey ed branch pian nausar so arum nin donasyon diad pangipaalagey tan pangapiger na saray Kingdom Hall tan Assembly Hall. Balet baleg nin kuarta so kaukolan diad pan-ayos, pan-renovate, tan pangiyalis na saray pasilidad na branch. Akin et kaukolan irayan gawaen? Panon ya makakatulong iray branch office ed kimey ya panagpulong? Amtaen tayo.

‘Makatulong Pian Mas Ombayag’

Dakel ya branch office so masulok lan 30 odino 40 ya taon! Oniay imbaga nen Nicholas, ya kaibad Worldwide Design/Construction Department: “Anggan panon so panmintina ed saray bilding, ondaan lanlamang tan naderal ya siansia. Pero makatulong so pan-renovate pian mas ombayag iratan tan tuloytuloy ya nausar.”

Kaukolan met ya umanen iray pasilidad ed Bethel pian nasuportaan iray pankaukolan ed organisasyon tayo. Manlapu nen nipaalagey iray branch office, biglan dinmakel so bilang na saray publisher ed interon mundo! Pian nasuportaan ira, kaukolan so dakel ya volunteer ya mankimey ed saray branch. Kanian aramay pasilidad ya dati et dugaruga labat so kabaleg da, natan et agto la ra nakarga ed karakel da!

Sankanonot mi met so safety. Lapud manbibilay ti la ed sampot na kaunoran iran agew, ondarakel iray trahedya tan kalamidad ya nayarin mangipeligro ed bilay tayo. (Lucas 21:11) Natan wala ray balon paraan na panag-renovate na bilding. Pian magmaliw ya safe ya pankimeyan iray pasilidad tayo, tinumbok mi iratan ya paraan. Makatulong met irayan renovation pian mas mainomay ya naorganisa iray relief work tan tuloytuloy ya nasuportaan so kimey ya panagpulong kayari na kalamidad.

“Benendisyonan nen Jehova Iyan Desisyon”

Inaprobaan na Mananguley ya Ulop so panagpaalagey o pan-renovate na 43 ya pasilidad na branch legan na 2023 service year. Kanian walay nagagawan construction project ed halos kapaldua na saray pasilidad na Bethel diad interon mundo. Anto ray pakanengnengan ya importante iyan kimey? Nengnengen tayo ray pigaran alimbawa.

Angola. Oniay imbaga nen Matt, ya membro na Branch Committee ed Angola: “Pribilehyo min nanengneng ya nasusumpal so propesiya ya walad Aggeo 2:7. Diad loob labat na samploran taon, tinmagey na 60 percent so bilang na publisher dia! Kanian pian nasuportaan ira, kaukolan ya triplien so bilang na pamilyan Bethel. Balet lapud melag iray pasilidad mi, limitado labat so naimbitaan mi ya mankimey dia. Kanian dakel ya Bethelite so mabetbet ya man-oovertime lapud karakel na kimey.”

Wala ray inyasain ya brother ya mananap na solusyon ed sayan pankaukolan na branch. Nen unaan, inisip da ya maples tan mas praktikal no i-renovate so bilding na Bethel. Balet kayari dan inaral ya maong iratan, atalosan da ya wala ni arum ya paraan pian mas nausar ed sankaabigan iray donasyon. Inrekomenda da ya mas maabig no saliwen tan i-renovate so bilding ya asingger ed Bethel. “Nen impresenta ed Branch Committee so pangaliw tan pan-renovate na saman ya bilding, manaalangan kami ta ompan aliwan onman katibay tan karakep ta aliwan sikatayon mismo so angipaalagey,” so kuan nen Matt. “Pero atalosan mi natan ya aman ya talagay kaukolan mi. Benendisyonan nen Jehova iyan desisyon.”

Posible ya diad arapen, kaukolan nin paawangen so Angola branch. Balet baleg lan tulong so balon bilding, saray adjustable ya pampundoan diad Bethel, tan saray nirentaan ya apartment ya asingger ed branch. Lapud saratan, tuloytuloy ya nasusuportaan so ilalaknab na kimey ya panagpulong diad teritorya na branch.

Japan. Manga 40 taon la so apalabas manlapu nen impaalagey iray akakkauna iran bilding ed branch tan maslak et agni a-renovate. Nansagpot ya maong iray agagi pian namintina iray pasilidad, pero diad tua, datdaan lan maong iratan. Kanian natan, peles ya ire-renovate iratan ya bilding.

Wala ray balon uksoyan ed Bethel. Antis na 2015, ilulutoay naakan so interon pamilyan Bethel. Kanian maslak ya kuarto ed Japan branch et wala labat so melag ya kusina to. Natan balet, saray Bethelite la so maslak ya manluluto na naakan da. Kanian in-renovate iray kusina ed kada kuarto pian mainomay ya makapanluto iray Bethelite. Oniay imbaga nen Sister Kumiko ya manlilingkor ed Japan branch nipaakar ed impan-renovate na kusina: “Kokkomportable ak ya manluto ed kusina, singa wala ak ed abung, akatulong iya pian lalok ya nasuportaan iray balon uksoyan ed Bethel.”

Baleg met so nitutulong na Japan branch pian nasuportaan so kimey tayo ed interon mundo. (Mateo 28:19, 20) Walay duaran branch office ya mangiimprinta na kompleton patalos na Biblia, tan sakey so Japan branch. Lapud satan, impila da ed construction project so pan-install na makina ya mankokolekta na dabok tan angkekelag ya piraso na papel pian safe ya mankimey iray mantratrabaho ed Printery. Ngalngali sakey milyon ya dolyar so agastos ed impangaliw tan impan-install ed sayan balon system. Pero baleg so nitutulong na saya pian tuloytuloy ya makapan-imprinta so branch na saray publikasyon, tan nasuplayan na espiritual ya naakan iray agagi.

Anggano walay construction project, sinegurado na saray agagi ya makapan-imprinta ni ra na Biblia. Oniay imbaga nen Trey, ya membro na Branch Committee ed Japan: “Legan na construction, say organisasyon tayo et tuloytuloy ed panag-release na Biblia ed nanduruman lenguahe. Ondarakel met iray totoon labay dan nawalaay sarilin kopya na Biblia. Kanian kaukolan ya iplanon maong na saray department ed Bethel tan na contractor so eskedyul na pan-install na balon equipment tan pan-imprinta na saray literatura.” Pero anggano oniay situasyon, ngalngali 220,000 ya Biblia so niimprinta kada bulan manlapud Marso anggad Agosto 2023. Agawa itan anggano walay baleg ya construction project diad Printery. Asumpal ya amin irayan proyekto ya aga linmampas ed badyet.

Wala met iray ginawan renovation pian mas makatipid ed kuryente. Singa bilang, nan-install ira na balon solar panel. Lapud satan, manga $120,000 so natipid kada taon. Nan-install met ira na saray triple-glazed window pian makatipid na $10,000 kada taon. Tua, mas mabli iraya, pero masulok ya 3.5 milyon ya dolyar so natipid diad ilabas na panaon. Aliwan satan labat, makatulong met iya pian agmasyadon naapektoan so kalikasan.

“Dakel Ni Kaukolan ya Gawaen”

Antoy ipapanengneng na sarayan duaran proyekto? Talagan baleg ya kimey so kaukolan pian nasuportaan na saray pasilidad ed Bethel so kimey ya panagpulong. Pero agni asumpal so kimey. Oniay imbaga nen Aaron, ya kaibad Worldwide Design/Construction Department: “Amayamay lay asumpal tayo, balet dakel ni kaukolan ya gawaen.” Kanian panon tayon nasuportaan itan? Onia ni imbaga to: “Makakatulong iray donasyon pian walay nagastos ed onia ran importantin proyekto. Balet misatsalamat tayo met ed saray mabulos ya nan-volunteer nensaman tan saray mansasagpot ya manggaway pananguman ed eskedyul tan panagbilay da pian makapan-volunteer ira ed arapen. Prueba iraya ya talagan bebendisyonan nen Aman Jehova so kimey tayo.”—Salmo 110:3.

Amin ya proyekto na organisasyon tayo ya panagpaalagey tan panag-renovate et susuportaan na saray boluntaryon donasyon, ya maslak et diad donate.jw.org. Misatsalamat kami ed inkamaiter yo!