Exodo

39 Manlapud asul a tinebey, kolor-ube ya abel,* tan ambalbalangan tinebey+ et nanlaga ra na saray kawes a marakep so inkalaga parad saramay manlingkor ed masanton pasen. Nanggawa ray masanton kawes a parad si Aaron,+ unong ya ingganggan nen Jehova ed si Moises.

2 Sikatoy nanggawa na efod+ a gawad balitok, asul a tinebey, kolor-ube ya abel, ambalbalangan tinebey, tan marakep a nilagan tinebey a linen. 3 Nanpitpit ira na saray tirampiak a balitok pian magmaliw iratan a maimpis, tan pinutot-putot to iratan pian magmaliw a singa tinebey ya usaren a kaiba na asul a tinebey, kolor-ube ya abel, ambalbalangan tinebey, tan marakep a klase na linen a tinebey, tan aburdaan itan. 4 Inggawaan da itan na saray pinagka-takeb ya impansaip diad tagey. 5 Tan say nilagan balkes, ya akapeket ed efod pian nitaker tan agnaekal,+ et gawad parehon materyales, gawad balitok, asul a tinebey, kolor-ube ya abel, ambalbalangan tinebey, tan marakep a nilagan tinebey a linen, unong ya ingganggan nen Jehova ed si Moises.

6 Insan da intapew iray baton onix ed saray balitok a panangipeketan, tan inyukit da ed saratan iray kangaranan na ananak nen Israel, a singa pangiyuukit da na tatak.+ 7 Inyan to iratan ed tapew na pinagka-takeb na efod bilang pakanodnonotan iran bato parad ananak nen Israel,+ unong ya ingganggan nen Jehova ed si Moises. 8 Insan sikatoy nanggaway apis na pagew+ a singa ginawa na sakey a managburda, singa say inkadesinyo na efod, gawad balitok, asul a tinebey, kolor-ube ya abel, ambalbalangan tinebey, tan marakep a nilagan tinebey a linen.+ 9 Kuadrado itan sano itupi. Ginawa ra so apis na pagew, a sano tupien et sankarangan* so karukey tan kalapar to. 10 Impeket dad satan so apatiran dasig na saray bato. Diad unonan dasig et rubi, topacio, tan esmeralda. 11 Diad komaduan dasig et turkesa, safiro, tan jaspe. 12 Diad komatlon dasig et baton lesem,* agata tan amatista. 13 Diad komapat a dasig et crisolito, onix, tan jade. Intapew iratan ed saray balitok a panangipeketan. 14 Saray bato et mipetekan ed kangaranan na saray 12 ananak nen Israel, tan niyukit iray kangaranan a singa tatak, kada ngaran et mangirepresenta ed kada sakey ed 12 tribu.

15 Insan nanggawa ray nilagan kadena ed tapew na apis na pagew, a singa iratan lubir a gawad puron balitok.+ 16 Tan nanggawa ray duaran panangipeketan a balitok tan duaran balitok a singsing tan impeket da so duaran singsing ed tapew na duaran suyok na apis na pagew. 17 Kayari na satan et insurob da so duaran balitok a lubir ed duaran singsing a walad saray suyok na apis na pagew. 18 Insan insurob da so duaran sampot na duaran lubir ed duaran panangipeketan, tan intapew da iratan ed saray pinagka-takeb na efod, diad bandad arap. 19 Insan nanggawa ray duaran balitok a singsing tan inyan da iratan ed duaran sampot diad dalem a gilig na apis na pagew, ya akaarap iratan ed efod.+ 20 Insan nanggawa ni ray duaran balitok a singsing tan inyan da iratan ed arap na efod, diad leksab na duaran pinagka-takeb na efod, ya asingger ed angisuldongan, diad tagey na nilagan balkes na efod. 21 Insan da insinger so apis na pagew diad panamegley na asul a lubir manlapud saray singsing to ya anggad saray singsing na efod, pian mansiansia so apis na pagew diad tapew na efod, diad tagey na nilagan balkes, unong ya ingganggan nen Jehova ed si Moises.

22 Insan ginawa to so andiay-taklay a latop a walad dalem na efod, a nilaga na sakey a managlaga, a say intero et gawad asul a tinebey.+ 23 Walad pegley na andiay-taklay a latop so pangilabotan na ulo, a singa samay walad samben na pagew. Nilaga so interon paliber na pangilabotan na ulo pian ag-itan napilat. 24 Insan say saloy na andiay-taklay a latop et inggawaan da na saray singa prutas a granada a gawad asul a tinebey, kolor-ube ya abel, tan ambalbalangan tinebey, ya impanlalagaan iratan. 25 Tan nanggawa ra na saray kampanilya a gawad puron balitok tan inyan da iray kampanilya ed baetan na saray singa prutas a granada diad interon saloy na andiay-taklay a latop; 26 impansalet-salet da so kampanilya tan singa prutas a granada, sakey a kampanilya tan sakey a prutas a granada, diad interon saloy na andiay-taklay a latop, ya uusaren ed panaglingkor, unong ya ingganggan nen Jehova ed si Moises.

27 Tan inggawaan day Aaron tan saray ananak to na saray andukey a kawes a gawad marakep a klase na linen a tinebey, a nilaga na sakey a managlaga,+ 28 tan say turbante+ a gawad marakep a klase na linen a tinebey, say dekorasyon a sakbong na ulo+ a gawad marakep a klase na linen a tinebey, say linen a karsonsilyo*+ a gawad marakep a nilagan tinebey a linen, 29 tan say balkes a gawad marakep a nilagan tinebey a linen, asul a tinebey, kolor-ube ya abel, tan nilagan ambalbalangan tinebey, unong ya ingganggan nen Jehova ed si Moises.

30 Insan ginawa ra so masileng a metal, say masanton tanda na dedikasyon,* manlapud puron balitok, tan singa pangiyuukit na tatak et oniay sulat ya inyukit da ed satan: “Masanto si Jehova.”+ 31 Insinger dad satan so sakey a lubir a gawad asul a tinebey pian itapew dad turbante, unong ya ingganggan nen Jehova ed si Moises.

32 Kanian asumpal so amin a kimey parad tabernakulo, say tolda a pantitiponan, tan ginawa na saray Israelita so amin ya ingganggan nen Jehova ed si Moises.+ Ontan so ginawa ra.

33 Insan inyakar dad si Moises so tabernakulo,+ say tolda+ tan amin a kagawaan na satan: saray panagkawit,+ saray hamba,+ saray baras+ tan saray lusek tan saray patoonan na satan;+ 34 say sakbong na satan a gawad katat na kalakian a karnero a kinoloran na ambalanga,+ say sakbong na satan a gawad katat na saray poka,* say sanib a kurtina;+ 35 say kaban na Testimonya tan saray panagsakbatan na satan+ tan say sakob;+ 36 say lamisaan, amin a kagawaan na satan+ tan say tinapay ya iyaapay; 37 say puron balitok a kandelero, saray adasig a lamparaan na satan,+ tan amin a kagawaan na satan+ tan say larak a pansilew;+ 38 say balitok ya altar,+ say larak a panaglana,+ say ambalingit ya insenso,+ say sanib*+ parad lolooban na tolda; 39 say gansan altar+ tan say gansan parilya na satan, saray palitek,+ amin a kagawaan na satan,+ say palanggana tan patoonan ed satan;+ 40 saray akasabit a kurtina diad sular, saray lusek tan saray patoonan na satan,+ say sanib*+ parad lolooban ed sular, saray lubir na tolda tan saray palpal na tolda na satan+ tan amin a kagawaan parad panaglingkor ed tabernakulo, parad tolda a pantitiponan; 41 saray marakep a nilagan kawes parad saramay manlingkor ed santuaryo, saray masanton kawes parad si Aaron a saserdote,+ tan saray kawes na ananak to a manlingkor bilang saserdote.

42 Amin ya ingganggan nen Jehova ed si Moises et ontan so impanggawa na saray Israelita ed amin a kimey.+ 43 Sanen inusisa nen Moises so amin a kimey da, anengneng ton ginawa ra so unong ed ingganggan nen Jehova; tan benendisyonan ira nen Moises.