Levitico

3 “‘No say apay to et sakey a bagat a pandurungoan,*+ tan no say iyapay to et manlapud pulok na saray baka, balanglan kalakian odino kabatyan, nepeg a sikatoy mangiyapay na andiay depekto ya ayep diad arapan nen Jehova. 2 Nepeg ton itapew so lima to ed ulo na apay to, tan pakgeran itan diad lolooban na tolda a pantitiponan; tan iwalsik na saray ananak nen Aaron, saray saserdote, so dala ed amin a diking na altar. 3 Sikatoy mangiyapay na kabiangan na bagat a pandurungoan bilang apay a pinoolan parad si Jehova:+ say taba+ ya akabalkot ed pait, amin a taba ed paliber na pait, 4 tan say duaran bato a kaibay taba na saratan a walad abay na saray tapi. Ekalen to met so taba na altey a kaiba iray bato.+ 5 Paaseweken itan na saray ananak nen Aaron ed altar, diad samay apay a popoolan ya akatapew ed kiew a walad apoy;+ satan et apay a pinoolan a walaay ambalingit* ya angob parad si Jehova.+

6 “‘No say apay to et manlapud pulok na saray karnero bilang bagat a pandurungoan parad si Jehova, sikatoy mangiyapay na andiay depekto a kalakian odino kabatyan.+ 7 No sikatoy mangiyapay na kilaw a kalakian a karnero, iyapay to itan ed arapan nen Jehova. 8 Nepeg ton itapew so lima to ed ulo na apay to, tan pakgeran itan diad arap na tolda a pantitiponan. Iwalsik na saray ananak nen Aaron so dala ed amin a diking na altar. 9 Iyapay to so taba manlapud bagat a pandurungoan bilang apay a pinoolan parad si Jehova.+ Ekalen to so interon ikol a napnoy taba a walad abay na tenten, say taba ya akabalkot ed pait, amin a taba ed paliber na pait, 10 tan say duaran bato a pati say taba na saratan a walad abay na saray tapi. Ekalen to met so taba na altey a kaiba iray bato.+ 11 Tan paaseweken itan na saserdote diad altar bilang kakanen,* sakey ya apay a pinoolan parad si Jehova.+

12 “‘No say apay to et sakey a kanding, iyapay to itan ed arapan nen Jehova. 13 Itapew toy lima to ed ulo na apay to, tan pakgeran itan diad arap na tolda a pantitiponan, tan iwalsik na saray ananak nen Aaron so dala ed amin a diking na altar. 14 Say kabiangan na satan ya iyapay to bilang apay a pinoolan parad si Jehova et say taba ya akabalkot ed pait, amin a taba ed paliber na pait,+ 15 tan say duaran bato a kaibay taba na saratan a walad abay na saray tapi. Ekalen to met so taba na altey a kaiba iray bato. 16 Paaseweken itan na saserdote diad tapew na altar bilang kakanen,* sakey ya apay a pinoolan pian niwalay ambalingit* ya angob. Amin a taba et kien nen Jehova.+

17 “‘Sakey iyan manbayag a ganggan parad saray henerasyon yo, diad amin a panaayaman yo: Agkayon balot mamangan na antokaman a taba odino dala.’”+