Levitico

13 Onia ni inkuan nen Jehova ed si Moises tan Aaron: 2 “No diad sakey a too et ompaway ed baog to* so larag, giri, odino batil, tan nayarin magmaliw itan a sakit a kating*+ ed baog to, nepeg a sikatoy iyakar ed si Aaron a saserdote odino diad sakey ed saray ananak ton saserdote.+ 3 Nengnengen na saserdote so impeksion ed baog to. Sano pinmuti so bago ed kawalaay impeksion tan ompatnag a mas aralem itan nen say baog, sakit a kating itan. Nengnengen itan na saserdote tan sikatoy iyabawag ton agmalinis. 4 Balet no amputi so batil ed baog to tan ag-itan ompatnag a mas aralem nen say baog tan agpinmuti so bago, ikuarantina na saserdote imay walaan na sakit diad loob na pitoy agew.+ 5 Sikatoy nengnengen na saserdote diad komapiton agew, tan no ompatnag ya agla linmoor so impeksion tan ag-itan kinmayat ed baog, sikatoy ikuarantina lamet na saserdote ed loob ni na pitoy agew.

6 “Nepeg a sikatoy nengnengen lamet na saserdote diad komapiton agew, tan no pinmusisaw la imay impeksion tan agla kinmayat ed baog, iyabawag na saserdote a sikatoy malinis;+ giri labat itan. Ipesak tod satan iray kawes to tan magmaliw a malinis. 7 Balet no kinmayat so giri* ed baog kayari na inyarap tod saserdote pian sikatoy niyabawag a malinis, nepeg a sikatoy onarap lamet* ed saserdote. 8 Nengnengen itan na saserdote, tan no kinmayat ed baog so giri, iyabawag na saserdote a sikatoy agmalinis. Kating+ itan.

9 “No nadapoan na sakit a kating so sakey a too, nepeg a sikatoy iyakar ed saserdote, 10 tan sikatoy nengnengen na saserdote.+ No walay amputin larag ed baog tan pinaputi na satan so bago tan nansugat imay larag,+ 11 graben kating so walad baog to, tan iyabawag na saserdote a sikatoy agmalinis. Sikatoy agto la nepeg ya ikuarantina,+ ta sikatoy agmalinis. 12 Natan, no say kating et kinmayat ed amin a baog to, tan napno na kating so too manlapud ulo ya anggad sali, unong ed nayarian a nengnengen na saserdote, 13 tan no sikatoy ninengneng la na saserdote tan anengneng ton napnoy kating so amin a baog to, iyabawag ton malinis* imay naimpeksion a too. Pinmuti lan amin itan, kanian sikatoy malinis. 14 Balet kada no walay ompatnag a sugat ed satan, sikatoy magmaliw ya agmalinis. 15 Sano nanengneng na saserdote imay sugat, sikatoy iyabawag ton agmalinis.+ Agmalinis so sugat. Kating+ itan. 16 Balet sano omputi lamet so sugat, diad satan et sikatoy onla ed saserdote. 17 Sikatoy nengnengen na saserdote,+ tan no pinmuti la so impeksion, iyabawag na saserdote a malinis imay naimpeksion a too. Sikatoy malinis.

18 “No ompaway ed baog na sakey a too so pelsa insan onabig itan, 19 balet ta walay amputin larag odino balangaan ya amputin batil ed kawalaan na pelsa, nepeg a sikatoy manpanengneng ed saserdote. 20 Nengnengen itan na saserdote,+ tan no ompatnag a mas aralem nen say baog tan pinmuti lay bago ditan, iyabawag na saserdote a sikatoy agmalinis. Sakit itan a kating a pinmaway ed kawalaan na pelsa. 21 Balet no ninengneng itan na saserdote tan anengneng ton anggapoy pinmuti a bago ditan tan aliwan mas aralem nen say baog tan pinmusisaw la, sikatoy ikuarantina na saserdote ed loob na pitoy agew.+ 22 Tan no mapatpatnag a kinmayat la itan ed baog, iyabawag na saserdote a sikatoy agmalinis. Sakey itan a sakit. 23 Balet no nansiansia ed sakey a pasen so batil tan ag-itan kinmayat, larag labat itan lapud pelsa, tan iyabawag na saserdote a sikatoy malinis.+

24 “Odino no say sakey et apiglatan lapud apoy tan say laman na piglat et nagmaliw a balangaan ya amputi odino amputin batil, 25 nengnengen itan na saserdote. No pinmuti so bago ed batil tan ompatnag a mas aralem itan nen say baog, kating itan a pinmaway ed kawalaan na piglat, tan iyabawag na saserdote a sikatoy agmalinis. Sakit itan a kating. 26 Balet no ninengneng itan na saserdote tan anengneng ton anggapoy pinmuti a bago ed batil tan aliwan mas aralem nen say baog tan pinmusisaw la, sikatoy ikuarantina na saserdote ed loob na pitoy agew.+ 27 Sikatoy nengnengen na saserdote ed komapiton agew, tan no mapatpatnag a kinmayat la itan ed baog, iyabawag na saserdote a sikatoy agmalinis. Sakit itan a kating. 28 Balet no nansiansia ed sakey a pasen so batil tan ag-itan kinmayat ed baog tan pinmusisaw la, larag labat itan lapud piglat, tan iyabawag na saserdote a sikatoy malinis.

29 “No ompaway ed sakey a laki odino bii so impeksion ed ulo odino ed timir, 30 nengnengen na saserdote so impeksion.+ No mas aralem itan nen say baog, tan say bago et duyaw tan maimpis, iyabawag na saserdote a satan a too et agmalinis; impeksion itan ed toktok na ulo odino ed balbas. Kating itan ed ulo odino ed timir. 31 Balet no anengneng na saserdote a say impeksion et aliwan mas aralem nen say baog tan anggapoy andeket a buek ditan, nepeg ya ikuarantina na saserdote ed loob na pitoy agew so toon naimpeksion.+ 32 Nengnengen na saserdote so impeksion ed komapiton agew, tan no agkinmayat so impeksion tan anggapoy dinmuyaw a bago ditan tan say impeksion et aliwan mas aralem nen say baog, 33 nepeg ton pakiskisan so ulo odino timir to, balet agto pakiskisan imay kawalaay impeksion. Insan ikuarantina na saserdote ed loob na pitoy agew so toon naimpeksion.

34 “Nengnengen lamet na saserdote so kawalaay impeksion diad komapiton agew, tan no agla kinmayat ed baog so impeksion ed ulo tan balbas tan aliwan mas aralem nen say baog, iyabawag na saserdote a sikatoy malinis, tan ipesak to iray kawes to insan magmaliw a malinis. 35 Balet no mapatpatnag ya onkakayat ed baog so impeksion kayarin sikatoy niyabawag a malinis, 36 sikatoy nengnengen na saserdote, tan no kinmayat ed baog so impeksion, agla kaukolan a nengnengen na saserdote no walay duyaw a bago; sikatoy agmalinis. 37 Balet no naimano ed impannengneng ya agla kinmayat so impeksion tan anggapoy tinmubon andeket a buek ditan, inmabig la so impeksion. Sikatoy malinis, tan iyabawag na saserdote a sikatoy malinis.+

38 “No diad sakey a laki odino bii et ompaway ed baog da* iray batil, tan amputi iratan, 39 nengnengen iratan na saserdote.+ No pusisawan ya amputi iray batil ed baog, batek labat itan ed baog. Malinis imay too.

40 “No naekalay buek so sakey a laki tan nayangyangan, sikatoy malinis. 41 No sikatoy naekalay buek diad bandad arap na ulo to tan nayangyangan ditan, sikatoy malinis. 42 Balet no walay ompaway a balangaan ya amputin larag ed yangyangan a parte na toktok na ulo to odino diad moling to, kating itan a pinmaway ed toktok na ulo to odino diad moling to. 43 Sikatoy nengnengen na saserdote, tan no say larag lapud impeksion et balangaan ya amputi a walad yangyangan a parte na toktok na ulo to odino diad moling to tan singa itan kating ed baog to, 44 sikatoy akating. Sikatoy agmalinis, tan iyabawag na saserdote a sikatoy agmalinis lapud sakit a walad ulo to. 45 Samay akating a walaay sakit et nepeg a pilaten iray kawes to tan paulyan ya ag-akaayos so buek na ulo to tan nepeg ton sakbongan so sangi* to tan ikelyaw ton, ‘Agmalinis, agmalinis!’ 46 Sikatoy agmalinis diad amin a panaon a sikatoy walaan na satan a sakit. Lapud sikatoy agmalinis, nepeg a biig so panayaman to. Diad paway na kampo so panayaman to.+

47 “No apeketan na sakit a kating so sakey a kawes, balanglan gawad bagoy karnero odino linen, 48 balanglan ed saray impanlalagaan a tinebey na abel a gawad linen odino bagoy karnero, odino ed katat odino ed antokaman a gawad katat, 49 tan apeketan na duyawan a birdi odino balangaan a mantsa a nanlapud sakit so sakey a kawes, katat, impanlalagaan a tinebey na kawes, odino antokaman a kagawaan a gawad katat, apeketan itan na kating, tan nepeg ya ipanengneng ed saserdote. 50 Nengnengen na saserdote so sakit, tan nepeg ton ikuarantina imay apeketan na sakit ed loob na pitoy agew.+ 51 Sano nengnengen to so sakit diad komapiton agew tan nanengneng ton kinmayat itan diad kawes, ed impanlalagaan a tinebey na kawes, odino diad katat (anggano antoy panguusaran ed katat), say sakit et talagan graben kating, tan ag-itan malinis.+ 52 Nepeg ton poolan so kawes odino say impanlalagaan a tinebey na abel a gawad bagoy karnero odino linen odino antokaman a kagawaan a gawad katat ya apeketan na satan a sakit, lapud talagan graben kating itan. Nepeg itan a poolan.

53 “Balet no ninengneng itan na saserdote tan agkinmayat so sakit ed kawes odino ed impanlalagaan a tinebey odino ed antokaman a kagawaan a gawad katat, 54 iganggan na saserdote a nepeg dan urasan so apeketan a kagawaan, tan ikuarantina to itan ed loob ni na pitoy agew. 55 Insan nengnengen na saserdote so apeketan a kagawaan kayarin naurasan a maong. No agnauman so nengneng na pinmeket a sakit, ag-itan malinis anggaman agkinmayat so sakit. Nepeg mon poolan itan, lapud amigmig la, balanglan diad dalem odino paway.

56 “Balet no ninengneng la itan na saserdote tan pinmusisaw la imay apeketan a parte kayarin inurasan itan a maong, ekalen to itan ed kawes odino ed katat odino ed impanlalagaan a tinebey na kawes. 57 Balet no siansia nin pinmatnag itan ed arum a parte na kawes odino ed impanlalagaan a tinebey na kawes odino ed antokaman a kagawaan a gawad katat, onkakayat itan, tan nepeg mon poolan so antokaman ya apeketan a kagawaan.+ 58 Balet no nakal la so pinmeket a sakit ed inurasan mon kawes odino ed impanlalagaan a tinebey na kawes odino antokaman a kagawaan a gawad katat, nepeg a piduaen ya urasan, tan magmaliw la itan a malinis.

59 “Saya so ganggan nipaakar ed sakit a kating a pinmeket ed abel a gawad bagoy karnero odino linen, odino ed impanlalagaan a tinebey, odino ed antokaman a kagawaan a gawad katat, pian niyabawag itan a malinis odino agmalinis.”