Levitico

20 Oniay inkuan ni nen Jehova ed si Moises: 2 “Ibagam ed saray Israelita, ‘Siopaman a too ed Israel tan siopaman a dayon manaayam ed Israel a mangiter na ilalak tod si Molec et nepeg a pateyen.+ Sikatoy nepeg a tupaken na saray totoo ed sayan dalin ya anggad ompatey. 3 Siak a mismo so mangipulisay ed satan a too, tan sikatoy ekalen* kod saray kabaleyan to, ta inter tod si Molec so arum ya ilalak to tan dinutakan toy masanton pasen ko+ tan pinabanday toy masanton ngaran ko. 4 No gagalaen na saray totoo ed dalin ya ilikdem iray mata ra ed gagawaen na satan a too sano iter tod si Molec so ilalak to tan sikatoy agda pateyen,+ 5 diad satan et siak a mismo so onsumpa ed satan a too tan say pamilya to.+ Ekalen* ko itan a too ed saray kabaleyan to, pati amin ya akiulop ed sikaton mandayew* ed si Molec.

6 “‘Samay too* ya onasingger ed saray espiritista+ tan ed saray managparles+ pian mibiang ed espiritual a prostitusyon ed sikara, sumpaen ko itan a too* tan ekalen* kod saray kabaleyan to.+

7 “‘Pasantos yoy inkasikayo tan magmaliw kayon masanto,+ ta siak si Jehova a Dios yo. 8 Tan nepeg yon sumpalen iray totontonen ko tan unor yo iratan.+ Siak si Jehova a mamapasanto ed sikayo.+

9 “‘No walay siopaman a toon mangayew* ed ama odino ina to, sikatoy nepeg a pateyen.+ Lapud inayew toy ama odino ina to, niiyan ed sikato so mismon dala to.

10 “‘Natan, nipaakar ed lakin mikalugoran ed asawa na sananey a laki: Nepeg a pateyen imay akikalugoran ed asawa na kapara ton too, samay laki tan biin akikalugoran.+ 11 Say lakin miakdol ed asawa na ama to et mangiter na kababaingan ed ama to.*+ Nepeg a pateyen iran dua. Niiyan ed sikara so mismon dala ra. 12 No akdolan na sakey a laki so manugang ton bii, nepeg a pateyen iran dua. Sinumlang da no antoy nisipor. Niiyan ed sikara so mismon dala ra.+

13 “‘No akdolan na laki so kapara ton laki a singa piaakdol na laki ed bii, makapadimla so ginawa ran dua.+ Nepeg iran pateyen. Niiyan ed sikara so mismon dala ra.

14 “‘No asawaen na laki so sakey a bii tan mirelasyon ed ina na bii, mabanbanday itan a kagagawa.*+ Sikatoy nepeg a poolan a kaiba ra,+ pian agmantultuloy ed limog yo so mabanbanday a kagagawa.

15 “‘No misekso so sakey a laki ed sakey ya ayep, sikatoy nepeg a pateyen, tan nepeg yon pateyen imay ayep.+ 16 No asinggeran na sakey a bii so antokaman ya ayep pian misekso ed satan,+ nepeg mon pateyen so bii tan say ayep. Nepeg iran pateyen. Niiyan ed sikara so mismon dala ra.

17 “‘No akdolan na sakey a laki so agi ton bii, say anak na ama to odino ina to, tan anengneng da so inkalakseb na balang sakey, makapabaing itan.+ Nepeg iran ekalen* ed imaton na saray ananak na kabaleyan da. Sikatoy angiter na kababaingan ed agi to.* Ebatan toy kasalanan to.

18 “‘No akdolan na sakey a laki so biin manreregla, agda inggalang so pampaparala to.+ Sikaran dua so nepeg ya ekalen* ed saray kabaleyan da.

19 “‘Agmo nepeg ya akdolan so biin agi nen inam odino say biin agi nen amam, ta mangiter itan na kababaingan ed kanayon.+ Nepeg dan ebatan so kasalanan da. 20 Say lakin akdolan toy asawa na pangamaen to et mangiter na kababaingan ed pangamaen to.*+ Nepeg dan ebatan so kasalanan da. Nepeg iran ompatey ya andiay anak. 21 No alaen na sakey a laki so asawa na agi ton laki, makapadimla itan.+ Sikatoy angiter na kababaingan ed agi to.* Ag-ira nepeg a nawalaay anak.

22 “‘Nepeg yon sumpalen so amin a totontonen ko tan amin a ganggan ko+ tan unor yo iratan,+ pian agkayo iyula na dalin a pangiyakaran kod sikayo a panayaman yo.+ 23 Agyo tutumboken iray totontonen na saray nasyon a pataynanen kod arapan yo;+ ta ginawa da irayan amin a bengatla kanian bubusolen ko ra.+ 24 Saya so rason ya inkuan kod sikayo: “Kayarianen yo so dalin da, tan iter ko itan ed sikayo bilang kayarian yo, sakey a dalin a manag-agus so gatas tan dilo.+ Siak si Jehova a Dios yo, ya angibiig ed sikayo ed saray totoo.”+ 25 Nepeg yon ibiig so malinis ya ayep ed agmalinis tan say agmalinis a manok ed malinis;+ agyo gagawaey inkasikayo* a makapadimla ed panamegley na ayep odino manok odino dinanman ya onkukurong ed dalin, a saratan et imbiig ko parad sikayo pian ipasen a marutak.+ 26 Nepeg kayon magmaliw a masanto parad siak, ta siak, si Jehova, et masanto,+ tan ibiig ta kayo ed arum a totoo pian magmaliw a kayarian ko.+

27 “‘Siopaman a laki odino bii ya espiritista odino managparles* et nepeg a pateyen.+ Nepeg iran tupaken na totoo ya anggad ompatey ira. Niiyan ed sikara so mismon dala ra.’”