Levitico

4 Onia ni inkuan nen Jehova ed si Moises: 2 “Ibagam ed saray Israelita, ‘No walay siopaman* ya agto ginagalay nankasalanan+ diad impanggawa tod bengatlan isesebel nen Jehova:

3 “‘No nankasalanan so alanaan a saserdote+ tan apilanor to ray totoo, nepeg a sikatoy mangiyapay na andiay depekton kilaw a kalakian a baka parad si Jehova bilang apay parad kasalanan lapud agawaan ton kasalanan.+ 4 Iyakar to so kalakian a baka diad lolooban na tolda a pantitiponan+ a walad arapan nen Jehova tan itapew toy lima to ed ulo na kalakian a baka, tan pakgeran to itan diad arapan nen Jehova.+ 5 Insan say alanaan a saserdote+ et mangala na daiset a dala na kalakian a baka tan iyakar to ed loob na tolda a pantitiponan; 6 tan idelnet na saserdote so gamet to diad dala+ tan maminpiton mangiwalsik na daiset a dala+ ed arapan nen Jehova diad arap na kurtina na masanton pasen. 7 Mangiyan met so saserdote na daiset a dala diad saray saklor na altar na ambalingit ya insenso,+ a walad arapan nen Jehova diad tolda a pantitiponan; tan iyibung to so amin a keran dala diad leksab na altar na apay a popoolan,+ a walad lolooban na tolda a pantitiponan.

8 “‘Insan to ekalen so amin a taba na kalakian a baka ya apay parad kasalanan, pati say taba ya akabalkot ed pait tan say taba ed paliber na pait, 9 tan say duaran bato tan say taba na saratan a walad abay na saray tapi. Tan ekalen to so taba na altey kaiba iray bato.+ 10 Mipara itan ed samay eekalen ed kalakian a baka parad bagat a pandurungoan.+ Tan paaseweken iratan na saserdote diad tapew na altar na apay a popoolan.

11 “‘Balet say katat na kalakian a baka tan amin a karne a kaibay ulo, saray sali, pait, tan dutak na satan+— 12 amin ya akera ed satan a kalakian a baka—nepeg ton paipaway ed kampo diad malinis a pasen a bantakay dapol,* tan poolan to itan ed tapew na mandarlang a kiew.+ Poolan itan diad bantakay dapol.

13 “‘Natan, no say amin ya Israelita et nankasalanan ya agda ginagala,+ tan ag-amta na kongregasyon ya akagawa ray bengatlan isesebel nen Jehova,+ 14 insan niparungtal so kasalanan, nepeg a mangiyapay so kongregasyon na kilaw a kalakian a baka bilang apay parad kasalanan tan iyakar itan ed arap na tolda a pantitiponan. 15 Itapew na saray mamatatken na totoo iray lima ra ed ulo na kalakian a baka diad arapan nen Jehova, tan pakgeran so kalakian a baka diad arapan nen Jehova.

16 “‘Insan iyakar na alanaan a saserdote so daiset a dala na kalakian a baka diad loob na tolda a pantitiponan. 17 Nepeg ya idelnet na saserdote so gamet to diad dala tan maminpiton iwalsik to itan diad arapan nen Jehova ed arap na kurtina.+ 18 Insan mangiyan na daiset a dala diad saray saklor na altar+ a walad arapan nen Jehova diad tolda a pantitiponan; tan iyibung to so akeran dala diad leksab na altar na apay a popoolan, a walad lolooban na tolda a pantitiponan.+ 19 Ekalen toy amin a taba na satan tan paaseweken to itan diad altar.+ 20 Gawaen tod kalakian a baka so singa ginawa tod inmunan kalakian a baka ya apay parad kasalanan. Ontan so gawaen tod satan, tan manggaway pananakbong so saserdote parad sikara,+ tan naperdona ira. 21 Nepeg ton paipaway ed kampo so kalakian a baka tan poolan to itan, a singa ginawa tod inmunan baka.+ Apay itan parad kasalanan ya onkana ed kongregasyon.+

22 “‘No say sakey a pangulo+ et agto ginagalay nankasalanan diad impanggawa tod sakey ed saray isesebel nen Jehova a Dios to, 23 odino naamtaan ton sikatoy akapankasalanan sumpad ganggan, nepeg a sikatoy mangiyakar na andiay depekton kilaw a kalakian a kanding bilang apay to. 24 Itapew toy lima to ed ulo na kilaw a kanding tan pakgeran to itan diad pasen a pamapakgeran na apay a popoolan ed arapan nen Jehova.+ Apay itan parad kasalanan. 25 Nepeg a mangala so saserdote na daiset a dala na apay parad kasalanan ed panamegley na gamet to tan iyan to itan diad saray saklor+ na altar na apay a popoolan, tan iyibung to so akeran dala diad leksab na altar na apay a popoolan.+ 26 Paaseweken to so amin a taba na satan diad altar a singa ginawa to ed taba na bagat a pandurungoan;+ tan manggawa na pananakbong so saserdote parad kasalanan na pangulo, tan sikatoy naperdona.

27 “‘No walay siopaman* ed saray totoo ya agto ginagalay nankasalanan diad impanggawa tod sakey ed saray isesebel nen Jehova kanian akapankasalanan,+ 28 odino naamtaan ton sikatoy akagaway kasalanan, nepeg a sikatoy mangiyakar na maabig a kilaw a kabatyan a kanding bilang apay to, parad ginawa ton kasalanan. 29 Itapew toy lima to ed ulo na apay parad kasalanan tan pakgeran toy apay parad kasalanan diad pasen a pamapakgeran ed apay a popoolan.+ 30 Mangala so saserdote na daiset a dala na apay parad kasalanan ed panamegley na gamet to tan iyan to itan diad saray saklor na altar na apay a popoolan, tan iyibung to so amin a keran dala diad leksab na altar.+ 31 Ekalen toy amin a taba+ na satan, a singa ginawa to ed taba na bagat a pandurungoan,+ tan paaseweken itan na saserdote diad altar bilang ambalingit* ya angob parad si Jehova; tan manggawa na pananakbong so saserdote parad sikato, tan sikatoy naperdona.

32 “‘Balet no say apay to parad kasalanan et sakey a kordero, nepeg a sikatoy mangiyakar na andiay depekton kabatyan a kordero. 33 Itapew toy lima to ed ulo na apay parad kasalanan tan pakgeran to itan bilang apay parad kasalanan diad pasen a pamapakgeran ed apay a popoolan.+ 34 Mangala so saserdote na daiset a dala na apay parad kasalanan ed panamegley na gamet to tan iyan to itan diad saray saklor na altar na apay a popoolan,+ tan iyibung to so amin a keran dala diad leksab na altar. 35 Ekalen to so amin a taba na satan, a singa ginawa to ed taba na kilaw a kalakian a karnero a bagat a pandurungoan, tan paaseweken itan na saserdote diad altar ed tapew na apay a pinoolan parad si Jehova;+ tan manggawa na pananakbong so saserdote parad sikato, tan sikatoy naperdona.+