Numeros

28 Insan inkuan ni nen Jehova ed si Moises: 2 “Iganggan mo ray Israelita tan ibagam ed sikara, ‘Nepeg yon alwaran so pangiyapay ed siak na apay ko, say tinapay ko. Saray apay kon pinoolan a walaay ambalingit* ya angob parad siak et nepeg a gawaen ed saray aturon panaon na saratan.’+

3 “Tan ibagam ed sikara, ‘Saya so apay a pinoolan ya iyapay yod si Jehova: kada agew et duaran andiay depekton kalakian a kordero a mantaon na sakey bilang regular ya apay a popoolan.+ 4 Iyapay mo so sakey a kalakian a kordero diad kabuasan, tan iyapay mo imay sakey a kalakian a kordero diad pansirunget,*+ 5 kaiba so kakaplo na sakey efa* na pinon arina bilang apay a kakanen a nilaokan na kakapat a hin* na larak a nanlapud pinespes ya olibo.+ 6 Sakey itan a regular ya apay a popoolan,+ a niletneg ed Palandey Sinai bilang ambalingit* ya angob, sakey ya apay a pinoolan parad si Jehova, 7 a kaiba na satan so apay ya iinumen, kakapat na sakey a hin parad kada sakey a kalakian a kordero.+ Ikalbom ed masanton pasen so de-alkohol ya iinumen bilang apay ya iinumen parad si Jehova. 8 Tan iyapay mo imay sakey nin kalakian a kordero diad pansirunget.* Kaiba so apay a kakanen a singa samay inyapay ed kabuasan tan kaiba so apay ya iinumen et iyapay mo itan bilang apay a pinoolan, bilang ambalingit* ya angob parad si Jehova.+

9 “‘Balet say nepeg ya iyapay diad agew na Sabaton+ et duaran andiay depekton kalakian a kordero a mantaon na sakey tan duaran kakaplo na sakey sukat ya efa na pinon arina a nilaokay larak bilang apay a kakanen, a kaiba na apay ya iinumen. 10 Saya so apay a popoolan parad Sabaton, a kaiba so regular ya apay a popoolan tan apay ya iinumen.+

11 “‘Diad gapo na kada bulan* et mangiyapay kayo na duaran kilaw a kalakian a baka, sakey a kalakian a karnero, tan pitoran andiay depekton kalakian a kordero a saratan et mantaon na sakey, bilang apay a popoolan parad si Jehova,+ 12 tan taloran kakaplon sukat na pinon arina a nilaokay larak bilang apay a kakanen+ parad kada kalakian a baka tan duaran kakaplon sukat na pinon arina a nilaokay larak bilang apay a kakanen parad samay sakey a kalakian a karnero,+ 13 tan sakey a kakaplon sukat na pinon arina a nilaokay larak bilang apay a kakanen parad kada sakey a kalakian a kordero, bilang apay a popoolan, ya ambalingit* ya angob,+ sakey ya apay a pinoolan parad si Jehova. 14 Tan saray apay ya iinumen et nepeg a kapaldua na sakey hin ya alak parad sakey a kalakian a baka+ tan kakatlo na sakey hin parad kalakian a karnero+ tan kakapat na sakey hin parad sakey a kalakian a kordero.+ Saya so binulan ya apay a popoolan diad interon taon. 15 Ontan met, sakey a kilaw a kanding so nepeg ya iyapay ed si Jehova bilang apay parad kasalanan likud nid samay regular ya apay a popoolan a kaiba so apay ya iinumen.

16 “‘Diad koma-14 ya agew na unonan bulan et say Paskua parad si Jehova.+ 17 Tan diad koma-15 agew na satan a bulan et walay piesta. Nepeg ya andi-lebaduran tinapay so kanen ed loob na pitoran agew.+ 18 Diad unonan agew et walay masanton pandaragup. Agkayo mankikimey na antokaman ya ambelat. 19 Tan mangiyapay kayo na duaran kilaw a kalakian a baka, sakey a kalakian a karnero, tan pitoran kalakian a kordero a saratan et mantaon na sakey, bilang apay a pinoolan parad si Jehova. Nepeg ya andiay depekton ayayep so iyapay yo.+ 20 Nepeg yon iyapay iratan a kaiba iray apay a kakanen a pinon arina a nilaokay larak,+ taloran kakaplon sukat parad sakey a kalakian a baka tan duaran kakaplon sukat parad kalakian a karnero. 21 Mangiyapay ka na kakaplon sukat parad kada sakey ed saray pitoran kalakian a kordero, 22 ontan met ed sakey a kanding bilang apay parad kasalanan pian makapanggaway pananakbong parad sikayo. 23 Iyapay yo iraya bilang kaaruman ed apay a popoolan diad kabuasan, a satan et parad regular ya apay a popoolan. 24 Inagew-agew yon iyapay iraya ed parehon paraan diad loob na pitoy agew bilang kakanen,* sakey ya apay a pinoolan a walaay ambalingit* ya angob parad si Jehova. Nepeg ya iyapay itan a kaiba so regular ya apay a popoolan tan apay ya iinumen. 25 Diad komapiton agew et nepeg a walay masanton pandaragup yo.+ Agkayo mankikimey na antokaman ya ambelat.+

26 “‘Diad agew na saray unonan aluton bunga,+ sano mangiyapay kayo na balon apay a kakanen parad si Jehova,+ nepeg a walay masanton pandaragup yo diad piesta na saray simba.+ Agkayo mankikimey na antokaman ya ambelat.+ 27 Mangiyapay kayo na duaran kilaw a kalakian a baka, sakey a kalakian a karnero, tan pitoran kalakian a kordero a saratan et mantaon na sakey, bilang apay a popoolan a walaay ambalingit* ya angob parad si Jehova,+ 28 tan kaiba na saratan so apay a kakanen a gawad pinon arina a nilaokay larak, a taloran kakaplon sukat parad kada sakey a kalakian a baka, duaran kakaplon sukat parad sakey a kalakian a karnero, 29 sakey a kakaplon sukat parad kada sakey ed saray pitoran kalakian a kordero, 30 ontan met ed sakey a kilaw a kanding pian makapanggaway pananakbong parad sikayo.+ 31 Iyapay iratan bilang kaaruman na samay regular ya apay a popoolan tan apay a kakanen. Nepeg ya andiay depekton ayayep iratan,+ a kaiba iray apay ya iinumen.