Numeros

6 Onia ni inkuan nen Jehova ed si Moises: 2 “Mitongtong kad saray Israelita tan ibagam ed sikara, ‘No say sakey a laki odino bii et manggawa na nikabiig a sipan a manbilay bilang sakey a Nazareo*+ parad si Jehova, 3 nepeg ton paliisan so alak tan arum ni ran de-alkohol ya iinumen. Agto nepeg ya oninum na tuka a nanlapud alak odino tuka a nanlapud antokaman a de-alkohol.+ Agto nepeg ya oninum na antokaman a tabol na ubas, odino mangan na ubas, balanglan kapamburbor odino pinamaga. 4 Diad amin ya agew na inka-Nazareo to et agto nepeg a mangan na antokaman a nanlapud ubas, balanglan saray maetan ubas odino anggan saray ubak.

5 “‘Diad amin ya agew na sipan to legan na inka-Nazareo to et anggapoy labahas ya ondalan ed ulo to.+ Sikatoy mansiansian masanto diad pamarukey tod buek to ya anggad nasumpal iray agew na inkibiig to parad si Jehova. 6 Agto nepeg ya onasingger ed* inatey a too* diad amin ya agew a pansiasiansia ton nibiig parad si Jehova. 7 Anggano ompatey so ama to odino ina to odino agi ton laki odino bii, agto nepeg a dutakay sarili to,+ lapud say tanda na inka-Nazareo to ed Dios to et walad ulo to.

8 “‘Sikatoy masanto parad si Jehova diad amin ya agew na inka-Nazareo to. 9 Balet no walay biglan ompatey ed abay to,+ tan adutakay buek to a mangisisimbolo na inkibiig to parad Dios,* nepeg ton kiskisan so ulo to+ diad agew na panlinis to. Nepeg ton kiskisan itan diad komapiton agew. 10 Tan diad komawalon agew et sikatoy nepeg a mangiyakar ed saserdote na duaran palekpek odino duaran sibong a malapati diad lolooban na tolda a pantitiponan. 11 Itarya na saserdote imay sakey bilang apay parad kasalanan tan samay sakey bilang apay a popoolan tan sikatoy manggaway pananakbong parad sikato lapud kasalanan to+ nipaakar ed samay inatey a too.* Insan pasantosen na Nazareo so ulo to diad saman ya agew. 12 Tan nepeg ton ibiig lamet so sarili to parad si Jehova nipaakar ed saray agew na inka-Nazareo to, tan sikatoy mangawit na sakey a kilaw a kalakian a karnero a mantaoy sakey bilang apay parad impakasumlang. Balet agla ibilang iramay inmuunan agew lapud adutakan toy inka-Nazareo to.

13 “‘Natan et saya so ganggan nipaakar ed Nazareo: Sano nasumpal to iray agew na inka-Nazareo to,+ sikatoy iyakar ed lolooban na tolda a pantitiponan. 14 Saraya so iyapay to ditan ed si Jehova: sakey ya andiay depekton kilaw a kalakian a karnero a mantaoy sakey bilang apay a popoolan,+ sakey ya andiay depekton kabatyan a karnero a mantaoy sakey bilang apay parad kasalanan,+ sakey ya andiay depekton kalakian a karnero bilang bagat a pandurungoan,+ 15 sakey a baskit a nankargay andi-lebaduran tinapay a kurti-singsing a gawad pinon arina tan nilaokay larak, andi-lebaduran maimpis a tinapay a pinuraporan na larak, tan kaiba iray apay a kakanen+ tan apay ya iinumen.+ 16 Iyapay iratan na saserdote ed arapan nen Jehova tan iyapay to so apay to parad kasalanan tan say apay ton popoolan. 17 Iyapay to so kalakian a karnero bilang bagat a pandurungoan parad si Jehova pati samay baskit a nankargay andi-lebaduran tinapay, tan kaiban iyapay na saserdote so apay a kakanen+ tan apay ya iinumen.

18 “‘Insan kiskisan na Nazareo so ag-akatlin buek to*+ diad lolooban na tolda a pantitiponan, tan alaen to so buek to a dinmukey legan na inka-Nazareo to tan iyan tod apoy a walad silong na bagat a pandurungoan. 19 Insan mangala so saserdote na inlambong+ a takeb na samay kalakian a karnero, sakey ya andi-lebaduran tinapay a kurti-singsing manlapud samay baskit, tan sakey ya andi-lebaduran maimpis a tinapay, tan iyan to iratan diad saray dakulap na Nazareo kayarin akiskis so tanda na inka-Nazareo to. 20 Tan ipayapay iratan na saserdote bilang apay ya ipapayapay diad arapan nen Jehova.+ Satan et bengatlan masanto parad saserdote, pati say pagew a parad apay ya ipapayapay tan say ulpo a niiter bilang kontribusyon.+ Kayari na satan et nayari lan oninum na alak so Nazareo.

21 “‘Saya so ganggan nipaakar ed Nazareo+ a manggawa na sipan: No sikatoy mangisipan tan nayarian toy mangiyapay ed si Jehova na onsulok ni ed samay kakaukolanen parad inka-Nazareo to, nepeg to sirin a sumpalen so sipan to nisengeg ed ganggan na inka-Nazareo to.’”

22 Insan oniay inkuan nen Jehova ed si Moises: 23 “Ibagam ed si Aaron tan ed saray ananak to, ‘Oniay paraan na pamendisyon+ yod saray totoo na Israel. Ibaga yod sikara:

24 “Bendisyonan ka komon nen Jehova+ tan salimbengan to ka.

25 Paliwawaen komon nen Jehova so lupa tod sika,+ tan kasian to ka komon.

26 Itangwa komon nen Jehova so lupa to ed sika tan ikdan to kay kareenan.”’+

27 Tan bitlaen day ngaran ko diad saray totoo na Israel,+ pian bendisyonan ko ra.”+