Deuteronomio
26 “Sano akaloob kayo lad dalin ya ipatawir ed sikayo nen Jehova a Dios yo tan akayarian yo la itan tan manaayam kayo la ditan, 2 mangala kay pigara ed saray unonan bunga ed amin ya aanien* ed dalin ya iter ed sika nen Jehova a Dios mo, tan ikargam ed sakey a baskit tan la kad pasen a pilien nen Jehova a Dios mo parad ngaran to.+ 3 La kad saserdote a manlilingkor ed saratan ya agew tan ibagam ed sikato, ‘Iyabawag ko natan ed si Jehova a Dios mo ya akaloob ak la ed dalin ya insipan nen Jehova ed saray inmuunan atateng tayo ya iter tod sikatayo.’+
4 “Insan alaen na saserdote so baskit ed limam tan iyan to itan ed arap na altar nen Jehova a Dios mo. 5 Insan iyabawag mod arapan nen Jehova a Dios mo, ‘Say amak et sakey a manaalis-alis* ya Arameo,+ tan sikatoy linma ed Ehipto+ tan nanayam diman bilang dayo, a daiset so kabiangan na sankaabungan to.+ Balet diman et sikatoy nagmaliw a baleg a nasyon, a mabiskeg tan walaan na dakerakel a totoo.+ 6 Tan minaltrato, pinairap, tan maruksan inaripen kami na saray Ehipsio.+ 7 Kanian tinmawag kami ed sika, Jehova, say Dios na saray inmuunan atateng mi, tan nadngel mo, Jehova, so boses mi tan inimanom so kairapan tan gonigon mi tan panamairap ed sikami.+ 8 Insan impaway mo kami, Jehova, ed Ehipto diad panamegley na mabiskeg a lima tan akaunat a taklay,+ diad panamegley na makapataktakot iran gawa, tan saray tanda tan milagro.+ 9 Insan mo kami inyakar ed sayan pasen tan inter mod sikami iyan dalin, sakey a dalin a manag-agus so gatas tan dilo.+ 10 Natan et inawit ko iray unonan bunga na dalin ya inter nen Jehova ed siak.’+
“Iyan mo itan ed arapan nen Jehova a Dios mo tan ondakmomo kad arapan nen Jehova a Dios mo. 11 Insan manliket ka lapud amin a maabig a bengatla ya inter ed sika nen Jehova a Dios mo tan ed sankaabungan mo, sika tan say Levita tan say dayo a walad limog yo.+
12 “No asumpal mo lan ibiig so interon kakaplo+ na inanim diad komatlon taon, say taon na kakaplo, nepeg mon iter itan ed Levita, dayo, say ugaw ya ulilad ama,* tan abalon bii, tan mangan ira ya anggad napesel ira diad loob na saray syudad* yo.+ 13 Insan mo ibagad si Jehova a Dios mo, ‘Inekal ko lad abung ko iray masanton bengatla tan inter ko lad Levita, dayo, ugaw ya ulilad ama, tan abalon bii,+ unong ya ingganggan mod siak. Agko sinumlang odino imbaliwala iray ganggan mo. 14 Agak angan ed satan sanen maneermen ak, tan agko met binembenan so antokaman ed satan sanen agak malinis, tan agko inter ed inatey so antokaman ed satan. Inunor koy Jehova a Dios ko tan ginawak so amin ya ingganggan mod siak. 15 Usdong ka natan manlapud masanton ayaman mo, say katawenan, tan bendisyonan mo so Israel a totoom tan say dalin ya inter mod sikami,+ say dalin a manag-agus so gatas tan dilo,+ unong ya insambam ed inmuunan atateng mi.’+
16 “Diad sayan agew et igaganggan kayo nen Jehova a Dios yo a manumpal ed sarayan totontonen tan ganggan. Nepeg yo irayan gawaen tan sumpalen ed interon puso yo+ tan interon kamarerwa* yo. 17 Natan et naawat yo so panangiyabawag nen Jehova a sikato so magmaliw a Dios yo legan kayon manaakar ed saray dalan to tan gagawaen yo iray totontonen to,+ saray bilin to,+ tan saray ganggan to,+ tan legan yon dedengelen so boses to. 18 Tan natan et naawat nen Jehova so panangiyabawag yo a sikayo so magmaliw a totoo to, say espisyal a kayarian* to,+ unong ya insipan tod sikayo, tan gawaen yo so amin a bilin to 19 tan gawaen to kayon mas atagey nen saray arum a nasyon a ginawa to,+ ya ikdan to kayo na dayew tan inkabantog tan gloria, unong ya insipan to, legan yon papaneknekan a masanto kayon totoo parad si Jehova a Dios yo.”+