Josue

23 Sanen masiken lan maong si Josue,+ kayari na dakel ya agew manlapud impangiter nen Jehova ed Israel na painawa+ ed amin ya akapaliber a kalaban da, 2 tinawag nen Josue so interon Israel,+ saray mamatatken, saray ulo, saray ukom, tan saray opisyal da,+ tan inkuan tod sikara: “Masiken ak lan maong. 3 Tan anengneng yon mismo so amin a ginawa nen Jehova a Dios yo ed sarayan amin a nasyon nisengeg ed sikayo, lapud si Jehova a Dios yo so milalaban parad sikayo.+ 4 Nia, inter kod sikayo ed panamegley na pampapalaranan*+ so dalin na saray nakekeran nasyon bilang tawir na saray tribu yo,+ ontan met ed amin a nasyon a dineral ko,+ manlapud Jordan ya anggad Baleg a Dayat* ed sagur.* 5 Tan si Jehova a Dios yo so angekal ed sikara manlapud arapan yo,+ tan pinataynan to ra nisengeg ed sikayo, tan akayarian yoy dalin da, unong ya insipan ed sikayo nen Jehova a Dios yo.+

6 “Manpakpel kayon maong natan pian nasumpal tan nagawaan yo so amin a nisulat ed libro na Ganggan+ nen Moises diad agyo iyarawi ed satan, balanglan diad kawanan odino diad kawigi,+ 7 diad agyo pilimog ed sarayan nasyon+ a nakekeraan ed limog yo. Agyo bibitlaen so kangaranan na saray dirios da+ odino mansamba ed panamegley na saratan, tan agkayon balot manlilingkor tan ondadakmomo ed saratan.+ 8 Noagta mansiansia kayod si Jehova a Dios yo,+ a singa gagawaen yo anggad natan. 9 Pataynanen nen Jehova iray angkakabaleg tan mabibiskeg a nasyon manlapud arapan yo,+ tan anggapo ni so anggan sakey a too ya akatalod sikayo anggad natan.+ 10 Sakey labat a too ed sikayo et usilan toy sanlibo,+ lapud si Jehova a Dios yo so milalaban parad sikayo,+ unong ya insipan tod sikayo.+ 11 Kanian naynay yon alwaran so inkasikayo*+ diad pangaro yo ed si Jehova a Dios yo.+

12 “Balet no ombeneg kayo tan mimuyong kayod saray nasyon ya akera+ ed limog yo, tan mikasakey kayod sikara diad panamegley na panangasawa,*+ tan milimog kayod sikara tan milimog irad sikayo, 13 amtaen yo ya agla pataynanen nen Jehova a Dios yo irayan nasyon parad sikayo.+ Magmaliw iran patit tan kalot, tan singa salot ya onsiplat ed diking yo+ tan sabit ed saray mata yo, anggad naupot kayo ed sayan maabig a dalin ya inter ed sikayo nen Jehova a Dios yo.

14 “Magano ak lan ompatey,* tan amta yo ed interon puso yo tan interon kamarerwa* yo ya anggapoy anggan sakey a salita ed amin ya insipan nen Jehova a Dios yo ya agtinmua. Tinmua iratan ya amin ed sikayo. Anggapoy anggan sakey a salita ya agtinmua.+ 15 Balet no panon ya agawa ed sikayo so amin a maabig ya insipan nen Jehova a Dios yo,+ idapo met nen Jehova ed sikayo so amin a kadederal ya insipan to* tan upoten to kayo ed sayan maabig a dalin ya inter ed sikayo nen Jehova a Dios yo.+ 16 No sumlangen yo so sipanan nen Jehova a Dios yo ya ingganggan ton sumpalen yo, tan manlingkor kayo ed arum a dirios tan ondakmomo ed saratan, ondalang so sanok nen Jehova ed sikayo,+ tan naandi kayon tampol ed sayan maabig a dalin ya inter tod sikayo.”+