Ruth
1 Diad panaon a saray ukom+ so mangipapaakseb na hustisya,* walay sinmabin eras ed Juda; tan walay sakey a laki a tinmaynan ed Betlehem+ diad Juda pian manayam bilang dayo diad kaumaan* na Moab,+ kaibay asawa to tan say duaran anak ton lalaki. 2 Say ngaran na laki et Elimelec,* say ngaran na asawa to et Noemi,* tan say ngaran na duaran anak ton lalaki et Malon* tan Kilion.* Saraya et Efratita a taga Betlehem diad Juda. Sanen akasabi rad kaumaan na Moab, diman la ra nanayam.
3 Ag-abayag et inatey si Elimelec ya asawa nen Noemi, tan sikatoy atilak kaibay duaran anak ton lalaki. 4 Sarayan lalaki et angasawa na bibiin Moabita; say ngaran na sakey et Orpa, tan samay sakey et Ruth.+ Et nanayam irad man na ngalngalin samploy taon. 5 Insan inatey met so duaran anak ton lalaki a si Malon tan Kilion, kanian si Noemi labat lay atilak ta anggapo la ray duaran anak to tan asawa to. 6 Kanian sikatoy binmuat kaiba iray manugang to manlapud kaumaan na Moab pian onsempet, ta nadngelan to diman ed Moab ya inimano la nen Jehova iray totoo to, ya iikdan to la ray naakan.*
7 Tinaynan to so pasen a nanayaman to kaibay duaran manugang to. Legan iran manaakar ed karsada pian onsempet ed dalin na Juda, 8 inkuan nen Noemi ed saray manugang to: “Sempet ki lad abung na kainaan yo. Komon ta ipatnag nen Jehova ed sikayo so matoor a panangaro to,+ a singa impatnag yo ed saray asawa yo ya inatey la ontan met ed siak. 9 Komon ta iyabuloy nen Jehova a makaromog so balang sakey ed sikayo na kaligenan* ed abung na asawa yo.”+ Insan to ra inangoban, tan inmakis ira na maksil. 10 Et aminpiga ran imbagad sikato: “Andi, mila kamid sika ed baley mo.” 11 Balet inkuan nen Noemi: “Sempet ki la, ananak ko. Akin et labay yoy milad siak? Makapangiyanak ak ni kasi na lalaki a nayarin magmaliw ya asawa yo?+ 12 Sempet ki la, ananak ko. La ki la, ta akulaw ak la pian miasawa. Anggano bilang ta makapiasawa ak ed sayan labi tan nawalaan met na anak a lalaki, 13 alagaren yo ra kasi anggad ibaleg da? Mansiansia kayo kasin andiay-asawa parad sikara? Aleg ananak ko, pinasya lay ermen ko parad sikayo, lapud sinmumpad siak si Jehova.”+
14 Et inmakis ira lamet na maksil, insan inangoban nen Orpa so katulangan to tan inmalis la. Balet si Ruth et nansiansian kaiba to. 15 Kanian inkuan nen Noemi: “Ni, pinmawil lay abalon irat mo ed baley to tan ed saray dirios to. Mila ka lad sikato ya onsempet.”
16 Balet inkuan nen Ruth: “Agmo kekerewen ed siak a taynan ta ka, ya agak la milad sika; ta no iner so laen mo et diman so laen ko, tan no iner ka mamalabas na labi et diman ak mamalabas na labi. Say baley mo et magmaliw a baley ko, tan say Dios mo et Dios ko.+ 17 No iner ka ompatey et diman ak ompatey, tan diman ak met iponpon. Komon ta dusaen ak na ambelabelat nen Jehova no abuloyan kon walay antokaman a makapangisian ed sikatan dua likud ed patey.”
18 Sanen anengneng nen Noemi a mapilit si Ruth a milad sikato, pinaulyan to la. 19 Tan nantultuloy iran nanakar anggad Betlehem.+ Kasabi rad man, say interon syudad et agulo lapud sikara, tan ibabaga na saray bibii: “Si Noemi ’tan?” 20 Et inkuan tod saramay bibii: “Agyo ak tatawagen a Noemi.* Tawag yo ak lan Mara,* ta inyabuloy na Makapanyarin-amin a magmaliw a maer-ermen so bilay ko.+ 21 Walad siak ya amin nen inmalis ak, balet ta pinapawil ak nen Jehova a kalimalima. Kanian akin et tawagen yo ak a Noemi, anta si Jehova so sinmumpad siak tan say Makapanyarin-amin so sengegay paniirap ko?”+
22 Oniay insempet nen Noemi manlapud kaumaan na Moab+ kaibay manugang ton Moabita a si Ruth. Sinmabi rad Betlehem diad gapo na panag-ani na sebada.+