Job
40 Intuloy nen Jehova ya inebatan si Job:
2 “Nepeg kasin misuppiatan ed Makapanyarin-amin so sakey a manaanap na lingo?+
Onebat komon imay malabay a mangipetek ed Dios.”+
3 Et inmebat si Job ed si Jehova, a kuan to:
4 “Anggapoy kakanaan ko.+
Antoy niyebat kod sika?
Pepetan ko lay sangik.+
5 Nansalita ak ya aminsan, balet agak la onebat;
On amidua, balet anggapo lay ibagak.”
6 Et inebatan nen Jehova si Job diad panamegley na maksil a dagem:+
7 “Iparaan mo pay inkasika, a singa sakey a laki;
Tepetan ta ka, tan ipaamtam ed siak.+
8 Kuestionen mo* kasi so hustisyak?
Kondenaen mo ak kasi pian ompaway a sikay duga?+
9 Kasin walaan ka na makapanyarin taklay a singa ed tuan Dios,+
Kasin sarag na boses mo so manpakarol a singa sikato?+
10 Dekoraan mo pay sarilim na gloria tan katagyan;
Mankawes kay kagalangan tan karakpan.
11 Bulosan mo so pinasyan sanok mo;
Nengneng mo so balang sakey a mapaatagey tan iyabebam.
12 Nengneng mo so balang sakey a mapaatagey tan ipaabebam,
Tan igatin-gatin mon tampol iray mauges.
13 Iyamot mo ran amin diad dabok;
Ikulong mo ra* diad akaamot a pasen,
14 Diad ontan et bidbiren ko*
A sarag kan iliktar na kawanan a limam.
15 Natan et wadia so Behemot,* a ginawak a singa ed impanggawak ed sika.
Sikatoy mamangan na dika a singa sakey a baka.
16 Imanom so biskeg na balangbang to
Tan say pakayari na saray masel na eges to!
17 Patatalkeren toy ikol to a singa kiew a sedro;
Saray ulat na ulpo to et impanlalagaan.
18 Saray pukel to et tubo a gansa;
Saray bikking to et singa saray pinanday a baston a balatyang.
19 Sikatoy manuna* ed limog na saray ginawa na Dios;
Say Manamalsa to labat so makaasingger ed sikato ya awit toy espada to.
20 Ta saray palandey so mamapawala na naakan to,
A ditan manggagalaw so amin ya atap ya ayayep.
21 Sikatoy ondudukol ed silong na saray kiew a lotus,
Diad sirom na saray tanubong a walad maranum a pasen.
22 Saray kiew a lotus so manisirom ed sikato,
Tan saray kiew ya alamo ed lawak* so akapaliber ed sikato.
23 No maksil so agus na ilog, agnatatakot.
Sikatoy mataletalek, anggano onsisipwak ed sangi to so Ilog Jordan.+
24 Wala tay makarel ed sikato legan ya akabantay,
Odino wala tay makadeyeng na eleng to ed panamegley na taga?*