Ombisita Tayod Kazakhstan

SARAY Kazakh nensaman et kaslakan ya onaalis-alis na ayaman. Anggad natan, iyaalis-alis nin siansia na saray managpastol iray ayep da depende ed panaon. No summer, onla rad ambetel ya kapalandeyan ya walay napampastolan da. Insan no winter la, iyalis da ray ipapastol da diad patar ya mas ampetang so klima.

Say arum ya Kazakh et manaayam ed saray modernon syudad. Pero, nanengneng nin siansia so kabibilay na inmuunan atateng da diad saray dakdakel ya tradisyon, naakan, tan gamit da. Amayamay so atawir dan tula, kansion, tan musika ya totogtogen panamegley na saray sarili dan instrumento.

Say yurt​—ya tradisyonal ya abung na saray Kazakh—​et nagmaliw ya simbolo na panrespeto na too ed kalikasan. Labalabay nin siansia na saray managpastol so manayam ed yurt, tan anggan saray Kazakh ya manaayam ed syudad et uusaren da itan no wala ray espisyal ya okasyon. Saray yurt et komportable met ya pampundoan na saray turista. Nanengneng ed loob na yurt so dunong na saray bibiin Kazakh diad panagburda, tan panaggaway abel tan carpet.

Inad-aro na saray pamilyan Kazakh ed probinsya iray kabayo da. Walay manga 21 ya termino da parad kabayo ya nandurumay labay ton ibaga, tan masulok ya 30 so termino da ya mandeskribe ed kolor na kabayo. Say malimgas ya kabayo et mabmablin regalo. Diad saray probinsya, anggan saray ugugaw nin lalaki et ipapasal da lan onlugan ed kabayo.

Say tradisyonal ya panangan na saray Kazakh et walan naynay so karne tan aliwan anagasang. Say paborito dan inumen et say koumiss, ya gawad gatas na kabayo tan ibabaga ran masustansia itan. Say sakey nin paborito da et say shubat ya medyo anakseng tan gawad gatas na kamelyo.

Welcome iray malabay ya ombisita tan man-tour ed branch office na Saray Tasi nen Jehova diad Almaty.