UGUGAW tan matatken ya walay pakayari dan man-magic, magana iran manananem, tan guapo iran bampira​—pigara labat irayan karakter diad dakel a libro, pelikula, tan video-game. Antoy epekto na saraya?

“Dinmakel iray manisia ed anyani diad apalabas ya dekada, manlapud sakey ed kada samploran Amerikano, ya anggad nagmaliw a sakey ed kada talora,” so insulat na professor na sociology ya si Claude Fischer. “Ngalngali doble so bilang na kabataan komparad matatken iran Amerikano so angibagan kinmonsulta irad psychic o managhula, manisia ed anyani, tan manisia ed haunted house.”

Kanian agla makapabigla ya saray istorya tungkol ed mauges ya espiritun onsapi ed too et onuuso lamet. “Say insikat na demonismo natan et lapud saray zombie, werewolf, tan bampira ya sikat nen imbeneg a dekada,” so insulat nen Michael Calia ed The Wall Street Journal.

Imbaga ed sakey ya report ya “anggan iner ed mundo, 25 anggad 50 porsiento so manisia ed anyani, tan saray anyani so mabetbet ya karakter ed saray literatura na dakel a kultura.” Ipapanengneng na sakey a survey ed United States ya ginawa na saray professor na sociology ya si Christopher Bader tan Carson Mencken ya “70 anggad 80 porsiento na Amerikano so talagan manisia ed sakey a klase na misteryoso iran nagagawa.”

Kasin anggapoy uges no naiingganyo kad espiritismo tan ed saray misteryoson nagagawa?

ANGGANO dakel so agmasyadon manisia ed saray misteryoson nagagawa tan espiritismo, ya iisipen dan is-istorya odino diad pelikula labat iratan, duma balet so ibabaga na Biblia. Nabasa ditan iray direktan ganggan tungkol ed espiritismo. Singa bilang, ibabaga na Deuteronomio 18:10-13: “Nepeg ya anggapoy siopaman ed sikayo a . . . manparles, manmahiko, mananap na saray tanda, sakey a managsalamangka, siopaman a kontrolen toy arum ed panamegley na mahiko, onkonsulta ed espiritista odino managparles, odino siopaman ya ontupleg ed inatey.” Akin? Onia ni ibabaga na Biblia: “Siopaman a manggagawa ed sarayan bengatla et makapadimla ed si Jehova . . . Nepeg kan magmaliw ya andiay pakabalawan ed arapan nen Jehova a Dios mo.”

Akin ya ibabawal na Biblia so amin ya klase na espiritismo?

MAUGES YA NANLAPUAN

Ibabaga na Biblia ya antis nin ginawa na Dios so dalin, ginawa to la ray minilyon ya espiritun pinalsa, odino anghel. (Job 38:4, 7; Apocalipsis 5:11) Kada anghel et sarag day mandesisyon—sarag dan pilien so maong o mauges. Wala ray nandesisyon ya manrebelde ed Dios tan tinaynan day tawen pian manggulo diad dalin. Kanian say dalin laingen et “napnoy inkaruksa.”—Genesis 6:2-5, 11; Judas 6.

Ibabaga na Biblia ya maksil so impluensya na sarayan mauges ya anghel tan ibabalang day minilyon ya totoo. (Apocalipsis 12:9) Sasamboten da ni ingen so panuusisa na totoo ed nagawad arapen.—1 Samuel 28:5, 7; 1 Timoteo 4:1.

Singa walay nitutulong na espiritismo ed totoo. (2 Corinto 11:14) Balet diad tua, labay na saray mauges ya anghel ya bulagen so nonot na totoo pian agda naamtaan so katuaan ed Dios.—2 Corinto 4:4.

Malinew ya ibabaga na Biblia ya mapeligro so antokaman ya walay koneksion tod mauges ya espiritu. Kanian nen naaralan na saramay labay day magmaliw ya disipulo nen Jesus so katuaan tungkol ed saraya, “saramay datin manmamahiko et tinipon da ray libro ra tan pinoolan” da, anggano mabmabli iratan.—Gawa 19:19.

Ontan met natan, dakel so nandesisyon ya itunda la ray datin gagawaen da ya walay koneksion tod espiritismo. Singa bilang, nen 12 años nen Maria,a singa walay pakayari ton amtaen no antoy nagawad arapen tan no walay nagawan peligro. Sikatoy manguusar na tarot card no manhuhula ed eskuelaan da. Tan lapud nagagawa iray ihuhula to, sikatoy naingganyo ed okultismo.

Say amta nen Maria, walay pakayarin inter na Dios ed sikato pian natulongay arum. “Pero singa walay aliwa,” so inamin to. “Uusaren ko ray tarot card pian hulaan so arum. Agko balet nahulaan so nagawad siak, anggano labalabay ko komon ya naamtaan iratan.”

Naguguloan si Maria lapud saray tepet ton agnaebatan. Kanian nampikasid Dios tan ag-abayag et wala ray Tasi nen Jehova ya akatongtong to, tan angiyaral ed sikato na Biblia. Naaralan tod Biblia ya agnanlapud Dios so pakayari ton amtaen so nagawad arapen. Naaralan to met ya saramay labay dan nakaaro so Dios et kaukolan dan iwasan so antokaman ya walay koneksion tod espiritismo. (1 Corinto 10:21) Antoy ginawa to ey? Imbantak nen Maria iray libro tan arum nin walay koneksion tod espiritismo. Natan et ibabaga to met lad arum iray katuaan ya nanaaralan tod Biblia.

Nen tinedyer ni si Michael, mahilig ya manbasa na libro tungkol ed saray karakter ya walay ekstraordinaryon pakayari da. “Labalabay ko iray sikat ya superhero ya sarag day onlad duman mundo,” so kuan to. Anggad agustoan met la nen Michael so manbasa na saray libro tungkol ed magic tan saray ritual ya walay koneksion tod si Satanas. “Curious ak kanian labalabay koy manbasa na libro tan manbantay na pelikula tungkol ed saratan,” so inamin to.

Balet diad panaaral nen Michael na Biblia, atalosan to ya kaukolan ton pilien ya maong no anto ray babasaen to. “Inlistak so amin ya walay koneksion tod espiritismo tan iniwasan kon amin iratan,” so kuan to. “Walay importantin naaralan ko. Ibabaga na Biblia diad 1 Corinto 10:31: ‘Gawa yo so amin a bengatla parad kigloriaan na Dios.’ Kanian natan tetepetan koy sarilik, ‘Kasin say pambasak ed saya et kontra ed kigloriaan na Dios?’ No on, agko la sirin basaen.”

Duga labat ya inkompara so Biblia ed silew. Ontulong itan pian malinew tayon nanengneng no anton talaga so espiritismo. (Salmo 119:105) Dakel ni so ibabaga na Biblia. Ipapaamta na satan ya onsabi panaon ya naekal la ray mauges ya espiritu ed mundo. Kanian, baleg so epekto na satan ed totoo. Singa bilang, ibabaga na Salmo 37:10, 11: “Agmanbayag et anggapo lay mauges; nengnengen moy kawalaan da, et anggapo la ra. Balet saray mauyamo et tawiren day dalin, tan manliket iran maong ed agnaparaan a kareenan.”