Pamakan ed Nilibo Panamegley na Pigaran Tinapay tan Sira

Malikeliket ya nampulong ed Galilea iray 12 apostol, tan imbalita dad si Jesus so “amin ya agawaan da.” Siempre, naksawan la ra. Balet anggapo ni panaon dan mangan ta dakel so totoon onsasabi tan onaalis. Kanian imbaga nen Jesus: “Ti’la, ta onla itayo ed sakey a nisulinek a pasen pian makapanpainawa itayon magano.”​—Marcos 6:30, 31, 31.

Linmugan irad baloto, nayarin asingger ed Capernaum, tan amaarap irad duman dalan diad bukig na Ilog Jordan ya walad biek na Betsaida. Balet anengneng ira na dakel a totoo tan akabatan itan na arum. Kanian batik irad gilig na dayat tan wadman la ra nen sinmabi may baloton niluganan nen Jesus.

Kaepas tod baloto, anengneng nen Jesus iray totoo tan akasian to ra, ta singa ra karneron anggapoy pastol da. Kanian “imbangat to ira na dakel a bengatla” nipaakar ed Panarian. (Marcos 6:34) Pinaabig to met “iramay nakaukolan a tambalen.” (Lucas 9:11) Lapud mansirunget la, inkuan na saray disipulo ed sikato: “Nisulinek iyan pasen tan onlalabi la; pasempet mo la ray totoo, pian makaonla rad saray baryo tan makasaliw iray naakan da.”​—Mateo 14:15.

Inmebat si Jesus: “Agda la kaukolan so onalis; ikdan yo ray naakan.” (Mateo 14:16) Anggano amta la nen Jesus no antoy gawaen to, sinubok toy Felipe: “Iner so pangaliwan tayo na tinapay ya ipakan ed sikara?” Si Felipe so tinepetan to ta tagad Betsaida, ya asingger diman. Balet, aliwan say pangaliw na tinapay so solusyon. Manga 5,000 ya lalaki so wadman. Tan no pati saray bibii tan ugugaw, ompan samplon libon amin! Inmebat si Felipe: “Kulang so tinapay a manbili na 200 a denario [say sakey a denario et sanagew a sueldo] anggano daiset labat so alaen na kada sakey.”​—Juan 6:5-7.

Nayarin agmakapanisiay Andres ya napakan iran amin kanian inkuan to: “Nia so melag ya ugaw a walay awit ton limaran tinapay a sebada tan duaran angkelag a sira. Balet onsusto la iya kasi parad dakdakel a totoo?”​—Juan 6:9.

Marso o Abril lad saman, tan asingger lay Paskua na 32 C.E. Birdi la ray kapalandeyan. Imbaga nen Jesus ed saray disipulo ya pairongen da ray totoo ed karikaan ya alimamplo tan nilasus. Inala toy limaran tinapay tan duaran sira tan akisalamat ed Dios. Insan to pinisagpisag iray tinapay tan inapag-apag toy duaran sira. Inter nen Jesus iratan ed saray disipulo to pian ibunog dad saray totoo. Makapakelaw ta angan tan naksel iran amin!

Kayari to, inkuan nen Jesus ed saray disipulo to: “Tipon yo iray akeran pisagpisag, ta pian anggapoy naperdi.” (Juan 6:12) Tinipon da tan napno so 12 ya baskit!