Duaran Mensahe a Nanlapud Dios

Ipapasen tayoy interon Biblia ya mensahe a nanlapud Dios. Inter itan na Ama tayod tawen pian ikdan itayoy instruksion. Imanoen balet so duaran espisyal ya mensahen impasabi to masulok a 2,000 taon lay apalabas. Impasabi iratan na anghel a say ngaran to et Gabriel, ya ‘akaalagey ed arapan na Dios.’ (Lucas 1:19) Panon ya impasabi na anghel iraman ya importantin mensahe?

Manga 3 B.C.E. so taon ed saman. Iner so angipaamtaan nen Gabriel ed inmunan mensahe? Diad kapukdolan a lugar na Judea, ya ag-arawi ed Jerusalem. Diman manaayam so saserdote nen Jehova a si Zacarias. Maedad la ra nen asawa ton si Elizabet, tan anggapoy anak da. Turno la nen Zacarias so manlingkor ya saserdote ed templo na Dios ed Jerusalem. Legan a sikatoy walad templo, biglan nampanengneng si Gabriel diad asingger ed altar na insenso.

Seguradon ataktakot si Zacarias. Balet pinakalma na anghel diad impangibagan: “Agka natatakot, Zacarias, lapud dinengel na Dios so masimoon a pikakasim, tan si Elizabet ya asawam et mangiyanak na sakey a laki, tan sikatoy ngaranan mo na Juan.” Inyarum nen Gabriel a si Juan et “magmaliw ya importante ed pakanengneng nen Jehova” tan ‘itarya to parad si Jehova so akaparaan a totoo.’​—Lucas 1:13-17.

Parad si Zacarias, singa imposible itan. Akin? Ta matatken la ran sanasawa. Kanian imbaga nen Gabriel: “Naemel ka tan agka makapansalita anggad agew na kagawa na sarayan bengatla, lapud agmo sinisia iray imbagak.”​—Lucas 1:20.

Legan na satan, mankelaw iray totoo no akin ya mabaybayag ed loob si Zacarias. Anggad pinmaway a siansia, balet naemel la. Mansisinyas labat lay Zacarias. Mapatnag ya walay anengneng ton makapakelkelaw legan a walad templo.

Kayari na impanlingkor nen Zacarias ed templo, sinmempet ed abung da. Ag-abayag, nanlukon si Elizabet! Legan ton aalagarey pananak to, agpinmaway ya limay bulan ed abung si Elizabet pian agnanengneng na totoo.

Insan nampanengneng lamet si Gabriel. Diad siopa? Diad si Maria, marikit a manaayam ed amianen na Jerusalem, diad rehyon na Galilea ed syudad na Nazaret. Antoy imbaga na anghel ed sikato? Inkuan to: “Pinaboran ka na Dios.” Inkuan ni nen Gabriel ed si Maria: “Manlukon ka tan mangiyanak kay sakey a laki, tan sikatoy ngaranan mo na Jesus.” Inyarum to ni: “Sikatoy magmaliw ya importante tan natawag ya Anak na Sankatagyan, . . . tan sikatoy manuley ya andi-anggaan bilang Ari ed sankaabungan nen Jacob, tan agmangangga so Panarian to.”​—Lucas 1:30-33.

Seguradon naapresyam so pribilehyo nen Gabriel a mangipasabi ed sarayan duaran mensahe. Diad pambasa tayo ni nipaakar ed si Juan tan Jesus, mas nalinewan tayo no akin ya talagan importante irayan mensahe a nanlapud tawen.