No Akin ya Magano Lay Kadederal

Aminpiga lan sinali nen Jesus ya pasesegen iray totoon nonotey relasyon dad Dios. Agawa lamet iya kayari impitongtong tod saray totoo diad paway na abung na sakey a Fariseo.

Binitla na arum ed sikara so sakey a trahedya. Imbaga da may nipaakar ed “saray taga Galilea a say dala ra et inlaok [na Romanon Gobernador a si Poncio] Pilato ed saray bagat da.” (Lucas 13:1) Antoy labay dan ibaga?

Nayarin saraya may tagad Galilea ya pinapatey nen namprotesta iray nilibon Judio lapud inusar nen Pilato so pundo ed kaban na templo pian manpagawa na banawang ya agusan na danum a paonlad Jerusalem. Ompan kakutsaba nen Pilato iray lider ed templo kanian nala toy kuarta. Inistorya na totoo iyan trahedya ta nayarin inisip dan inatey iratan ya tagad Galilea ta mauge-uges ira. Balet agmipaknay Jesus ed satan.

Intepet to: “Isipen yo kasin mas makasalanan irayan taga Galilea nen saray arum nin taga Galilea lapud agawad sikara irayan bengatla?” Say ebat to et andi. Balet inusar to itan ya trahedya pian pasakbayan iray Judio: “No agkayo magbabawi, ompatey kayo met ya amin.” (Lucas 13:2, 3) Binitla nen Jesus so sakey nin trahedya ya nayarin agano nin agawa tan posiblin mikonektaan met ed samay panggagawad satan ya banawang, intepet to:

“Saramay 18 atapilan na tori ed Siloam, a sengegay impatey da​—isipen yo kasin mas baleg so kasalanan da nen say arum ni ran totoo a manaayam ed Jerusalem?” (Lucas 13:4) Ompan inisip na totoo ya inatey iramay 18 lapud mauges ira. Aglamet mipakna si Jesus ed satan. Amta ton “say panaon tan saray ag-iilaloan a nagawa” et agnapaliisan tan nayarin aya met so rason ed sayan trahedya. (Eclesiastes 9:11) Balet, kaukolan ya makaaral iray totoo ed sayan agawa. “No agkayo magbabawi, ompatey kayon amin a singa sikara,” so kuan nen Jesus. (Lucas 13:5) Balet akin et idadanet to ’ya natan?

Lapud wala lad bandad sampot na ministeryo to. Oniay inter ton ilustrasyon ed satan: “Sakey a toon walaay kiew ya igos ya akatanem ed kaubasan to so linman nananap na bunga na satan, balet anggapoy aromog to. Insan inkuan tod samay managkimey ed kaubasan, ‘Taloy taon ak lan manaanap na bunga na sayan kiew ya igos, balet anggapoy aromog ko. Batang mo la! Akin a magmaliw laingen ya andi-kana so dalin lapud satan?’ Inyebat to, ‘Katawan, paulyanan mo nin sakey taon, anggad nakotkotan ko so paliber na satan tan naabonoan ko. No manbunga itan diad arapen, maong; balet no andi, ipabatang mo la.’”​—Lucas 13:6-9.

Masulok lan taloy taon ya papabiskegen nen Jesus so pananisia na saray Judio. Balet, dagdaiset so nagmaliw ya disipulo tan nibagan bunga na impansagpot to. Natan, diad komapat ya taon na ministeryo to, mas lalon nansagpot si Jesus. Singa to kokotkotan tan iikday abono so paliber na Judion kiew ya igos diad pampupulong tan pambabangat tod Judea tan Perea. Antoy resulta? Dagdaiset so Judion kinmiwas. Agnagbabawi so kaslakan ya totood sayan nasyon kanian asingger la ran naderal.

Ag-abayag kayari na satan, legay Sabaton, naimano lamet ya talagan dakel ed sikara so ag-kinmiwas. Manbabangat si Jesus ed sakey a sinagoga. Anengneng toy biin 18 taon lan abukot lapud pansasakiten na sakey ya demonyo. Akasian nen Jesus tan imbaga to: “Bii, nibulos ka lad sakit mo.” (Lucas 13:12) Intapew nen Jesus so lima tod bii, tan tampol ya akaalagey a diretso tan inggloria toy Dios.

Nampasnok so manangasikaso na sinagoga, tan imbaga ton: “Walay anemiran agew a nepeg a pankimey; kanian diad saratan labat ya agew so nayarin pampatambal yo, aliwan diad agew na Sabaton.” (Lucas 13:14) Amta na manangasikaso ya walay pakayari nen Jesus ya manpaabig; balet, nampasnokan to ray totoo ta oonla ran manpatambal legay Sabaton! Malinlinew so katunongan nen Jesus: “Mansimpisimpitan, agta uukbaran na kada sakey ed sikayo so baka odino asno to ed kuwadra tan iyaakar to itan a painumen legan na Sabaton? Agta manepeg labat sirin a sayan bii ya anak nen Abraham, tan 18 taon lan binalor nen Satanas, et naukbaran ed sayan inkabalor to, anggano agew na Sabaton?”​—Lucas 13:15, 16.

Abaingan so amin ya onsusumpad si Jesus, balet nanliketan na totoo so amin ya anengneng dan makapakelaw a ginawa to. Insan inulit nen Jesus dia ed Judea imay duaran ilustrasyon ya propesiya nipaakar ed Panarian. Imbaga to met la ’tan nen walad baloto diad Dayat na Galilea.​—Mateo 13:31-33; Lucas 13:18-21.