Nampanengneng ed Dakel so Pinaolin Jesus

Diad saman et Simba, Nisan 16, tan naeermenan iray disipulo. Agda natalosan no akin ya anggapoy karga na lubok. (Mateo 28:9, 10; Lucas 24:11) Diad saman met ya agew, si Cleopas tan sakey nin disipulo et inmalis ed Jerusalem paonlad Emaus, a manga 11 a kilometro kaarawi.

Legan iran manaakar, pantotongtongan da no antoy agawa. Insan walay akiulop ed sikara a dayo. Tinepet to: “Anto rayay pandidiskusyonan yo legan kayon manaakar?” Inmebat si Cleopas: “Akin, dayo kad Jerusalem a manaayam a biig ed totoo kanian agmo amta ray agawa diman nen imbeneg iran agew?” Tinepet lamet na dayo: “Nipaakar ed anto?”​—Lucas 24:17-19.

“Nipaakar ed si Jesus a Nazareno,” kuan da. “Iilaloan mi a sayan too so mangiliktar ed Israel.”​—Lucas 24:19-21.

Inistorya nen Cleopas tan samay kaiba to iray agawa ed saman ya agew. Imbaga da ya wala ray bibiin linmad lubok ya angiponponan ed si Jesus balet anengneng dan anggapoy karga na lubok tan sarayan bibii et naimatonan da so sakey a nikadkaduman agawa​—nampanengneng iray anghel ya angibagan mabilay si Jesus. Imbaga ra met ya wala ray arum nin linmad lubok tan “anengneng dan tuay imbaga na saray bibii.”​—Lucas 24:24.

Mapatnag ya awetwet iray duaran disipulo no antoy kabaliksan na sayan agawa. Pian nipetek so kanonotan da a mangaapekta lad puso ra, oniay inyebat na dayo a pakapatnagan a walay autoridad to: “O sikayo ran andiay-pakatalos tan mairap a manisia ed amin ya imbaga na saray propeta! Agta kaukolan a naeksperiensya na Kristo irayan bengatla ta pian makasabi ed gloria to?” (Lucas 24:25, 26) Insan impaliwawa to nid sikara so dakel a bengatla nipaakar ed Kristo a walad Kasulatan.

Nen akasabi ra ed asingger ed Emaus, labay ni na duaran disipulo so ondengel ed sikato, kanian inkuan da: “Tuloy ka nid sikami, ta onlalabi la.” Sikatoy inmabobon ya ontuloy ed sikara. Nen mangan la ra, nampikasi imay dayo, pinisagpisag toy tinapay, insan inderew tod sikara, kanian sikatoy abidbir da, balet diad saman et naandi ed pakanengneng da. (Lucas 24:29-31) Natan et segurado la ran mabilay si Jesus!

Malikeliket a deneskribe na duaran disipulo no antoy alikna ra: “Agta singa onaapoy so puso ta nen mitotongtong ed sikata diad dalan, legan ton lulukasan ed sikata so Kasulatan?” (Lucas 24:32) Nanapura iran pinmawil ed Jerusalem, tan asabian da diman iray apostol tan saramay akitipon ed sikara. Antis ya ibalita nen Cleopas tan say kaiba to so agawa, arengel dan inkuan na arum: “Tua ya apaoli so Katawan, tan nampanengneng ed si Simon!” (Lucas 24:34) Insan imbaga na duara no panon a nampanengneng ed sikara si Jesus. On, anengneng da met.

Natan et abigla so amin​—nampanengneng si Jesus diad kuarton kawalaan da! Makapakelkelaw iya ta intalak da ray puerta lapud natatakot irad saray Judio. Balet, siansia nin wadmay Jesus ya akaalagey ed pegley da. Inkuan tod sikara diad kalmadon boses: “Niwala komon ed sikayo so kareenan.” Balet ataktakot ira. Singa nen apalabas, “abaloan dan sakey ya espiritu so anengneng da.”​—Lucas 24:36, 37; Mateo 14:25-27.

Pian paneknekan ya tuay nanenengneng da tan aliwan imahinasyon da labat, tan sikatoy walaay pisikal a laman, impanengneng nen Jesus iray lima tan sali to tan inkuan to: “Akin et natatakot kayo, tan akin et manduaruway kapusoan yo? Nengneng yo iray limak tan salik, ta siak iya; diwit yo ak tan nengneng yo, ta say sakey ya espiritu et andian na laman tan pukepukel a singa nanenengneng yon walad siak.” (Lucas 24:36-39) Pinasyay liket da tan nikelawan ira balet singa agni ra makapanisia.

Pian natulongan ni ra a natalosan a tuay nanenengneng da, intepet to: “Walay naakan dia?” Dinerewan day inkalot a sira tan inakan to. Insan inkuan to: “Saraya imay imbagak ed sikayo nen kaiba ta kayo ni [antis na impatey ko], ya amin a nisulat ed Ganggan nen Moises tan ed sulat na saray Propeta tan Salmo nipaakar ed siak et nepeg a nasumpal.”​—Lucas 24:41-44.

Tinulongan nen Jesus si Cleopas tan samay kaiba to a natalosan so Kasulatan, tan ontan met so ginawa to natan ed sarayan amin a nantitipon: “Saya so nisulat: a manirap so Kristo tan diad komatlon agew et onoli manlapud inaatey, tan diad ngaran to et nipulong ed amin a nasyon so nipaakar ed panagbabawi pian naperdona iray kasalanan​—onggapo itan ed Jerusalem. Sikayoy magmaliw a tasi nipaakar ed sarayan bengatla.”​—Lucas 24:46-48.

Anggapod saman si apostol Tomas. Diad tinmumbok iran agew, malikeliket ya imbagad sikato na arum: “Anengneng mi so Katawan!” Inmebat si Tomas: “Agak balot manisia no agko nanengneng iray sugat na pasak ed saray lima to tan agko nidiwit so gamet ko ed saray sugat na pasak tan agko nidiwit so limak ed diking to.”​—Juan 20:25.

Kayari waloy agew, nantitipon lamet iray disipulo ya akatalak iray puerta, balet diad saman et wadman lay Tomas. Nampanengneng ed pegley da si Jesus ya nansulong na pisikal a laman tan imbano to ra: “Niwala komon ed sikayo so kareenan.” Insan inkuan tod si Tomas: “Iyan moy gamet mo dia, tan nengneng mo iray limak, tan idiwit mo itay limam ed diking ko, tan agka la manduaruwa noagta manisia ka la.” Inmebat si Tomas: “Katawan ko, Dios ko!” (Juan 20:26-28) Natan et agla manduaruway Tomas a si Jesus et mabilay bilang makapanyarin espiritu a mangirerepresenta ed si Jehova a Dios.

Inkuan nen Jesus: “Manisia ka la lapud anengneng mo ak la? Maliket iramay ag-akanengneng ingen ta manisia ra.”​—Juan 20:29.