Naisip mo la kasi ya basaen so Biblia balet agmo nagawaan lapud saray rason ya abitlad tagey? Parad dakel, singa mairap ya basaen so Biblia. Balet panon to no naamtaan mon makatulong so Biblia pian magmaliw a mas maliket so bilay mo? Tan panon to no naamtaan mon wala ray paraan pian mas na-enjoy mon basaen itan? Labay mo kasin nengnengen no panon kan natulongan na Biblia?

Nia ray pigaran imbaga na arum no panon iran atulongan nen ginapoan dan basaen so Biblia.

Imbaga nen Ezekiel, ya masulok ya 20 so taon to: “Dati, singa ak mandra-drive na kotse ya agko amta no iner so laen ko. Balet akatulong so pambabasak na Biblia pian walay direksion na bilay ko. Praktikal iray bilin to ya nausar kod inagew-agew.”

Oniay imbaga nen Frieda, ya masulok met lan 20 so taon to: “Mipepetang so ulok dati. Balet lapud pambabasak na Biblia, naaralan kon kontrolen so sarilik. Aliwa ak lan mairap ya pibagayan, kanian mas dakel so kaarok natan.”

Si Eunice, ya masulok ya 50 so taon to, et oniay imbaga to nipaakar ed Biblia: “Ontutulong itan pian magmaliw ak ya mas maong a too tan nauman iray makapuy ya apasalan ko.”

Singa ed naamtaan da tan na minilyon nin totoo, makatulong so pambasa na Biblia pian magmaliw ya mas maliket so bilay mo. (Isaias 48:17, 18) Ontan met, natulongan ka ya (1) manggaway maong iran desisyon, (2) nawalaan na tuan kakaaro, (3) nasarag so stress, tan (4) say sankaimportantian, naamtaan moy katuaan nipaakar ed Dios. Saray bilin na Biblia et nanlapud Dios, kanian parad pankaabigan mo no tumboken mo itan. Agbalot mangiter so Dios na makapuy ya bilin.

Say importante et igapom so pambasa. Anto ray gawaen mo pian mas mainomay mon nigapo so pambasa tan mas na-enjoy mo itan?

Antoy gawaen mo pian na-enjoy moy manbasa na Biblia tan minabang kan maong? Nia ray limaran suhestion ya akatulong ed dakel.

Manpili na dugan lugar. Mananap na lugar ya mareen. Ekalen iray nayarin makadisturbo pian makapampokus ka. Mas maong no wala kad maliwawa tan preskon lugar pian minabang kan maong ed pambabasam.

Dapat walaan ka na dugan panagnonot. Lapud say Biblia et nanlapud Ama tayod tawen, minabang kan maong no singa ka ugaw ya labalabay toy manpabangat ed maaron ateng to. No wala lay sarilim ya opinyon nipaakar ed Biblia, ekal mo ni itan ed isip mo pian nibangat ka na Dios.—Salmo 25:4.

Manpikasi antis ya manbasa. Saray walad Biblia et kanonotan na Dios, kanian kaukolan tayoy tulong to pian natalosan itan. Ibabaga na Dios ya mangiter na “masanton espiritu ed saramay onkekerew ed sikato.” (Lucas 11:13) Satan ya masanton espiritu so ontulong ed sika ya natalosan so kanonotan na Dios. Diad ilalabas na panaon, lukasan na satan so nonot mo pian natalosan mo “anggan saray aralem a bengatlan nipaakar ed Dios.”—1 Corinto 2:10.

Talosan moy babasaen mo. Aglabat basta manbabasa pian nasumpal mo itan. Nonot mo no antoy babasaen mo. Tepetan moy sarilim na singa onia ran tepet: ‘Anto ray anengneng kon ugali na sayan karakter ya babasaen ko? Panon kon iyaplika iya ed bilay ko?’

Manplano na gawaen mo. Pian nagunggonaan kad pambabasam na Biblia, iplanom la no antoy labay mon naamtaan ya talagan makatulong ed bilay mo. Singa bilang, onia ray nayarin nonoten mon gawaen: ‘Labay kon mas nakabat so Dios.’ ‘Labay koy magmaliw ya mas maong ya too tan mas maong ya asawa.’ Insan manpili na saray basaen mo ya makatulong pian nagawaan mo iraya.a

Makatulong irayan lima pian nigapom so pambasa. Balet panon mon mas na-enjoy so pambasam? Wala ray suhestion diad onsublay ya artikulo.

Boring? Odino eksayting? Antoy naliliknam ed pambasa na Biblia? Depende ed no panon mon gawaen itan. Nengnengen tayo iray nayarin gawaen mo pian mas eksayting tan na-enjoy moy manbasa.

Manpili na napantiwalaan tan modernon lenguahe ya translation. No say basaen mo et mairap ya natalosan odino daan iray salitan inusar, nayarin agmo na-enjoy so pambasam. Kanian mananap ka na Biblia ya mainomay ya natalosan tan makasabi ed pusom. Balet dapat ya inas-asikaso tan susto so impan-translate ed satan.a

Mangusar na modernon teknolohiya. Natan, say Biblia et aglabat available ed printed, noagta diad digital met. Arum ya Biblia et nabasa online odino na-download pian nabasa ed computer, tablet, odino cellphone. Diad arum ya bersion et wala ray nausar mon tools pian mainomay mon nanengneng iray bersikulo na Biblia ed parehon topic odino nikomparam iray nanduruman translation. No mas labay moy ondengel nen say manbasa, wala met iray audio recording na Biblia. Nae-enjoy na dakel ya totoo so ondengel legan iran manbiabiahe, manpepesak, odino manggagawa na arum ya kimey. Labay mon salien no antoy balibalid sika?

Usaren iray makatulong parad panagaral na Biblia. Wala ray nayarin usaren mo ya makatulong ed sika pian minabang kan maong ed pambabasam. Saray mapa na saray lugar ed Biblia et ontulong ed sika pian naamtaan mo no iner iray pasen ya nababasam tan mas naimadyin mo ray nagagawa. Saray artikulon singa saray walad sayan magasin odino say “Bangat na Biblia” ya seksion na website ya jw.org et ontulong ed sika pian naamtaan moy kabaliksan na dakel ya parte na Biblia.

Salien so arum ya paraan. No parad sika et singa mairap ya basaen so interon Biblia, gawam ya eksayting itan. Sarag mon iyuna so parte ya labalabay mo. No labay mon naamtaan so nipaakar ed saray kabkabat ya totoo ed Biblia, nayarin salien mon sansakeyen ya basaen so nipaakar ed sikara. Say alimbawa na ontan ya paraan et nanengneng ed kahon ya “Aralen a Maong so Biblia—Kabaten Iray Totoo Ditan.” Odino ompan labay mon basaen so Biblia base ed topic odino pantutumbokan na saray agawa. Anto kasi no salien moy sakey ed saratan ya paraan?

Say Biblia et aliwan ordinaryon libro. Karga na satan iray bilin na Manamalsa tayo. (2 Timoteo 3:16) Say mensahe na satan et baleg so epekto to ed sikatayo. Diad tua, imbaga na Biblia: “Say salita na Dios et mabilay tan makapanyari.” (Hebreo 4:12) Walay pakayari na satan ya umanen so bilay tayo diad duaran paraan—mangiiter na giya ed inagew-agew a kabibilay tayo natan tan ontutulong ed sikatayo ya nakabat so Dios tan naamtaan iray promisa to.—1 Timoteo 4:8; Santiago 4:8.

Gawaen ton mas maabig so bilay mo natan. Makatulong so Biblia ed kada aspekto na bilay mo. Mangiiter itan na praktikal ya bilin nipaakar ed saraya.

• Relasyon mo ed arum.​—Efeso 4:31, 32; 5:22, 25, 28, 33.

• Emosyon tan pangasikasod laman.​—Salmo 37:8; Proverbio 17:22.

• Dugan kagagawa.​—1 Corinto 6:9, 10.

• Pangasikaso ed materyal ya pankaukolan.​—Proverbio 10:4; 28:19; Efeso 4:28.a

Walay sanasawa ed Asia ya naapresya dan maong so bilin na Biblia. Singa dakel ya balon kasal, nanairapan iran man-adjust ed personalidad na kada sakey tan no panon iran mantongtong. Balet tinumbok da ray nababasa ra ed Biblia. Antoy resulta? Imbaga na asawan laki ya si Vicent: “Akatulong ed siak iray nababasak ed Biblia pian naayos iray problema min sanasawa diad maaron paraan. Ginawa mi ray ibabaga na Biblia kanian maliket kami.” Imbaga met na asawa ton si Annalou: “Akatulong ed sikami so pambabasa mi na saray alimbawa ed Biblia. Natan et maliket tan kontento ak ed bilay min sanasawa tan diad saray plano min gawaen ed arapen.”

Nakabat moy Dios. Aglabat itan akatulong ed bilay dan sanasawa, ta imbaga nen Vicent: “Diad pambabasak na Biblia, aliknak ya mas maapit ak ed Dios.” Saya so importante ya naobserbaan nen Vicent—say Biblia so ontulong ed sika ya nakabat moy Dios. No gawaen mo itan, agka labat minabang ed saray bilin na Dios noagta nakaarom met. Tan naamtaan mo ya wala ray ibabaga to nipaakar ed mas maabig ya arapen, a diad satan et panliketan moy “tuan bilay”—ya agbalot manampot. (1 Timoteo 6:19) Anggapo lay arum a libro ya makapangiter na ontan ya ilalo.

No ginapoan mo lan basaen so Biblia tan itultuloy mon gawaen itan, naeksperiensyam met iratan ya resulta—mas maabig ya bilay natan tan nakabat moy Dios. Pero legan mon babasaen so Biblia, nayarin dakel so naisip mon tepet. No ontan, nonot moy maong ya alimbawa na sakey ya Etiopen opisyal ya nambilay 2,000 taon lay apalabas. Amayamay so tepet to ed Biblia. Nen walay nantepet ed sikato no natatalosan toy babasaen to, say ebat to: “Panon kon natalosan no anggapoy mangipaliwawa ed siak?”b Insan inawat toy tulong na sakey ya kualipikadon managbangat na Biblia a si Felipe, sakey a disipulo nen Jesus. (Gawa 8:30, 31, 34) No ontan so naliliknam ya labay mon mas dakel so naamtaan mo ed Biblia, iimbitaan mi kan man-request online diad www.pr2711.com/pag odino mansulat ed sankaasinggeran ya address ya walad sayan magasin. Nayari met ya kontaken mo ray Tasi nen Jehova ya asingger ed sikayo odino bisitaen so Kingdom Hall diad lugar yo. Agta balibali no basaen moy Bibliam, tan paigiya ka ed satan pian magmaliw ya mas maabig so bilay mo?