Parad arum et mairap ya aroen so Dios. Iisipen dan sikatoy agnatalosan, arawdawi, odino maruksa ni ingen. Oniay ibabaga ra:

• “Idadasal kod Dios ya tulongan to ak, balet pakaliknak et sikatoy arawdawi tan singa agnaasinggeran. Parad siak, say Dios et sakey a personan anggapoy pakalikna to.”​—Marco, Italy.

• “Talagan labalabay koy manserbi ed Dios, pero singa arawdawi. Say naiisip ko et sikatoy maruksan Dios ya say gagawaen to labat et dusaen itayo. Agak manisian sikatoy maaro.”​—Rosa, Guatemala.

• “Nen ugaw ak, panisiaan kon nenengnengen na Dios iray lingo tayo tan akaparaan ya manusad sikatayo no kaukolan. Insan nen kien, aliknak ya anggapoy pibabali tod sikatayo. Say Dios et singa sakey a prime minister ya uuleyan to ray sakop to balet diad tua et ag-interesado ed sikara.”​—Raymonde, Canada.

Parad sika, kasin mairap ya aroen so Dios? Nilasus taon la yan itetepet na saray Kristiano. Diad tua legan na taon 500 anggad manga 1500 C.E., dakel ed saray membro na Kakristianoan so agmanpipikasi ed Makapanyarin amin ya Dios. Akin? Lapud natatakot irad sikato. Oniay imbaga na sakey ya historian a si Will Durant: “Labay kasi na sakey a nankasalanan so manpikasi ed Dios ya makapataktakot tan mairap ya asinggeran?”

Akin ya ibabaga ran say Dios et “makapataktakot tan mairap ya asinggeran”? Anton talagay ibabangat na Biblia nipaakar ed Dios? Kasin natulongan kan aroen so Dios no naamtaan moy katuaan nipaakar ed sikato?

SAY SISIAEN NA DAKEL

“Agkami makapanpakna no kasin walay ngaran na Dios, tan no bilang wala, anto kasi itan?”​—Professor David Cunningham, Theological Studies.

SAY KATUAAN MANLAPUD BIBLIA

Imbaga na Dios: “Siak si Jehova, satan so ngaran ko.” (Isaias 42:8) Say labay ya ibaga na Hebreon ngaran ya Jehova et “Pagmaliwen To.”​—Genesis 2:4.

Labay nen Jehova ya usaren tayoy ngaran to. Oniay ibabaga na Biblia: ‘Tawag yo so ngaran to, ipaliwawa yo so saray gawa to ed nanleleetan na balbaley, uliten yo pian say ngaran to nitandoro.’​—Isaias 12:4.

Inusar nen Jesus so ngaran na Dios. Oniay impikasi tod si Jehova: “Impakabat ko ed sikara [saray disipulo nen Jesus] so ngaran mo tan ipakabat ko itan.” Akin et impakabat nen Jesus so ngaran na Dios ed saray disipulo to? Intuloy to: “Ta pian nipatnag da met so aro ya impatnag mo [say Dios] ed siak tan mikasakey ak ed sikara.”​—Juan 17:26.

NO AKIN YA IMPORTANTIN PANNONOTAN

“Say toon agto amtay ngaran na Dios et agton talaga kabat so Dios bilang sakey a persona, tan agto naaro no say pakaamta to et sakey labat a puersa, aliwan persona,” so insulat na sakey a theologian ya si Walter Lowrie.

Si Victor et sinimban mimimisa, balet agton balot alikna ya kabat toy Dios. “Insan naamtaan ko ya say ngaran na Dios et Jehova, diad saman et singa kami pormal ya nankabat,” so kuan to. “Akabat kon siansia imay Sakey ya dakel lay arengel ko nipaakar ed sikato. Diad saman ko labat akabat so Dios bilang tuan Persona tan nagmaliw ya kaarok.”

Onapit met si Jehova ed saray manguusar ed ngaran to. Diad ‘saramay mannononot ed ngaran to,’ oniay promisa na Dios: ‘Iyansakit ko ra naani, singa sakey a toon iyansakit toy dili ya anak to a laki a manlilingkor ed sikato.’ (Malaquias 3:16, 17) Bendisyonan met na Dios iramay ontatawag ed ngaran to. Ibabaga na Biblia ya “balang sakey ya ontatawag ed ngaran nen Jehova et nilaban.”​—Roma 10:13.

SAY SISIAEN NA DAKEL

Say Kristianon relihyon ya walaan na “taloran manunan klase, say Romano Katoliko, Orthodox, tan Protestante et manisiad sakey a Dios ed taloran Persona: Dios Ama, Dios Anak, tan Dios Espiritu Santo. Unong ed Kristianon teolohiya, sayan sisiaen et agmangibabagan walay taloran dios noagta sarayan taloran persona et saksakey.”​—The New Encyclopædia Britannica.

SAY KATUAAN MANLAPUD BIBLIA

Agbalot inisip nen Jesus, say Anak na Dios, ya sikatoy mipetekan o mipara ed Ama to. Imbes, imbaga to: “Onla ak ed Ama, lapud say Ama et babaleg nen say siak.” (Juan 14:28) Imbaga to met ed sakey ed saray papatumbok to: “Onsegep ak ed kawalaan nen Amak tan Ama yo tan Dios ko tan Dios yo.”​—Juan 20:17.

Say masanton espiritu et aliwan sakey a persona. Saray Kristiano nensaman et ‘apano na masanton espiritu,’ tan imbaga nen Jehova ya “Ikalbok so espirituk ed amin a klase na totoo.” (Gawa 2:1-4, 17) Say masanton espiritu et agkabiangan na Trinidad. Saya et aktibon puersa na Dios.

NO AKIN YA IMPORTANTIN PANNONOTAN

Impaliwawa na saray Katolikon scholar ya si Karl Rahner tan Herbert Vorgrimler, a say Trinidad et “agnatalosan no anggapoy mangipaamta, tan anggano walay mangipaamta, ag-itan sigpot a natalosan.” Sarag mo kasin aroen so sakey ya imposiblin natalosan odino nakabat? Say doktrinan Trinidad sirin et makaamper ed pangabat tan pangaro ed Dios.

Atalosan nen Marco, ya abitlad akaunan artikulo, a say Trinidad et makaamper. Inkuan to: “Inisip kon iyaamot na Dios so inkasikato ed siak kanian sikatoy lalo laingen ya arawdawi, sakey a misteryo, tan mairap ya asinggeran.” Balet, ibabaga na Biblia ya say Dios et “ag-arawi ed balang sakey ed sikatayo.” (Gawa 17:27) Agto iyaamot so inkasikato, labay ton nakabat tayo. Imbaga nen Jesus: “Amta mi so dadayewen mi.”​—Juan 4:22.

“Nen naamtaan kon say Dios et agkabiangan na Trinidad,” so kuan nen Marco, “awalaan ak ya siansia na maapit a relasyon ed sikato.” No manisia tayon si Jehova et sakey a tuan Persona, aliwan misteryo, ag-itayo nairapan ya aroen. “Say agmangaro agto kabat so Dios,” so kuan na Biblia, “ta say Dios sikato so aro.”​—1 Juan 4:8.

SAY SISIAEN NA DAKEL

“Kayari ipatey na totoon makasalanan, saray kamarerwa ra et tampol ya onlad impierno tan manirap irad ‘agmanganggan apoy.’” (Catechism of the Catholic Church) Ibabaga na arum ya lider na relihyon a saramay walad impierno et sigpot ya nisian ed Dios.

SAY KATUAAN MANLAPUD BIBLIA

“Say kamarerwa a mankasalanan ompatey.” (Ezequiel 18:4) Saray inaatey et “agda amta so bengatla.” (Eclesiastes 9:5) No say kamarerwa et ompatey tan anggapo lay amta to, panon to nin manirap ed “agmanganggan apoy” odino naliknay sakit lapud inkisian ed Dios?

Diad Biblia, say Hebreo tan Griegon salitan mabetbet ya ipapatalos ya “impierno” et diad tua et ontutukoy ed kaslakan ya ponponan o lubok na totoo. Alimbawa, sanen maniirap a maong si Job ed sakit, oniay impikasi to: “Komon ta iyamot mo ak ed lubok ko [“diad impierno,” Douay-Rheims Version].” (Job 14:13, Holy Bible—Easy-to-Read Version) Labay nen Job so manpainawa, aliwan diad pasen na panamairapan odino inkisian ed Dios, noagta diad lubok.

NO AKIN YA IMPORTANTIN PANNONOTAN

No maruksa so Dios, ag-itayo napaapit ed sikato. “Manlapu lad inkianak ko, nibangat ed siak so doktrina nipaakar ed impierno,” so imbaga nen Rocío, a taga Mexico. “Natatakot ak ya maong ed Dios kanian agko naimadyin a walay anggan sakey a maabig ya kualidad to. Naisip kon sikatoy mapasnok tan anggapoy konsiderasyon to.”

Nauman so panmoria nen Rocío lapud malinew ya bangat na Biblia nipaakar ed panangukom na Dios tan say kipapasen na inatey. “Singa ak nibulos​—biglan linmemew so ambelat ya naliliknak,” so kuan to. “Manlapu lad saman manisia ak lan iisipen na Dios so pankaabigan tayo, ya inaro to tayo, tan sarag ko met ya aroen. Singa ama ya mangitatabin ed saray anak to tan say labay to et parad pankaabigan da.”​—Isaias 41:13.

Gagawaen na dakel so anggaay nayarian dan magmaliw ya relihyoso lapud antakot day onlad impierno, balet aglabay na Dios ya manserbi tayod sikato lapud natatakot tayod sikato. Imbes, imbaga nen Jesus: “Arom si Jehova a Dios mo.” (Marcos 12:29, 30) Sakey ni, no natan et amta tayon mahustisya so Dios, napanmatalkan tayo met so panangukom tod arapen. Matalek tayo met ya nibaga so imbaga na kaaro nen Job ya si Elihu: “Arawi ed Dios, a sikato manggawa na karelmengan, tan ed Makapanyarin amin, a manggawa na inkauges.”​—Job 34:10.

Aminsan, diad Jerusalem, itotongtong nen Jesus so nipaakar ed Ama ton si Jehova tan ipapaamta to ray aliwan bangat na saray lider na relihyon diad panaon to. (Juan 8:12-30) Say imbaga tod saman et mangibangat ed sikatayo no panon tayon nausisa iray sisiaen nipaakar ed Dios natan. Imbaga nen Jesus: “No mansiansia kayo ed salitak, peteg a sikayo iray disipulok, tan naamtaan yo so katuaan, tan say katuaan so mangibulos ed sikayo.”​—Juan 8:31, 32.

“Mansiansia kayo ed salitak.” Diad saya et angiter si Jesus na basiyan pian naamtaan no kasin “katuaan” iray ibabangat na relihyon. No walay ibabaga na arum nipaakar ed Dios, tepetan moy sarilim, ‘Kasin base iratan ed salita nen Jesus tan ed arum nin ibabagay Masanton Kasulatan?’ Aligen iramay dinmengel ed si apostol Pablo ya ‘maalwar dan inusisa so Kasulatan ya inagew-agew no kasin tua iraman a bengatla [saray bengatlan inaral da].’​—Gawa 17:11.

Si Marco, Rosa, tan Raymonde ya abitlad inmunan artikulo na sayan serye et maalwar dan inusisa iray sisiaen da diad impanaral na Biblia kaiba iray Tasi nen Jehova. Antoy naaralan da?

Marco: “Inusar na nambangat ed sikami so Biblia pian naebatan so amin ya tepet mi nen asawak. Naaralan min aroen si Jehova, tan mas naaro mi met so sakey tan sakey bilang sanasawa!”

Rosa: “Nensaman, say amtak ed Biblia et sakey labat a libro na pilosopiyay too ya manasalin ipaliwawa so nipaakar ed Dios. Balet kalkalna ya aromog kod Biblia iray ebat ed saray tepet ko. Natan et tudtua ed siak si Jehova. Sikatoy Sakey ya panmamatalekan ko.”

Raymonde: “Impikasik ed Dios ya tulongan to ak pian sikatoy nakabat ko. Ag-abayag, nanaral kami nen asawak na Biblia. Naaralan min siansia so katuaan nipaakar ed si Jehova! Agaylay liket mi nen naamtaan mi personalidad to bilang Dios.”

Aglabat ipapanengneng na Biblia iray katilaan nipaakar ed Dios noagta ipapaamta met na satan so katuaan nipaakar ed saray balibalin kualidad to. Satan a Salita na Dios et ontulong ed sikatayo “pian naamtaan tayo iray bengatla a mapangasin inter ed sikatayo na Dios.” (1 Corinto 2:12) Maabig no amtaen mon mismo no panon ya ebatan na Biblia iray kaslakan balet ta importante iran tepet nipaakar ed Dios, say gagala to, tan say arapen tayo? Basaen iray ebat ed sarayan tepet diad “Bible Teachings > Bible Questions Answered” diad www.pr2711.com. Sarag mo met so man-request na panag-aral na Biblia ed satan a Web site odino diad Saray Tasi nen Jehova. Segurado kami ya no gawaen mo itan, naamtaan mon mas mainomay ya aroen so Dios nen say iilaloan mo.