Ginarantiyaan nen Jehova so Im-promise To ya Paraiso

1. Antoy mensahe nen propetan Isaias ed saray kapara ton Israelita?

IMBAGA nen propetan Isaias ya si Jehova et “Dios na katuaan.” Say literal ya kahulugan to may salita ya in-translate ya “katuaan” et “amen.” (Isa. 65:16, paimanod leksab) Antoy labay ya ibaga na “amen”? Say kabaliksan to et “ontan pa komon” o “segurado.” Diad Biblia, no walay imbaga nen Jehova o Jesus, maslak et nauusar so salitan “amen” pian garantiyaan ya tua itan. Kanian nen imbaga nen Isaias ya si Jehova et “Dios na katuaan,” singa ibabaga tod saray kapara ton Israelita ya napantiwalaan da iray sipan o promise nen Jehova ed sikara. No antoy imbaga to, nagawan-nagawa!

2. Akin et makapantiwala tayo ya nagawa iray sipan nen Jehova, tan anto ran tepet so pantongtongan tayo?

² Kasin napantiwalaan tayo met iray sipan nen Jehova ya nagawad arapen? Kayari na manga 800 ya taon manlapud panaon nen Isaias, imbaga nen apostol Pablo so rason no akin ya makapantiwala tayod saray sipan nen Jehova. Kuan to: “Imposiblin mantila so Dios.” (Heb. 6:18) Singa onia ’tan ay: Sakey labat ya klase na danum so ompaway ed subol. No maasin, maasin; no matabang, matabang. Ontan met si Jehova. Sikato so lapuan o Subol na katuaan kanian agnayarin panlapuan na tila. Makapantiwala tayo sirin ed amin ya ibabaga to, pati ed amin ya promise to ya nagawa diad arapen. Pantongtongan tayo ed sayan artikulo irayan tepet: Antoy im-promise nen Jehova ya gawaen to parad sikatayo? Tan panon ya ginarantiyaan nen Jehova ya ontua itan?

ANTOY IM-PROMISE NEN JEHOVA?

3. (a) Anton promise nen Jehova so espisyal ed saray lingkor To? (Apocalipsis 21:3, 4) (b) Antoy reaksion na arum no ipupulong tayo itan ed sikara?

³ Pantongtongan tayo so promise nen Jehova ya espisyal ed saray lingkor to. (Basaen so Apocalipsis 21:3, 4.) Im-promise nen Jehova ya onsabi panaon et “anggapo lay patey, anggapo met lay panermen tan panakis tan panotot.” Diad tua, ayan teksto so paborito tayon ibasa ed ministeryo ta labay tayon ipaamta ya walay bilay ya andi-anggaan diad Paraison dalin. Anto balet so reaksion na arum no ibasa tayo itan ed sikara? Ompan ibaga ra, “Singa imposible itan.”

4. (a) Nen im-promise nen Jehova so Paraiso, anto lay amta to ya nagawa diad panaon tayo? (b) Nen nam-promise si Jehova, anto ni ginawa to?

⁴ Nen impaisulat nen Jehova ed si apostol Juan iyan promise tungkol ed Paraiso, amta nen Jehova ya diad panaon tayo et ipulong tayo itan ya ilalo. Amta to met ya mairap itan ya panisiaan na arum. (Isa. 42:9; 60:2; 2 Cor. 4:3, 4) Anto sirin so gawaen tayo pian nakombinse tayo ray totoo tan say sarili tayon mismo ya talagan nagawa so ibabaga na Apocalipsis 21:3, 4? Diad tua, nen im-promise itan nen Jehova, imbaga to iray makakombinsin rason no akin ya makapantiwala tayo ed satan. Anto iratan ya rason?

GINARANTIYAAN NEN JEHOVA SO PROMISE TO

5. Anton teksto so mamabiskeg ed tiwala tayo ed promise nen Jehova, tan anto ray nabasa ditan?

⁵ Kayarin imbaga nen Jehova imay promise to tungkol ed Paraiso, imbaga ton tampol iray rason no akin ya makapantiwala tayo ed satan. Oniay nabasa tayo: “Inkuan na samay akayurong ed trono: ‘Gagawaen kon balo so amin a bengatla.’ Inkuan to ni: ‘Isulat mo, ta sarayan salita et napanmatalkan tan tua.’ Tan inkuan tod siak: ‘Agawa la iraya! Siak so Alfa tan say Omega, say gapo tan say sampot.’”​—Apo. 21:​5, 6a.

6. Akin et pabiskegen na Apocalipsis 21:5, 6 so tiwala tayo ed saray promise nen Jehova?

⁶ Akin et pabiskegen na sarayan bersikulo so tiwala tayo ed promise nen Jehova? Diad satan ya teksto, singa manpipirma si Jehova na titulo o dokumento bilang garantiya ya talagan gawaen toy promise to.b Amay promise nen Jehova et walad Apocalipsis 21:3, 4, pero amay “pirma” to et walad bersikulo 5 tan 6. Ginarantiyaan to so promise to pian agtayo pandudaan. Sansasakeyen tayo pan aralen iray salita ya inusar nen Jehova ed saratan ya bersikulo.

7. Antoy nabasan introduksion ed bersikulo 5, tan akin et espisyal iman?

⁷ Antis ya imbaga nen Jehova iray rason no akin ya makapantiwala tayo ed saray promise To, oniay nabasan introduksion: “Inkuan na samay akayurong ed trono.” (Apo. 21:5a) Akin et espisyal iya? Diad interon libro na Apocalipsis, taloran beses labat ya nabasa ya si Jehova a mismo so mansasalita, tan sakey iyay walad Apocalipsis 21:5. Amay nabasa tayo sirin ditan ya garantiya et ag-imbaga na sakey ya makapanyarin anghel, aliwa met ya si Jesus so mansasalita, noagta si Aman Jehova ya mismo—say Dios ya “agto nayarian so mantila.” (Tito 1:2) Ambelat itan ya rason pian panisiaan tayo imay nabasa ed Apocalipsis 21:5, 6.

“GAGAWAEN KON BALO SO AMIN A BENGATLA”

8. Antoy imbaga nen Jehova pian idanet ya talagan ontua so sipan to? (Isaias 46:10)

⁸ Antoy imbaga nen Jehova, “samay akayurong ed trono”? Kuan to: “Gagawaen kon balo so amin a bengatla.” (Apo. 21:5) Kasin naimanom ya say imbaga nen Jehova et, “Gagawaen kon balo,” aliwan “Gawaen kon balo”? Tua ya diad arapen ni nagawa iray sipan to, pero imbaga to ya singa la iratan nagagawa pian idanet ya seguradon ontua iratan.​—Basaen so Isaias 46:10.

9. (a) Antoy duara ya tutukoyen nen Jehova nen imbaga ton “Gagawaen kon balo so amin a bengatla”? (b) Antoy nagawa ed kaplesan ya “tawen” tan “dalin”?

⁹ Nen imbaga nen Jehova ya, “Gagawaen kon balo so amin a bengatla,” antoy labay ton ibaga? (Apo. 21:5) Diad Apocalipsis kapitulo 21, ontutukoy iya ed duaran gawaen nen Jehova. Unona, walay salatan to. Komadua, walay pasimbaloen to. Pantongtongan tayo may unaan. Antoy salatan nen Jehova? Oniay nabasa ed Apocalipsis 21:1: “Naandi la imay datin tawen tan samay datin dalin.” Isisimbolo na “datin tawen” so amin ya gobierno na too ya kontrolado nen Satanas tan saray demonyo to. (Mat. 4:8, 9; 1 Juan 5:19) No maminsan diad Biblia, say salitan “dalin” et ontutukoy ed mismon totoo. (Sal. 66:4; 96:1) Kanian say “datin dalin” et isisimbolo toy lipunan na mauges ya totoo. Ag-apigeren o parakepen nen Jehova so kaplesan ya “tawen” tan “dalin.” Deralen to iratan, insan to salatan na “sakey a balon tawen” (ya isisimbolo toy balon gobierno) tan “sakey a balon dalin” (ya isisimbolo toy lipunan na matunong ya totoo).

10. Antoy pasimbaloen nen Jehova?

¹⁰ Diad Apocalipsis 21:5, ag-imbaga nen Jehova ya, “Manggawa ak na balo iran bengatla.” Say imbaga to et: “Gagawaen kon balo so amin a bengatla.” Labay ton ibaga, pasimbaloen to iyay literal ya dalin tan saray totoo. Impropesiya nen Isaias ya pasimbaloen nen Jehova so planetan Dalin ya anggad magmaliw ya singa hardin na Eden so interon mundo. Saray totoo ey, panon iran pasimbaloen nen Jehova? Gawaen ton perpekto so kada sakey ed sikara. Ekalen to lay amin ya sakit tan kapansanan. Paabigen to ray bulag, piley, tan saray emel. Bilayen to ni ingen iray inatey!​—Isa. 25:8; 35:1-7.

“SARAYAN SALITA ET NAPANMATALKAN TAN TUA. . . . AGAWA LA IRAYA!”

11. Antoy ingganggan nen Jehova ed si apostol Juan, tan akin?

¹¹ Anto ni imbaga nen Jehova pian nagarantiyaan so sipan to? Oniay imbaga to ed si Juan: “Isulat mo, ta sarayan salita et napanmatalkan tan tua.” (Apo. 21:5) Nen ingganggan nen Jehova si Juan ya isulat to iray sipan ya nagawad arapen, imbaga To met so rason no akin ya isulat to iratan. Kuan to: “Sarayan salita et napanmatalkan tan tua.” Maong labat ta insulat nen Juan irayan napantiwalaan ya promise nen Jehova. Lapud satan, malinlinew ed isip tayo so promise na Dios ya Paraison dalin, tan natan ni labat et naimadyin tayo la ray awaten tayon bendisyon.

12. Akin et imbaga nen Jehova ya: “Agawa la iraya”?

¹² Antoy sinmublay ya imbaga nen Jehova? Kuan to: “Agawa la iraya!” (Apo. 21:6) Akin et imbaga nen Jehova ya singa asumpal lan amin so im-promise to? On ta amta to ya anggapon balot so makahadlang ed gagala to. Pero wala ni imbaga to pian nagarantiyaan so promise to. Anto ’tan ey?

“SIAK SO ALFA TAN SAY OMEGA”

13. Akin et imbaga nen Jehova ya: “Siak so Alfa tan say Omega”?

¹³ Singa abitla nen niman, taloran pagkakataon ya si Jehova ya mismo so mansasalita diad saramay pasingawey ya anengneng nen Juan. (Apo. 1:8; 21:5, 6; 22:13) Tan diad saratan ya pagkakataon, ibabaga met nen Jehova ya: “Siak so Alfa tan say Omega.” Diad alphabet na saray Greek, say unonan letra et alfa tan say sampot et omega. Kanian nen imbaga nen Jehova ya sikato so “Alfa tan say Omega,” singa to ibabaga ya no antoy inggapo to et sumpalen ton sumpalen. Sikatoy ag-ontunda anggad ag-itan nagawa.

14. (a) Kapigan ya singa imbaga nen Jehova so “Alfa,” tan kapigan ya singa to ibagan “Omega”? (b) Antoy ipapaseguro na Genesis 2:1-3?

¹⁴ Nen pinalsa nen Jehova si Adan tan Eva, imbaga tod sikara no antoy gagala to parad totoo tan dalin. Oniay imbaga na Biblia: “Benendisyonan ira na Dios tan inkuan tod sikara: ‘Manbunga kayo tan manparakel kayo, pano yoy dalin tan uleyan yo.’” (Gen. 1:28) Nen imbaga itan nen Jehova, singa to imbagan “Alfa.” Say gagala to et napano so dalin na perpekto tan maunor ya ananak nen Adan tan Eva tan gawaen da iyan Paraiso. No nagawa la itan, ditan la singa ibaga nen Jehova so “Omega.” Diad tua, kayari ton pinalsa so “tawen tan say dalin tan say amin a bengatlan wadtan,” walay ginawa nen Jehova pian garantiyaan so gagala to. Nabasa itan diad Genesis 2:1-3. (Basaen.) “Ginawa [ton] sagrado” so komapiton agew. Labay ton ibaga, inggana to itan ya agew parad pakasumpal na gagala to. Singa ibabaga nen Jehova ya diad sampot na komapiton agew et seguradon asumpal la so gagala to parad totoo tan dalin.

15. Akin et nayarin inisip nen Satanas ya ahadlangan to so gagala nen Jehova parad totoo?

¹⁵ Nen nanrebelde si Adan tan Eva, nagmaliw iran makasalanan tan impatawir day kasalanan tan patey ed saray ananak da. (Roma 5:12) Nen onman so agawa, seguro inisip nen Satanas ya ahadlangan toy gagala na Dios ya napano so dalin na perpekto tan matunong ya totoo, tan imposible lan naibaga nen Jehova so “Omega.” Seguro, inisip nen Satanas ya anggapo lay marakep ya opsyon nen Jehova. Singa bilang, no say desisyon nen Jehova et pateyen toy Adan tan Eva tan manggawa lamet na perpekton sanasawa, walay rason nen Satanas ya ibagan matila so Dios. Akin ey? On ta diad Genesis 1:28, say imbaga nen Jehova ya manbilay diad dalin et saray ananak nen Adan tan Eva.

16. Akin et posiblin inisip nen Satanas ya talagan pinmalpak la so gagala nen Jehova?

¹⁶ Anto ni posiblin naisip nen Satanas ya opsyon nen Jehova? Seguro inisip to ya paulyan labat nen Jehova ya nawalaan na ananak si Adan tan Eva anggano anggapo ed saratan so magmaliw ya perpekto. (Ecl. 7:20; Roma 3:23) No ontan so nagawa, walay rason nen Satanas ya ibagan palpak so gagala nen Jehova. Akin ey? On ta say gagala nen Jehova et perpekto tan maunor ya totoo so manayam ed Paraison dalin.

17. Panon ya sinolusyonan nen Jehova so impanrebelde nen Satanas tan na inmunan sanasawa, tan akin et atan so sankaabigan ya solusyon? (Nengnengen met so litrato.)

¹⁷ Seguro abigbigla si Satanas ed solusyon nen Jehova ed impanrebelde to tan na inmunan sanasawa. (Sal. 92:5) Pinaulyanan nen Jehova ya nawalaan na ananak si Adan tan Eva, kanian anggapoy rason nen Satanas ya ibagan matila so Dios. Tan impropesiya nen Jehova ya walay “ilalak” ya iter toy bilay to pian nadondon so kasalanan na saray maunor ya ananak nen Adan tan Eva, kanian anggapoy rason nen Satanas ya ibagan palpak so gagala na Dios. (Gen. 3:15; 22:18) Seguro, agmakapanisia si Satanas ed impangiter nen Jehova na dondon. Akin ey? On ta say rason no akin ya inter nen Jehova so dondon et lapud inar-aro to ray totoo. Sikatoy akaparaan ya mansakripisyo parad sikara. (Mat. 20:28; Juan 3:16) Kabaliktaran itan ed ugali nen Satanas ta sarili to labat so iisipen to. Antoy nagmaliw ya posible lapud dondon? No nasumpal la so Sanlibon Taon ya Uley nen Kristo, Paraiso la so interon dalin. Say manayam ditan et saray perpekto tan maunor ya ananak nen Adan tan Eva. Atan imay orihinal ya gagala nen Jehova. No nagawa la itan, diad satan la singa ibaga nen Jehova so “Omega.”

PABISKEG MOY TIWALAM ED IM-PROMISE NEN JEHOVA YA PARAISO

18. Anto may taloran panamaseguro ya talagan nagawa so sipan nen Jehova? (Nengnengen met so kahon ya “Taloran Rason no Akin ya Makapantiwala Tayo ed Promise nen Jehova.”)

¹⁸ Apantongtongan tayo ray rason no akin ya makapantiwala tayo ya talagan magmaliw ya Paraiso so dalin. Tandaan tayo iratan tan i-share tayo ed saray napupulongan tayo. Unona, si Jehova ya mismo so nam-promise. Oniay ibabaga na libron Apocalipsis: “Inkuan na samay akayurong ed trono: ‘Gagawaen kon balo so amin a bengatla.’” Labalabay nen Jehova ya gawaen so im-promise to. Tan lapud sikato so sankarunongan tan Makapanyarin-amin, sarasarag to itan ya gawaen. Komadua, segurado si Jehova ya nagawa itan kanian diad pakanengneng to et singa la itan agawa. Oniay imbaga to: “Isulat mo, ta sarayan salita et napanmatalkan tan tua. . . . Agawa la iraya!” Komatlo, no antoy inggapo nen Jehova et sumpalen ton sumpalen, tan ag-ontunda anggad ag-itan nagawa. Atan so rason no akin ya imbaga ton, “Siak so Alfa tan say Omega.” No nagawa lay gagala nen Jehova, ditan napatunayan ya si Satanas so matila tan palpak.

19. No walay napulongan mo ya mairap ton panisiaan so Paraiso, antoy gawaen mo?

¹⁹ No ipupulong mo iray rason no akin ya makapantiwala tayo ed si Jehova, diman met mas ombiskeg so tiwalam ed sikato. Kanian no imbasam so Apocalipsis 21:4 tan say kuan to may katongtong mo et, “Singa imposible itan,” antoy gawaen mo? Marakep no ibasam tan i-explain mo so bersikulo 5 tan 6. Ipanengneng mo ya nen nan-promise si Jehova, ginarantiyaan to. On, pinirmaan nen Jehova so promise to!​—Isa. 65:16.