No Akin a Nepeg Yon Amtaen So Katuaan Nipaakar ed Si Abraham
ABRAHAM—sakey a mitologon bayani odino sakey a tuan propeta? Panon kaimportante so ebat ed satan a tepet? Unong ed kronolohya na Biblia, si Abraham so nambilay ed apalabas lan 4,000 taon. Arum so nayari sirin a mangikatunongan, ‘Antoy diperensya no kasin sikato so peteg a nambilay odino andi?’
Bueno, kapaldua ed populasyon na mundo so kabiangan na saray relihyon a mangibabagan mananisia ed si Abraham. Say 1988 Britannica Book of the Year so angilista na 32.9 porsiento ed mundo a bilang Kristiano, 17.2 porsiento a Muslim, tan 0.4 porsiento a Judio, tan si Abraham so sakey a prominentin pigura ed amin a talo na sarayan relihyon. Peteg, saray masimoon a mananisia a manlapud sarayan pananisia so malabay a maneguro a say nibangat ed sikara nipaakar ed si Abraham so katuaan. Anggan saraman so kabiangan na arum iran relihyon odino ed saraman so mangibabagan andian na relihyon a balot so nepeg ya interesado. Akin?
Lapud ibabaga na Biblia a si Abraham so sakey a propeta. (Genesis 20:7) Satan so sakey a Biblikon salitan inusar a maneskribe ed sakey a sangiyan na Dios a tekep na sakey a mensahe a para ed arum a totoo. No si Abraham so sakey a tuan propeta, amin so ontalindeg a mangungguna. Akin? Lapud say mensahen inawat to so nankarga na maong a balita a para ed amin a katooan. (Galacia 3:8) Unong ed Biblia, insipan na Dios ed si Abraham: “Amin a pamilya ed dalin so peteg a papalaren da so inkasikara ed panamegley mo.”—Genesis 12:3.
Satan so makapakelaw a sipan, tan satan so nadngel nen Abraham a nibaga ed duara nin sananey ya inkagawa. (Genesis 18:18; 22:18) Ta pian satan so nasumpal, say Dios so mamaoli ed anggan saray representante na pamilya ya inatey la. Say bilay na saray ontan a napaoli so tuan sakey a bendisyon lapud maslak ed sikara so ompawil ed sakey a mangaraldalin a kipapasen a miulibay ed Paraison orihinal ya abalang na too. Kayari to, sikara so nabangatan no panon so pakagamor ed bendisyon na andi-anggaan a bilay.—Genesis 2:8, 9, 15-17; 3:17-23.
No, diad biek a dapag, et si Abraham so sakey lambengat a mitologon persona, anggapo so letnegan diad panisia ed makapakelaw a sipan a naawat to. Nagkalalo ni, no saray sipan na Biblia so agnapanmatalkan, nayarin isangsang na arum so pangideboto ra na inkasikaran sigpot diad saray likeliket ed kaplesan a bilay. Singa insulat na sakey ed saray inmunan Kristianos: “No saray inaatey so agnapaoli, ‘sikatayo so mangan tan oninum, ta nabuas et ompatey itayo.’”—1 Corinto 15:32.
Sirin, walaan itayon amin na rason diad pangusisa ed tepet, kasin si Abraham so sakey lambengat a mitologon bayani odino kasin sakey a tuan propeta? Nayarin kigtoten to kayo ed pakaamta no anto so imbaga na prominentin klero nen koma-19 a siglo nipaakar ed saya. Kaleganan to, saray arkeologo so akagawa na makapakelaw iran impakadiskobre a mangaangat ed saratan a panmoria na klero.