Kililiktar ya Ompugta’d Matunong a Balon Mundo
“Manliket ira a dili ed inkadaakan na kareenan.”—SALMO 37:11.
1, 2. (a) Panon a say panangiliktar nen Jehova ed panaon tayo so midumaan manlapud saray panangiliktar ed inmunan panaon? (b) Diad anton klasen mundo so pangiyakaran nen Jehova ed totoo to?
SI Jehova so Dios na kililiktar. Nen inmunan panaon, aminpigapigan inliktar toy totoo to. Saraman a kililiktar et temporaryo, ta agpermanentin impaakseb nen Jehova so panangukom to sumpad intiron mundo nen Satanas. Balet diad panaon tayo, magano lan gawaen nen Jehova so sanka-engrandian a kililiktar parad amin ya ariripen to. Deralen to’d satan so amin a pakasuysoyan ed sistema nen Satanas ed sankadalinan, tan itarok toray ariripen to ed sakey a permaninti tan matunong a balon mundo.—2 Pedro 2:9; 3:10-13.
2 Ta oniay isisipan nen Jehova: “Wala ni so daiset, et say bagel onandi . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.” (Salmo 37:10, 11) Kaunongan kabayag? “Say matunong tawiren to so dalin tan manayam diman lawas.” (Salmo 37:29; Mateo 5:5) Balet, sakbay a nagawa itan, nasagmak na sayan mundo so sankaguloan a panaon ya asagmak to ed kapiganman.
Say “Baleg ya Irap”
3. Panon a diniskribi nen Jesus so “baleg ya irap”?
3 Nen 1914 et linmoob iyan mundo ed “kaunoran iran agew” to. (2 Timoteo 3:1-5, 13) Koma-83 taon tayo la natan ed satan a peryodo tan manasingger la ed anggaan to sano, singa ed impasakbay nen Jesus et nagawa so onggendan: “Wala naani baleg ya irap ed satan ya anggapo so ontan a nanlapud gapo na mundo ya angga ed natan, anggapo, anggapo la naani.” (Mateo 24:21) On, mas grabe ni nen say Guerra Mundial II, sanen 50 milyon a bilay so atigway. Agaylan manasingger lay makapakigtot a panaon ed mundo!
4. Akin ya onsabi so panangukom na Dios ed “Babilonia a Baleg”?
4 Say “baleg ya irap” so biglaan ya onsabi, “ed saksakey oras.” (Apocalipsis 18:10) Say ibetag to so nabidbir diad pangipaakseb na Dios ed panangukom to ed amin a palson relihyon, a tatawagey Salitay Dios a “Babilonia a Baleg.” (Apocalipsis 17:1-6, 15) Say manunan kabiangan na kadaanan a Babilonia et say palson relihyon. Say modernon Babilonia so singa met say inmunan kasimbangan to a mangirerepresinta’d imperyo na palson relihyon ed mundo. Sikatoy mibabalangkantis diad pikokompromiso ed mapolitikal iran elemento. Sinuportaan toray impanbabakal da tan benibendisyonan toray armada ed mankalaban a dapag, a nansumpal ed panpapateyan na totoon mankarelihyonan. (Mateo 26:51, 52; 1 Juan 4:20, 21) Binabaliwala to lay mauges ya agagamil na saray patumbok to tan pinapasegsegang toy tuan Kristianos.—Apocalipsis 18:5, 24.
5. Panon so igapo na “baleg ya irap”?
5 Onggapo so “baleg ya irap” sano biglan ompuliktar iray mapolitikan elemento ed “Babilonia a Baleg.” “Busolen da so balangkantis, tan sikato so gawaen da a maermen tan labos lakseb, tan kanen da so laman to, tan sikato so lablabasen dan poolan ed apuy.” (Apocalipsis 17:16) Kayari na satan et sikatoy ‘pannangisan tan pandageyeman’ na saray datin sumusuporta to. (Apocalipsis 18:9-19) Balet abayag lan tatalaranan na ariripen nen Jehova iya, diad ontan et ikelyaw da: “Aleluya, . . . ta sikato inukom to so baleg a balangkantis, a sikato so nanderal ed dalin lapu ed impilawan to, tan insingil to so dala na saray aripen to dia ed lima to.”—Apocalipsis 19:1, 2.
Naataki Ariripen na Dios
6, 7. Akin a makapankompiyansa iray ariripen nen Jehova sano naataki legan na “baleg ya irap”?
6 Lapud aderal lay palson relihyon, ompuliktar ed satan iray mapolitikan elemento ed ariripen nen Jehova. Si Satanas, say “Gog ed dalin na Magog” unong ed propesiya, kuanto: “Onla ak naani ed saray wala ed pampainawa, a manaayam a mataletalek.” Lapud isisipen ton alay inomay iran kalotan, atakien to ra tekep na “sakey a baley ya ulop . . . , singa sakey a lurem a manakbong na dalin.” (Ezequiel 38:2, 10-16) Amta na totoo nen Jehova a sayan panangataki so onsaew lapud manmamatalek ira ed si Jehova.
7 Sanen alikna nen Faraon tan saray armada to ya asukop daray ariripen na Dios ed Ambalangan Dayat, mamilagron inliktar nen Jehova so totoo to tan tinigway toray armada na Ehipto. (Exodo 14:26-28) Legan na “baleg ya irap,” sano liknaen na nasyones ya asukop daray totoo nen Jehova, mamilagro to lamet ya ilegyas ira: “Dia ed saman ya agew . . . say sanok ko onloob naani ed saray abot na eleng ko. Ta dia ed imon ko tan dia ed apuy na sanok ko sinalitak.” (Ezequiel 38:18, 19) Insan paganigani la’d satan so kapantokan na “baleg ya irap”!
8. Antoran labas nen natural ya ebento so nagawa sakbay na paneral nen Jehova ed saray marelmeng, tan tekep na anton resulta?
8 Walay panaon kayari igapo na ‘baleg a kairapan,’ balet ta sakbay ya ipaakseb nen Jehova so panangukom to ed nakekeraan a kabiangan na sayan mundo, nagawa iray labas nen natural ya ebento. Imanoen pay epekto na saratan. “Insan onpatnag so tanda na Anak na too [Kristo] ed tawen, et manermen naani ed satan so amin a polipoli na dalin, tan nanengneng da naani so Anak na too ya onsasabi ed tapew na lurelurem na tawen a napnoy pakayari tan baleg a gloria.” (Mateo 24:29, 30) “Wala naani tanda dia’d agew tan bulan tan saray bibitewen, . . . saray totoo napunaw ira nisengeg ed takot tan egagel da ed saray bengatlan onsabi ed mundo.”—Lucas 21:25, 26.
“Say Karondon Yo Asingger La”
9. Akin a saray ariripen nen Jehova et ‘itangwa daray kauloan da’ sano nagawa iray labas nen natural ya ebento?
9 Diad satan a mismon panaon et onaaplika so propesiya ed Lucas 21:28. Inkuan nen Jesus: “Sano onggapo a nagawa so saraya a bengatla, tangay kayo, et itangwa yo so saray ulo yo, ta say karondon yo asingger la.” Onggiwgiw iray kabusol na Dios diad takot lapud amta ran saray labas nen natural ya ebenton nagagawa et manlalapud si Jehova. Balet manggayaga iray ariripen nen Jehova lapud naamtaan da a say kililiktar da et asingger la.
10. Panon a didiskribien na Salitay Dios so pantok na “baleg ya irap”?
10 Insan itarok ed satan nen Jehova so makapatey a dapmeg ed sistema nen Satanas: “Pati salot tan dala onloob ak naani ed pangukom ed sikato [Gog]; et pauranen ko naani ed tapew to, tan ed saray dakel ya ulop to, tan ed saray baley a wala ed sikato, na sakey a manleppua a mayamaya, tan ankabaleg ya uran a bato, apuy tan asupre . . . Et naamtaan da ak naani a siak si Jehova.” (Ezequiel 38:22, 23) Amin a pakapatnagan ed sistema nen Satanas so naderal. Say intiron sosyedad na too a mangibabaliwala’d Dios so napagit. Satan so pantok na Armagedon na say “baleg ya irap.”—Jeremias 25:31-33; 2 Tesalonica 1:6-8; Apocalipsis 16:14, 16; 19:11-21.
11. Akin a niliktar iray ariripen nen Jehova ed “baleg ya irap”?
11 Niliktar ed “baleg ya irap” iray minilyon a managdayew ed si Jehova ed sankadalinan. Tugyopen na saya so “baleg ya ulop” a “nanlapu ed balang nasyon tan amin na saray kailalakan, tan binaleybaley, tan salita.” Akin a sikaray niliktar ed ontan a makapakelkelaw a paraan? Lapud ‘lilingkoran da [na sagradon serbisyo] ed agew tan labi’ si Jehova. Kanian sikaray nilegyas ed anggaan na sayan mundo tan nitonton ira ed matunong a balon mundo. (Apocalipsis 7:9-15) Kanian, natasian da’d satan so kasumpalan na sipan nen Jehova: “Manalagar ka ed Jehova, tan tonton mo so dalan to, et itandoro to ka a manawir na dalin. Sano napater so saray bagel, nanengneng mo.”—Salmo 37:34.
Say Balon Mundo
12. Anto so tatalaranan na saray makalegyas ed Armagedon?
12 Agaylan makapaliket itan a panaon—say kaandi na karelmengan tan say ipelnak na sankamagloriaan a panaon ed amin ya awaran na too! (Apocalipsis 20:1-4) Agaylan otang a linawa na saray makalegyas ed Armagedon ed si Jehova a makaloob ed sakey a masnag, malinis a sibilisasyon a ginawa na Dios, sakey a balon mundo, ed dalin a pagmaliwen a paraiso! (Lucas 23:43) Tan agla ran balot ompatey! (Juan 11:26) On, manlapud satan a manpatuloy, sikara lay nawalaan na makapasagyat, makapakelaw a tatalaranan, say panbilay anggad manbibilay si Jehova!
13. Panon a nituloy nen Jesus so panagtambal a kimey ya inggapo to ed dalin?
13 Si Jesus, a tinuro nen Jehova bilang mangatatawen ya Ari, so mangasikaso’d mamilagron bendisyones a panggayagaan na saray niliktar. Sanen wadiad dalin, nilukasan toray bulag a kamataan tan saray telek a layag tan tinambal toy “amin a nengneng na beblay.” (Mateo 9:35; 15:30, 31) Diad balon mundo, ituloy to so baleg a panagtambal balet diad sankagloboan a laknab. Bilang Ahente na Dios, sumpalen toy sipan: “Punasen to [Dios] so amin a lua ed kamataan da, tan anggapo la naani ipatey, tan anggapo la naani onnangis o dageyem, o ot-ot. Ta saray ona a bengatla sikara so linmabas la.” (Apocalipsis 21:4) Aglan balot kaukolan iray medikal a praktisioner odino walaay punerarya!—Isaias 25:8; 33:24.
14. Anton kililiktar so onsabi ed ariripen nen Jehova ya inatey la?
14 Niliktar met ya amin iramay matoor ya ariripen na Dios ya inatey ed apalabas. Diad balon mundo, sikaray nisigpay ed panangemgem na lubok. Ta igagarantiya nen Jehova: “Wala naani kioli ed bilay na saray matunong tan agmatunong.” (Gawa 24:15) Maseguro, “saray matunong” so makaunan paolien tan ontulong ira ed kilaknab na Paraiso. Agaylan ligsa parad saray makalegyas ed Armagedon so idengel ed saray eksperiensia na saramay matoor ya inatey ed inmuna, a natan et mabilay la.—Juan 5:28, 29.
15. Diskribien pa so pigaran kipapasen a naeksperiensia diad balon mundo.
15 Amin na saramay mabilay ed satan so makaeksperiensia ed imbaga na salmista nipaakar ed si Jehova: “Sika buskagen mo so limam tan peneken mo so saray pilalek na ami bengatlan mabilay.” (Salmo 145:16) Anggapo lay eras: Say dalin so nipawil ed sakey a balansin ekolohiko tan mamabungay daakan. (Salmo 72:16) Anggapo laray totoon andiay ayaman: “Sikara ipaalagey da naani so saray abung tan manayam ira naani,” tan balang sakey so onyurong “ed silong na kiew to ya ubas tan ed silong na kiew to a higos, et anggapo naani manaktakot ed sikara.” (Isaias 65:21, 22; Miqueas 4:4) Anggapo lay takot: Anggapo lay bakal, karawalan, odino krimen. (Salmo 46:8, 9; Uliran 2:22) “Say amin a dalin wala ed painawa, tan sikato so mareen. Ombutay ira a mankankanta.”—Isaias 14:7.
16. Akin a napatnagan so inkatunong ed balon mundo?
16 Diad balon mundo, say propaganda nen Satanas a media so naekal la’d satan. Imbes, “saray manaayam ed mundo aralen da so inkatunong.” (Isaias 26:9; 54:13) Tekep na mabunigas ya espiritual ya instruksion a tinaon, “say dalin napano naani ed pikakabat ed Jehova singa saray danum sakbongan da so dayat.” (Isaias 11:9) Saray makapaalagey a kanonotan tan kiwas so napatnagan ed katooan. (Filipos 4:8) Isipen pa, sakey a sankamundoan a sosyedad na totoon bulos manlapud krimen, egotismo, imon—sakey ya internasyonal ya impanaagi a say bunga na espiritu na Dios so ipatnag na amin. On, anggan natan la et saratan a kualidad so babayuboan na baleg ya ulop.—Galacia 5:22, 23.
Akin ya Ontanlan Kabayag?
17. Akin ya ontanlan kabayag so impanalagar nen Jehova pian panganggaey karelmengan?
17 Balet, akin ya ontanlan kabayag ya impanalagar nen Jehova pian ekaley karelmengan tan pian iliktar so totoo to ed balon mundo? Isipen pa so kaukolan a nasumpal. Say sankaimportantian et say kiyalangon na inkasoberano nen Jehova, say kanepegan ton manguley. Diad pangiyaabuloy na magenap a panaon, nidemostra to ed labas na antokaman a panduaruwa a say uley na too ed paway na inkasoberano to so lawas onsasaew. (Jeremias 10:23) Kanian natan et si Jehova so sigpot a napatunongan ed panalat na uley na too ed say uley na mangatatawen a Panarian to ed silong nen Kristo.—Daniel 2:44; Mateo 6:9, 10.
18. Kapigan a tinawir na kailalakan nen Abraham so dalin na Canaan?
18 Say nagagawa legan na sarayan amin a siglo so mipadpara ed agawa ed panaon nen Abraham. Imbaga nen Jehova ed si Abraham a saray kailalakan to so manawir ed dalin na Canaan—balet kaukolan day manalagar ed loob na apatanlasus a taon “lapu ed agni asumpal so inkauges na saray Amorreo.” (Genesis 12:1-5; 15:13-16) Dia et say terminon “Amorreo” (dominantin tribu) so mangirerepresinta anganko ed totoo na Canaan bilang intiraminti. Kanian ngalngali apatiran siglo so onlabas sakbay a paulyanan nen Jehova a naala na totoo to so Canaan. Ambegya nin pinaulyanan nen Jehova iray nasyon ed Canaan a mamawala na saray sosyedad da. Tekep na anton resulta?
19, 20. Anton nengneng na saray sosyedad so pinawala na saray Canaanita?
19 Say Bible Handbook, nen Henry H. Halley, naimano to a diad Megiddo et aromog na saray arkeologo iray geray na templo nen Ashtoreth, diosan-asawa nen Baal. Insulat to: “Pigara labat a kutbang manlapud sayan templo et wadtan so sakey a sementeryo, a pakaromogan na dakel a buyog, a mankargay bangkay na saray kapanyanak ya imbabagat ed sayan templo . . . Saray propeta nen Baal tan Ashtoreth so opisyal a managpatey na ankekelag ya ugugaw.” “Sananey nin makapakigtot ya agamil et [say] tatawagen dan ‘pundasyon iran bagat.’ Sano ipaalagey so sakey ya abung, kaukolan a nibagat so sakey ya ugaw, tan say bangkay to so nipila ed pangipaalagey na pader.”
20 Oniay komento nen Halley: “Say panagdayew ed si Baal, Ashtoreth, tan arum niran dirios na Canaanita so mangilalaktip ed sanka-alablabasan iran seremonya; saray templo ra so sentro na kaugsan. . . . Nandayew iray Canaanita, diad imoral ya inkaalablabas, . . . tan insan, diad pamapatey da na panguloan ya ananak da, bilang bagat ed sarayan parihon dirios. Ompatnag, a diad baleg a sukat et say dalin na Canaan so nagmaliw a nengneng toy Sodoma tan Gomora ed nasyonal a laknab. . . . Kasin say sibilisasyon ed ontan a makapadimlan inkadutak tan inkaruksa so walaan ni kanepegan a mantultuloy? . . . Saray arkeologon nankotkot ed saray geray na syudadis na Canaanita so manumameng no akin ya ag-iran tampol dineral na Dios imbes a diad saginonor.”—Ikompara so 1 Arari 21:25, 26.
21. Anton piulibayan so wala ed baetan na situasyon na saray Canaanita tan ed agew tayo?
21 Say karelmengan na saray Amorreo so ‘asumpal la.’ Kanian sigpot lan napatunongan si Jehova diad impamagit to’d sikara. Mipadpara met itan natan. Sayan mundo so napno na karawalan, imoralidad, tan pamubusol ed saray ganggan na Dios. Tan lapud satan et manepeg labat a sikatayoy nakigtot ed makapataktakot a panagbagat na anak diad kadaanan a Canaan, balet komusta iray sinamplon minilyon a nibabagat a kalangweran ed bakabakal ed sayan mundo, a mas mauges ni nen say antokaman a bengatla diad Canaan? Segurado, a napnek lan tuloy natan si Jehova a panganggaen to iyan marelmeng a sistema.
Manumpal na Sakey nin Bengatla
22. Anto so susumpalen na anos nen Jehova ed panaon tayo?
22 Say anos nen Jehova ed sarayan kaunoran ya agew so manusumpal na sakey nin bengatla. Mangiyaabuloy na panaon pian tiponen tan bangatan so baleg ya ulop, a walaan la natan na bilang a masulok a limaran milyon. Diad silong na panangiderihi nen Jehova, sikaray natitibukel ed sakey a maaligwas ya organisasyon. Lalaki, bibii, tan saray tobonbalo so nipapasal pian nibangat day arum ed saray katuaan na Biblia. Diad panamegley na saray miting da tan palapagan na Biblia, naaralan daray maaron dalan na Dios. (Juan 13:34, 35; Colosas 3:14; Hebreos 10:24, 25) Niarum ni, naaaralan daray kimey diad konstruksion, elektroniks, panag-imprinta, tan arum niran lawak ta pian nasuportaan day panangipulong na “ebanghelyo.” (Mateo 24:14) Maseguron say ontan a panagbangat tan panagpaalagey so malaknab a nausar ed balon mundo.
23. Akin a sakey a pribilihyo so pagmaliw a mabilay natan?
23 On, natan et ipaparaan nen Jehova iray ariripen to pian nalabasan day “baleg ya irap” a mamaarap ed matunong a balon mundo. Insan naandi la’d satan si Satanas tan say marelmeng a mundo to a kaukolan dan pibarangkaan, anggapo lay sakit, ermen, tan ipapatey. Tekep na baleg ya entusiasmo tan gayaga et mantultuloy so totoo na Dios ed maliket a kimey a pangipaalagey na sakey a paraiso, ya inagew-agew et “maliga.” Agaylan apribilihyoan tayo a makapambilay ed sayan kapantokan na amin a panaon, pian naamtaan tan napanlingkoran si Jehova, tan namorian agla manbayag et ‘itangwa tayoray kauloan tayo ta say karondon tayo et asingger la’!—Lucas 21:28; Salmo 146:5.
Repason Tepetepet
◻ Anto so “baleg ya irap,” tan panon itan ya onggapo?
◻ Akin ya onsaew so panangataki na Gog ed ariripen nen Jehova?
◻ Panon a mangangga so “baleg ya irap”?
◻ Antoran makapakelaw a gungguna so itarya na balon mundo?
◻ Akin ya ontanlan kabayag so impanalagar nen Jehova pian panganggaen iyan sistema?
[Litrato ed pahina 16]
Say intiron dalin so pagmaliwen a sakey a paraiso