Panangapresia ed Saray Kristianon Pandaragup
“Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo.”—HEBREOS 10:24, 25.
1, 2. (a) Akin a pribilihyo so pakaatendi ed pandaragup na tuan Kristianos? (b) Diad anton pantalos a presenti si Jesus ed saray pandaragup na papatumbok to?
AGAYLAN pribilihyo so pakaatendi ed Kristianon pandaragup, balanglan tugyopen itan na kulang a samplora odino pigaran libon managdayew nen Jehova, ta inkuan nen Jesus: “No iner so kawalaan na duara ono talora a nantitipon nisengeg ed ngaran ko, siak wala ak ed nanleleetan da”! (Mateo 18:20) Diad katuaan to, sanen isisipan to itan, sisingbaten nen Jesus iray hudisyal a pamaakaran a kaukolan ya asikasoen a maong na saramay mangidadaulo ed loob na kongregasyon. (Mateo 18:15-19) Balet kasin niyaplika met ed prinsipyo iray salita nen Jesus ed amin a Kristianon pandaragup a lulukasan tan sasaraan ed sakey a pikakasi diad ngaran to? On. Tandaan, sanen ingganggan nen Jesus iray patumbok to a manggaway-babangatan, insipan to: “Nia, walaak a naynay ed sikayo, ya angga ed kasampotan na mundo.”—Mateo 28:20.
2 Anggapoy panduaruwa a say Ulo na Kristianon kongregasyon, si Katawan a Jesu-Kristo, so interesadon tuloy ed amin a pandaragup na matoor a papatumbok to. Niarum ni, naseguro tayon sikatoy wadman a kaiba ra diad panamegley na masanton espiritu na Dios. (Gawa 2:33; Apocalipsis 5:6) Si Jehova a Dios so interesado met ed pantitipon tayo. Say manunan gagala na saratan a miting et say kiyatagey na dayew ed Dios “dia ed saray muyong.” (Salmo 26:12) Say iyaatendi tayo ed saray miting ed kongregasyon et ebidensia na panangaro tayo’d sikato.
3. Diad antoran importantin rason ya aapresiaen tayoray Kristianon pandaragup?
3 Wala niray maong a rason no akin ya aapresiaen tayoray Kristianon pandaragup. Sakbay na intaynan to’d dalin, tinuro nen Jesu-Kristo iray alanaan a babangatan to ya onakto bilang “matoor tan makabat ya aripen” diad panangisuplay na nipanpanaon ya espiritual a tagano ed sankaabungan na pananisia. (Mateo 24:45) Say importantin paraan ed ontan a katagano’d espiritual et diad saray miting ed kongregasyon pati met laray babaleg a pandaragup—asamblea tan kombension. Ididirehi na Katawan a Jesu-Kristo iyan matoor ya aripen a mangitarya na makanan impormasyon ed ontan iran pandaragup pian amin a malabay a makaliktar ed anggaan na sayan marelmeng a sistema tan makagamor na bilay diad matunong a balon mundo na Dios.
4. Anton mapeligron “ugali” so abitla ed Biblia, tan antoy ontulong ed sikatayon napaliisan itan?
4 Kanian, anggapoy Kristianon paulyanan toy inkasikaton nabayuboay mapeligron ugali ya impaimano nen apostol Pablo, a nansulat: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Say pandalepdep ed pribilihyo tan saray gungguna ed iyaatendi’d saray Kristianon pandaragup so ontulong ed sikatayon sitotoor tan intiron puson manuporta ed saratan a pandaragup.
Saray Miting a Mamabiskeg
5. (a) Antoy kaukolan ya epekto na panagsalita tayo ed saray miting? (b) Akin ya agtayo ipapaleen so pangimbita ed saray interesado pian onatendi ed saray miting?
5 Lapud ipipikasi na Kristianos so masanton espiritu nen Jehova a niwala ed saray Kristianon miting, kaukolan a pasyaen a pankimeyan na kada indibidual ya onaatendi a mitunosan ed espiritu, ya ‘agpaeermenen so espiritu santo na Dios.’ (Efeso 4:30) Sanen insulat nen apostol Pablo iraman ya impuyan a salita, sisingbaten toy dugan usar na panagsalita. Say ibaga tayo so kaukolan a lawas nausar “ed pakapansimpit unong na nakaukolan, pian mangiter na gayaga ed saray ondengel.” (Efeso 4:29) Nagkalalo lan importanti iya ed Kristiano iran pandaragup. Diad sulat to ed saray taga-Corinto, indanet nen Pablo so pankaukolan a saray miting et magmaliw a makapabiskeg, makaibangat, tan makapaseseg. (1 Corinto 14:5, 12, 19, 26, 31) Amin a presenti so nagunggunaan ed ontan iran miting, pati saray balo nin onatendi, a nayarin mangibagan: “Say Dios wala ed sikayo dia ed tua.” (1 Corinto 14:25) Nisesengeg ed saya, agtayo ipapaleen so pangimbita ed saray balo nin interesadon midagup ed sikatayo, ta say panggawa ed satan so mamapeles ed iyaaligwas da’d espiritual.
6. Antoray arum a sengegan ya ontulong ed pagmaliw na miting a makapabiskeg?
6 Labay a seguroen na amin a naasain a manpaliwawa, na-interbio, odino mandemostra ed Kristianon miting a say panagsalita ra so makapabiskeg tan mitunosan ed nisulat a Salitay Dios, say Biblia. Niarum ni ed pangibalikas na suston panagsalita, kaukolan tayon ibalikas so liknaan tan emosyon a mitunosan ed maaro iran personalidad na Dios tan Kristo. No amin a mangipresinta’d betang da’d programa na miting et sinononot ed pangisindag na ‘saray bunga na espiritu na Dios,’ a singa say gayaga, andukey a panagtepel, tan pananisia, sirin amin a wadtan so seguradon napabiskeg.—Galacia 5:22, 23.
7. Panon ya amin ya onatendi so makapanpabiskeg ed pandaragup?
7 Anggaman pigara labat so nawalaay parti ed programa ed saray miting ed kongregasyon, amin so makapanpabiskeg ed pandaragup. Mabetbet a walaray pankanawnawan makaebat iray dumerengel ed tepetepet. Panaon irayan mapublikon nideklaray pananisia tayo. (Roma 10:9) Agbalot uusaren iratan a pankanawnawan iyalibansa iray personal ya ideya tayo, pangipasirayew ed personal iran agawaan tayo, odino pamalaw ed kapananisiaan. Agta mamaermen itan ed espirituy Dios? Saray agpantatalosan ed saray kapananisiaan so sankaabigan a naresolbi ed pribadan paraan diad espiritu na aro. Kuan na Biblia: “Manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.” (Efeso 4:32) Agaylan ekselentin pankanawnawa iray Kristianon pandaragup pian niyaplika tayo iyan maabig a konseho! Diad satan a gagala, dakel so onsasabi ed saray miting a masasakbay tan manbayag ni kayari to. Mamaabrasa met iya ed saray balo nin interesado, a walaay nikaduman pankaukolan. Diad ontan et amin a dedikadon Kristiano so walaay betang ed pagmaliw na saray miting a makapabiskeg diad ‘panpapagalangan tan panaayatan ed aro tan saray maabig a gawa.’
Manparaan a Maong
8. (a) Antoran nakomendaan a panagsakripisyo so gagawaen na arum pian makapimiting? (b) Anton alimbawa so ipapanengneng nen Jehova bilang sakey a pastol?
8 Bangta parad arum et mainomay so iyatendi ed saray Kristianon pandaragup, parad arum et mankakaukolan itan na tuloytuloy a panagsakripisyo. Alimbawa, say Kristianon ina a kaukolan toy mantrabaho pian legpeten iray nakakaukolan na sankaabungan to so kaslakan ya onsesempet a naknaksawan. Anganko ta manluto ni tan asistian toray anak ton manparaan parad miting. Arum a Kristiano et nayarin arawi so biahien da pian makaatendi, odino ompan sikaray lilimitaan na sakit odino itatatken. Maseguro, natatalosan nen Jehova a Dios so situasyon na kada matoor ya onaatendi ed miting, no panon a say maaron pastol et natatalosan toray nikaduman pankaukolan na kada karnero ed pulok to. “Singa sakey a pastol,” kuan na Biblia, “tiponen [nen Jehova] naani so saray kordero ed taklay to, tan awiten tora ed pagew to, tan guyoren to a makalna naani so saray walaan na kilaw.”—Isaias 40:11.
9, 10. Panon tayon nagunggunaan a maong manlapud saray miting?
9 Saramay kaukolan a mansakripisyoy baleg ta pian regular ed saray miting so nayarin nagegetaran ed panaon dan usaren a manparaan ed materyal a kokonsideraen. Say pibansag ed sinimban eskedyul a babasaen ed Biblia et pagmaliwen ton say iyaatendi ed Teokratikon Eskuelaan Parad Panagministro a lalon makatumang. Mipadpara, say panparaan lan unona parad arum a miting, a singa say Panagaral na Panag-Bantayan tan say Panagaral na Libro ed Kongregasyon et pagmaliwen da iratan a lalon makagungguna. Diad panbasa lan unona ed aaralen a materyal tan konsideraen so anggan pigara labat ed nisitan teksto ed Biblia, saramay say kipapasen da et mankakaukolan na baleg a panaon so mas onkiling a nawaalan na makabaliksan a pibibiang ed sarayan importantin diskusyon ed Biblia.
10 Say arum, a saray sirkumstansia ra et mangiyabuloy na malaglaem a panaon, so makapangipanaon na babaleg ed panparaan ed miting. Alimbawa, na-reasearch daray kasulatan a nisitas balet ta ag-inaon. Diad ontan et amin so makapanparaan a nagunggunaan a tuloy ed saray miting tan nawalaan na maabig a pibiang ed pamabiskeg ed kongregasyon diad saray paliwawa tan komento ra. Diad pagmaliw ya akaparaan a maong, saray matatken tan ministeryal ya ariripen so mangipanengneng na maabig ya alimbawa diad panangiter na antikey, asegek ya ebaebat. Lapud respeto parad saray probisyon nen Jehova, paliisan na saramay presenti so antokaman a makaabalan agagamil kaleganay miting.—1 Pedro 5:3.
11. Akin a say dilin-disiplina so nakakaukolan ed panparaan ed saray miting?
11 Saray aktibidad tan panliketan ya agmakana ed kabunigasan tayo’d espiritual so mangala na baleg a panaon tayo. No ontan, kaukolan tayon usisaen so inkasikatayo tan “aliwa . . . komon a makulangkulang” ed panangusar na panaon tayo. (Efeso 5:17) Say gagala tayo et say ‘panganamot na panaon’ tayo manlapud agtanton importanti iran pamaakaran ta pian nausar so malaglaem a panaon ed personal a panagaral na Biblia tan panagparaan parad miting, ontan met ed serbisyo ed Panarian. (Efeso 5:16) Tua, aglawas mainomay iya tan kakaukolaen toy dilin-disiplina. Saray kalangweran a makabat ed panangusar na panaon da so mangileletneg na maabig a pundasyon parad iyaaligwas ed arapen. Oniay insulat nen Pablo ed malalangwer a kaiba ton Timoteo: “Seetan mo so sarayan bengatla [konseho nen Pablo ed Timoteo], sikara labat so arapen mo; pian say ibubunam nipatnag komon ed saray ganagana.”—1 Timoteo 4:15.
Saray Alimbawa Manlapud Salitay Dios
12. Anton matalonggaring ya alimbawa so impanengneng na pamilya nen Samuel?
12 Konsideraen pay maabig ya alimbawan impanengneng na pamilya nen Samuel, a maparanay ya akibiang ed saray uksoyan ed pandaragup kaiba iray kaparan managdayew sanen say tabernakulo na Dios et walad Silo. Saray lalaki labat so kakaukolanen a tinaon ya ombisita ed saray selebrasyon a piesta. Balet say ama nen Samuel, si Elcana, so angitagar ed intiron pamilya to, legan a sikatoy “tinmatdang nensaman a manlapu ed syudad to ed tinaon pian manpikasi tan pian manbagat ed Jehova na saray ehersito ed Silo.” (1 Samuel 1:3-5) Say mismon baley nen Samuel, Ramataim-sofim, et posiblin nipasen ed asingger a baybay na modernon agew a Rentis diad saray saliay alosadsar “ed kapugaroan na Efraim.” (1 Samuel 1:1) Kanian say biahen manpaarap ed Silo so manasaglawi ed biahen ngalngalin 30 kilometro, makapabanal a baroy ed saraman ya agew. Onia so sitotoor a ginawa na pamilya nen Elcana a “tinaon, sanen tinmatdang [ira] ed abung nen Jehova.”—1 Samuel 1:7.
13. Anton alimbawa so impanengneng na matoor a Judios sanen wadiad dalin si Jesus?
13 Binmaleg met si Jesus bilang kabiangan na baleg a pamilya. Tinaon a nambiahe so pamilya a nampaarap ed Nazaret a ngalngali 100 kilometron manpaabalaten pian atendiay piesta na Paskua ed Jerusalem. Duaray posiblin rotan nadalan da. Say mas diretson rotan manpalasor ed Lawak na Megido tan insan patatdang ed ngalngali 600 metro a dalanay teritorya na Samaria a mamaarap ed Jerusalem. Say sananey a bantog a rota et samay dinalan nen Jesus ed unor a biahe ton paarap ed Jerusalem nen 33 K.P. Lalanoren na saya so panakar ed Lawak na Jordan ed lampas na dantal na dayat ya anggad asabi toy “ketegan na Judea tan labas na Jordan.” (Marcos 10:1) Manlapu ditan, say “dalan, ya ontatatdang ed Jerusalem” et 30 kilometro so kaarawi to, a lalanoren toy itatatdang ed masulok nen 1,100 metro. (Marcos 10:32) Naynay a gagawaen na saray matoor a karaklan a manseselebra ed piesta so mairap a biahen manlapud Galilea ya anggad Jerusalem. (Lucas 2:44) Agaylan abig ya alimbawa parad ariripen nen Jehova a walad mayayaman a daldalin natan, a dakel ed sikara so maininomay a makaatendi ed saray Kristianon pandaragup, maong ta walaray modernon transportasyon!
14, 15. (a) Anton alimbawa so impanengneng nen Ana? (b) Antoy naaralan tayo manlapud maabig ya awawey ya impanengneng na pigaran balo niran miaaral?
14 Sakey nin alimbawa et samay 84-taon a balon Ana. Kuan na Biblia a sikato so “agla onaalis ed templo.” (Lucas 2:37) Niarum ni, impanengneng nen Ana so maaron interes ed arum. Diad impakanengneng ed kapan-anak a Jesus tan ed impakaamtan sikato so insipan a Mesias, antoy ginawa to? Akisalamatan toy Dios tan ginapoan toy “nansalita nipaakar ed ugaw ed saray amin a manaalagar [ed] karondon na Jerusalem.” (Lucas 2:38) Agaylan maabig ya awawey, uliran parad Kristianos natan!
15 On, say iyaatendi tan pibibiang ed saray miting tayo so kaukolan a makapaliket a, singa si Ana, agtayon balot labay so nasaew. Dakel a balo ni so makakaeksperiensia met na parehon apresasyon parad saray miting. Walan pinmaway ed kabilungetan ya amaarap ed makapakelkelaw a liwawa na Dios, labay dan amtaen so amin a nayarian da, tan dakel so mangibabalikas na pirmin entusiasmo parad saray Kristianon miting. Diad biek a dapag, saramay abayag la’d katuaan et nepeg day manalwar sumpad ‘pangikaindan ed akaunan aro ra.’ (Apocalipsis 2:4) Saray graben problema ed bunigas tan arum niran sengegan ed labas na pakakontrol na sakey so no maminsan et limitaan toy pakapiaral. Balet agtayon balot aabuloyan so materyalismo, panagligliwaan, odino kakulangay interes a sengegay pagmaliw tayon ag-akaparaan, paspasaray, odino iregular ed piaaral tayo.—Lucas 8:14.
Say Sankaabigan ya Alimbawa
16, 17. (a) Antoy awawey nen Jesus ed saray espiritual a pandaragup? (b) Anton maong ya ugali so kaukolan a panggunaetan a tumboken na amin a Kristiano?
16 Impanengneng nen Jesus so matalonggaring ya alimbawa ed panangapresia ed espiritual iran pandaragup. Diad malangwer ya edad a 12, indemostra to so aro to’d abung na Dios diad Jerusalem. Sikatoy abalangan na atateng to balet ta diad kaunoran et nalmo ra’d templo a misisingbatan ed Salitay Dios ed saray managbangat. Bilang ebat to’d panpapaga na atateng to, sirerespeton intepet nen Jesus: “Agyo amta a nakaukolan ko so wala ed abung nen Amak?” (Lucas 2:49) Tekep na panagpasakop, say malangwer a Jesus so sinmempet a kaibay atateng to ed Nazaret. Diman et intuloy ton impanengneng so panangaro to parad saray miting na panagdayew diad regular ya iyaatendi ed sinagoga. Diad ontan et sanen inggapo toy panagministro to, irereport na Biblia: “Linma ed Nazaret, a diman so binalegan to; et linmoob, unong na ugali to, ed sinagoga ed agew a sabaton, et inmalagey a nambasa.” Kayari et imbasa tan insalaysay nen Jesus so Isaias 61:1, 2, say dumerengel so ginmapon “nikelawan . . . ed saray salita a magrasya a nanlapu ed sangi to.”—Lucas 4:16, 22.
17 Itutumbok met iray Kristianon miting natan ed parehon manunan padron. Kayarin nilukas so miting ed sakey a kanta na panangidayew tan sakey a pikakasi, ibabasa tan isasalaysay iray bersikulo manlapud Biblia (odino bersikulon inaon ed aaralen ed panagaral na Biblia). Saray tuan Kristiano so naobligan mangalig ed maong ya ugali nen Jesu-Kristo. Daput no iyabuloy na sirkumstansia ra, naliketan ira ed pagmaliw a regular ed iyaatendi ed saray Kristianon pandaragup.
Modernon-Agew Iran Alimbawa
18, 19. Antoran marakep ya alimbawa so ipapanengneng na agagi ed agtanton mayaman iran bansa no nipaakar ed saray miting, asamblea, tan kombension?
18 Diad saray agtanton mayaman a parti na dalin, dakel ed agagi tayo so mangipapanengneng na maabig ya alimbawa na panangapresia ed saray Kristianon pandaragup. Diad Mozambique kinaukolan na manangasikaso na distrito, si Orlando, tan say akulaw to, si Amélia, so 45 oras a panakar na 90 kilometro ed atagey a palandey ta pian manserbi ed sakey ya asamblea. Insan kaukolan ya akaren da lamet itan a papawil pian manserbi’d ontumbok ya asamblea. Sipapaabeban inreport nen Orlando: “Liknaen min samsamet a tuloy itan no ipareng ed saray agagin taga Bawa Congregation. Pian naatendiay asamblea tan makasempet ed kaabungan da et kakaukolanen na satan so anem-agew a panbiahe a ngalngali 400 kilometro so akaren, tan kaulop day agin lakin mantaon na 60!”
19 Komusta balet so apresasyon ed saray sinimban miting ed kongregasyon? Si Kashwashwa Njamba so sakey a masakit ya agin bii a masulok lan 70 taon to. Sikatoy manaayam ed Kaisososi, melag a purok a ngalngali limaran kilometroy kaarawi to manlapud Kingdom Hall diad Rundu, Namibia. Pian makapimiting, sikatoy manakar na samploran kilometro a pawil-patubo ed saray kasupokan. Arum so sinabat ed sayan rota, balet si Kashwashwa so tuloytuloy a mimimiting. Maslak ed saray miting so nikokondukta ed saray lenguahen agto natalosan. Kanian panon so pakagugunggunaan to’d iyaatendi to? “Diad panutumbok ed saray kasulatan,” kuanen Kashwashwa, “salien kon padesiran no antoy nasisingbat.” Balet ta agto amtay manbasa tan mansulat, kanian panon ton natumbok so kasulatan? “Tatalinengen koray kasulatan a nipatlep ko,” ebat to. Tan diad idadalan na saray taon et akapangipatlep ak lay dakel a kasulatan. Pian napaaligwas so abilidad to ed panangusar na Biblia, aatendian toy literacy class ya inyuksoy na kongregasyon. “Labalabay kon atendian iray miting,” kuanto. “Lawas walaray balon bengatlan naaralan. Labalabay kon napilimogan iray agagi. Anggaman agkora nakatongtong ya amin, lawas iran onasingger a mangibano ed siak. Tan nagkalalon importanti, amtak a diad pimimiting et napapaliket koy puso nen Jehova.”
20. Akin a nepeg tayon agpaulyanan iray Kristianon pandaragup tayo?
20 Singa si Kashwashwa, minilyon a managdayew nen Jehova diad intiron mundo so mangipapanengneng na nakomendaan ya apresasyon parad saray Kristianon pandaragup. Leleg a mamapaarap so mundo nen Satanas ed kadederal, agtayo nayarin paulyanan so pandaragup tayon saniiba. Imbes, mansiansia itayon aliing ed espiritual tan ipanengneng so aralem ya apresasyon parad saray miting, asamblea, tan kombension. Agto lambengat paliketey puso nen Jehova noagta nagunggunaan itayon maong legan a mibibiang itayo ed madibinon bangat a mangitonton ed magnayon a bilay.—Uliran 27:11; Isaias 48:17, 18; Marcos 13:35-37.
Repason Tepetepet
◻ Akin a pribilihyo so pakaatendi ed saray Kristianon pandaragup?
◻ Panon ya amin ya onatendi so makapanpabiskeg ed miting?
◻ Anton matalonggaring ya alimbawa so impanengneng nen Jesus?
◻ Anton leksion so naaralan manlapud agagin walad agtanton mayaman a daldalin?
[Kahon ed pahina 17]
Aapresiaen Daray Sinimban Miting
Minilyon a totoo a manaayam ed syudades so sasaloten na inkaduka tan krimen. Anggaman ed saratan a sirkumstansia, saray tuan Kristiano ed limog da so mangipapanengneng na nakomendaan ya apresasyon parad saray Kristiano pandaragup. Oniay irereport na sakey a matatken a manlilingkor ed sakey ed saray kongregasyon ed Soweto na Gauteng, South Africa: “Diad sakey a kongregasyon na 60 Tastasi tan agbautismado iran manangipalapag, walaan kami na 70 ya anggad 80, tan no maminsan et masulok ni, ya onaatendi ed saray miting. Anggaman ag-arawi so biabiahien na agagi pian makaatendi, say kipapasen ed sayan parti na Soweto so maruksa. Sakey ya agin laki so dinuyok ed beneg legan a manaakar a paarap ed miting. Ag-onkunlang ed duaran agagin bibii so dinegkem diad panasalin takewan ira. Balet ag-iya amatunda ed sikaran onatendi. Diad saray Simba, walaan kami na antikey a panangipasal ed pankanta kayari miting tekep na pikakasi. Anggan panon et 95 porsiento so regular a natitilak tan mankanta ed amin kansion ya usaren ed saray miting no ontumbok a simba. Ontutulong iya ed balo niran interesadon naaralan iray kanta tan makapibansag a mangansion.”
Saray manaayam ed baryo so walaan na arum a babeng, a singa saray andurukey a distansya a kaukolan dan biahien ta pian naatendian iray miting a mamitlo ed loob na sakey a simba. Sakey ya interesadon sanasawa a manaayam ed 15 kilometroy kaarawi to manlapud Kingdom Hall diad Lobatse, Botswana. Diad apalabas a taon, sikaray miaaral a regular a kaibay duaran anak da. Say asawan laki so manag-opiger na sapatos pian legpetey pamilya to. Say asawan bii so manlalako na angkekelag a begatla pian naarumay anap na pamilya et walay ibayar da ed pamasahen pawil-patubo ed saray miting.
Agni abayag diad sakey a labi na tiagew, kayari miting ed bisita na manangasikaso na sirkito, abaya iyan pamilya ed sakey ya istasyon na bus ed 9:00 n.l. Asakbay so inggarahe na saray bus lapud mauges a panaon. Tinmunda so sakey a polis ya akalugan ed van to tan tinepetan tora no antoy gagawaen da. Diad impakaamta ed kipapasen da, akasian tora tan pinalugan tora ed 15 kilometro nin pasempet ed abung. Say asawan bii, ya agbautismadon manangipalapag, so nankuan ed masiken to: “Nengneng mo, no iyuna tayoray miting, lawas itayon tarokan nen Jehovah.” Natan say asawan laki et ibabalikas toy pilalek ton magmaliw met a managpulong na maong a balita.
[Litrato ed pahina 18]
Saray Tastasin singa saraya diad Romania so mangipapanengneng na maabig ya alimbawa na panangapresia ed saray Kristianon pandaragup