Iyaansakit na “Dios na Kareenan” Iray Maniirap

IPAPABITAR na Biblia a si David na inmunan panaon et agbalo-balo ed irap. Diad pigaran taon et sikatoy nambilay bilang puganti, a siruruksan inusilan na marelmeng tan anawet-tenten ya ari, a determinadon mamatey ed sikato. Legan na sayan peryodoy irap, inyamot-amot nen David so inkasikato’d nisulinek iran pasen. Nilikud ed satan et wala ni so ginawa to. Sikatoy masimoon a nanpikasi’d si Jehova nipaakar ed panpapairap to. Oniay insulat to’d saginonor nipaakar ed nasasagmak to, “Inyakis ko so bosis ko ed Jehova. Ikalbok so pandalem ko ed arap to; iparungtal ko ed arap to so gonigon ko.”​—Salmo 142:1, 2.

Natan, luludlureyen na arum so panagmatalek nen David ed Dios. Ibabaga ran say pikakasi et sikolohiko lambengat a paraan pian manambayo ed kanonotan na sakey tan diad praktikalan et darak labat itan na panaon. Balet, duga labat lay impankompiyansa nen David ed Dios, ta diad kaunoran et atalo iray kabusol to. Diad pannodnonot ed eksperiensia to, oniay insulat nen David: “Saya a too a duka [maniirap, NW] inmakis et sikato so dinengel nen Jehova. Tan inlaban to ya impaway ed saray amin a gon-gonigon to.” (Salmo 34:6) Say tuan Dios a tinuplegan nen David et natatawag ed duaran teksto a “say Dios na kareenan.” (Filipos 4:9; Hebreos 13:20) Nitarok to ta so pakainawaan ed irap, a manresulta ed kareenan tayo?

Iyaansakit Ka nen Jehova

Si Jehova so aliwan mapaulyan ed panpapairap na totoo to. (Salmo 34:15) Agto lambengat aasikasoen iray pankaukolan na ariripen to bilang grupo noagta bilang indibidual met ya ontatakot ed sikato. Sanen idedika lay templo ed kadaanan a Jerusalem, si Solomon so akikasi’d Jehova pian ontalineng ed “anggan anto a pikakasi tan pankerew [a] gawaen na siopaman a too, no say amin a baley mo ya Israel, ya amtaen na balang too so dili a salot to tan say dili ya ermen to.” (2 Awaran 6:29) Singa inaksobi nen Solomon, kada indibidual so walaay nikaduman irap a kaukolan a sungdoan. Diad sakey et ompan beblay ed pisikal. Parad sananey, ompan emosyonal a gonigon. Arum so nayarin maniirap lapud impatey na inadaro. Say pakaandi-anapan, kairapay bilay, tan saray problema ed pamilya so kasmak met a paniirapan ed sarayan maksay a panaon.

Isipen pan maganoy ‘dili a pakasasalot mo tan say pakakaot-ot mo.’ Nayari pa lagin diad sagpaminsan et naliknam so singa ed insulat nen salmistan David: “Nananap ak na pigara a mangisibeg, balet anggapo a balot; tan saray managligliwa, balet anggapon balot so nalmok.” Ingen, napaseguroan kan manonot so Dios ed situasyon mo, lapud diad saginonor met lamlamang a salmo et insulat nen David: “Si Jehova dengelen to so saray naokolan, tan agto ra modmoraen so saray dinakep to.”​—Salmo 69:20, 33.

Diad malaknab a pangiyaplika ed saray salita nen David, maseguro tayon say Manamalsa na katooan so ontatalineng ed pikakasi na saramay nipangaw ed irirap da, a singa panangibaga. Niarum ni’d satan, sikatoy onkikiwas lapud nasasagmakan da. Konsideraen paray onggendan a balbalikas a mangipapatnag na panangabagey nen Jehova ed saray maniirap.

“Agyo pabpairapen so siopaman a bii a balo odino say ulila ed ama. No pabpairapen mo ra, et ontawag ira kalamor ed siak, dengelen ko so tagleey da; et say sanok ko ompetang naani.”​—Exodo 22:22-24.

“Say Dios agto kasi naani isingil so saray pinili to ya ontawag ed sikato ed agew tan labi, et sikato so maanos ed sikara?”​—Lucas 18:7.

“Sikato iliktar to so naokolan no oney-ey, say makabos met, ya anggapo so mananulong ed sikato. Sikato ilagak to so makabos tan naokolan, tan ilaban to so kamarerwa na naokolan. Sikato dondonen to so kamarerwa ra a yarawi ed panamalingo tan panamasoot, et mabli naani dala ra ed mata to.”​—Salmo 72:12-14.

“Say maniwit ed sikayo [totoo na Dios ed dalin] diwiten to so bukel na matak.”​—Zacarias 2:8.

Sarayan pigaran alimbawa so mangiyiilustra ed aralem ya interes na Manamalsa tayo ed pankaabiganan na totoo to. Kanian, walaan tayoy maabig a rason pian tumboken so pananimbawa nen apostol Pedro: “Imatalek yo ya amin ed sikato so kapagaan yo, ta sikato asikasoen to kayo.” (1 Pedro 5:7) Balet panon itayon tulongay Dios legan na saray panaon na irap?

No Panoy Panutulong na Dios ed Saray Maniirap

Singa anengneng tayo la, sanen anagmak si David na irap, sikatoy masimoon a nampikasi’d Dios parad panangiwanwan. Ontan met, sikatoy kinmiwas pian napalemew so situasyon, a manguusar ed inkamaparaan pian nalusutan toray manguusil ed sikato. Sirin, say panagmatalek ed si Jehova ya atekepan na personal a sagpot so amakayari’d si David pian nasungdoay panpapairap to. Antoy naaralan tayo’d saya?

Sano nipapaarap tayo’d irap, maseguron aliwan makapoy so resonablin ikiwas tayo pian nasolbar so problema. Alimbawa, no naandiay anapan so sakey a Kristiano, agta sikatoy mansagpot pian makaromog na trabaho? Odino no sikatoy walaay beblay ed pisikal, agta sikatoy manpatambal? On, anggan si Jesus, a walaan na pakayarin manambal ed amin a nengneng na sakit, so angaksobi a ‘say mansasakit so mankaukolan na managtambal.’ (Mateo 9:12; ikompara so 1 Timoteo 5:23.) Siempre, arum ed saray paniirapan so agnapaliisan; saratan so sungdoan lambengat. Balet, say sakey a tuan Kristiano so agnepeg a manmorian say paniirap so birtud a mismo, a singa sisiaen na arum. (Ikompara so 1 Arari 18:28.) Imbes, gawaen toy antokaman a kundang a sarag to pian talonaay irap to.

Balet, mas magmaong met ya ipanon so pamaakaran ed si Jehova diad pikakasi. Akin? Unona, diad isaral ed Manamalsa tayo, natutulongan itayon “naseguro iray bengatla ran sankaabigan.” (Filipos 1:10) Singa bilang, sano mananap na anapan, say sipipikasin panagmatalek ed Dios so ontulong ed sikatayo pian ag-awatey trabahon sumlang ed prinsipyos na Biblia. Paliisan tayo met so pagmaliw ya ‘abalbalang ed pananisia’ lapud aro ed kuarta. (1 Timoteo 6:10) Petepeteg, sano manggaway ambelat iran desisyon​—nipaakar ed anapan odino antokaman ya aspeto ed bilay—​kaukolan tayon tumboken so pananimbawa nen David: “Paawit mo ed Jehova so awit mo et sikato benbenan to ka. Agton balot paulyan so matunong a natentenyeg.”​—Salmo 55:22.

Ontutulong met so pikakasi ed sikatayon napansiansia tayoy balansin nonot, ta pian ag-itayo nalaspag ed irap tayo. Oniay insulat nen apostol Pablo: “Dia ed ganagana lapu ed pikakasi tan pikekerew a tekep na pisasalamat nipakabat komon ed Dios so saray kerew yo.” Tekep na anton resulta? “Say deen na Dios a talonaan ton amin a pakatalos, bantayan to so kapusoan yo tan saray nonot yo ed Kristo Jesus.” (Filipos 4:6, 7) On, kareenan, say deen na Dios. Satan a kareenan et “talonaan toy amin a pakatalos,” ta pian satan so manimbang ed sikatayo sano nabebelatan itayo’d pakakasakitay pagew. ‘Bantayan to so kapusoan tayo tan saray nonot tayo,’ diad ontan et natulongan itayon makapaliis ed kiwas a manapurasta tan agmakabat, a pansengegay lalon irap tayo.​—Eclesiastes 7:7.

Wala ni nagawaan na pikakasi. Makaapekta itan no panon ya onlesa so situasyon. Konsideraen pay sakey ya alimbawa ed Biblia. Sanen nipangaw si apostol Pablo ed Roma, pinaseseg toray kapara ton Kristiano ya ipikasi ra. Akin? “Kerewen ko ed sikayo a mapilpilit a gawaen yo so saya,” so insulat to’d sikara, “pian siak so nipawil ed sikayo ed maganggano.” (Hebreos 13:19) Amta nen Pablo a makaapekta so agmanundan pikakasi na saray kapananisiaan to no kapigan so kibulos to.​—Filemon 22.

Nauman ta na pikakasi so pansumpalan na irap mo? Nayarin ontan. Balet, kaukolan tayon moriaen ya aglawas eebatan nen Jehova iray pikakasi tayo diad paraan ya iilaloan tayo. Alimbawa, aminpigapigan nampikasi si Pablo lapud “sabit ed laman” to​—anganko ta problema’d pisikal a nisiglaot ed pakanengneng to. Imbes ya ekalen so irap, oniay imbaga na Dios ed si Pablo: “Say grasyak so masarag ed sika; ta say pakayarik agawan ayadyari ed kakapoyan.”​—2 Corinto 12:7-9.

Kanian no maminsan et agnaandi so paniirapan tayo. Imbes, nawalaan tayoy pankanawnawan napaneknekay panagmatalek tayo’d Manamalsa tayo. (Gawa 14:22) Niarum ni, napaseguroan tayo ya anggano ag-ekalen nen Jehova so paniirapan tayo, sikatoy “manggawa met na dalan a paliisan ta pian nayarian [tayo] ya itepel.” (1 Corinto 10:13) On, walay maabig a rason no akin ya atawag si Jehova bilang “Dios na ami’ ligliwa, a sikato so manligliwa ed sikatayo ed amin a panermenan tayo.” (2 Corinto 1:3, 4) Iiter to so kaukolan tayo pian makapansungdo tekep na daakan a kareenan.

Maganggano la​—Sakey a Mundon Andiay Irap

Isisipan na Manamalsa a diad panamegley na Panarian to et asingger to lan punasey amin a paniirapay katooan. Panon ton gawaen iya? Diad pamagit to’d si Satanas, say manunaan a manamawalay irap tan say manunan kabusol na kareenan, ya ipapaamta na Biblian “say dios na sayan panaon.” (2 Corinto 4:4) Balet maganggano lan manganggay panamanlong to’d katooan. Say pakaandi to so mangilukas ed agnabilang a bendisyon ya onsabi’d saramay ontakot ed Dios. Isisipan na Biblia a si Jehova et “punasen to so amin a lua ed kamataan da, tan anggapo la naani ipatey, tan anggapo la naani onnangis o dageyem o ot-ot. Ta saray ona a bengatla sikara so linmabas la.”​—Apocalipsis 21:1-4.

Ompatnag kasin imposibli so mundon andiay irap? A lanang lay pambibilay tayon manpapairap ya agtayo la makakulapay pian isipey pakaandi to. Balet say kawayangan manlapud takot, kapagaan, tan kalamidad so gagala lay Dios ed katooan diad impamalsa to, tan ontalona so gagala to.​—Isaias 55:10, 11.

Saya imay ilalon aromog di Sonia, Fabiana, tan Ana ya asalambit ed unaan ya artikulo. Si Sonia, ya inatey ed AIDS so duaran anak to, so akagamor na daakan a kareenan manlapud ilalon iyoopresi na Biblia​—say kioli na saray matunong tan saray agmatunong. (Gawa 24:15) “Sakey so bengatlan segsegurado,” kuanto, “say ilalo tayo so anaeg ed antokaman nin ot-ot.”

Legan a manaayam ed ayaman na saray ulila, si Ana so binisita na sakey ed Tastasi nen Jehova. “Impanengneng to’d siak so ngaran nen Jehova ed Biblia,” so inkuan nen Ana, “tan siak so akanangis ed liket. Kakkaukolan koy tulong, tan naamtaan kon wala so Dios a mangiyaansakit ed sikatayo.” Kayari inyalis to’d ayaman na saray ulila, inawat nen Ana so panagaral na Biblia tan akaamta nin nagkalalo ed saray sipan nen Jehova. Insan to indidika so bilay to ed si Jehova tan insimbolo to itan ed panamegley na bautismo. “Manlapulad saman et nantultuloy ak lan nanmatalek ed si Jehova ed panamegley na pikakasi, tan siak so aligliwa ed panamaseguron tulongan to ak.”

Aromog met nen Fabiana so mas nagkalalon ligliwa tan kareenan na nonot ed panpapairap to diad impakaamta to ed sipasipan na Dios parad arapen. “Say panaral na katuaan ed Biblia et aliling toy ipapaway ed sakey ya ambilbilunget tan mauddiem a pasen tan iloloob ed sakey a malinew, maliwawa, tan marakep a kuarto.”​—Ikompara so Salmo 118:5.

Balet panon tan kapigan so kiwala na literal a kareenan ed intiron globo? Nengnengen tayo pay onggendan iran artikulo.

[Kahon ed pahina 6]

Nanduruman Nengneng na Irap

▪ Ngalngalin kakapat ed populasyon na mundo so manbibilay ed pirmin inkaduka, tan minilyon ni so manbibilay ed leksab-nen-toon kipapasen a mamipeligro’d pakapambilay da.

▪ Masulok a 200 milyon ya ugugaw so nabibigot.

▪ Kada taon et titigwayen na diarrhea so ngalngalin taloran milyon ya ugugaw a mantaoy limara paabeba.

▪ Saray makaalis a sakit so anigway ed onliligada’d 16.5 milyon a totoo nen 1993 labat. Lapud nandurumay pangipapasen na arum a bansa ed saray beblay, say aktual a bilang so nayarin atagtagey ni.

▪ Walay akalkulan 500 milyon a totoon naapektoay arum a nengneng na problema ed mental.

▪ Ompepeles so idaraak ed bilang na panagbitkel diad limog na saray tobonbalo nen say dinan nin agwat na edad.

▪ “Dumsis so eras tan kaandiay-trabaho ed mundo,” so inkuan na The Unesco Courier. “Walay 35 milyon ya andiay-trabaho ed pitoran sankayamanan iran nasyon, tan diad Brazil lambengat et walay 20 milyon a mantratrabahon andiay magenap a taganoen.”

[Saray litrato ed pahina 7]

Ontulong ed sikatayo so pikakasi a nisentro ed sipan na Dios a mundon andian na irap