Kasin Mangiyaansakit so Dios ed Sikatayo?

KASIN liknaen mon nabebelatan ka la lapud saray problema ed pamilya, bunigas, kimey, odino arum niran ambelat a responsabilidad mo? Ontan so nalilikna na dakel a totoo. Tan siopa ta natan so agnaaapektoan ed ag-inkahustisya, krimen, tan karawalan? On, ontan a mismo so imbaga na Biblia: “[Say] lapag a pinalsa maningel ira ya amin tan maniirap ira a mananak ya anggad natan.” (Roma 8:22) Agpankelawan ya itetepet na dakel a totoo: ‘Kasin mangiyaansakit so Dios? Kasin tulongan to itayo?’

Oniay impikasi nen makabat ya Arin Solomon ed Dios: “Ta sika, sika a bukbukor, antam so saray puso na saray anak na saray totoo.” Nanmatalek si Solomon a say Dios so aglambengat mikabat ed sikatayo noagta sikatoy mangiyaansakit met ed sikatayo bilang indibidual. Makpel ton kinerew ed Dios ya ‘ondengel komon manlapu ed tawen’ tan ebatan To iray pikakasi na kada indibidual a matakot ed Dios a mangipapaamta ed Sikato na “dili a salot to tan say dili ya ermen to.”​—2 Awaran 6:29, 30.

Natan, si Jehova a Dios so siansian mangiyaansakit ed sikatayo tan mamapaseseg ed sikatayon onkerew ed sikato panamegley na pikakasi. (Salmo 50:15) Isisipan to ya ebatan to iray masimoon a pikakasi a mitunosan ed linawa to. (Salmo 55:16, 22; Lucas 11:5-13; 2 Corinto 4:7) On, dedengelen nen Jehova so ‘anggan anto a pikakasi tan pankerew a gawaen na siopaman a too odino na amin a baley [to].’ Kanian, no sikatayoy manmatalek ed Dios, manpikasi parad tulong to, tan onapit ed sikato, naeksperiensya tayo so maaron panangiyansakit tan panangiwanwan to. (Uliran 3:5, 6) Oniay impaseguro ed sikatayo na managsulat na Biblia a si Santiago: “Singger kayo ed Dios, et sikato so onsingger naani ed sikayo.”​—Santiago 4:8.