Kapawil ton akilaban, akatongtong toy Azarias. Sikatoy pinaseseg tan pinasakbayan na sayan propeta ya: “Denglen yo ak, Asa, tan amin a Juda tan Benjamin. Si Jehova wala ed sikayo, leleg ya wala kayo ed sikato, et no sikato so anapen yo, sikato so naromog yo, balet no sikato so ikaindan yo, sikayo so ikaindan to . . . Manpabiskeg kayo, tan saray lima yo ag-ira komon onkapuy, ta say gawa yo natumangan.”​—2 Awa. 15:1, 2, 7.

Napabiskeg na sarayan salita so pananisia tayo. Papaneknekan na saraya ya tulongan itayo nen Jehova no mansiansia tayon matoor ed sikato. No onkerew tayo na tulong, seguradon dengelen to tayo. “Manpabiskeg kayo,” so inkuan nen Azarias. Talagan kaukolay inkakpel pian gawaey duga, balet nagawaan tayo iya diad tulong nen Jehova.

Balet, wala so pasakbay ed imbaga nen propeta Azarias. Oniay inkuan to: “No sikato [Jehova] so ikaindan yo, sikayo so ikaindan to.” Agkomon itan nagawad sikatayo ta makapasinagem so pansumpalan na satan! (2 Ped. 2:20-22) Ag-ibabaga na Kasulatan no akin ya inter nen Jehova itan a simbawa ed si Asa, balet ag-itan inunor na ari.