Napaliket Moy Puso nen Jehova No Pansiansiaen Moy integridad Mo
“Ana’ko, onkabat ka, tan paliketen mo so pusok, pian naebatan ko so mamalaw ed siak.”—ULI. 27:11.
1, 2. (a) Anto so ibabaga na libroy Job ya inkantiaw nen Satanas? (b) Anto so pakapatnagan ya anggan sanen inatey lay Job et kakantiawan ni nen Satanas si Jehova?
INABULOYAN nen Jehova si Satanas a manubok ed integridad na matoor a lingkor Ton si Job. Lapud satan, naandi ayayep tan ananak nen Job, tan nansakit na grabe. Balet sanen sinubok nen Satanas so integridad nen Job, aliwa labat a si Job so sankanonot to. Oniay inkantiaw nen Satanas: “Baog tan baog, on, amin a say too wala ed sikato iter to nipaakar ed bilay to.” On, aliwa labat a si Job so nalalanor ed sayan isyu tan nantultuloy ni itan anggan sanen abayag lan inatey si Job.—Job 2:4.
2 Kalabas na manga 600 taon kayari inkasubok nen Job, apuyanan si Solomon a mangisulat: “Ana’ko, onkabat ka, tan paliketen mo so pusok, pian naebatan ko so mamalaw ed siak.” (Uli. 27:11) Mapatnag sirin ya anggad saman a panaon et kakantiawan ni nen Satanas si Jehova. Niarum ni, diad samay pasingawey ed si apostol Juan, anengneng toy Satanas a mangaakusa ed saray lingkor na Dios sanen nibasileng la’d dalin, ag-abayag kayari na inkiletneg na Panariay Dios nen 1914. On, anggad natan ya asingsingger lan naderal iyan mauges a sistema et kukuestionen ni nen Satanas so integridad na saray lingkor na Dios!—Apo. 12:10.
3. Antoran makanakanan leksion so naaralan tayo ed libron Job?
3 Walay taloran importantin leksion a naaralan tayo ed libron Job. Unona, impabidbir na saray subok ed si Job no siopan talagay kalaban na katooan tan say walad benegan na saray isusumpa’d totoo na Dios. Satan et si Satanas a Diablo. Komadua, antokaman so nasagmak tayon subok, napansiansia tayoy integridad tayo no walay maapit a relasyon tayo ed Dios. Komatlo, no manasagmak itayo na subok, tutulongan itayo na Dios a makapansungdo a singa ginawa to’d si Job. Gagawaen nen Jehova itan natan panamegley na Salita to, organisasyon to, tan say masanton espiritu.
Aglilingwanan No Siopan Talagay Kalaban
4. Siopa so natetel ed saray nagagawa ed mundo natan?
4 Dakel so mangibabagan anggapo kunoy Satanas. Kanian, anggano natatakot la ra’d saray nagagawa ed mundo, agda namomorian si Satanas a Diablo so talagan walad benegan na satan. Tua a say kaslakan a sengegay paniirap na totoo et sikara met lanlamang. Saray inmunan ateng tayo a di Adan tan Eva et pinili ray agmanpasakop ed Manamalsa ra. Tan manlapu la’d saman, saray tinmutumbok a henerasyon et nagmaliw met a benger. Siansia ni balet a natetel si Satanas ta sikatoy amalikdo ed si Eva a manrebelde ed Dios. Sikato so angiletneg ed limog na imperpekto tan ompapatey a katooan na sakey a sisteman kokontrolen to. Si Satanas so “dios na sayan sistema na mundo,” kanian saray katooan et mapangaya, agum, mapasirayew, maimon, matila, tan masumpa, a singa sikato. (2 Cor. 4:4, NW; 1 Tim. 2:14; 3:6; basaen so Santiago 3:14, 15.) Manreresulta irayan ugali ed busolan, panagsaol, gulo, tan sebegan ed politika tan relihyon a mamapaloor ed paniirap na katooan.
5. Anto so labay tayon gawaen ed makanakanan katuaan ya amta tayo?
5 Bilang lingkor nen Jehova, talagan abendisyonan tayo ta amta tayo iyan katuaan! On, amta tayo no siopay natetel ed ondedenden iran kipapasen na mundo. Agta nepeg labat sirin a napakiwas itayon manpulong pian nakabatay totoo no siopay peteg a panlalapuay problema? Tan agta maliket tayon ondapag ed tuan Dios a Jehova, tan mangipaliwawa ed arum no panon ton paandien si Satanas tan say paniirap na katooan?
6, 7. (a) Siopa so walad benegan na panamasegsegang ed saray tuan managdayew? (b) Panon tayon naalig si Elihu?
6 Si Satanas so walad benegan na dakel a kaermenan ed mundo, pati saray isusumpan nasasagmak na totooy Dios. Sikatoy pursigidon manubok ed sikatayo. Oniay inkuan nen Jesu-Kristo ed kinen apostol Pedro: “Simon, Simon, nia, si Satanas kinerew to ka, pian nagalpong to ka a singa trigo.” (Luc. 22:31) Mipadpara, balang sakey ed sikatayo ya ontutumbok ed bakat nen Jesus et makasagmak met na subok. Inkompara nen Pedro so Diablo ed “omoang a leon a mananap na buagen to.” Tan inkuan met nen Pablo: “Amin so saray malabay a manbilay ed sinasanto ed Kristo Jesus, manako’ra naani pamasegsegang.”—1 Ped. 5:8; 2 Tim. 3:12.
7 Panon tayon nipatnag ya agtayo nalilingwanan no siopa so talagan kalaban tayo no walay onsabin trahedya ed sakey ya agi? Imbes ya arawian tayo, aligen tayoy awawey nen Elihu ya akitongtong ed si Job bilang tuan kaaro. Ibaan tayo iyan agi diad pipupuligesgesan to’d kalaban tayon amin, salanti, si Satanas. (Uli. 3:27; 1 Tes. 5:25) Say gagala tayo et tulongan iyan kaparan lingkor pian napansiansia toy integridad to antokaman so nagawa, diad ontan et napaliket so puso nen Jehova.
8. Akin et ag-apatunda nen Satanas si Job a mangidayew ed si Jehova?
8 Say unonan kayarian ya inekal nen Satanas ed si Job et saray ayayep to. Balbaleg so bili na saraya tan nayarin panlalapuay pambilay da. Balet ta uusaren met iraya nen Job ed panagdayew. Kayari nen Job a pasantosen iray ananak to, sikatoy “inmalagey ya asaksakbay ed kabuasan, tan angiyapay na bagbagat a poolan unong ed bilang da ya amin. Ta si Job inkuan to, ‘nayari a saray ana’ko a lalaki nankasalanan ira, tan inkaindan da so Dios ed saray puso ra.’ Onia so ginawa nen Job a naynay.” (Job 1:4, 5) Sirin, si Job et regular a mangiyaapay na ayayep ed si Jehova. Balet agto la itan agawaan sanen ginmapo laray subok ed sikato. Ta anggapo lay “kayarian” ton usaren to’d pangidayew ed si Jehova. (Uli. 3:9) Ingen ta sarag ton idayew si Jehova panamegley na bibil to, tan ontan so ginawa to!
Bayuboan so Maapit a Relasyon ed si Jehova
9. Anto so sankaimportantian a bengatla ed bilay tayo?
9 Mayaman itayo man o mairap, ugaw man o matatken, mabunigas o mansasakit, sarag tayon bayuboan so maapit a relasyon ed si Jehova. Antokaman so nasasagmak tayon subok, no walay maapit a relasyon tayo ed Dios et napansiansia tayoy integridad tayo tan napaliket tayoy puso nen Jehova. Wala ni ingen iray indibidual a limitadoy pikakabat da ed katuaan, balet ta akapampakpel ira tan apansiansia ray integridad da.
10, 11. (a) Panoy inkiwas na sakey ya agi tayo sanen asubok so integridad to? (b) Anto so mapuersan ebat na sayan agi ed si Satanas?
10 Imanoen pay eksperiensya nen Sister Valentina Garnovskaya, sakey ed saramay dakel a Tasi ed Russia a pinansiansia ray integridad da anggaman ed pinasyan subok, a singa say matoor a si Job. Nen 1945, sanen man-20 años to ni labat, sikatoy apulongan na sakey ya agi. Tan amidua nin apawil na samay agi, balet kayari na satan et agla ran balot akapannengneng. Anggaman kuan, ginmapo lay Valentina a manpulong. Lapud satan, sikatoy inerel tan asentensiaan na waloy taon ed panamairapan a kampo. Nen 1953, sikatoy nibulos tan tampol ton inggapo lamet so manpulong. Balet ta narel lamet tan impriso, tan diad saya, say sentensia to la et samploy taon. Kayari na pigaran taon ed sakey a kampo, sikatoy niyalis ed sananey. Tan diad satan a kampo, walaray agagin bibii a walaan na sakey a Biblia. Aminsan, impanengneng na sakey ya agi ed si Valentina iman a Biblia. Seguradon makapalikliket itan a bekta! Isipen pa labat, say unor tan alenleneg a Biblian anengneng nen Valentina et saman ni awit na agin nantasi ed sikato nen 1945!
11 Nen 1967, nibulos si Valentina, tan nisimbolo ton siansiay dedikasyon to ed si Jehova panamegley na bautismo. Maseseg ton inusar so kawayangan to pian mibiang ed ministeryo anggad 1969. Balet diad satan a taon, sikatoy narel lamet tan asentensiaan na taloy taon. Ingen ta agtinmundan nampulong si Valentina. Sakbay ya inatey nen 2001, 44 a totoo so atulongan ton makapikabat ed katuaan. Diad amin-amin et 21 taon so impanayam to ed saray kampo tan kulongan. Mabulbulos ton insakripisyo so antokaman, anggan say kawayangan to, napansiansia to labat so integridad to. Oniay inkuan to antis a manampot so bilay to: “Agko asali ‘tay awalaan na sarilin ayaman. Wala labat ed saksakey a maleta so amin a kayarian ko, balet ta maliket tan kontento ak a manlilingkor ed si Jehova.” Talagan mapuersay ebat nen Valentina ed si Satanas a mangibabagan agla mansiansian matoor ed Dios iray totoo no nasubok ira! (Job 1:9-11) Segurado itayon apaliket nen Valentina so puso nen Jehova. Tan sikatoy pirpirawat met la nen Jehova a paolien, pati say amin nin matoor ya inatey.—Job 14:15.
12. Akin ya importante so aro diad relasyon tayo ed si Jehova?
12 Say pikakaaro ed si Jehova et akaletneg ed panangaro tayo ed sikato. Pandidinayewan tayoray kalidad na Dios tan gagawaen tayoy anggaay nayarian tayon manbilay unong ed saray gagala to. Aliwan singa ed ibabaga na Diablo, mabulbulos tan sigpot tayon aaroen si Jehova. Sayan nalilikna tayon aro so mamapabiskeg ed sikatayon mamasiansia ed integridad tayo ed antokaman a subok. Diad biang met nen Jehova, “iyapiger to so kamarerwa na saray [“matoor,” NW] to.”—Uli. 2:8; Sal. 97:10.
13. Antoy nenengnengen nen Jehova ed saray bengatlan gagawaen tayo parad sikato?
13 Aro so mamakiwas ed sikatayon igalang so ngaran nen Jehova, anggano say pakalikna tayo et kulang niray nagagawaan tayo. Nanenengneng toray maong a motibo tayo tan agto itayo ipupulisay no agtayo nagawaan so amin a labay tayon gawaen. Say importante et aliwa labat lan say gagawaen tayo, noag pati say rason no akin a gagawaen tayo itan. Si Job et pinasyay ermen tan sinungdoan to, balet siansia nin intongtong to ed saray mangaakusa ed sikato so panangaro to’d saray dalan nen Jehova. (Basaen so Job 10:12; 28:28.) Diad unor a kapitulo na libron Job, imbalikas na Dios so sanok to’d si Elifaz, Bildad, tan Zofar lapud agda sinalitay katuaan. Balet imbalikas nen Jehova so panangabobon to ed si Job sanen sikatoy amipat Ton tinukoy ya “aripen ko” tan sanen ingganggan Ton manpikasi parad saramay palson managligliwa. (Job 42:7-9) Komon ta onkiwas itayo met ed paraan ya aabobonan nen Jehova.
Tutulongan nen Jehova Iray Matoor a Lingkor To
14. Panon a tinulongan nen Jehova si Job a nipetek so panmoria to?
14 Apansiansia nen Job so integridad to anggaman aliwan perpekto. No maminsan, diad pinasya lan pakakadetdetan to et nanaekal so inkabalanse na panmoria to. Alimbawa, inkuan to’d si Jehova: “Ontawag ak ed sika, et agka onebat ed siak . . . ed pakapanyari na limam usilan mo ak.” Niarum ni, alabas nen Job so impangikatunongan to’d inkasikato sanen inkuan to: “Agak marelmeng,” tan “anggapo so pamasoot ed saray limak, tan say pikakasik sikato so malinis.” (Job 10:7; 16:17; 30:20, 21) Anggaman kuan, mapangasin tinulongan nen Jehova si Job panamegley na nantutumbokan a tepet ya angiyalis na imano manlapud si Job tan malinlinew ya angipamoria ed sikato a say too et singa anggapo no ikompara ed inkatalonggaring na Dios. Inawat nen Job itan a simbawa tan impetek toy panmoria to.—Basaen so Job 40:8; 42:2, 6.
15, 16. Diad antoran paraan a tutulongan nen Jehova iray lingkor to natan?
15 Mangiiter met si Jehova na maaron panangigiya tan simbawa ed saray totoo to natan. Niarum ni, dakel so probisyon a pakakagunggonaan tayon maong. Alimbawa, inter toy Jesu-Kristo bilang dondon bagat, tan lapud satan et nayari lan naperdona iray kasalanan tayo. Lapu met ed satan, sarag tayo lay nawalaan na maapit a relasyon ed Dios, anggano ag-itayo perpekto. (Sant. 4:8; 1 Juan 2:1) No makakasagmak tayo na subsubok, ipipikasi tayo met so tulong tan panamabiskeg na masanton espiritu na Dios. Sakey ni, walaan itayo na Biblia. No basaen tan dalepdepen tayo so karga na satan, nipaparaan tayo’d saray onsabin subok ed pananisia. Ontulong so panagaral pian natalosan tayo so isyu na sankatalbaan ya inkasoberano tan personal ya integridad.
16 Niarum ni, baleg a gunggona so impagmaliw tayon kabiangan na sankamundoan ya impanaagi, a tataryaan nen Jehova na espiritual a tagano panamegley na “matoor tan makabat ya aripen.” (Mat. 24:45-47) Kada sakey ed manga 100,000 a kongregasyon na saray Tasi nen Jehova et walaan na pantitipon a mangiwawanwan tan mamapabiskeg ed sikatayon talonaan iray subok ed pananisia. Saya so niyilustra ed eksperiensya nen Sheila, sakey a Tasin tinedyer ed Germany.
17. Iyilustra pa no akin a makabat so lawas pangunor ed saray panangiwanwan na organisasyon nen Jehova natan.
17 Aminsan diad eskuelaan, sanen anggapoy manbabantay ed klase di Sheila, sinali na saray kaklase to so manggalaw na Ouija board (espiritistikon galaw). Tamtampol a pinmaway si Sheila ed kuarto. Sikatoy malikeliket ed satan a ginawa to ta diad saginonor et naamtaan ton legan a manggagalaw iramay kaklase to et alikas day kiwawala na saray demonyo tan kibatiktik ira ed takot. Akin et denesidi nen Sheila so ontaynan a tampol? “Sakbay na sayan inkagawa, apantongtongan mi ed pantitipon diad Kingdom Hall so kapeligroan na Ouija board. Kanian amtak la no antoy gawaen ko,” so inkuan to. “Labay kon paliketen si Jehova a singa ibabaga na Biblia ed Uliran 27:11.” Maong labat ta inmatendi Sheila ed saman a pantitipon tan dinmengel a maong!
18. Anto so determinadom a gawaen?
18 Komon ta balang sakey ed sikatayo et determinadon manumbok ed panangigiya na organisasyon na Dios. Diad regular a pipiaral, panagbasa na Biblia, panagaral ed saray publikasyon tayo, pampikasi, tan pililimog ed saray maespiritual ya agagi, nagamoran tayoy panangigiya tan tulong a nakaukolan tayo. Labay nen Jehova a lawas napansiansia tayo so integridad tayo tan sikatoy matalek a nagawaan tayo itan. Talagan baleg a pribilehyo so pangidayew ed ngaran nen Jehova, pamasiansiay integridad, tan pamaliket ed puso to!
Kasin Nanonotan Mo?
• Si Satanas so walad benegan na antoran kipapasen tan subok?
• Anto so sankaimportantian a bengatla ed bilay tayo?
• Anto so akaletnegan na pikakaaro tayo’d si Jehova?
• Diad antoran paraan a tutulongan itayo nen Jehova natan?
[Litrato ed pahina 8]
Napapakiwas ka kasin inabang so makanakanan katuaan ya antam?
[Litrato ed pahina 9]
Natulongan tayoray kaparan managdayew a mamasiansia ed integridad da
[Litrato ed pahina 10]
Mabulbulos si Valentina ya angisakripisyoy antokaman, napansiansia to labat so integridad to