4. Diad dilin salitam, panon mon isalaysay so ibabaga na Salmo 133 nipaakar ed inaagin pankakasakey?

⁴ Inapresyan tuloy na salmistan David so inaagin pankakasakey. Sikato so asagyat ni ingen a mangikansion ed satan! Isipen pan sikatoy manutugtog na arpa legan a kakantaen to: “Nengnengen yo! Alay kaabigan tan alay kaligliwaan na panayam na sanaagi ed inkasaksakey! Singa say mabmabli a larak ed ulo, ya onagos angga ed balbas, say balbas ni nen Aaron ya inmagos angga ed saray saloy na kawekawes to. Singa say linaew ed Hermon, tan singa say linaew ya onleksab ed tapew na palpalandey na Sion, ta si Jehova imbaki tod man so kapalaran, salanti bilay ya andi-anggaan.”​—Salmo 133:1-3.

6, 7. Panon a say pankakasakey na Israel so singa linaew ed Palandey Hermon, tan iner so pakaromogan tayo na bendisyon na Dios natan?

⁶ Panon a say impaniiban pankakasakey na Israel so singa met ed linaew na Palandey Hermon? Bueno, lapud say toktok na sayan palandey so masulok a 2,800 a metro so kaatagey to ed palatas na dayat, satan so naynay a napno na niebe ed ngalngali interon taon. Say manieben toktok na Hermon so sengegay ibasa na alingasew ed labi tan diad ontan et mamapawala na dakel a linaew a mangipreserba ed tanamanan legan na andukey a panaoy tiagew. Say ambetel a siplog na dagem a manlalapud kapalandeyan na Hermon so makapangisabi ed saratan ya alingasew ya anggad arawin abalaten a lugar na Jerusalem, a saratan so ombasa bilang linaew. Kanian dugaruga so impanalambit na salmista a ‘say linaew ed Hermon so onleksab ed tapew na palpalandey na Sion.’ Alay abig a panonot ed say makarepreskon impluensya a mamabulaslas ed pankakasakey na pamilya na saray managdayew nen Jehova!

⁷ Sakbay na inkiletneg na Kristianon kongregasyon, say Sion, odino Jerusalem, so sentro na tuan panagdayew. Kanian, ditan ya ingganggan na Dios so pamendisyonan. Lapud say Lapuan na amin a bendisyon so nanayam diad paraan a nirepresenta ed santuaryo diad Jerusalem, manlapu ditan iray bendisyon. Anggaman ontan, lapud say tuan panagdayew so agla nigeter ed sakey a lugar, say bendisyon, aro, tan pankakasakey na ariripen na Dios so naromog ed interon dalin natan. (Juan 13:34, 35) Antoray arum a manunan sengegan a mamapabulaslas ed sayan pankakasakey?