Wala ra Kasi Salita ed Biblia ya Makaligliwa ed Siak?
Say ebat na Biblia
On. (Roma 15:4) Imanoen iray alimbawan bersikulo na Biblia ya manliligliwa ed saramay walad mairap iran situasyon tan nabebelatan so liknaan da.
Diad sayan artikulo
Mairap ya situasyon
Salmo 23:4: “Anggano manaakar ak ed ambilbilunget a dalan, anggapoy nepeg kon takotan, ta wala kad abay ko.”
Say labay ya ibaga: No manpikasi kad Dios tan mantiwala ka ed panangigiya na Salita to, say Biblia, nawalaan kay pakpel anggano mairap so situasyon mo.
Filipos 4:13: “Walay biskeg kon arapen so amin a bengatla lapud samay mangiiter ed siak na pakayari.”
Say labay ya ibaga: Ikdan ka na Dios na biskeg pian nasarag moy anggan anton problema.
Naandi so inaro ed bilay
Eclesiastes 9:10: “Anggapo so kimey odino plano odino kakabatan odino karunongan diad Lubok.”
Say labay ya ibaga: Agmaniirap iramay inatey la, tan agda tayo met sarag ya sakitan. Anggapo lay amta ra.
Gawa 24:15: “Walay kioli.”
Say labay ya ibaga: Sarasarag na Dios ya bilayen lamet iray inaro tayod bilay.
Graben pakakakonsiensia
Salmo 86:5: “Maomaong ka, O Jehova,a tan akaparaan kan mamerdona; abalbaleg so matoor a panangarom ed amin ya ontatawag ed sika.”
Say labay ya ibaga: Peperdonaen na Dios iramay talagan pagbabawian da iray agawaan dan lingo nensaman tan determinado iran agla uliten iratan.
Salmo 103:12: “No panoy kaarawi na bubutayan na agew manlapud seselekan to, ontan so impangiyarawi to ed sikatayo na saray kasalanan tayo.”
Say labay ya ibaga: No peperdonaen itayo na Dios, iyaarawi tod sikatayo iray kasalanan tayo, iiyan to itan ed sankaarawian ya anggad posible. Agto lan balot ipanonot iratan pian tetelen odino dusaen itayo.
Ermen
Salmo 31:7: “Nanenengneng moy paniirap ko; amtam so pinasyan pakakagonigon ko.”
Say labay ya ibaga: Amta na Dios so amin ya mairap ya dadalanen mo. Natatalosan toy amin ya naliliknam—anggano ag-itan natatalosan na arum.
Salmo 34:18: “Si Jehova et asingger ed samay asugatay puso to; ililiktar to iramay nagogonigon so espiritu ra.”
Say labay ya ibaga: Impromisa na Dios ya suportaan to ka no maermen ka. Sarag to kan ikdan na biskeg pian nasarag moy ansakit ya naliliknay pusom.
Sakit
Salmo 41:3: “Sikatoy asikasoen nen Jehova legan a walad dukolan a mansasakit.”
Say labay ya ibaga: Pian nasarag moy graben sakit, ikdan ka na Dios na mareen ya nonot, biskeg, anos, tan karunongan pian makapanggawa kay maabig iran desisyon.
Isaias 33:24: “Anggapoy manaayam ditan a mangibagay: ‘Mansasakit ak.’”
Say labay ya ibaga: Impromisa na Dios ya onsabi panaon ya amin ya totoo et maksil so laman da.
Stress tan pakakaaburido
Salmo 94:19: “Sanen nadadaeg ak na saray kapagaan, niligliwa tan pinakalma mo ak.”
Say labay ya ibaga: No onasingger tayod Dios diad panaon ya nai-stress itayo, seguradon tulongan to tayon mansiansian kalmado.
1 Pedro 5:7: “Ipaawit yod sikato so amin a kapagaan yo, lapud iyaansakit to kayo.”
Say labay ya ibaga: Iimanoen nen Jehova no walay dadalanen tayon mairap ya situasyon. Labay ton manpikasi tayod sikato tan ibaga tayon amin iray pampapagaan tayo.
Guerra
Salmo 46:9: “Papatundaen to ray guerra diad interon dalin.”
Say labay ya ibaga: Asingger lan ekalen na Panarian na Dios so amin ya guerra.
Salmo 37:11, 29: “Saray mauyamo et tawiren day dalin, tan manliket iran maong ed agnaparaan a kareenan. . . . Saray matunong et tawiren day dalin, tan manbilay ira ditan diad andi-anggaan.”
Say labay ya ibaga: Panliketan la na maong ya totoo so anggapoy anggaan ya kareenan ed dalin.
Pampapaga ed arapen
Jeremias 29:11: “‘Amtak iray bengatlan nononoten ko parad sikayo,’ so imbaga nen Jehova, ‘say kareenan, tan aliwan say kadederal, pian ikdan ta kayoy maong ya arapen tan ilalo.’”
Say labay ya ibaga: Impaseguro na Dios ed totoo to ya nawalaan iray balibalin arapen.
Apocalipsis 21:4: “Punasen to so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.”
Say labay ya ibaga: Impromisa na Dios ya ekalen toy amin ya mauges iran nagagawa ya nanenengneng tan nai-eksperiensya tayo natan.
a Jehova so ngaran na Dios. (Salmo 83:18) Nengnengen so artikulon “Siopa si Jehova?”