“Jehova, Dios a Mapangasi tan Mapaaro”

Jehova, Jehova, Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.”​—EXODO 34:6.

1. (a) Anton ligliwa so itatarya na Biblia parad saramay akaimaton ed inkasipa na saray inad-aro manlapud puron panagdayew? (b) Panon a momoriaen nen Jehova iray managkasalanan?

“INKUAN ed siak na ana’kon bii ya agto labay lay magmaliw a kabiangay Kristianon kongregasyon,” so kuan na sakey a Kristianon ama. “Diad loob na pigaran agew, simba, bulabulan ni ingen kayari to et sengegan la iman na imbeleng ko. Mas grabe ni itan nen say patey.” Talagan makapagonigon so pakaimaton ed sakey ya inad-aro ya onkasipa ed basbas na puron panagdayew. Kasin awalaan ka lay ontan ya eksperiensia? No wala, naligliwa ka ed pakaamtan si Jehova et mililikna ed sika. (Exodo 3:7; Isaias 63:9) Balet panon ton momoriaen iratan a managkasalanan? Ipapanengneng na Biblia a sikaray sipapangasin papapawilen nen Jehova ed pabor to. Sikatoy akikasi ed saray rebelyoson Judio nen panaon nen Malaquias: “Ompawil kayo ed siak, et siak ompawil ak naani ed sikayo.”​—Malaquias 3:7.

2. Panon ya ipapanengneng na Biblia a say panangasi et sipor lan kabiangay personalidad nen Jehova?

² Nipabitar so panangasi na Dios ed si Moises diad Palandey Sinai. Diman et imparungtal nen Jehova so inkasikato bilang “Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.” (Exodo 34:6) Idadanet na sayan panangiyabawag a say panangasi et sipor lan kabiangay personalidad nen Jehova. ‘Labay [ton] nagegemtan da so panagsibkel,’ so insulat nen Kristianon apostol Pedro. (2 Pedro 3:9) Siempre, walay limitasyon na panangasi na Dios. “Anggan anton pamaakaran agto ibilang a malinis so nankasalanan,” so nibaga’d si Moises. (Exodo 34:7; 2 Pedro 2:9) Anggaman kuan, “say Dios sikato so aro,” tan say panangasi so baleg ya aspekto na satan a kualidad. (1 Juan 4:8; Santiago 3:17) Si Jehova et “agto pagnayonen so sanok to ed ando lan ando,” tan sikatoy “manliket ed maaro ya abig na linawa.”​—Miqueas 7:18, 19.

3. Panon a midumaan so panmoria nen Jesus ed panmoria na eskribas tan Fariseos nipaakar ed panangasi?

³ Si Jesus so naspot a repleksion na mangatatawen ya Ama to. (Juan 5:19) Say mapangasin panagtrato to ed saray managgaway-mauges so aliwan panangonsinti ed saray kasalanan da noagta pakapatnagay miparan matamoy a liknaan ya impatnag to ed saray mabeblay. (Ikompara so Marcos 1:40, 41.) On, inlaktip nen Jesus so panangasi ed saray “ambelbelat a pamaakaran” na Ganggan na Dios. (Mateo 23:23) Misunian, konsideraen pay eskribas tan Fariseos, a say unong-ed-ganggan a pakatalos da ed inkahustisya et gendat ya agmangikokonsidera’d panangasi. Sanen anengneng day Jesus a midedeneng ed saray managkasalanan, inreklamo ra: “Sayan too awaten [to] so saray managkasalanan, tan mikan ed sikara.” (Lucas 15:1, 2) Inebatan nen Jesus iray mangaakusa’d sikato tekep na taloran ilustrasyon, a kada sakey ed saratan et mangidadanet ed panangasi na Dios.

4. Anto so insalaysay nen Jesus a duaran ilustrasyon, tan anto so punto na kada sakey?

⁴ Unona, sinaglawi nen Jesus so sakey a too ya angitilak ed 99 a karnero pian anapen toy sakey ya abalang. Say punto to? “Wala naani liket ed tawen nisengeg ed sakey a managkasalanan a magbabawi, nagkalalo nen dia ed saray siamamplo tan siam a matunong a totoo, ya agda kaukolan so pagbabawi.” Mikadua, sinaglawi nen Jesus so sakey a bii ya inanap toy abalang a drakman sinsilyo tan nanliket lapud impakaromog ed satan. Say pangiyaaplikaan to? “Wala so liket ed arap na saray angheles na Dios nisengeg ed sakey a managkasalanan a magbabawi.” Indalatdat nen Jesus so mikatlon ilustrasyon to diad nengneng na sakey a parabolo.a Impasen iya na dakel bilang sankaabigan ya antikey ya istorya a nisalaysay ed kapiganman. Say pangonsidera ed sayan parabolo so ontulong ed sikatayon mangapresia tan mangalig ed panangasi na Dios.​—Lucas 15:3-10.

Tinmaynan ed Abung so Sakey a Rebelyoson Anak

5, 6. Panon ya impatnag na yogtan ya anak ed mikatlon ilustrasyon nen Jesus so makapasinagem a kakulangay apresasyon?

⁵ “Sakey a too walaan na duara ya anak a lalaki. Et say yogtan ed sikara inkuan to ed ama to, ‘Ama, iter mo ed siak so kaaruman na kayarian mo a nabebetangan ko.’ Et inapag to ed sikara so kayarian to. Et kayari, aliwan dakel ya agew, say yogtan ya anak tinipon to ya amin, et linma ed kurang ed sakey a dalin ya arawi, et diman to dinarak so kayarian to ed panagbilay a marutak.”​—Lucas 15:11-13.b

⁶ Impatnag dia na yogtan ya anak so makapasinagem a kakulangay apresasyon. Unona, kinerew toy tawir to, insan to dinarak itan “ed panagbilay a marutak.” Say balikas a “panagbilay a marutak” so impatalos manlapud Griegon salita a mankabaliksay “magulon panagbilay.” Inkuan na sakey ya iskolar a say salita so “mangibabalikas na pirmin impangitalirak ed moralidad.” Tekep na maabig a rason, say balolaki ed parabolo nen Jesus so mabetbet a natawag a managdarak, sakey a salitan manideskribe ed sakey a toon gastador tan madarak.

7. Siopara natan so mipadpara ed say managdarak, tan akin ya aanapen na ontan iran indibidual so inka-independenti diad “sakey a dalin ya arawi”?

⁷ Walara kasi natan so totoon mipadpara ed say managdarak? On. Makapaermen, walaray pigaran tinmaynan ed maligen ya “abung” na mangatatawen ya Ama tayo, si Jehova. (1 Timoteo 3:15) Isipen na arum ed saraya a say kipapasen na sankaabungan na Dios et mapeget a tuloy, a say pamabantay nen Jehova et babeng imbes a proteksion. (Ikompara so Salmo 32:8.) Konsideraen pay sakey a Kristianon bii a pinabaleg unong ed saray prinsipyo na Biblia balet ta diad saginonor et alanor ed panangabusoy alkohol tan druga. Diad panmomolimoli ed apalabas a mauddiem a peryodoy kabibilay to, inkuanto: “Gabay kon paneknekan a nayarian kon parakepey panagbilay ko. Gawaen koy gabay kon gawaen, tan agko labay a walay onkontra’d siak.” Singa say managdarak, pinilalek na sayan malangwer a bii so inka-independenti. Makapaermen, lapu ed saray agmakasulatan ya agamil to et sikatoy kaukolan ya ekalen ed Kristianon kongregasyon.​—1 Corinto 5:11-13.

8. (a) Anton tulong so niyopresi ed saramay nampilalek a manbilay a sumlang ed saray estandarte na Dios? (b) Akin a nepeg a seryoson konsideraen na sakey so desisyon na arum nipaakar ed panagdayew?

⁸ Talagan makapaermen sano ipatnag na sakey a kapananisiaan so pilalek a manbilay a sumlang ed saray estandarte na Dios. (Filipos 3:18) Sano nagawa iya, pambabanikelan na saray mamatatken tan arum nin walaay espiritual a kualipikasyon ya ipetek so managkasalanan. (Galacia 6:1) Anggaman kuan, anggapo so papaskaren a mangawat ed pako na Kristianon inkababangatan. (Mateo 11:28-30; 16:24) Sano susto lara’d edad, anggan saray tobonbalo so nepeg a mandesisyon a dili no nipaakar ed panagdayew. Diad kaunoran, bulos a makapandesisyon so balang sakey ed sikatayo balet ta mikuentaan itayo ed Dios. (Roma 14:12) Siempre, ‘anien tayo met so intanem’ tayo​—say leksion a naaralan ed kaunoran na say managdarak ed parabolo na Jesus.​—Galacia 6:7, 8.

Andiay-ilalo ed Arawin Bansa

9, 10. (a) Anton pananguman ed sirkumstansia so asagmakan na managdarak, tan panon so inkiwas to’d satan? (b) Iyilustra no panon a say arum natan ya angikaindan ed tuan panagdayew so makakasagmak met na singa say asagmak na managdarak.

⁹ “Nen agastos to la ya amin, sinmabi ed saman a dalin so baleg ya eras; et sikato ginmapo a wala ed pankaukolan. Et linma tan inmasingger ed sakey ed saray ombaley ed saman a dalin; et sikato so imbaki to ed saray uma to pian manpakan na baboy. Et kinaliktan to a panoen so eges to ed saray algarrobas a kanen na saray baboy; et anggapo so too ya angiter ed sikato.”​—Lucas 15:14-16.

¹⁰ Anggaman sikatoy pakaskasi la, agni anonotan na managdarak so onsempet. Imbes, aromog toy sakey a mibabaley ya angiter ed sikatoy trabahon mankumponi na baboy. Lapud indatak na Mosaikon Ganggan a saray baboy et marutak ya ayayep, maseguron ag-awaten na sakey a Judio so ontan a trabaho. (Levitico 11:7, 8) Balet no nakokonsiensia so managdarak, kaukolan ton daegen itan. Tutal, agto nailaloan so amo to, a mibabaley diman, a manpaga ed saray liknaan na pakaskasin sankaili. Say asagmakan na managdarak so mipara ed eksperiensia na dakel natan ya anaynan ed maptek a basbas na puron panagdayew. Mabetbet, saratan so angagamil na gawagawan datin ipapasen dan mabanday. Alimbawa, diad edad a 17, intalirak na sakey a balolaki so binalegan to bilang Kristiano. “Lapud imoralidad tan panangabuso na druga et abaliwala iray taon na inkibangat manlapud Biblia,” so inamin to. Agnambayag, sayan balolaki so apriso lapud panagholdap tan panagpatey. Anggaman diad saginonor et akapawil ed espiritual, agaylan makapaot-ot so asagmakan to nisesengeg ed “onlabas a liket na kasalanan”!​—Ikompara so Hebreos 11:24-26.

11. Panon a linmoor so probleman inkidungetan na say managdarak, tan panon ya aromogan na arum natan a saray pakasagyatan ed sayan mundo et “andi-kakanaan a panamalingo”?

¹¹ Linmoor so probleman inkidungetan na managdarak lapud ta ‘anggapo lay toon mangiter ed sikato.’ Iner so kawalaan na saray balon akaaro to? Natan ta anggapo lay kuarta to, sikatoy singa “kagula” ra la. (Uliran 14:20) Ontan met, dakel natan a kinmasipa’d pananisia so akaamtan saray pakasagyatan tan panmoria na sayan mundo so manresulta ed “andi-kakanaan a panamalingo.” (Colosas 2:8) “Asagmak koy pirmin ot-ot tan sakit na linawa lapud anggapoy panangigiya nen Jehova,” so inkuan na sakey a marikit ya abayag ya anaynan ed organisasyon na Dios. “Sinalik so mibagay ed mundo, balet lapud talagan aliwa ak a singa arum, impulisay da ak. Singa ak ugaw ya abalang a mankaukolay aman mangigiya ed siak. Amoriak ed satan a kaukolan koy Jehova. Agkon balot labay so onsian ed sikato lamet.” Ontan met so amoria na managdarak ed ilustrasyon nen Jesus.

Akanonot a Siansia so Managdarak

12, 13. Antoray sengegan ya akatulong ed arum natan pian makanonot iran siansia? (Nengnengen so kahon.)

¹² “Balet nen nannonot ed inkasikato inkuanto, ‘Pigapigara so miuupa ed abung nen amak a walaan na daakan a tinapay tan makapangikera ra, et siak ompatey ak dia ed eras! Onalagey ak tan onla ak ed amak, et ikuanko ed sikato: “Ama, nankasalanan ak sumpa ed tawen, tan dia ed arap mo. Agak la onnepeg ya ingaran na anak mo. Gawa moak a singa sakey ed saray miup-upa ed sika.”’ Et inmalagey, tan linma ed ama to.”​—Lucas 15:17-20.

¹³ Say managdarak so ‘akanonot a siansia.’ Abayag, sikatoy nigalet ed pananap na likeliket, a singano manaayam ed mundo na pantasya. Balet ta natan et amoria to so tuan espiritual a kipapasen to. On, anggano sikatoy abalang, wala nin siansiay ilalo na sayan balolaki. Wala niray maong a kualidad a naromog ed sikato. (Uliran 24:16; ikompara so 2 Awaran 19:2, 3.) Komusta balet iramay tinmaynan ed pulok na Dios natan? Makatunongan kasin ibaga a sikara et andian lay ilalo, a diad amin a kipapasen et papaneknekan na rebelyoson kurang da a sikaray nankasalanan sumpad masanton espiritu na Dios? (Mateo 12:31, 32) Aliwa met ya ontan. Arum ed sikara so nagogonigon ed matungangan kurang da, tan sinmabi panaon et dakel ed saraya so akanonot a siansia. “Ni anggan sakey agew, agkon balot alingwanan so nipaakar ed si Jehova,” so inkuan na agin bii, a manmomolimoli ed panaoy impakaarawi to’d organisasyon na Dios. “Lawas kon impikasi ya anggan panon tan nasabin siansia et awaten toak ya ompawil ed katuaan.”​—Salmo 119:176.

14. Antoy deniside na say managdarak, tan panon ton impanengneng so inkamapaabeba diad panggawa’d satan?

¹⁴ Balet antoy nayarin gawaen na saramay kinmasipa nipaakar ed kipapasen da? Diad parabolo nen Jesus et nandesisyon so managdarak ya onsempet la tan mikasi ed panamerdona nen ama to. “Gawa moak a singa sakey ed saray miup-upa ed sika,” so desididon ibaga na managdarak. Say uupaan et agewan a trabahador a sarag ya ekalen ed saman met lanlamang ya agew. Abebbeba iya nen say aripen a, diad sakey a pantalos et singa la membroy pamilya. Kanian anggapo’d kanonotan na managdarak a paipawil ed datin kipapasen to bilang anak. Mas labayen to lay mangawat na sankaabebaan a posisyon ta pian paneknekan toy apasimbalon katooran to’d si ama to diad ilabas na saray agew. Balet ta, nasurprisa so managdarak.

Makapatenyeg-liknaan ya Impangawat

15-17. (a) Panon a kinmiwas so ama sanen anengneng toy anak to? (b) Anto so ipapabitar na aysing, singsing, tan sandalyas ya intarya na ama ed anak to? (c) Anto so ipapanengneng na impanpaponsia na ama?

¹⁵ “Balet nen arawi ni, sikato so anengneng nen ama to, et atenyeg so panangabagey to, et binmatik, tan nilakap to ed beklew to, et sikatoy inangoban to. Et inkuan na anak ed sikato, ‘Ama, nankasalanan ak sumpa ed tawen, tan dia ed arap mo; agak la manepeg a tawagen na anak mo. [Gawa moak a singa sakey ed saray miup-upa ed sika.]’ Ingen say ama inkuan to ed saray ariripen to, ‘Ipawa’yo a magangganat so sankaabigan a kawes, et sikato so isulong yo ed sikato; et ’yan yo so sakey a singsing ed lima to, tan sapin ed saray sali to. Et awit yo so pinataba a baka, tan sikato so pateyen yo, et mangan itayo, tan manliket itayo; ta saya so ana’ko inatey, et mabilay lamet; abalang, et aromog.’ Et ginmapo ra a nanliket.”​—Lucas 15:20-24.

¹⁶ Panpirawatan na siopaman a maaron ateng so pakapawil na sakey ya anak ed espiritual. Kanian, nailitrato tayo’d kaisipan tayo so ama na managdarak ya inagew-agew a mamabantag ed dalan a walad arap na abung to, a mapagpagan maniilalo ed ipawil na anak to. Natan abantag toy anak ton manaakar ed dalan! Maseguron anguma-uman lay itsura na balolaki. Siansia, sikatoy abidbir na ama to legan a ‘wala ni’d arawi.’ Agto inimano so apilatpilat a kawes tan say maer-ermen ya awawey; say iimanoen to et say anak to, tan sikatoy binmatik a mangabet ed sikato!

¹⁷ Sanen akaasingger lay ama ed anak to, nilakap to’d beklew so anak to tan matamoy ton inangoban. Insan ingganggan toray aripen to a taryaan day anak to na aysing, singsing, tan sandalyas. Sayan aysing so aliwa labat lan ordinaryon kawesen, noagta “sankaabigan”​—nayarin sakey a klase na kawes a pirmin abordaan ya ipapalangkap ed galgalangen a bisita. Lapud say singsing tan sandalyas so agkaslakan a nanengneng ed saray aripen, ipapabitar na ama a say anak to so aawaten lamet bilang sigpot a membroy pamilya. Balet wala ni so ginawa na ama. Sikatoy nanpaponsia pian selebraan so impawil na anak to. Malinew, sayan too so ag-apilitan a mamerdona ed anak to odino makasengeg labat ed impawil na anak to et kanepegan to itan; labay ton inatnat so panamerdona. Panliketan to itan.

18, 19. (a) Anto so ibabangat ed sika na parabolo na say anak a managdarak nipaakar ed si Jehova? (b) Singa nipanengneng ed saray impideneng to’d Juda tan Jerusalem, panon a ‘nanalagar’ si Jehova ed ipawil na managkasalanan?

¹⁸ Diad kaplesan, antoy ibabangat ed sikatayo na parabolo na anak a managdarak nipaakar ed Dios ya apribilihyoan tayon dayewen? Unona, si Jehova et “mapangasi tan mapaaro, mapalna ya onsanok, tan daakan ed maaro ya abig na linawa, tan katuaan.” (Exodo 34:6) On, say panangasi so nikabkabiig a kualidad na Dios. Normal itan a reaksion to ed saramay mankaukolan. Insan, ibabangat ed sikatayo na parabolo nen Jesus a si Jehova et ‘akaparaan a mamerdona.’ (Salmo 86:5) Sisipotan to, a singa panangibaga, ya oobserbaan so antokaman a panangumay puso ed biang na makasalanan a totoo a napangibasiyan toy panginatnat na panangasi.—2 Awaran 12:12; 16:9.

¹⁹ Alimbawa, isipen paray impideneng na Dios ed Israel. Pinuyanan nen Jehova si propeta Isaias a maneskribe ed Juda tan Jerusalem bilang ‘mabeblay manlapud ulo anggad sali.’ Ingen, inkuanto met: “Manalagar si Jehova, pian kasian to kayo; pian diad ontan sikato so nitandoro; et sikato so maparaan ed panangasi ed sikayo.” (Isaias 1:5, 6; 30:18; 55:7; Ezequiel 33:11) Singa say ama ed parabolo nen Jesus, ‘banbantagen nen Jehova so dalan,’ a singa panangibaga. Iilaloan ton tuloy so ipawil na siopaman a tinmaynan ed abung to. Agta onia so ilaloan tayo ed sakey a maaron ama?​—Salmo 103:13.

20, 21. (a) Diad anton dalan a dakel natan so naaayat lapud panangasi na Dios? (b) Anto so singbaten ed ontumbok ya artikulo?

²⁰ Kada taon, say panangasi nen Jehova so mangaayat ed dakel pian makanonot iran siansia tan ompawil ed tuan panagdayew. Agaylan gayaga so itarok na saya ed saray inad-aro ra! Alimbawa, pawilen tayo pay Kristianon ama ya asaglawi ed gapo. Makapaliket, say anak ton bii so akapawil ed espiritual tan natan et manlilingkor la bilang sigpot-panaon a ministro. “Malikeliket ak anggaman ed sayan daan a sistema na bengabengatla,” so kuan to. “Saray luak lapud ermen so asalatan na saray lua lapud gayaga.” Petepeteg, manliliket met si Jehova!​—Uliran 27:11.

²¹ Balet wala ni so lalanorey parabolo na say managdarak. Intuloy nen Jesus so istorya to ta pian pandumaanen toy panangasi nen Jehova ed say mapeget, maukom ya awawey a kasmak ed limog na saray eskriba tan Fariseo. No panon to itan a ginawa​—tan no antoy kabaliksan na saya ed sikatayo​—so singbaten ed ontumbok ya artikulo.

[Saray paimano ed leksab]

Diad Panrepaso

◻ Panon a midumaan so awawey nen Jesus ed awawey na saray Fariseo nipaakar ed panangasi?

◻ Siopara natan so mipadpara ed say managdarak, tan panon?

◻ Antoran sirkumstansia so sengegay impakanonot a siansia na say managdarak?

◻ Panon ya impanengneng na ama so panangasi ed magbabawin anak to?

[Kahon ed pahina 11]

AKANONOT IRAN SIANSIA

Anto so akatulong ed arum a datin nakal ed Kristianon kongregasyon pian makanonot iran siansia? Saray onggendan a komento so mangipaliwawa ed saya.

“Diad pusok et amtak nin siansia no iner so kawalay katuaan. Saray taon na impanaral na Biblia tan iyaakar ed saray Kristianon miting so walaay makatantandan epekto’d siak. Panon kon sigagagalan naibeneg si Jehova? Agto ak inkaindan; sikato balet et inkaindan ko. Diad kaunoran, inaksobik ya agaylay impakalingok tan inkabangar ko tan lawas susto so ibabaga na Salita nen Jehova—anien mo so intanem mo’”—C.W.

“Makalabir lay melag ya ana’ kon bii, tan anenyeg itan ed pusok lapud ta labay kon ibangat nipaakar ed saray bengatla a singa say no siopa si Jehovah tan no panoy manpikasi ed sikato. Agak makaugip, tan aminsan a lablabi la et manmaneho ak ed sakey a parki tan nannangis ak. Innagis ko, tan impikasik ed si Jehova ed pilimeron pankanawanawa ed abayag a panaon. Say amtak labat et kakkaukolan koy Jehovah ed bilay ko, tan komon ta perdonaen toak.”—G.N.

“Sano onlesa so teman nipaakar ed relihyon, ibabagak ed totoo a no siak so mamili na relihyon a mangibabangat na katuaan, labay koy magmaliw a sakey ed Tastasi nen Jehova. Insan ko ibagan dati ak a Tasi, balet ta agko asarag so manbilay ya unong ed satan, kanian tinmunda ak. Diad impakamoria ed saya, lanang ak a nakonsiensia tan maer-ermen. Diad kaunnoran et inaksobik a ‘Miserabli ak. Kaukolan koy pirmin pananguman’”—C.N.

“Talompon taon lay apalabas na impakadispelosip mi nen masiken ko. Insan, nen 1991, asurprisa kami ed imbisita na duaran matatken ya angipaamta ed sikami a posibli so pakapawil ed si Jehova. Anem bulan ed saginonor, nanlikliketan mi so pakapawil. Say masiken ko et mantaoy 79 tan et 63.”—C.A