Panaral a Panggayaga ed Itatakot ed si Jehova
“Gali dia, sikayo anak, talineng kayo ed siak. Ibangat ko ed sikayo so itakot ed Jehova.”—SALMO 34:11.
1. Panon a pagiten na Panarian na Dios so takot, balet kasin kabaliksan na satan so amin a nengneng na takot?
SARAY totoo ed amin a pasen so manpirawat na kawayangan manlapud takot—takot ed krimen tan karawalan, takot ed agpakaimpleyo, takot ed graben sakit. Agaylan engranden agew itan sano satan a kawayangan so magmaliw a kapetegan ed silong na Panariay Dios! (Isaias 33:24; 65:21-23; Miqueas 4:4) Ingen, aliwan amin a takot so napagit ed satan, nisay panggunaetan tayon italirak so amin a takot ed saray bilay tayo natan. Wala so takot a maong tan takot a mauges.
2. (a) Anton nengneng na takot so mauges, tan anton klase na takot so makapasagyat? (b) Anto so maridios a takot, tan panon a saray nisitan kasulatan so mangipanengneng ed satan?
2 Say takot so nayarin maneral ed kanonotan, a deralen toy abilidad na toon mankatunongan. Pakapuyen to so pakpel tan deralen to so ilalo. Say ontan a takot so nayarin naeksperiensia na siopaman a papagyawen na sakey a kabusol. (Jeremias 51:30) Nayarin satan so naeksperiensia na sakey a walaan na alabas a panmoria ed kaimportantian na pakawalaan na panangabobon na pigaran maimpluensyan totoo. (Uliran 29:25) Balet wala met so takot a mabunigas, say klasen mamupuger ed sikatayo manlapud panggawa na antokaman a mapeligro, manlapud pakapasakit ed inkasikatayo. Isasakup na maridios a takot so nagkalalo ni nen say satan. Satan so takot ed si Jehova, aralem a respeto ed sikato, ya atekepan na mabunigas a takot ed pamaermen ed sikato. (Salmo 89:7) Sayan takot ed pamaermen ed sikato so natibukel diad pangapresya ed maaron-panangasi tan kaabigan to. (Salmo 5:7; Oseas 3:5) Satan met so mangilaktip ed pakaamta a si Jehova so Supremon Ukom tan say Makapanyarin-amin, a walaan na pakayarin mangipakseb na dusa, anggan patey, ed saramay onsunggay ed sikato.—Roma 14:10-12.
3. Panon a say takot ed si Jehova so midumaan ed saramay nisisiglaot ed pigaran paganon dirios?
3 Say maridios a takot so mabunigas, aliwan mauges. Satan so mamayubo ed sakey a magmaliw a mapekder ed no antoy maptek, aliwan say pikompromiso diad panggaway aliwa. Aliwan singa say takot a nisiglaot ed kadaanan a Griegon dios a Phobos, adeskribe bilang sakey a mauges a dios a manataktakot. Tan aliwan singa say takot a nisisiglaot ed diosan Hindu a Kali, a no maminsan et nadedeskrebi bilang napgaan-ed-dala, a manguusar na saray bangkay, uleg, tan bungo bilang arkos. Say maridios a takot so managyat; satan so agmakapadismaya. Nisisiglaot itan ed aro tan apresasyon. Sirin, say maridios a takot so mangiyasingger ed sikatayo ed si Jehova.—Deuteronomio 10:12, 13; Salmo 2:11.
No Akin a Wala Itan ed Arum tan say Arum et Andian na Satan
4. Singa impanengneng nen apostol Pablo, panon a say kipapasen na katooan so nakukusbo, tan antoy sengegan na saya?
4 Say katooan bilang interamenti so agpapakiwasen na kualidad a maridios a takot. Diad Roma 3:9-18, dedeskribien nen apostol Pablo no panon kaarawi so totoo manlapud orihinal ya inkayadyari. Kayarin imbinsabinsa ya amin so walad silong na kasalanan, inaon nen Pablo so Salmo, a kuanto: “Angapo so matunong, angapo, angan sakey.” (Nengnengen so Salmo 14:1.) Insan itatarok toray detalye diad pangisisita ed saratan a bengatla a singa say panangibaliwala na katooan diad pananap ed Dios, say kakulangan na kaabigan da, say makapalikdon panagsalita ra, panangayew, tan panagpaagus na dala. Agaylan susto so panideskrebi na satan ed mundo natan! Kaslakan so andiay interes ed Dios tan ed saray gagala to. Anggan dinan a nengneng na kaabigan so mabetbet a tuloy a nireserba ed saray okasyon sano wala so bengatlan nagamoran ed satan. Say panagtila tan mabanday a panagsalita so kaslakan. Say panagpaagos na dala so nipaparungtal aliwan dia lambengat ed saray balita noagta dia met ed panagligliwaan. Anto so rason ed ontan a kipapasen? Tua ya amin tayo so kailalakan nen makasalanan ya Adan, balet sano saray totoo so mangiyadapta ed saray bengatlan deneskribe nen apostol Pablo, sakey a bengatlan nagkalalo’d satan so nalalanor. Ipapaliwawa na Bersikulo 18, a kuanto: “Angapo so takot ed Dios dia ed arap na mata ra.”—Nengnengen so Salmo 36:1.
5. Akin a say arum a totoo et walaan na maridios a takot, bangta arum et andian na satan?
5 Anggaman ontan, akin ya arum a totoo so walaan na maridios a takot, bangta arum so andian? On, lapud arum a totoo so mamabayubo ed satan, balet saray arum so andi. Anggapo ed sikatayo so niyanak a walaan na maridios a takot, balet amin tayo so walaan na kapasidad parad satan. Say maridios a takot so bengatlan kaukolan tayon aralen. Insan, pian satan so magmaliw a mabiskeg a manamakiwas a puersa ed saray bilay tayo, kaukolan tayon bayuboan itan.
Say Makapasagyat ya Imbitasyon
6. Siopa so manginanatnat ed sikatayo na imbitasyon a nirekord ed Salmo 34:11, tan panon a sayan teksto so mangipapanengneng a say maridios a takot so nepeg ya aralen?
6 Say makapasagyat ya imbitasyon pian naaralay itakot ed si Jehova so ninanatnat ed sikatayo diad Salmo 34. Saya so salmo nen David. Tan siopay inyanino nen David? Anggapoy arum et say Katawan a Jesu-Kristo. Say propesiyan ispisikon inyaplika nen apostol Juan ed si Jesus et nirekord diad bersikulo 20 na sayan salmo. (Juan 19:36) Diad agew tayo, si Jesus so manginanatnat na sakey ya imbitasyon a singa samay walad bersikulo 11: “Gali dia, sikayo anak, talineng kayo ed siak. Ibangat ko ed sikayo so itakot ed Jehova.” Malinew ya ipapanengneng na saya a say maridios a takot so bengatlan naaralan, tan si Jesu-Kristo so ekselentin kualipikadon manbangat ed sikatayo. Akin ya ontan?
7. Akin a si Jesus so nagkalautlan nepeg a panaralan tayo na maridios a takot?
7 Kabat nen Jesus so kaimportantian na maridios a takot. Ibabaga na Hebreos 5:7 nipaakar ed sikato: “A dia ed saraman ya agew a sikato so silalaman na ompatey, angibagat na pikakasi tan pikekerew, a tekep na mabiskeg a tagleey tan saray lua, ed saman so makapanyari’n mangilaban ed sikato ed ipapatey, tan sikato so nadngel lapud masanton panaglikas [maridios a takot, NW] to.” Say ontan a maridios a takot so kualidad ya impatnag nen Jesu-Kristo anggan sakbay a nidunget ed ipapatey ed panamairapan a palitek. Tandaan, diad Uliran kapitulo 8, say Anak na Dios so nadedeskribe bilang say personipikasyon na kakabatan. Tan diad Uliran 9:10, nibabaga ed sikatayo: “Say takot ed Jehova sikato so sengeg na kakabatan.” Kanian say maridios a takot so manunan kabiangan na personalidad na Anak na Dios sakbay na insabi to ed dalin.
8. Diad Isaias 11:2, 3, anto so naaralan tayo nipaakar ed takot ed si Jehova?
8 Nagkalalo ni, nipaakar ed si Jesus bilang Mesianikon Ari, ibabaga na Isaias 11:2, 3: “Et say Espiritu nen Jehova manayam naani ed tapew to, say espiritu na kakabatan tan pakatalos, say espiritu na pananimbawa tan pakapanyari, say espiritu na pikakabat tan say takot ed Jehova; et say liket to wala naani ed takot ed Jehova.” Agaylay dakep a nibalikas itan! Say takot ed si Jehova so agmakapaermen. Satan so positibo tan makapaalagey. Satan so kualidad ya onkayat ed interon nasasakopan na uley nen Kristo bilang Ari. Sikato so manuuley la natan, tan ed amin a natitipon bilang uuleyan to, sikato so mangiiter na bilin diad itakot ed si Jehova. Panon?
9. Panon itayon babangatan nen Jesu-Kristo na takot ed si Jehova, tan anto so labay ton naaralan tayo nipaakar ed satan?
9 Diad panamegley na saray miting tayo ed kongregasyon, asamblea, tan saray kumbension, si Jesus, bilang aturon Ulo na kongregasyon tan bilang Mesianikon Ari, so ontutulong ed sikatayon natalosan a malinew no anto so maridios a takot tan no akin a makagunggunan tuloy itan. Kanian panbabanikelan ton napaaralem so apresasyon tayo parad satan ta pian naaralan tayo so panggayaga diad itakot ed si Jehova a singa gagawaen to.
Kasin Panggunaetan Yo?
10. Sano onaatendi ed saray Kristianon miting, anto so nepeg tayon gawaen pian natalosan so takot ed si Jehova?
10 Siempre, say basta panbasa tayo na Biblia odino iyatendi ed saray miting diad Kingdom Hall so agmangarantiya a sikatayo so nawalaan na maridios a takot. Imanoen no antoy kaukolan tayon gawaen no peteg a labay tayon talosan so takot ed si Jehova. Kuan na Uliran 2:1-5: “Ana’ ko, no awaten mo so saray salitak, tan yatol mo so saray gangan ko ed sika. A singa pangikiling mo na layag mo ed kakabatan, tan ipeket mo so pusom ed pakatalos. On, no kelyawan mo so kaisipan, tan itagey mo so voces mo nipaakar ed pakatalos. No sikato so anapen mo a singa pilak, tan sikato so osisaen mo a singa saray inyamot a kayamanan. Diad ontan natalosan mo so takot ed Jehova, tan naromog mo so pikakabat ed Dios.” Kanian, sano onaatendi ed saray miting, kaukolan tayon imanoey nibabaga, mangisekar na sagpot ed pangiyapasakey tan pananda ed saray manunan punto, isipen a maong no panon a say liknaan tayo nipaakar ed si Jehova so kaukolan a mangimpluensya ed awawey tayo ed niiter a simbawa—on, lukasan so kapusoan tayo. Diad ontan et natalosan tayo so itakot ed si Jehova.
11. Pian bayuboan so maridios a takot, anto so magunaet tan maparanay tayon gawaen?
11 Ipapaimano na Salmo 86:11 so sananey nin importantin letnegan, say pikakasi. “Ibangat moak ed dalan mo, O Jehova; manakarak ed katuaan mo,” pikasi na salmista. “Ipasakey mo so pusok ya ontakot ed ngaran mo.” Inabobonan itan nen Jehova, ta impaikurit to itan ed Biblia. Pian nabayuboan so maridios a takot, kaukolan tayo met so manpikasi ed si Jehova parad tulong to, tan nagunggunaan itayo diad magunaet tan maparanay a panagpikasi.—Lucas 18:1-8.
Nalalanor so Puso Yo
12. Akin a say puso so nepeg ya ikdan na nikadkaduman imano, tan anto so lalaktipen na satan?
12 Wala ni bengatlan nepeg tayon imanoen ed Salmo 86:11. Say salmista so aglabat onkekerew parad inteliktual a pakatalos ed takot ed Dios. Sasalambiten to so puso to. Say panamayubo ed maridios a takot et sasaglawien to so piguratibon puso, a kakaukolanen toy nikadkaduman imano lapud satan so akindalem a too a singa nipatnag ed amin ya aktibidades tayo’d bilay a lalaktipen toy kanonotan tayo, ugugali tayo, pilpilalek tayo, saray motibasyon tayo, saray kalat tayo.
13. (a) Anto so nayarin mangipanengneng a say puso na sakey et naapag? (b) Legan a babayuboan tayo so maridios a takot, diad anton kalat so nepeg a kimeyan tayo?
13 Ipapasakbay ed sikatayo na Biblia a say puso na too so nayarin naapag. Satan so nayarin manamalingo. (Salmo 12:2; Jeremias 17:9) Nayarin satan so mamakiwas ed sikatayon mibiang ed makapabiskeg iran kimey—iyaatendi ed saray miting ed kongregasyon tan ipapaway ed lawak na kimeyan—balet satan met so mamakiwas ed sikatayo a mangaro ed pigaran paraan na kabibilay ed mundo. Saya so nayarin mamuger ed sikatayo manlapud pagmaliw a talagan sigpot-kamarerwa ed panangiyalibansa na intereses na Panarian. Insan, say manamalingon puso so nayarin manalin manangguyor ed sikatayo ya, anggaman panon met lanlamang et sikatayoy manggagaway singa gagawaen na karaklan. Odino, anganko diad eskuelaan odino diad pantatrabahoan, say puso so nayarin naimpluensyaan na takot ed too. Bilang resulta, diad saraman a kaliberliber et sikatayo so nayarin masuyat a mamidbir ed inkasikatayo bilang Tastasi nen Jehova tan nayarin anggan manggawa na bengabengatla ya agmatukoy parad Kristianos. Balet kayari to, say konsensia tayo so mangonigon ed sikatayo. Aliwan ontan ya inkatoo so labay tayon pagmaliwan. Sirin, singa ed salmista, manpikasi tayo ed si Jehova: “Ipasakey mo so pusok ya ontakot ed ngaran mo.” Labay tayon say interon akindalem ya inkatoo, a singa nipapanengneng ed amin ya aktibidad tayo ed bilay, so mamaneknek a ‘tatakotan [tayoy] Dios tan uunoren iray gangan to.’—Eclesiastes 12:13.
14, 15. (a) Sanen impasakbay so kipawil na Israel manlapud inkautibo ed Babilonia, anto so insipan nen Jehova ya iter ed totoo to? (b) Anto so ginawa nen Jehova diad gagalan pangipasepsep na takot ed Dios ed kapusoan na totoo to? (c) Akin a say Israel so sinmuawi ed saray dalan nen Jehova?
14 Insipan nen Jehova a mangiter ed totoo to na ontan a puson ontatakot-ed-Dios. Impasakbay to so kipawil na Israel tan inkuanto, unong a nabasa tayo ed Jeremias 32:37-39: “Nia, tiponen ko ra naani a manlapu ed saray amin a dalin, . . . tan yakar ko ra naani a maligeligen. Et sikara naani baley ko, tan siak naani Dios da. Et itdan ko ra naani sakey a puso tan sakey a dalan, pian ontakot ira naani ed siak lawas, ya onkanan kaabigan da, tan saray anak da ya mantombok ed saginonor da.” Diad Jer 32 bersikulo 40, say sipan na Dios so apekderan: “Yan ko naani takot ed puso ra, pian ag ira onarawi ed siak.” Nen 537 K.K.P., sikara so impawil nen Jehova ed Jerusalem, unong ya insipan to. Balet komusta so kabiangan na satan a sipan—ya ikdan tora na ‘sakey a puso pian ontakot ira lawas ed sikato’? Akin a say kadaanan a nasyon na Israel so sinmuawi manlapud si Jehova kayari impangipawil to’d sikara manlapud Babilonia, kanian say templo ra so aderal nen 70 K.P., ya agbalot nipaalagey lamet?
15 Saya so aliwan lapud antokaman ya insaew ed biang nen Jehova. On, si Jehova so kinmiwas a mangiyan na itakot ed Dios ed kapusoan na totoo to. Diad panamegley na panangasin impanengneng to ed impangiliktar ed sikara manlapud Babilonia tan impangipawil ed sikara ed niyanakan dan dalin, inikdan to ira na magenap a rason a sikato so moriaen tekep na aralem a galang. Pinekderan na Dios itan ya amin tekep na saray panonot, simbawa tan panamaat diad panamegley na saray propeta a si Aggeo, Zacarias, tan Malaquias; diad panamegley nen Esdras a nibaki ed sikara bilang managbangat; diad panamegley nen Manuley a Nehemias; tan diad panamegley na dilin Anak na Dios. No maminsan et mangimano tan ontulok iray totoo. Ginawa ra itan sanen sikaray angipaalagey lamet na templo nen Jehova diad panangipaseseg nen Aggeo tan Zacarias tan sanen pinataynan daray sankailin kaasawaan dan bibii ed agew nen Esdras. (Esdras 5:1, 2; 10:1-4) Balet mas mabetbet so agda intulok. Sikaray agnantultuloy ed panangimano; sikaray agnantultuloy a magmaliw ya akaparaan a mangawat ed simbawa; agda impansiansia so kapusoan dan akalukas. Ag binayuboan na Israelitas so maridios a takot, tan bilang resulta et agmabiskeg a manamakiwas a puersa ed kabibilay da.—Malaquias 1:6; Mateo 15:7, 8.
16. Diad siopan kapusoan so angipasepsepan nen Jehova na maridios a takot?
16 Ingen, say sipan nen Jehova ed pangipasen na maridios a takot ed kapusoan na totoo to so agsinmaew. Sikato so nanggawa na balon sipanan ed espiritual ya Israel, saraman a Kristianos ya angiteran to na mangatatawen ya ilalo. (Jeremias 31:33; Galacia 6:16) Nen 1919, sikaray impawil to manlapud impakautibo ed Babilonian Baleg, say sankamundoan ya imperyo na palson relihyon. Mapekder ton impasepsep ed kapusoan da so takot ed sikato. Saya so angitarok na mayaman iran gungguna ed sikara tan ed “baleg ya olop,” a walaan na ilalon bilay bilang mangaraldalin ya uuleyan na Panarian. (Jeremias 32:39; Apocalipsis 7:9) Say takot ed si Jehova so onsabi met ed kapusoan da!
No Panon a say Maridios a Takot so Nipasepsep ed Kapusoan Tayo
17. Panon ya ipapasen nen Jehova so maridios a takot ed kapusoan tayo?
17 Panon ya ipapasepsep nen Jehova iyan takot ed kapusoan tayo? Diad panamegley na panangipakurang na espiritu to. Tan anto so walad sikatayo a produkto na masanton espiritu? Say Biblia, say apuyanan a Salita na Dios. (2 Timoteo 3:16, 17) Diad agawaan to ed apalabas, diad saray pidedeneng to natan ed ariripen to diad kasumpalan na mapropetikon Salita to, tan diad saray propesiya ed bengabengatlan onsabi, itatarok nen Jehova so maabig a basiyan parad amin tayo diad pamayubo ed maridios a takot.
18, 19. Panon a saray kumbension, asamblea, tan saray miting ed kongregasyon so ontutulong ed sikatayon nagamoray maridios a takot?
18 Makatantanda ya, unong a nireport ed Deuteronomio 4:10, inkuan nen Jehova ed si Moises: “Pandaragup mo so katooan ed siak, ta pandengelen ko ’ra na salsalitak, pian naaral da so ontakot ed siak ed amin na saray agew a panbilay da dia ed tapew na dalin, tan pian nibangat da so saray anak da.” Mipadpara natan, si Jehova so nanggawa na daakan iran probisyon pian tulongay totoo ya ontakot ed sikato. Diad saray kumbension, asamblea, tan ed saray miting ed kongregasyon, nibinsabinsa tayoy paneknek na maaron-panangasi nen Jehova tan say kaabigan to. Ontan so gagawaen tayo sano aaralen tayo so libron The Greatest Man Who Ever Lived. Panon a say panagaral so mangaapekta’d sikayo tan ed ugali yo nipaakar ed si Jehova? Unong ya anengneng yo so nanduruman nengneng na engranden personalidad na mangatatawen ya Ama tayo ya impanengneng na Anak to, agta satan so mamabiskeg na pilalek yon agbalot mamaermen ed Dios?—Colosas 1:15.
19 Diad saray miting tayo, aaralen tayo met iray salaysay ed impangiliktar nen Jehova ed totoo nen saman. (2 Samuel 7:23) Legan ya aaralen tayo so libro na Biblian Apocalipsis diad tulong na libron Revelation—Its Grand Climax At Hand!, nanaaralan tayoray mapropetikon pasingawey ya asumpal la diad sayan koma-20 siglo tan nipaakar ed makapataktakot iran ebenton nagawa ni. Nipaakar ed amin na saratan a kimey na Dios, ibabaga na Salmo 66:5: “Gali dia, tan nengnengen yo so saray kimey na Dios; sikato makapakebiew ed gawagawa to a nipaakar ed saray anak na totoo.” On, no suston namoria, sarayan gawa na Dios so mangipasepsep ed kapusoan tayo na takot ed si Jehova, sakey ya aralem a galang. Sirin natebek tayo no panon a si Jehova so manusumpal ed sipan to: “Yan ko naani takot ed puso ra, pian ag ira onarawi ed siak.”—Jeremias 32:40.
20. Ta pian say maridios a takot so nipasepsep a tuloy ed kapusoan tayo, anto so kakaukolanen ed biang tayo?
20 Anggaman ontan, mapatnag a sayan takot so ag-onsabi ed kapusoan tayo ya anggapo so magunaet a sagpot ed biang tayo. Saray resulta so aliwan automatiko. Nepeg tayon gawaen so biang tayo diad pamayubo ed maridios a takot. (Deuteronomio 5:29) Say natural ya Israel so sinmaew a manggawa ed satan. Balet tekep na panagmatalek ed si Jehova, say espiritual ya Israel tan saray kakaiba ra so makakaeksperiensia la na dakel iran gungguna ya onsasabi ed saraman so ontatakot-ed-Dios. Kunsideraen tayo so pigara ed sarayan gungguna diad ontumbok ya artikulo.
Panon Yon Ebatan?
◻ Anto so maridios a takot?
◻ Panon itayon nibabangat a panggayagaan so itakot ed si Jehova?
◻ Pian nawalaan na maridios a takot, anton sagpot so nakakaukolan ed biang tayo?
◻ Akin a say pangamor na maridios a takot et lalanoren to so amin ya aspekto na piguratibon puso tayo?
[Saray litrato ed pahina 12, 13]
Say maseet a panagaral so kakaukolanen pian natalosan so takot ed si Jehova