Panetermina ed Kakapuyan, Karelmengan, tan Pagbabawi

SAY kasalanan so bengatlan kagula na Kristianos​—say isasaew ed saray matunong ya estandarte nen Jehova. (Hebreos 1:9) Makapaermen, amin tayo so mabetbet a mankakasalanan. Amin tayo so mipupuligesgesan ed atawir a kakapuyan tan ag-inkayadyari. Anggaman ontan, mabetbet a no ipatua tayoray kasalanan tayo ed si Jehova tan sisimoon a panggunaetan ya aglara uliten, sikatoy naasinggeran tayo tekep na malinis a konsiensia. (Roma 7:21-24; 1 Juan 1:8, 9; 2:1, 2) Pisalamatan tayo si Jehova a, base’d dondon bagat et aawaten to so sagradon serbisyo tayo anggaman ed saray kakapuyan tayo.

No say sakey et napelag ed seryoson pankasalanan lapud silalaman a kakapuyan, kaukolan ton tampol so panagpastol a mitunosan ed totontonen ya indatak nen Santiago diad 15:14-16: “Mangi-inagem so sakey ed sikayo? patawag to so saray mamasiken na Iglesia . . . tan no nankasalanan napaandi’ra ed sikato. Manpapatuaan kayo na kasalanan ed sakey tan sakey, tan manpipikasian so sakey tan sakey, ta pian onabig.”​—Santiago 5:14-16.

Kanian, sano say sakey a dedikadon Kristiano so akapanggawa na graben kasalanan, mas nen say personal a panangipatua ed si Jehova so nakakaukolan. Nepeg a manggawa na kundang iray mamatatken, ta say kalinisan odino kareenan na kongregasyon so nasisigensigen. (Mateo 18:15-17; 1 Corinto 5:9-11; 6:9, 10) Saray mamatatken so kaukolan a manetermina: Kasin say sakey so magbabawi? Anto so angitonton ed impankasalanan? Kasin satan so resulta na kakapuyan lapud inyarawi? Kasin aagamilen itan a kasalanan? Say ontan a panangamta so lawas agsimpli odino malinew tan mankakaukolan na malaknab a pakatebek.

Panon to no say impankasalanan et lapud pangegemtan na kurang na gawan-mauges tan marelmeng a kondukta? Sirin, say responsabilidad na mamatatken so malinew. Sanen mamibilin nipaakar ed panamenben na seryoso iran pamaakaran diad kongregasyon na Corinto, inkuan nen apostol Pablo: “Paekal yo sirin so mauges a too ed pegle’yo.” (1 Corinto 5:13) Anggapoy pasen na saray marelmeng ed Kristianon kongregasyon.

Pananimbang ed Kakapuyan, Karelmengan, tan Pagbabawi

Panon a naamtaan na mamatatken no kasin say sakey et magbabawi?a Saya so aliwan simplin tepet. Alimbawa, isipen pa si Arin David. Sikatoy nankasalanan na pikakaluguran tan kayari to, diad katuaan et amapatey. Ingen, inabuloyan nen Jehova a mansiansian manbilay. (2 Samuel 11:2-24; 12:1-14) Insan isipen pa si Ananias tan Sapira. Sititila ran sinalin palikdoen iray apostol, a mankuankuanan a mabunlok iran tuloy nen say kapetegan. Seryoso? On. Ontanlan kauges a singa panagpatey tan pikakalugoran? Andin balot! Ingen, bilay di Ananias tan Sapira so nagmaliw a bayar.​—Gawa 5:1-11.

Akin a mandumaan so impangukom? Si David so naplag ed seryoson kasalanan lapud silalaman a kakapuyan. Sanen kinompronta ed ginawa to, sikatoy nagbabawi, tan pinerdona nen Jehova​—anggaman sikato so seryoson dinisiplina no nipaakar ed saray problema ed sankaabungan to. Si Ananias tan Sapira so nankasalanan diad impansimpisimpitan dan impantila, a panggugunaetan dan palikdoen so Kristianon kongregasyon tan sirin ‘nantila ed masanton espiritu tan ed Dios.’ Paneknekan na satan so marelmeng a puso. Kanian, mas grabe so impangukom ed sikara.

Si Jehova so angukom ed duaran kaso, tan susto so impangukom to lapud nausisa toray puso. (Uliran 17:3) Agnagawaan itan na toon mamatatken. Kanian panon a natebek na mamatatken no kasin say seryoson kasalanan so pakapatnagan na kakapuyan nen say karelmengan?

Diad tua, amin a kasalanan so marelmeng, balet aliwan amin a mankakasalanan et marelmeng. Say manpadparan kasalanan so nayarin pakapatnagan na kakapuyan na sakey a too tan karelmengan met ed sananey. On, gendagendat a lalanoren na panagkasalanan so namparan kakapuyan tan karelmengan ed biang na managkasalanan. Say sakey a maneterminan sengegan et no panon a momoriaen na managkasalanan so ginawa to tan anto so plano ton gawaen nipaakar ed satan. Kasin ipapanengneng to so magbabawin awawey? Kaukolan na mamatatken so pakatebek ta pian natalosan iya. Panon dan naala itan a pakatebek? Insipan nen apostol Pablo ed si Timoteo: “[Ikdan mo na mantultuloy a panag-isip, NW] so salitaen ko; et say Katawan itdan to ka komon na pakatalos ed amin.” (2 Timoteo 2:7) No sipapaabeban ikdan na mamatatken na “mantultuloy a panag-isip” so apuyanan iran salita nen Pablo tan arum niran managsulat na Biblia, nadampot da so pakatebek a nakakaukolan ta pian susto so panmoria ed saramay nankasalanan diad kongregasyon. Insan, napatnagan ed saray desisyon da so panag-isip nen Jehova, aliwan say sikara.​—Uliran 11:2; Mateo 18:18.

Panon iyan nagagawa? Say sakey a paraan et say pangusisa no panon so panedeskribe na Biblia ed marelmeng a totoo tan nengnengen no kasin say deskripsyon so onaaplika ed indibidual a pidedenengan.

Panangaksobi tan Panagbabawi

Say inmunan totoo a nampili na kurso na karelmengan et si Adan tan Eva. Anggaman ed inkayadyari ra tan walaan na sigpot a pikakabat ed ganggan nen Jehova, sikaray nanrebeldi sumpad madibinon inkasoberano. Sanen kinompronta ira nen Jehova ed ginawa ra, saray kiwas da so makanan imanoen​—tinetel nen Adan si Eva, tan tinetel nen Eva so uleg! (Genesis 3:12, 13) Ipareng iya ed masimoon a panagpaabeba nen David. Sanen impaarap ed sikato iray graben kasalanan to, inaksobi to so kasalanan tan kinmerew na panamerdona, diad impangibagan: “Nankasalanan ak sumpa ed Jehova.”​—2 Samuel 12:13; Salmo 51:4, 9, 10.

Maabig no kunsideraen na mamatatken so duaran alimbawa sano mamebenben na saray kaso na seryoson kasalanan, nagkalautla ed biang na sakey a susto-lad-edad. Kasin say managkasalanan​—singa si David sanen amoria toy kasalanan to—​direktan angaksobi ed tetel tan magbabawin manilalo ed si Jehova parad tulong tan panamerdona, odino kasin panggunaetan ton palemewen so agawaan to, anganko ta itetel ed arum? Tua, nayarin kaliktanen na nankasalanan ya isalaysay no antoy angipaarap ed sikaton manggawa na onman, tan nayarin walaray sirkumstansya, balanglan diad apalabas odino kaplesan, a kaukolan ya ikunsidera na mamatatken sano mandeside no panon a sikatoy tulongan. (Ipareng so Oseas 4:14.) Balet nepeg ton awaten a sikato so nankasalanan tan sikato so responsabli ed imaton nen Jehova. Tandaan: “Si Jehova asinger ed saray wala ed kipapasen na sakey a nabtagan na puso; tan ilaban to so totoo ya wala ed sakey a kamarerwa a masakit ed panagbabawi.”​—Salmo 34:18.

Panangagamil No Anto so Mauges

Diad libro na Salmos et dakel a reperensya na marelmeng a totoo. Saratan a kasulatan so nagkalalon makatulong ed mamatatken a manebek no kasin say too so talagan marelmeng odino makapuy. Alimbawa, kunsideraen so apuyanan a pikakasi nen Arin David: “Ag moak pibabantak ed saray babagel, tan saray managgawa na kasulitan [manag-agamil ed no anto so makapasakit, NW], a sikara mansalita ra na kareenan ed saray kapara ra a too, balet say panaggewgew so wala ed saray puspuso ra.” (Salmo 28:3) Imanoen a saray marelmeng a totoo so asaglawi a mipadpara ed saramay “manag-agamil ed no anto so makapasakit.” Say sakey a mankakasalanan lapud silalaman a kakapuyan so maseguron ontunda bektaman a namoria to. No, anggaman, say sakey et ‘mangagamil’ ed no antoy mauges pian satan so magmaliw a kabiangay kabibilay to, saya so nayarin mamaneknek na puson marelmeng.

Sinaglawi nen David so sananey a pakabidbiran na karelmengan ed satan a bersikulo. Singa si Ananias tan Sapira, say marelmeng a too et mansasalita na maong a bengatla ed sangi to balet walaay mauges a bengatla’d puso to. Nayarin sikato so sakey a mansimpisimpitan​—singa saray Pariseo ed agew nen Jesus a ‘nengneng da so matunong ed saray totoo balet dia ed loob napno na pansimpisimpitan tan kaugsan.’ (Mateo 23:28; Lucas 11:39) Kagula nen Jehova so pansimpisimpitan. (Uliran 6:16-19) No wala so mansimpisimpitan a mangiburi ed saray seryoson kasalanan to anggano mitotongtong ed hudisyal a komite, odino walaay embel na linawan mangaksobi ed akabatan la na arum, ya ikakaindan to so sigpot a pangipatua, saya so maseguron ebidensya na marelmeng a puso.

Mapasang a Panangibaliwala’d si Jehova

Arum niran bengatlan kalareker na marelmeng a too so nidatak ed Salmo 10. Dia et nabasa tayo: “Say bagel dia ed kalangasan to duksaen to so makabos; . . . gulaen to si Jehova.” (Salmo 10:2, 3) Panon tayon moriaen so sakey a dedikadon Kristiano a mapasang tan agmanrerespeto ed si Jehova? Maseguro, saraya so marelmeng ya awawey ed kanonotan. Say toon nankasalanan lapud kakapuyan, bektaman a namoria toy kasalanan to odino nipaimano ed sikato et magbabawi tan panbanikelan ton pasimbaloen so kurang to. (2 Corinto 7:10, 11) Diad kasuniyan, no say sakey a too so mankakasalanan lapud talagan agpanrerespeto ed si Jehova, anto so mangamper ed sikato manlapud pamawil-pawil ed makasalanan a kurang to? No sikato so mapasang anggaman sikatoy sinimbawa la ed espiritu na kaoyamoan, panon ton nawalaan na inkamapaabeban nakakaukolan pian masimoon tan matuan magbabawi?

Kunsideraen natan iray salita nen David diad saginonor na parehon salmo: “Akin a say bagel et modmoraen to so Dios. Ta ikuan to ed puso to so, Sika agmo [nakakaukolan so pipalinewan, NW].” (Salmo 10:13) Diad eksena na Kristianon kongregasyon, kabat na marelmeng a too so pandumaan ed baetan na susto tan lingo, balet agto masuyat a gawaen so mauges no isipen ton makapansiansian agnadusa. Basta anggapoy takot ed kiwalwal, mangiter na kumpleton kawayangan ed makasalanan iran inklinasyon to. Aliwan singa si David, no saray kasalanan to et niparungtal, mamalikdon paliisan toy disiplina. Say ontan a too so agaylan agmamapagalang ed si Jehova. “Angapo so takotan ed Dios ed arapan na saray mata to. . . . Sikato agto gulaen so mauges.”​—Salmo 36:1, 4.

Napapasakitan so Arum

Gendagendat, masulok nen say sakey so naapektaan na kasalanan. Alimbawa, say mikakalugroan so mankakasalanan sumpa ed Dios; bibiktimaen toy asawa to tan ananak to; no say akikalugoranan to et walay asawa to, bibiktimaen to met so pamilya to; tan dudumsisan to so maabig a ngaran na kongregasyon. Panon ton momoriaen iratan ya amin? Kasin ipapanengneng to so impapuson kaermenan tekep na tuan panagbabawi? Odino kasin ipapatnag to so espiritu a deniskribe ed Salmo 94: “Mangibesngaw tan mansalita ra a malangalangas: amin day managgawa na kasulitan ya ipangpangta ra so inkasikara. Sikara betagbetagen da so katooran mo, O Jehova, tan paermenen da so tawir mo. Sikara pateyen da so bii a balo, tan say sankaili, tan saray ulila ekalan da ra na bilay. Et ikuan da, Si Jehova agto nanengneng, nisay naimano na Dios nen Jacob”?​—Salmo 94:4-7.

Maseguro, saray kaso na kasalanan diad sakey a kongregasyon so agmangilalanor ed panagpatey. Ingen say awawey a nipatnag dia​—say awawey ya akaparaan a mamiktima ed arum parad personal a kagunggunaan—​so nayarin mapatnag legan ya iimbestigaen na mamatatken so gawan-mauges. Saya met so inkatangsit, tanda na marelmeng a too. (Uliran 21:4) Satan so sigpot a kasunian ed awawey na tuan Kristiano, a mabulos ya isakripisyo to so inkasikato parad agi to.​—Juan 15:12, 13.

Panangiyaplika na Maridios a Prinsipyos

Sarayan pigaran giya so agnigana pian mangiletneg na saray totontonen. Anggaman ontan, saratan so talagan mangiiter na ideya ed saray bengatlan momoriaen nen Jehova bilang tuan marelmeng. Agto ta labay ya awaten so responsabilidad ed agawan kasalanan? Kasin wala so panangibaliwala na nankasalanan ed apalabas a simbawa ed sayan mismon pamaakaran? Kasin wala so nigalet a panangagamil na seryoson gawan-mauges? Kasin say managgaway-mauges so mangipapatnag na walaay getman panangikaindan ed ganggan nen Jehova? Kasin sikatoy nanggawa na akalkula iran sagpot ed pangiyaamot ed mauges, anganko say paneral ed arum met ed parehon panaon? (Judas 4) Kasin saratan a sagpot so ompalalo lambengat sano say kaugsan so nipabitar? Kasin say managgaway-mauges so mangipapanengneng na sigpot a panangibaliwala ed sakit ya agawaan to ed arum tan ed ngaran nen Jehova? Komustay nipaakar ed awawey to? Kayari sipapangasin Makasulatan a simbawa ed sikato, kasin sikato so mapasang odino matangsit? Kasin andian na impapuson pilalek a paliisan so pangulit ed mauges? No natebek na mamatatken iratan a bengatla, a mabiskeg a mangipanengneng na kakulangay pagbabawi, nayarin nibaga ran saray agawan kasalanan so mangipapatnag na karelmengan imbes a kakapuyan lambengat na laman.

Anggan sano midedeneng ed sakey a toon ompatnag a walaan na marelmeng iran inklinasyon, ag-ontutunda iray mamatatken a manimbawa ed sikato pian gemtanen so inkatunong. (Hebreos 3:12) Saray marelmeng a sinansakey so nayarin magbabawi tan manguman. No aliwan ontan so kaso, akin a pinaseseg nen Jehova iray Israelita: “Say marelmeng paulian to komon so dalan to, tan say too ya aliwa a maptek so saray kanonotan to; et ompawil komon ed Jehova, et sikato naani kasian to; tan ed Dios tayo, ta sikato perdonaen to naani ed daakan”? (Isaias 55:7) Anganko, legan na hudisyal a bista, natebek na mamatatken so naimanon pananguman ed kipapasey puso to a singa nipatnag diad magbabawin itsura tan awawey.

Anggan diad panaon na pakadespilosip na sakey, saray mamatatken, bilang managpastol, so mamaseseg ed sikaton magbabawi tan panggunaetan so pakapawil to ed abobon nen Jehova. Tandaan so “marelmeng a too” diad Corinto. Diad kaunoran et anguman ed dalan to, tan diad saginonor et inrekomenda nen Pablo a nipawil. (2 Corinto 2:7, 8) Kunsideraen met si Arin Manases. Talagan sikatoy ontanlan marelmeng, balet sanen diad kaunoran et sikatoy nagbabawi, inawat nen Jehova so pagbabawi to.​—2 Arari 21:10-16; 2 Awaran 33:9, 13, 19.

Tua, wala so kasalanan ya agnaperdona​—say kasalanan sumpad masanton espiritu. (Hebreos 10:26, 27) Si Jehova lambengat so manetermina no siopa so akapanggawa na ontan a kasalanan. Andian na autoridad so totoon manggawa na ontan. Say responsabilidad na mamatatken et say pamasiansia ed kalinisan na kongregasyon tan itulong ed pamapawil ed saray magbabawin managkasalanan. No gawaen da itan tekep na pakatebek tan inkamapaabeba, ya aabuloyan a saray desisyon da so mangipatnag na kakabatan nen Jehova, sirin sikaray bendisyonan nen Jehova ed sayan aspekto na panagpastol da.

[Saray paimano ed leksab]

[Litrato ed pahina 29]

Sititilan nansimpisimpitan si Ananias tan Sapira ed masanton espiritu, a mangipapanengneng na karelmengan ed puso