Asingsingger la so “Panaon Nipaakar ed Deen”!

“Nipaakar ed amin a bengatla wala so sakey ya [“aturon,” NW] panaon, . . . panaon nipaakar ed bakal, tan panaon nipaakar ed deen.”​—ECLESIASTES 3:1, 8.

1. Anton misunian a kipapasen so niwala legan na koma-20 siglo no nipaakar ed bakal tan kareenan?

PANPIRPIRAWATAN na maslak a totoo so kareenan, lapu ed maabig a rason. Agtanton naeksperiensia ed koma-20 siglo so kareenan no ikompara ed antokaman iran siglo ed awaran. Misunian itan a tuloy lapud anggapo nin balot nensaman so pirmin impansagpot pian iletneg so kareenan. Nen 1920 et aporma so Liga na Nasyones. Nen 1928 say Kellogg-Briand Pact, a tinawag na sakey a reperensia bilang, “say sankalaknaban ed nantutumbokan iran sagpot pian pansiansiaen so kareenan kayari Guerra Mundial I,” so sinuportaan na “ngalngalin amin na saray nasyon ed mundo . . . ya inmaabobon iran mangiyurak ed bakal bilang sakey a paraan a totontoney nasyon.” Insan, nen 1945 say organisasyon a Nasyones Unidas so inletneg pian salatan so agla onkukurang a Liga na Nasyones.

2. Anto so ibabagan kalat na Nasyones Unidas, tan diad anton kalaknab so walan intalona to?

² Singa say Liga, say ibabagan kalat na Nasyones Unidas et pansiansiaen to so kareenan ed mundo. Balet limitado so intalona to. Tua, agnaeeksperiensia ed mundo natan so bakal a singa kalaknab na duaran guerra mundial. Anggaman kuan, siansia nin dodogirogen na dakerakel ya angkelag a panlalaban so kareenay nonot na nilasus nilibon totoo, a manasamsam ni ed saray kaykayarian da, tan saray mismon bilay da. Ipalaran tayo kasi ya ilaloan a napagmaliw na Nasyones Unidas so koma-21 siglo a “panaon nipaakar ed deen”?

Say Letnegan na Tuan Kareenan

3. Akin ya agniwala so tuan kareenan no walay pambubusolan?

³ Aliwa lambengat a say panangiyabuloy so nakaukolan pian niwalay kareenan ed baetan na totoo tan saray nasyon. Talaga kasin mikakareenan so siopaman no wala ni bubusolen to? Aliwan ontan unong ed 1 Juan 3:15: “Anggan siopa a mamusol ed agi to sikato so akapatey.” Singa apaneknekan na agano nin awaran, magangganon ontundas ed karawalan so nigalet iran pambubusolan.

4. Siopa lambengat so makaeksperiensiay kareenan, tan akin?

⁴ Lapud si Jehova so “Dios na kareenan,” say kareenan so naeksperiensia lambengat na totoon mangaaro ed Dios tan walaay aralem a respeto ed matunong iran prinsipyo to. Malinew, ag-ipapagamor nen Jehova so kareenan ed amin. “Anggapo so deen, kuan na Dios ko, ed saray marelmeng.” Say makasengeg ed saya et agpapaigiya iray marelmeng ed masanton espiritu na Dios, a say bunga na satan et kareenan.​—Roma 15:33; Isaias 57:21; Galacia 5:22.

5. Anto so agmakatunongan parad saray tuan Kristiano?

⁵ Say pibakal ed kaparan totoo​—a mabetbet a gagawaen na saray mankuan a Kristiano, nagkalautla ed sayan koma-20 siglo—​so agmakatunongan parad saray tuan Kristiano. (Santiago 4:1-4) Tua, mibabakal ira ed bangabangat a mamapauges ed Dios, balet sayan pibabakal so denesinyo pian tulongay totoo, aliwan pian pasakitan ira. Say pamasegsegang ed arum lapu ed pandurumaan na relihyon odino panduksa lapud nasyonalistiko iran sengegan so misumlangan a tuloy ed tuan Inkakristiano. “No nayari, dia ed anganggaan na nayarian yo,” so imbilin nen Pablo ed saray Kristiano ed Roma, “manayam kayo ed kareenan ed ganaganay totoo.”​—Roma 12:17-19; 2 Timoteo 2:24, 25.

6. Iner lambengat so pakaromogay tuan kareenan natan?

⁶ Natan, say madibinon kareenan so naromog lambengat ed limog na saray tuan managdayew ed si Jehova a Dios. (Salmo 119:165; Isaias 48:18) Agnagirogiro so pankakasakey da makasengeg ed inkaapag-apag ed politika, lapud ta neutral ira ed politika anggan iner a pasen. (Juan 15:19; 17:14) Lapud ta sikara et ‘saksakey ed nonot tan saksakey ed isip,’ agnasesga so kareenan ed limog da lapud pandurumaan na relihyon. (1 Corinto 1:10) Say kareenan a panggagayagaan na Tastasi nen Jehova et sakey a modernon-agew a milagro, a pinawalay Dios a mitunosan ed sipan to: “Turoen ko so kareenan bilang saray manangasikaso yo tan say inkatunong bilang saray manangiganggan yo.”​—Isaias 60:17, NW; Hebreos 8:10.

Akin a “Panaon Nipaakar ed Bakal”?

7, 8. (a) Anggaman ed mareen a talindeg da, panon so panmoriay Tastasi nen Jehova ed kaplesan a panaon? (b) Anto so manunaan ya ayura na sakey a Kristiano diad pibabakal?

⁷ Anggaman ed mareen a talindeg da, ipapasen balet na saray Tastasi nen Jehova so kaplesan a panaon bilang say kaslakan a “panaon nipaakar ed bakal.” Siempre, aliwa iyan literal a pambabakal, lapud ta say pamilit ed arum a mangawat na mensahe na Biblia diad panamegley na biskeg na ayura so mikontraan ed imbitasyon na Dios a “say malabay, mangala ed danum na bilay ya andi-bayar.” (Apocalipsis 22:17) Aliwa iyan puersaan a panagkomberti! Say pibabakal na Tastasi nen Jehova et diad espiritual lambengat a paraan. Insulat nen Pablo: “Say ayura na saray pibabakal mi aliwa ran kien na mangaraldalin, balet makapanyari’ ra ed arap na Dios a mamagbag na saray malet a fortalezas.”​—2 Corinto 10:4; 1 Timoteo 1:18.

⁸ Say manunaan ed ‘saray ayura na pibabakal tayo’ et “say kampilan na espiritu, a sikato so salitay Dios.” (Efeso 6:17) Mabiskeg iyan kampilan. “Say salita na Dios sikatoy mabilay tan mabiskeg, tan makdem nen say anggan dinan a kampilan a duaray tarem, tan ontalos ya angga ed pansianan na kamarerwa tan espiritu, tan angga ed saray langolangoan tan saray utek, tan masiglat a mangibiig ed saray nonot tan saray getma na puso.” (Hebreos 4:12) Diad pangusar ed sayan kampilan, sarag na saray Kristiano a daegen iray “kaisipan, tan balang atagey a bengatla ya onalagey ya onsumpa ed kakabatan na Dios.” (2 Corinto 10:5) Ontulong itan ed sikara pian iwalwal iray palson doktrina, makapasakit iran agamil, tan saray pilosopiyan mangipapatnag na kakabatay too imbes a kakabatan na Dios.​—1 Corinto 2:6-8; Efeso 6:11-13.

9. Akin a tuloytuloy so pibarangkaan tayo ed makasalanan a laman?

⁹ Say sakey nin klase na espiritual a pibabakal et say pibabarangkaan ed makasalanan a laman. Tutumboken na saray Kristiano so alimbawa nen Pablo, ya inaksobi ton: “Leweten ko so laman ko, tan ’yan ko ed silong na kaaripenan: ta agla piga no nagawa, no kayarik ya angipulong ed saray arum, siak a dili so nipulisay.” (1 Corinto 9:27) Asimbawa iray Kristianon taga-Colosas a pateyen da iray “kabiangan [da] a wadia ed tapew na dalin; panaglawan, inkarutak, kaalakan, mauges a getma, tan agum, say panagdayew ed talintao.” (Colosas 3:5) Tan pinaseseg a maong nen Judas, a managsulat na Biblia, iray Kristiano “a mibangal [ira] nisesengeg ed pananisia a niiter nen aminsan ed saray sasanto.” (Judas 3) Akin a nepeg tayon gawaen itan? Inmebat si Pablo: “No manbilay kayo unong ed laman, nakaukolan ya ompatey kayo; bangbalet no lapu ed espiritu pateyen yo so saray gawa na laman, manbilay kayo.” (Roma 8:13) Nisengeg ed sayan malinew a balikas, tuloytuloy so pibarangkaan tayo ed mauges iran tendensia.

10. Anto so agawa nen 1914, a mansumpal ed anto diad asingger lan arapen?

¹⁰ Ingen say sananey nin rason no akin a moriaen so kaplesan a panaon bilang panaon na bakal et lapud asingsingger lay “agew na kababales na Dios tayo.” (Isaias 61:1, 2) Nen 1914, sinmabi ed satan so aturon panaon nen Jehova pian iletneg to so Mesianikon Panarian tan autorisaan itan ya aktibon mibakal ed sistema nen Satanas. Angangga la ed satan a panaon so nigeter a peryodo parad totoo pian nasali ra so ginawa ran uley ya anggapoy pibabali na Dios. Imbes ya awaten da so Mesianikon Manuley na Dios, sikatoy tuloytuloy ya impulisay na maslak a totoo, a singa ginawa met na dakel nen inmunan siglo. (Gawa 28:27) Kanian lapud isusumpa ed Panarian, apaskar si Kristo a “manuley . . . ed pegley na saray kakabusol [to].” (Salmo 110:2) Makapaliket ta isisipan na Apocalipsis 6:2 ya ‘isumpal to so pananalo to.’ Gawaen to iya diad “baleg ya agew na Dios, a Makapanyarin-amin . . . , dia ed Hebreo manngaran na Armagedon.”​—Apocalipsis 16:14, 16.

Natan la so “Panaon a Pansalita”

11. Akin a pirmi lay panaanos nen Jehova, balet anto so nagawa ed kaunoran?

¹¹ Nanlapulad inkauman na saray kipapasen na totoo nen 1914 et linmabas lay 85 a taon. Pirmi lay panaanos nen Jehova ed sankatooan. Sigpot ton impaamta ed saray Tastasi to so inkaganatan ed walan kipapasen. Napepeligro so minilyon a bilay. Makanepegan a pasakbayan irayan dakerakel a totoo lapud “say Katawan. . . , agto labay a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9) Anggaman kuan, magano lan onsabi so ‘ipayawar na Katawan tayo a Jesus a manlapu ed tawen ya iba to so saray angheles na pakayari to.’ Insan, amin na saramay ginagala ran ipulisay so mensahe na Panariay Dios so managmak ed “panamales” ya idapo nen Jesus ed “saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.”​—2 Tesalonica 1:6-9.

12. (a) Akin ya anggapoy kakanaan so pamalbeng ed no kapigan so nayarin igapo na baleg a kairapan? (b) Anton kapeligroan nipaakar ed saya so impasakbay nen Jesus?

¹² Kapigan so panganggan siansia na panaanos nen Jehova? Anggapoy kakanaan na antokaman a palbeng nipaakar ed no kapigan so nayarin igapo na ‘baleg a kairapan.’ Malinew so inkuan nen Jesus: “Satan ya agew tan oras anggapoy mikabat.” Diad biek a dapag, oniay insimbawa to: “Manpuyat kayo sirin; ta agyo amta no anton agew so isabi Katawan yo. . . . Kanian manparaan kayo met komon: ta dia ed oras ya agyo isisipen onsabi’ Anak na too.” (Mateo 24:21, 36, 42, 44) Diad simplin panangibaga, kabaliksan na saya a diad agew-agew et nepeg tayo so mansiansian akabantay ed saray ebento ed mundo tan nodnonoten so ibetag na baleg a kairapan. (1 Tesalonica 5:1-5) Agaylan mapeligron isipen a nayari ni so mankampante, a singa panangikuan et normal labat a panagbilay, a manaalagar labat no antoray nagawa! Inkuan nen Jesus: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit.” (Lucas 21:34, 35) Makapanseguro itayo nipaakar ed saya: Say “apatiran dagem” na kadederal a pupugeran ni natan na “apatira ya anghel” nen Jehova so agla maandon pugeran.​—Apocalipsis 7:1-3.

13. Anto so amoria na ngalngali anemiran milyon a totoo?

¹³ Nisengeg ed sayan manasingger lan maong ya agew na pikuekuentaan, walaan na nikadkaduman kabaliksan iray salita nen Solomon nipaakar ed say kiwala na “panaon a pansalita.” (Eclesiastes 3:7) Lapud impakamoria ra a natan lan talaga so panaon a pansalita, ngalngali anemiran milyon a Tastasi nen Jehova so maseseg a mangitotongtong ed gloria na inkaari na Dios tan mangipapasakbay nipaakar ed agew na panangibales to. Mabulbulos dan iyaapay so inkasikara ed sayan panaoy puersa militar nen Kristo.​—Salmo 110:3; 145:10-12.

Saramay Mansalita na ‘Deen, Anta Anggapo so Deen’

14. Antoran palson propeta so niwala kaleganay komapito a siglo K.K.P.?

¹⁴ Legan na komapiton siglo K.K.P., inyabawag na saray propeta na Dios a si Jeremias tan Ezequiel iray mensahe na madibinon panangukom sumpad Jerusalem lapud mauges a kurang to diad itutunganga ed Dios. Say kadederal ya impasakbay da so agawa nen 607 K.K.P., anggano sinumpa na saray prominenti tan maimpluensian lider na relihyon iray mensahero na Dios. Apaneknekan na sarayan lider na relihyon a sikaray “manpropropeta a maatiw [a] . . . tinukso ra so baley [na Dios], ya inkuan da, Deen; et anggapo so deen.”​—Ezequiel 13:1-16; Jeremias 6:14, 15; 8:8-12.

15. Wala met kasi natan so mipadparan palson propetas? Ipaliwawa.

¹⁵ Singa saramay “manpropropeta a maatiw” ed saman a panaon, agmet pinasakbayan na maslak a lider na relihyon natan so totoo nipaakar ed onsabin agew na panangukom na Dios. Imbes, paparakepen da so panmoria ed saray partidoy politika a nailaloan a makapawalay kareenan tan kaligenan ed kaunoran. Lapud mas mapaga pian paliketen iray totoo imbes a say Dios, ibabaga ray labay a dengelen na saray membro ra imbes ya ipaliwawa ran niletneg la so Panarian na Dios tan magano lan isumpal na Mesianikon Ari so pananalo to. (Daniel 2:44; 2 Timoteo 4:3, 4; Apocalipsis 6:2) Singa saray palson propeta, sasalitaen day nipaakar ed ‘deen, anta anggapo so deen.’ Balet agmanbayag, say papanisiaan da so biglan magmaliw a pakatalagnawan sano nipaarap ira ed sanok na samay Sakey a papaugesen da tan papabandayen dan maong so ngaran to. Saray lider na sankamundoan ya empiryo na palson relihyon, a deneskribe ed Biblia bilang imoral a bii, so nadesyang legan dan mapalikdon ikekelyaw so nipaakar ed kareenan.​—Apocalipsis 18:7, 8.

16. (a) Anto so makasengeg ed inkibantog na Tastasi nen Jehova? (b) Panon iran midumaan ed saramay mangikekelyaw na ‘deen, anta anggapo so deen’?

¹⁶ Anggaman itutultuloy na karaklan ed saray prominenti tan maimpluensian lider so mankuankuanan a pangisisipan day kareenan, ag-itan manenyeg ed kompiyansa na saramay walaan na pananisia ed sipan na Dios nipaakar ed tuan kareenan. Diad loob na masulok lan sakey siglo, nibantog iray Tastasi nen Jehova bilang matoor a manangidepensa ed Salitay Dios, makpel a kabusol na palson relihyon, tan determinadon mananuporta ed Panariay Dios. Agda papatemegen so totoo diad panamegley na malarog a balbalikas da nipaakar ed kareenan, noagta maseeseet dan pambabanikelan a liingen iray totoo nipaakar ed inkapeteg a natan lay panaon nipaakar ed bakal.​—Isaias 56:10-12; Roma 13:11, 12; 1 Tesalonica 5:6.

Onkelyaw lay Jehova

17. Anto so labay ya ibaga na magano lan onkelyaw si Jehova?

¹⁷ Inkuan nen Solomon: “Say [tuan] Dios ukomen to naani so maptek tan marelmeng; ta wala so panaon diman nipaakar ed balang pegdat tan nipaakar ed balang gawa.” (Eclesiastes 3:17) Si Jehova so walaan na aturon panaon ed pangipaakseb toy panangukom ed palson relihyon tan ed “saray arari’ dalin [ya] impasen da so inkasikara, . . . sumpa ed Jehova, tan sumpa ed pinuyokan to.” (Salmo 2:1-6; Apocalipsis 16:13-16) Diad bektan sinmabi la itan a panaon, mangangga lay panaon ya ‘ag-iyeesel’ nen Jehova. (Salmo 83:1; Isaias 62:1; Jeremias 47:6, 7) Diad panamegley na nitronon Mesianikon Ari to, si Jesu-Kristo, sikatoy ‘mansalita’ ed lenguahen mapatnag a natalosan lambengat na saray onsusumpa ed sikato: “Si Jehova ompaway naani a singa sakey a mabayani a too; papawayen to naani so seseg a singa sakey a too na bakal: sikato naani so oningal, on, sikato naani oneyag [nipaakar ed bakal]; gawaen to naani a mabisbiskeg a sumpa ed saray kabusol to. Abayag la a binembenan ko so deen ko; agak inmesel, tan pinokpokan ko so inkasiak: natan oningal ak naani a singa sakey a bii a manpasakit; mamagbag ak tan mangakmon ak a maminpinsan. Igebak naani so saray palandey tan pukdol, tan pamagaen ko so amin a dika ra; tan saray ilog pagmaliwen ko ra naani a pulpulo, tan paekaten ko naani so saray libsong. Tan yakar ko naani so bulag ed sakey a dalan ya agda amta: ed saray basbas ya agda amta so pangidalanan ko ed sikara; say bilunget gawaen ko naani a liwawa ed arap da, tan pampeteken ko so pikewet a pasen. Saraya a bengatla so gawaen ko naani, tan agko ra paulyan.”​—Isaias 42:13-16.

18. Diad anton paraan ya agmanbayag et ‘ag-onesel’ iray totoo na Dios?

¹⁸ Sano ‘mansalita’ la si Jehova diad pangitandoro toy inka-Dios to, agla nakaukolan a mansalita iray totoo to bilang panangitandoro ed sikato. Onsublay met iray totoo to ya ‘ag-onesel.’ Singa ed saray lingkor na Dios nensaman, onaplika irayan salita: “Agyo nakaukolan so mibakal dia ed saya a bakal: ompasen kayo, tan ontanyareg kayo, tan nengnengen yo so panangilaban nen Jehova ed sikayo.”​—2 Awaran 20:17.

19. Anton pribilihyo so magano lan niwala ed saray espiritual ya agagi nen Kristo?

¹⁹ Agaylan makadesyang so pakatalo nen Satanas tan say organisasyon to! Mibiang iray niglorian agagi nen Kristo diad pangibasig da ed matalonggaring a pambiktorya nisesengeg ed inkatunong, mitunosan ed sipan a: ‘Say Dios na kareenan diad magano et imedmer to si Satanas ed lepsag na saray sali yo.’ (Roma 16:20) Asingsingger la so abayaglan tatalaranan a panaon na kareenan.

20. Anton panaon so magano lan nagawa?

²⁰ Agaylan abendito so pambilay na amin a walad dalin a makaliktar ed sayan matalonggaring a kipatnag na pakapanyari nen Jehova! Agmanbayag kayari na satan et nakaiba da iray matoor a lalaki tan bibii nensaman ya asabi met lay aturon panaon dan onoli. Say Sanlibon Taon a Panuley nen Kristo so peteg a “panaon a pantanem, . . . panaon a pamaalagey; . . . panaon a panelek; . . . panaon a panlugtot; . . . panaon a panlakap, tan . . . panaon a pangaro.” On, tan satan so magmaliw lan andi-anggaan a “panaon nipaakar ed deen”!​—Eclesiastes 3:1-8, NW; Salmo 29:11; 37:11; 72:7.

Anto so Ebat Yo?

◻ Anto so letnegan na magnayon a kareenan?

◻ Akin a kokonsideraen na Tastasi nen Jehova so kaplesan a panaon bilang “panaon nipaakar ed bakal”?

◻ Kapigan a ‘mansalita’ so totoo na Dios, tan kapigan so ‘agda iyesel’?

◻ Panon tan kapigan so ikelyaw nen Jehova?

[Kahon/Saray litrato ed pahina 13]

Si Jehova so Walaan na Aturon Panaon ed

◻ panagyat ed si Gog ya onataki ed totoo na Dios.​—Ezequiel 38:3, 4, 10-12

◻ pangiyan ed kapusoan na manuley a totoo pian deraley Babilonia a Baleg.​—Apocalipsis 17:15-17; 19:2

◻ pakagaway bansal na Kordero.​—Apocalipsis 19:6, 7

◻ igapo na bakal ed Armagedon.​—Apocalipsis 19:11-16, 19-21

◻ pamalor ed si Satanas pian onggapo lay Sanlibon Taon ya Uley nen Jesus.​—Apocalipsis 20:1-3

Maalutor lambengat ya indatak irayan ebento unong na inkatukoyan da ed Kasulatan. Makapanseguro itayo ya amin irayan limaran ebento so nagawa ed alasir a denetermina nen Jehova tan no kapigan so eksakton panetermina to.

[Saray litrato ed pahina 15]

Say Sanlibon Taon ya Uley nen Kristo so petepeteg a panaon a . . .

panelek . . .

panlakap . . .

pangaro . . .

pantanem . . .

panlugtot . . .

pama-alagey . . .