Magayaga Natan tan ed Ando lan Ando

“Mansayaksak, sikayon totoo, tan manggayaga ed ando lan ando ed no anto so palsaen ko. Ta dia palsaen ko so Jerusalem a sengegan parad panggayaga tan sengegan na pansayaksak parad totoo to.”​—ISAIAS 65:18.

1. Panon a naaapektoan na tuan panagdayew iray indibidual ed apalabas iran siglo?

DIAD loob na saray siglo, agnabilang iray akaromog na mayaman a gayaga diad panaglingkor ed tuan Dios, si Jehova. Si David so sakey ed saray nanggayaga ed tuan panagdayew. Isasalaysay na Biblia a sanen say kaban na sipan so inawit ed Jerusalem, “si David tan say interon abung nen Israel so angawit ed kaban nen Jehova tekep na magayagan paneyag.” (2 Samuel 6:15) Say ontan a gayaga diad panaglingkor ed si Jehova so aliwan sakey lambengat a bengatla ed apalabas. Makapinabang ka ed satan. Tan anggan natan walaray sukat na gayaga ya agla manbayag et nakayarian mo!

2. Diad labas na orihinal a kasumpalan na Isaias kapitulo 35 ed pinmapawil a Judio, siopara natan so nasasaglawi ed sakey nin kasumpalan?

² Diad akadkaunan artikulo, nausisa tayo so inmunan kasumpalan na makapasagyat a propesiyan nikurit diad Isaias kapitulo 35. Duga so pangitawag tayo ed saya bilang panangipawil a propesiya lapud ontan so nagmaliwan na saray Judio ed saman. Walaan itan na mipadparan kasumpalan ed panaon tayo. Panon? Bueno, nanlapu ni ed saray apostol tan ed arum ni nen Pentecostes 33 K.P., midedeneng la si Jehova ed espiritual ya Israelitas. Saraya so totoon alanaan na masanton espiritu na Dios a nagmaliw a kabiangan ed samay tatawagen nen apostol Pablo ya “Israel na Dios.” (Galacia 6:16; Roma 8:15-17) Tandaan met a diad 1 Pedro 2:9 et sarayan Kristiano so tatawagen a “sakey a pinilin rasa, sakey a maarin inkasaserdote, sakey a masanton nasyon, totoo a parad nikaduman kayarian.” Intuloy nen Pedro ya impaamta so asainmin ya initer ed espiritual ya Israel: “‘Pian niyabawag yo ed dalin a biek taew iray karlangan’ na samay sakey ya anawag ed sikayo manlapud kabilungetan a mamaarap ed makapakelaw a liwawa to.”

Sakey a Kasumpalan ed Panaon Tayo

3, 4. Anto so kipapasen sanen asumpal so Isaias kapitulo 34 ed modernon panaon?

³ Wala so panaon ed asasakbay na sayan siglo sanen say nakdaan na espiritual ya Israel so agnantultuloy ya aktibo ed panangiyabawag na sayan mensahe. Ag-ira sigsigpot ya akiliket diad makapakelkelaw a liwawa na Dios. Diad tua, sikaran talagay walad kabilungetan. Kapigan iman? Tan anto so ginawa nen Jehova a Dios ed satan?

⁴ Saman et nen Guerra Mundial I, kayarin tuloy na inkiletneg na Mesianikon Panarian na Dios ed tawen nen 1914. Saray nasyon, tekep na pananugsug na klero na saray iglesia ed nanduruman daldalin, so sinmanok ed sakey tan sakey. (Apocalipsis 11:17, 18) Siempre, say Dios so sumpa ed apostatan Kakristianoan pati say nipaatagey a kleron klase to no panon a sikatoy sumpa nen saman ed matangsit a nasyon na Edom. Kanian, say Kakristianoan, say antitipikon Edom, so niganan managmak ed modernon-panaon a kasumpalan na Isaias kapitulo 34. Sayan kasumpalan diad panamegley na nagnap a kadederal so segurado a singa ed inmunan kasumpalan to sumpad kadaanan ya Edom.​—Apocalipsis 18:4-8, 19-21.

5. Anton nengneng na kasumpalan na Isaias kapitulo 35 so nagagawa ed panaon tayo?

⁵ Komusta so nipaakar ed kapitulo 35 na propesiya nen Isaias, a mangidadanet ed gayaga? Satan met so nasusumpal ed panaon tayo. Panon ya ontan. Satan so nasusumpal diad inkipawil na espiritual ya Israel manlapud sakey a nengneng na inkakautibo. Usisaen tayo paray agawa unong ed kapetegan ed agano nin teokratikon awaran, ya agawa ed bilay na dakel a wadia ni natan.

6. Akin a nibaga a say nakdaan na espiritual ya Israel so nisilong ed inkakautibon kipapasen?

⁶ Diad loob na antikey a panaon legan na Guerra Mundial I, say nakdaan na espiritual ya Israel so agsigpot a nantultuloy a malinis tan nitunos ed linawa na Dios. Arum ed sikara so amatikan na saray lingon doktrina tan akikompromiso diad agsigpot ya indapag ed si Jehova sanen nisilong ed pananesdes a suportaan so manbabakal a nasyon. Legan na saraman a panaon na bakal, asagmak da so amin a nengneng na panamasegsegang, insibel ni ingen ed dakel a lugar iray literatura ra ed Biblia. Diad kaunoran, pigara ed prominentin agagi so pinakasalanan tan nipriso lapud palso iran akusasyon. Diad panrepaso et agmairap a talosan, a diad sakey a pantalos, et say totoo na Dios, imbes a kibulos, so walad sakey a kipapasen ya akautibo. (Ikompara so Juan 8:31, 32.) Sikaray talagan kinmulang ed espiritual a panmoria. (Efeso 1:16-18) Angipanengneng ira na relatibon inkaemel ed panangidayew ed Dios, a say resulta et say impagmaliw dan agmabunga diad espiritual. (Isaias 32:3, 4; Roma 14:11; Filipos 2:11) Naiimanom ta so kipetekan na situasyon na kadaanan iran Judio ya akautibo diad Babilonia?

7, 8. Anton nengneng na panangipawil so naeksperiensia na modernon agew a nakdaan?

⁷ Balet kasin basta labat taynan na Dios so modernon-agew ya ariripen to ed ontan a kipapasen? Andi, sikatoy determinadon mangipawil ed sikara, a mitunosan ed nipasakbay diad panamegley nen Isaias. Kanian sayan parehon propesiya diad Isa kapitulo 35 et walaan na mabitar a kasumpalan diad panaon tayo, ed pangipawil ed nakdaan na espiritual ya Israel a mamaarap ed aligwas tan bunigas diad espiritual a paraiso. Diad Hebreos 12:12, inyaplika nen Pablo so Isaias 35:3 diad piguratibon pantalos, a susuportaan so inkasusto na espiritual a pangiyaaplika tayo ed sayan kabiangan na propesiya nen Isaias.

⁸ Diad panaon na kayari bakal, saray alanaan a nakdaan na espiritual ya Israel so nibulos manlapud inkakautibo, a singa panangibaga. Inusar nen Jehova a Dios si Jesu-Kristo, say Babaleg a Ciro, pian ibulos ira. Diad ontan et sayan nakdaan so makapangipaalagey-lamet, a singa ed kimey na nakdaan na kadaanan iran Judio, a pinmawil ed dalin da pian ipaalagey-lamet so literal a templo diad Jerusalem. Niarum ni, sarayan espiritual ya Israelita diad modernon panaon so makapangigapo ed pamayubo tan pamawala na maberden espiritual a paraiso, sakey a piguratibon hardin na Eden.

9. Panon ya agawa ed panaon tayo so sakey a bengatlan singa ed deneskribe na Isaias 35:1, 2, 5-7?

⁹ Tekep na satan ed kanonotan, konsideraen tayo pa lamet so Isaias kapitulo 35, tan nengnengen ni Isa 35 bersikulo 1 tan 2. Say ompatnag ya anggapoy danum a rehyon so talagan ginmapon manrosas tan nagmaliw a mabunga a singa ed kadaanan a patar na Saron. Insan, nengnengen pay Isa 35 bersikulo 5 tan 7. Alukasan iray mata na pakatalos na saray nakdaan, a pigara ed sikara so mabilay ni tan aktibo diad serbisyo ed si Jehova. Magmaong so pakanengneng da ed nagagawa nen 1914 tan manpatuloy. Walaan met na epekto itan ed dakel ed sikatayo a manitibukel ed “baleg ya ulop,” a natan et manlilingkor a kaiba iray nakdaan.​—Apocalipsis 7:9.

Kasin kabiangan Kayo na Kasumpalan?

10, 11. (a) Panon kayon nasasaglawi ed kasumpalan na Isaias 35:5-7? (b) Anto so personal ya alikna yo nipaakar ed sarayan pananguman?

¹⁰ Alaen pan alimbawa so inkasikayo. Sakbay ya akabat yoray Tastasi nen Jehova, regular ta la a babasaen yo so Biblia? No ontan, kaunongay kaaralem na pakatalos yo nipaakar ed saya? Singa bilang, amta yo la natan so katuaan nipaakar ed kipapasen na saray inatey. Anganko et sarag yon ipanengneng ed interesadon too so pamaakaran nipaakar ed saya iray nisiglaot a teksto diad Genesis kapitulo 2, Eclesiastes kapitulo 9, tan Ezequiel kapitulo 18, ontan met ed dakel nin kasulatan. On, maseguron natatalosan yo la so ibabangat na Biblia nipaakar ed dakel a tema odino isyu. Diad simplin panangibaga et natatalosan yo la so Biblia, tan dakel so nisalaysay yo ed arum nipaakar ed satan, a singa andi-duaruwan gagawaen yo la.

¹¹ Balet, marakep no itepet na balang sakey ed sikatayo, ‘Panon kon naaralan ya amin so amtak nipaakar ed katuaan na Biblia? Sakbay ya akiaral ed totoo nen Jehova, kasin inanap ko lan amin so tekston kapkapansalambit? Talaga ta ya atalosan ko lay kabaliksan na saraya tan adampot so suston konklusyon nipaakar ed kablian na saraya?’ Say prangkan ebat ed sarayan tepet so maseguron andi. Anggapoy siopaman a kaukolan a naopendi ed ontan a balikas, balet nibagan diad tua et bulag kayo ed saman nipaakar ed sarayan teksto tan ed kabaliksan na saraya. Agta ontan? Saratan so walad Biblia, balet agyo natebek odino natalosan iray kabaliksan da. No ontan, panon ya alukasan iray mata yo diad espiritual a pantalos? Satan so diad panamegley na ginawa nen Jehova bilang pakakasumpalan na Isaias 35:5 ed saray alanaan a nakdaan. Lapud saya et alukasan met so kamataan yo. Anggapo kayo la’d espiritual a kabilungetan. Makanengneng kayo la.​—Ikompara so Apocalipsis 3:17, 18.

12. (a) Akin a nibaga tayo ya aliwan saya so panaon parad mamilagron panagpaabig ed pisikal? (b) Panon ya inlitrato na kipapasen nen Brother F. W. Franz so kasumpalan na Isaias 35:5 ed panaon tayo?

¹² Kabat na saray aliston estudyante na Biblia tan saray pidedeneng na Dios ed apalabas iran siglo ya aliwa iyan panaon ed awaran parad pisikal iran milagron panamaabig. (1 Corinto 13:8-10) Kanian agtayo iilaloan a lukasan nen Jesu-Kristo iray mata na saray bulag pian paneknekan a sikatoy Mesias, say Propeta na Dios. (Juan 9:1-7, 30-33) Nisay pakayarian ton makadngel lamet iray telek. Sanen si Frederick W. Franz, sakey ed saray alanaan tan presidenti ed saman na Watch Tower Society, asingger lan manedad na 100, sikato so ngalngali la bulag tan kinaukolan a mangusar na hearing aid. Wala lay pigaran taon ya agla makabasa; balet, siopa so manisip a sikatoy bulag odino telek diad pantalos na Isaias 35:5? Say makdem ya espiritual a pakanengeng so sakey a bendisyon ed totoo na Dios ed sankadalinan.

13. Anton pansalat odino panangipawil so naeksperiensia na modernon-panaon a totoo na Dios?

¹³ Komusta met so nipaakar ed dila yo? Saray alanaan na Dios so singano emel ed panaon na espiritual ya inkakautibo ra. Balet bektaman ya inuman na Dios itan a kipapasen, saray dila ra so ginmapon kinmelyaw lapud liket ed akabatan da nipaakar ed inkiletneg na Panarian na Dios tan ed sipasipan to ed arapen. Nayarin atulongan da kayo met a makapansalita. Kaunongay kabetbet na impansalita yo na katuaan na Biblia ed arum ed apalabas? Anganko walaray panaon ya isipen yon, ‘Panggagayagaan ko so panaaral, balet agko nayarian so onla diman tan mitongtong ed arum a too.’ Anggaman ontan, agta tua a “say dila na say agmakapansalitan sakey” so ‘onkekelyaw [la natan] lapud liket’?​—Isaias 35:6.

14, 15. Panon a manaakar ed “say Dalan na Inkasanto” so dakel ed panaon tayo?

¹⁴ Andukey so impanbaroy na saray kadaanan a Judion nibulos manlapud Babilonia a mamapawil ed binalegan dan dalin. Anto so kasimbangan na satan ed panaon tayo? Bueno, imanoen tayo pa so Isaias 35:8: “Petepeteg a niwala diman so sakey a maawang a dalan, anggan sakey a dalan; tan natawag itan a say Dalan na Inkasanto. Say agmalinis a sakey so ag-ondalan ed satan.”

¹⁵ Nanlapulad inkibulos da manlapud espiritual ya inkakautibo, say alanaan a nakdaan, a natan et iibaan na minilyon na arum a karnero, so pinmaway la manlapud Babilonia a Baleg a mamapaarap ed piguratibon dalan, sakey a malinis a dalan na inkasanto a mamaarap ed espiritual a paraiso. Panggugunaetan tayon onkualipika tan mansiansia ed sayan Dalan na Inkasanto. Isipen pay inkasikayo. Agta say moral iran estandarte tan prinsipyo a tutumboken yo so mas atagtagey natan nen say sanen sikayo so wala ni’d mundo? Agta mas panggugunaetan yon itukoy so panag-isip tan kondukta yo ed Dios?​—Roma 8:12, 13; Efeso 4:22-24.

16. Antoran kipapasen so panggagayagaan tayo legan a manaakar tayo ed Dalan na Inkasanto?

¹⁶ Legan na pantutultuloy yo ed sayan Dalan na Inkasanto, talagan agyo panpapagaan so nipaakar ed inaayep a totoo. Iyaliling lan ontan, diad mundo et kaukolan yoy manbantay pian agkayo buagen a mabilay diad piguratibon pantalos na totoon maagum odino makapagula. Dakdakel a totoo so midedeneng ed arum tekep na inkaibeg. Agaylan midumaan itan ed limog na totoo na Dios! Ditan et protektado kayo ed kaliber-liber. Siempre, aliwan ayadyari iray kapara yon Kristiano; no maminsan et say sakey so nalingo odino sengegan na pakaopendian. Balet kabat yon agginagala na agagi yon sikayo so pasakitan odino abusoen. (Salmo 57:4; Ezequiel 22:25; Lucas 20:45-47; Gawa 20:29; 2 Corinto 11:19, 20; Galacia 5:15) Imbes, interesado ira ed sikayo; tutulongan da kayo; labay da so manlingkor a kaiba yo.

17, 18. Diad anton pantalos a wala natan so sakey a paraiso, tan anto so epekto na saya ed sikatayo?

¹⁷ Kanian nayarian tayon usisaen so Isaias kapitulo 35, lawas a nonoten so kaplesan a kasumpalan na Isa 35 bersikulo 1 ya anggad 8. Agta malinew ya aromog tayo so dugan natatawag ya espiritual a paraiso? Andi, satan so aliwan ayadyari​—andi ni. Balet satan so sakey a tuan paraiso, ta dia et nagagawa tayo la, a singa ed ibabaga na Isa 35 bersikulo 2, “nengneng yo so gloria nen Jehova, say karakpan na Dios tayo.” Tan anto so epekto? Iyaarum na Isa 35 bersikulo 10: “Mismon saray dinondon nen Jehova so ompawil tan petepeteg ya onla ed Sion tekep na magayagan kelyaw; tan say panliket ed panaon ya andi-geter so nitapew ed ulo ra. Diad pansayaksak tan panliket et narapat da, tan say panermen tan pantagleey so nepeg ya ontaynan.” Peteg, say impaway tayo manlapud palson relihyon tan say panggegemtan tayo ed tuan panagdayew diad silong na abobon na Dios so manasagyat na gayaga.

¹⁸ Say gayagan nisiglaot ed tuan panagdayew so mantultuloy ya ombabaleg, agta ontan? Nanenengneng yoray balon interesado a mamapasimbalo tan makapanaaral ed katuaan na Biblia. Naiimano yoray tobonbalo ed kongregasyon ya ombabaleg tan onaabante ed espiritual. Wadtan iray panagbautismo, a nababantayan yoray kabat yon nabautismoan. Agta saratan so rason pian manggayaga ed inkadaakan natan? On, agaylan gayaga so pakapibiang na arum ed espiritual a kawayangan tayo tan espiritual a paraison kipapasen!

Asingger lan Sakey Nin Kasumpalan!

19. Tekep na anton makapasagyat ya iilaloan so itatarok ed sikatayo na Isaias kapitulo 35?

¹⁹ Diad sayan punto et akonsidera tayo la so Isaias kapitulo 35 no nipaakar ed inmunan kasumpalan to ed say Judio a pinmawil tan ontan met ed espiritual a kasumpalan a nagagawa natan. Balet aliwan satan so anggaan to. Dakel ni nagawa. Satan so nipaakar ed panamaseguro na Biblia ed onsasabin kipawil na literal iran kipapasen na paraiso ed dalin.​—Salmo 37:10, 11; Apocalipsis 21:4, 5.

20, 21. Akin a makatunongan tan Makasulatan so panisian wala so sakey nin kasumpalan na Isaias kapitulo 35?

²⁰ Aliwan matukoy parad si Jehova so pangiter na malinlinew iran deskripsyon nipaakar ed sakey a paraiso tan insan pegetan itan ed saray kasumpalan na espiritual a bengabengatla labat. Siempre, aglabay ya ibaga na saya a say espiritual a kasumpalan so agla importanti. Anggano niletneg lay literal a paraiso, agtayo napenek ya anggaman ed marakep a nenengnengen tan maamo iran ayep et napapaliberan tayo met na totoon marutak ed espiritual, totoon onkikiwas a singa atap ya ayayep. (Ikompara so Tito 1:12.) On, nepeg ya unona so espiritual, ta satan so sankaimportantian.

²¹ Anggaman kuan, say onsasabin Paraiso so agmangangga ed saray espiritual ya aspeton panggagayagaan tayo la natan tan panggayagaan ni ed arapen. Walaan tayo na maabig a rason ya ilaloan so literal a kasumpalan na saray propesiya a singa say Isaias kapitulo 35. Akin? Bueno, diad Isa kapitulo 65, impasakbay nen Isaias so “balon katawenan tan sakey a balon dalin.” Inusar itan nen apostol Pedro sanen dedeskribien to no antoray tumbokan na agew nen Jehova. (Isaias 65:17, 18; 2 Pedro 3:10-13) Ipapanengneng nen Pedro a saray kabiangan a deneskribe nen Isaias so aktual a niwala sano wadtan lay “balon dalin.” Ilaktip na satan iray deskripsyon a nayarin kabisado yo la​—panangipaalagey na saray abung tan panayam ed saratan; pantanem na kaubasan tan pangan na saray bunga to; manbayag a gayaga ed gawa na kalimaan; say lobo tan say kordero a manaayam a saniba; tan anggapoy nagagawan makapasakit ed sankadalinan. Diad arum a salita, andukey a bilay, maligen iran ayaman, daakan a tagano, makapenek a kimey, tan kareenan ed limog na ayayep tan ed baetan na ayayep tan totoo.

22, 23. Anton basiyan na gayaga so niwala diad arapen a kasumpalan na Isaias kapitulo 35?

²² Agta napapano kayo na gayaga lapud satan ya iilaloan? Manepeg labat, ta pinalsa itayo na Dios pian manbilay ya ontan. (Genesis 2:7-9) Kanian, anto so kabaliksan na satan no nipaakar ed propesiya diad Isaias kapitulo 35 a kokonsideraen tayo? Kabaliksan na satan a walaan itayo na kaaruman a rason pian onkelyaw parad gayaga. Saray literal a disierto tan anggapoy-danum a rehyon so manrosas, a sengegay panliket tayo. No ontan saray totoon say kamataan da et asul, odino brown, odino arum niran makapalikliket a kolor, balet natan et bulag so makanengneng la. Saray kapara tayon Kristiano a telek, odino anggan saramay makapuy so pakadngel da, so makadngel lan malinlinew. Agaylan gayaga so pakapangusar ed satan ya abilidad ya ondengel ed Salita na Dios a nabasa tan nisalaysay, ontan met ed pakatalineng ed palayupoy na dagem ed kakiewan, panelek na ugaw, uni na manok!

²³ Kabaliksan met na satan a saray piley, pati saramay walaay arthritis natan, so makakiwas lan anggapoy ot-ot. Agaylan pakainawaan itan! Diad ontan et literal ya onagus so danum ed saray disierto. Namparan nanengneng tan narengel tayo so agus tan panburabura na danum. Makapanakar tayo diman tan nadiwit iray berden dika tan balbalinon tantanaman. Satan so talagan nipawil a Paraiso. Komusta met so gayaga a naasinggeran so sakey a leon odino arum nin maatap ya ayep ya andiay takot? Agtayo kaukolan a deskribien ni itan, ta abayag lan panpipirawatan tayo itan ya eksena.

24. Akin ya onabobon kayo ed balikas ed Isaias 35:10?

²⁴ Papaseguroan itayo nen Isaias: “Mismon saray dinondon nen Jehova so ompawil tan petepeteg ya onla ed Sion tekep na magayagan kelyaw; tan say panliket ed panaon ya andi-geter so nitapew ed ulo ra.” Kanian mipakna tayon walaan tayo na rason pian onkelyaw ed gayaga. Gayaga lapud agawaan la nen Jehova parad totoo to so espiritual a paraiso tayo, gayaga lapud iilaoan tayo diad literal a Paraison asingger la. Nipaakar ed saray magayaga​—nipaakar ed sikatayo​—oniay insulat nen Isaias: “Diad pansayaksak tan panliket et narapat da, tan say panermen tan pantagleey so nepeg ya ontaynan.”​—Isaias 35:10.

Kasin Naimano Yo?

◻ Anto so nagmaliw a komaduan kasumpalan na Isaias kapitulo 35?

◻ Antoy espiritual a kasimbangan na mamilagro iran pananguman ya impasakbay nen Isaias?

◻ Panon so impinabang mo ed sakey a kasumpalan na sayan propesiya?

◻ Akin a nibaga tayo a say Isaias kapitulo 35 so napnapno na ilalo parad arapen tayo?

[Litrato ed pahina 15]

Say karsel ed Raymond Street, Brooklyn, a ditan impisok so pitoran prominentin agagi nen Hunyo 1918

[Litrato ed pahina 16]

Anggaman ngalngali bulag la ed kaunoran iran taon to, nansiansian makdem ed espiritual a pakanengneng si Brother Franz

[Saray litrato ed pahina 17]

Say espiritual ya ibabaleg tan kiyaabante so rason pian manggayaga