Walaan Tayo na Rason Pian Onkelyaw ed Gayaga
“Diad pansayaksak tan panliket et narapat da, tan say panermen tan pantagleey so nepeg ya ontaynan.”—ISAIAS 35:10.
1. Siopa natan so walaan na nagkalautlan rason pian manggayaga?
MASEGURON naiimanom a pigpigaran totoo natan so walaan na peteg a gayaga. Ingen, bilang tuan Kristianos, saray Tastasi nen Jehova so walaan na gayaga. Tan say ilalon nagamoran itan a gayaga so akaarap met ed minilyon nin agni bautismado, ugaw man tan matatken, a mililimog ed Tastasi. Say bengatlan nababasa yo natan irayan salita na sayan magasin so mangipapanengneng a sayan gayaga so kayarian mo la odino sankadampot mo la.
2. Panon a midumaan so gayaga na Kristiano ed inkalapagan a gayaga na maslak a totoo?
2 Liknaen na maslak a totoo a walay kulang ed bilay da. Komusta kayo met? Tua, nayarin andian kayo na amin a materyal iran kagawaan a nausar yo, maseguron aliwan amin a totoon mayaman tan makapanyari natan so walaan na saratan. Tan nayarin labay yo so nawalaan na lalon maong a bunigas tan biskeg. Siansia, nibaga a no nipaakar ed gayaga, mas mayaman tan mas mabunigas kayo nen say dakel a binilyon a wadiad dalin. Panon ya ontan?
3. Antoran makabaliksan a salita so makanepegan na imano tayo, tan akin?
3 Tandaan iray salita nen Jesus: “Sarayan bengatla so sinalitak ed sikayo, pian say gayagak so niwala ed sikayo tan say gayaga yo so nagawan nagnap.” (Juan 15:11) “Say gayaga yo so nagawan nagnap.” Agaylan impaneskribe! Say aralem a panaral ed Kristianon kabibilay so mangiparungtal na dakel a rason pian magmaliw a nagnap so gayaga tayo. Balet natan la, imanoen iray makabaliksan a salita diad Isaias 35:10. Saraya so makabaliksan lapud baleg so kabaliksan da parad sikatayo natan. Nabasa tayo: “Mismon saray dinondon nen Jehova so ompawil tan petepeteg ya onla ed Sion tekep na magayagan kelyaw; tan say panliket ed panaon ya andi-geter so nitapew ed ulo ra. Diad pansayaksak tan panliket et narapat da, tan say panermen tan pantagleey so nepeg ya ontaynan.”
4. Anton klase na gayaga so nasasalambit diad Isaias 35:10, tan akin a kaukolan tayon imanoen iya?
4 “Panliket ed panaon ya andi-geter.” Say balikas ya “ed panaon ya andi-geter” so sakey a suston patalos ed insulat nen Isaias diad Hebreo. Balet, singa met pepekderan na arum a kasulatan, say kabaliksan na sayan bersikulo so “ando lan ando.” (Salmo 45:6; 90:2; Isaias 40:28) Kanian magmaliw ya agmangangga so panliket, diad saray kipapasen a mangiyabuloy—on, mangiter-katunongan—andi-anggaan a panliket. Agta makapaligsan denglen itan? Balet, anganko et pandinayewan yo itan a bersikulo bilang sakey a kipapasen a walad nonot lambengat, panisipen to kayon: ‘Agak met talagan napipilanor ed satan a singa ed pakakalanor ko ed saray problemak tan kapagaan ed inagew-agew.’ Balet aliwan ontan so prupruebaan na saray katuaan. Say mapropetikon sipan ed Isaias 35:10 so walaan na kabaliksan parad sikayo natan. Pian naamtaan no panon, usisaen tayo pa iyan marakep a kapitulo, Isaias 35, ya iimanoen so kada kabiangan na konteksto. Seguradon panggayagaan yo so naimano tayo.
Totoon Nakakaukolan a Manliket
5. Diad anton mapropetikon eksena a naromog so propesiya diad Isaias kapitulo 35?
5 Bilang tulong, nengnengen tayo pay abenegan, say maawaran ya eksena, na sayan makapasagyat a propesiya. Insulat iya na Hebreon propeta a si Isaias nen ngalngali 732 K.K.P. Saratan so dekada sakbay na impaneral na saray armada na Babilonia ed Jerusalem. Unong ya ipapanengneng na Isaias 34:1, 2, impasakbay na Dios ya ibalikas toy panangibales ed saray nasyon, a singa say Edom, ya asalambit diad Isaias 34:6. Mapatpatnag ya inusar to so akauna iran taga Babilonia a manggawa ed satan. Mipadpara, pinankibalatar na Dios so Juda diad panamegley na saray taga Babilonia lapud agnanmatoor iray Judio. Say resulta? Akautibo iray totoo na Dios, tan say binalegan dan dalin so ataynanan a nankibalatar ed loob na 70 taon.—2 Awaran 36:15-21.
6. Anto so walan pandumaan ed baetan na onsabi ed saray Edomita ed onsabi parad saray Judio?
6 Anggaman ontan, wala so baleg a pandumaan ed baetan na saray Edomita tan saray Judio. Agbalot angangga so madibinon panangibales ed saray Edomita; diad kaunoran et sikaray naandi bilang totoo. On, nabisita yo niray aderalderal ed lugar a datin nanayaman na saray Edomita, a singa say bantog ed mundon geray na Petra. Balet natan, anggapo so nasyon odino totoon nakabatan bilang ‘saray Edomita.’ Diad biek a dapag, ando lan ando ta a pankibalataren na Babilonia so Juda, a tinaynan so dalin ya agmagayaga ed ag-agetaran?
7. Panon so nayarin inkiwas na saray akautibon Judio ed Babilonia diad Isaias kapitulo 35?
7 Walay makapasagyat a kabaliksan dia na marakep a propesiya ed Isaias kapitulo 35. Nayarin tawagen itan a panangipawil a propesiya, ta awalaan itan na inmunan kasumpalan sanen pinmawil iray Judio ed binalegan dan dalin nen 537 K.K.P. Saray Israelita ya akautibo ed Babilonia so pinagamoran na kawayangan ya ompawil ed binalegan dan dalin. (Esdras 1:1-11) Ingen, sakbay ya agawa itan saray kautibon Judio diad Babilonia ya angonsidera ed sayan madibinon propesiya so nayarin nanumameng no antoran kipapasen so sabien da ed dilin bansa ra, say Juda. Tan anto so magmaliw a kipapasen dan mismo? Saray ebat so direktan mitukoyan ed no akin a talagan walaan tayo na rason pian onkelyaw ed gayaga. Nengnengen tayo.
8. Antoran kipapasen so naromogan na saray Judio diad ipawil da manlapud Babilonia? (Ikompara so Ezequiel 19:3-6; Oseas 13:8.)
8 Maseguron say situasyon et ag-ompatnag a singa say iilaoan na saray Judio anggan sanen nadngel dan sikaray makapawil la ed binalegan dan dalin. Say dalin da so ataynanan a nankibalatar ed loob na pitoran dekada, sakey ya interon panbilay. Anto so agawa ed dalin? Amin a dinalusan ya uma, kaubasan, odino tanamanan so nayarin nagmaliw a kalawakan. Saray napaparanuman a tanamanan odino naasikason taneman so nagmaliw a kelang odino disierto. (Isaias 24:1, 4; 33:9; Ezequiel 6:14) Isipen pa met so atap ya ayayep ya ondagsa. Laktipen na saraya so ayayep a mangakan na karne, singa saray leon tan leopardo. (1 Arari 13:24-28; 2 Arari 17:25, 26; Kanta nen Solomon 4:8) Nisay nalingwanan daray uso, a walaay abilidad a mamatey na laki, bii, odino ugaw. (1 Samuel 17:34-37; 2 Arari 2:24; Uliran 17:12) Tan agtayo la kaukolan a salambiten iray tadyuko tan arum niran maditan uleg, odino alakdan. (Genesis 49:17; Deuteronomio 32:33; Job 20:16; Salmo 58:4; 140:3; Lucas 10:19) No akaiba yoray Judion ompawil manlapud Babilonia nen 537 K.K.P., ompan sikayo so masuyat a manakarakar ed ontan a lugar. Aliwa iman a paraiso sanen sinmabi ra.
9. Anto so rason no akin a saray pinmapawil et walaan na basiyan pian manilalo tan mankompiyansa?
9 Siansia, si Jehova a mismo so angitonton ed saray managdayew ton onsempet, tan sikato so walaan na abilidad ya umanen so nankibalatar a kipapasen. Agmo ta sisiaen itan ed Manamalsa? (Job 42:2; Jeremias 32:17, 21, 27, 37, 41) Sirin anto so gawaen to—anto so ginawa to—parad ompapawil a Judio tan parad dalin da? Anto so epekto na saya ed totoo na Dios ed modernon panaon tan ed situasyon mo—ed kaplesan tan ed arapen? Nengnengen tayo nin unona no antoy agawa nen saman.
Magayaga Nisesengeg ed Nauman a Kipapasen
10. Anton pananguman so impasakbay na Isaias 35:1, 2?
10 Anto so agawa sanen inabuloyan nen Ciro iray Judio ya ompawil ed saman a makapataktakot a dalin? Basaen pay makapasagyat a propesiya diad Isaias 35:1, 2: “Say kalawakan tan say anggapoy-danum a rehyon so mansayaksak, tan say disierton patar so manggayaga tan manrosas a singa say safron. Ag-onsaew a satan so manrosas, tan talagan satan so manggayagan walaay inkagayaga tan walaay ligsan kelyaw. Say gloria na Lebanon a mismo so nepeg a niiter ed satan, say karakpan na Carmelo tan Saron. Onsabi iramay akanengneng ed gloria nen Jehova, say karlangan na Dios tayo.”
11. Anton pikakabat nipaakar ed dalin so inusar nen Isaias?
11 Diad panaon na Biblia, say Lebanon, Carmelo, tan Saron so bantog ed inkabirden karakpan da. (1 Awaran 5:16; 27:29; 2 Awaran 26:10; Kanta nen Solomon 2:1; 4:15; Oseas 14:5-7) Inusar nen Isaias iratan ya alimbawa pian deskribien so nengneng na apasimbalon dalin, diad tulong na Dios. Balet kasin diad dalin labat so dedeskribien na saya? Maseguron andi!
12. Akin a nibaga tayo a say propesiya ed Isaias kapitulo 35 so akasentro ed totoo?
12 Sasaglawien na Isaias 35:2 a say dalin so “manggayagan walaay inkamagayaga tan walaay maligsan kelyaw.” Amta tayon say dalin tan tantanaman so aliwan literal a “manggayagan walaay inkamagayaga.” Ingen, say imkapasimbalo na saraya a magmaliw a mabuna tan mabunga so sengegan na ontan a liknaan na totoo. (Levitico 23:37-40; Deuteronomio 16:15; Salmo 126:5, 6; Isaias 16:10; Jeremias 25:30; 48:33) Saray literal a pananguman diad dalin a mismo so misimbangan ed saray pananguman na totoo, ta nisesentro iyan propesiya ed totoo. Kanian, walaan tayo na rason pian talosan iray salita nen Isaias bilang manunan ontutukoy ed saray pananguman ed pinmapawil a Judio, nagkalalo la ed inkamagayaga ra.
13, 14. Anton pananguman ed totoo so nipropesiya ed Isaias 35:3, 4?
13 Mitukoyan, usisaen tayo pa ni iyan makapasagyat a propesiya ta pian nanengneng no panon ya asumpal iya kayari na inkibulos tan impawil na saray Judio manlapud Babilonia. Diad Isa 35 bersikulo 3 tan 4, sasaglawien nen Isaias so nipaakar ed arum niran pananguman ed saraman a pinmapawil: “Pabiskegen yoray makapuy a lima, sikayon totoo, tan paligenen yoray mankalog a pueg. Ikuanyo ed saraman so mapaga diad puso: ‘Manpabiskeg kayo. Agkayo natatakot. Nia! Say dilin Dios yo so onsabi tekep na panangibales a mismo, say Dios anggan tekep na sakey a bayar. Sikaton mismo so onsabi tan isalba kayon totoo.’”
14 Agta makapabiskeg so panisip a say Dios tayo, a makapanguman ed nankibalatar a kipapasen na dalin, so ontanlan interesado ed saray managdayew to? Agto labay a saray kautibon Judio so onkapuy, nadismaya, odino manpaga nipaakar ed arapen. (Hebreos 12:12) Isipen pa so kipapasen na saramay akautibon Judio. Nilikud ed ilalon naala ra manlapud sarayan propesiya na Dios nipaakar ed arapen da, talagan mairap parad sikara so pagmaliw ya optimistiko. Sikaray singa no walad ambilunget ya ungib, ya agmakapaway tan magmaliw ya aktibo ed panaglingkor ed si Jehova. A parad sikara et singano anggapoy liwawa ed unaan da.—Ikompara so Deuteronomio 28:29; Isaias 59:10.
15, 16. (a) Anto so nayarin nibaga tayo ed ginawa nen Jehova parad saray pinmapawil? (b) Akin a saray pinmapawil et agnanilalo ed mamilagron panamaabig ed pisikal, balet anto so ginawa na Dios unong ed Isaias 35:5, 6?
15 Balet, agaylan satan so nauman, sanen pinakiwas nen Jehova si Ciro ya ibulos ira pian ompawil ed bansa ra! Anggapo so Biblikon ebidensyan mamilagron nilukasan diman na Dios so siopaman a bulag iran mata na pinmapawil a Judio, nilukas iray layag na saray telek, odino pinaabig so siopaman a piley odino saray pukol. Anggaman ontan, talagan walay bengatlan ginawa to a mas engrande. Impawil tora ed liwawa tan kawayangan na inad-aro ran dalin.
16 Anggapo so pakapatnagan a saray pinmapawil so nanilalon si Jehova so manggawa na ontan iran mamilagron panamaabig ed pisikal. Maseguron amoria ra ya aliwan onman so ginawa na Dios ed kaso nen Isaac, Samson, odino Eli. (Genesis 27:1; Uko-ukom 16:21, 26-30; 1 Samuel 3:2-8; 4:15) Balet no ilaloan da ya umanen na Dios so kipapasen da ed piguratibon paraan, ag-ira adismaya. Maseguron diad piguratibon pantalos et talagan asumpal so Isa 35 bersikulo 5 tan 6. Susto so impangipasakbay nen Isaias: “Diad satan a panaon saray mata na saray bulag so nalukasan, tan say mismon kalayagan na saray telek so nibuang. Diad satan a panaon say sakey a piley so onkalab a singa sakey a kalakian ya usa, tan say dila na agmakapansalita so onkelyaw diad inkaliket.”
Panggawa ed Dalin a Singa Paraiso
17. Anton pisikal iran pananguman so mabitabitar a ginawa nen Jehova?
17 Saramay pinmapawil so maseguron walaan na rason ya onkelyaw a walaay inkaliket a singa ed intuloy a deneskribe nen Isaias: “Ta dia ed kalawakan et saray danum so ompositsit, tan saray subol ed disierton patar. Tan say kinmelang a dalin so magmaliw a singa libsong, tan say napgaan a dalin magmaliw naani a singa subosubol na danum. Diad panaayaman na saray chakal, sakey a panagpainawaan parad sikara, ditan et niwala so berden dika pati saray tanobong tan tantanaman a papiro.” (Isaias 35:6b, 7) Anggaman agtayo nanengneng itan ed interon rehyon natan, ipapanengneng na ebidensya a satan a lugar a datin Juda so “sakey a paraiso na saray pastol.”a
18. Panon so maseguron inkiwas na saray pinmapawil a Judio ed saray bendisyon na Dios?
18 No nipaakar ed saray sengegan pian manggayaga, isipen pa no antoy alikna na nakdaan iran Judio sanen sikaray akapawil ed Insipan a Dalin! Walaan ira na pankanawnawan nakayarian so nankibalatar a kalawakan, a nanayaman na saray chakal tan arum niran ayayep, tan pasimbaloen itan. Agkayo ta makaromog na gayaga ed ontan a panangipawil a kimey, nagkalalo la no amta yon bebendisyonan na Dios iray sagpot yo?
19. Diad anton pantalos a say ipapawil manlapud Binababilonian inkakautibo et kondisyonal?
19 Anggaman ontan, aliwan basta siopaman odino amin a Judion kautibo diad Babilonia so makapawil odino pinmawil pian minabang ed satan a magayagan panamasimbalo. Inletneg na Dios iray kondisyon. Anggapo so makanepegan ya ompawil ya arutakan na Binababilonia, paganon relihyoson agagamil. (Daniel 5:1, 4, 22, 23; Isaias 52:11) Nisay makapawil so siopaman a makulangkulang a nanggawa ed agmakabat a kurang. Agkualipikado so amin ya ontan a totoo. Diad biek a dapag, saramay makakapet ed saray estandarte na Dios, a minoria to bilang masanto diad relatibon pantalos, so nayarin makapawil ed Juda. Makapanbaroy ira a singa wala la’d Dalan na Inkasanto. Impalinew itan nen Isaias diad Isa 35 bersikulo 8: “Petepeteg a niwala diman so sakey a maawang a dalan, anggan sakey a dalan; tan natawag itan a say Dalan na Inkasanto. Say agmalinis a sakey so ag-ondalan ditan. Tan magmaliw itan a parad samay sakey a manaakar ed dalan, tan anggaporay makulangkulang a manyatawyataw ditan.”
20. Anto so agkaukolan a takotan na saray Judio diad ipawil da, a nansumpal ed anto?
20 Saray pinmapawil a Judio so agkaukolan ya ontakot ed antokaman a panangataki manlapud singa-ayep a totoo odino grupo na managlusob. Akin? Lapud ag-abuloyan nen Jehova so ontan a totoo a niwala ed Dalan a kaibay arondon a totoo to. Kanian sikaray makapanbaroy tekep na magayagan inkapositibo, tekep na saray maliket ya iilaloan. Imanoen no panon so impaneskribe nen Isaias ed satan diad impansara to ed sayan propesiya: “Anggapo so leon a napaneknekan a wadman, tan say masebeg a klase na maatap iran ayep so ag-onla ed satan. Anggapo so naromog diman; tan saramay arondon so nepeg a manakar diman. Mismon saray dinondon nen Jehova so ompawil tan petepeteg ya onla ed Sion tekep na magayagan kelyaw; tan say panliket ed panaon ya andi-geter so nitapew ed ulo ra. Diad pansayaksak tan panliket et narapat da, tan say panermen tan pantagleey so nepeg ya ontaynan.”—Isaias 35:9, 10.
21. Panon so nepeg a panmoria tayo natan ed kasumpalan na Isaias kapitulo 35 ya agawa la?
21 Agaylan mapropetikon litrato so niwala dia! Anggaman ontan, agtayo komon moriaen iya bilang panaral lambengat ed apalabas ya awaran, a singano marakdakep ya istorya a samsamet so kabaliksan to ed situasyon tayo odino arapen tayo. Say katuaan et sayan propesiya so walan na makapakelkelaw a kasumpalan natan ed limog na totoo na Dios, kanian talagan manasaglawi ed bilay na balang sakey ed sikatayo. Iikdan to itayo na maong a rason pian onkelyaw parad gayaga. Sarayan aspeto a manasaglawi ed bilay yo natan tan diad arapen so singbaten ed ontumbok ya artikulo.
[Paimano ed leksab]
a Manlapud impanaral to ed sayan rehyon, inkuan nen agronomon Walter C. Lowdermilk (mangilalaman ed U.N. Food and Agriculture Organization): “Sayan dalin so datin sakey a paraiso na saray pastol.” Impanengneng to met a say klima diman so agtanton anguman “nanlapulad panaon na Romano,” tan “say ‘disierto’ a sinmumblay ed datin-mabungan dalin so kimey na too, aliwan say palsa.”
Kasin Natandaan Yo?
◻ Kapigan so inmunan kasumpalan na Isaias kapitulo 35?
◻ Anto so epekton pawalaen na inmunan kasumpalan na propesiya?
◻ Panon a sinumpal nen Jehova so Isaias 35:5, 6?
◻ Antoran pananguman ed dalin tan ed kipapasen da so naeksperiensia na pinmapawil a Judio?
[Litrato ed pahina 9]
Saray deral na Petra, ed lugar a datin nanayaman na saray Edomita
[Credit Line]
Garo Nalbandian
[Saray litrato ed pahina 10]
Legan ya adakep iray Judio, baleg a kabiangan na Judea so nagmaliw a singa sakey a kalawakan, a nanayaman na maatap ya ayayep a singa saray uso tan leon
[Credit Lines]
Garo Nalbandian
Uso tan Leon: Safari-Zoo na Ramat-Gan, Tel Aviv