Niyabawag a Maliket so Mensaheros na Maridios a Kareenan
“Saray dinondon nen Jehova ompawil ira naani, tan onla ra dia ed Sion a tekep na pankankanta; tan naynay a liket so wala naani ed tapew na kauloan da.”—ISAIAS 35:10.
1. Antoy panpirpirawatan a kaukolan na mundo?
NATAN, mas ni nen say nensaman a nakakaukolan na katooan so mensahero na maong a balita. Wala so maganat a pankaukolan parad sakey a mangibaga na katuaan nipaakar ed Dios tan saray gagala to, sakey ya andiay-takot a tasin mamasakbay na onsabin kadederal ed saray marelmeng tan ontulong ed saray maptek-impanpuso a nawalaan na maridios a kareenan.
2, 3. Diad kaso na Israel, panon a sinumpal nen Jehova so sipan ton nirekord ed Amos 3:7?
2 Diad panaon na kadaanan ya Israel, insipan nen Jehova a mangitarok na mensaheros ed onian nengneng. Diad pansamposampot na koma-siam a siglo K.K.P., ikuan nen propeta Amos: “Petepeteg anggapo naani gawaen nen Katawan a Jehova, ya agnaani nipuyan so inamot to ed saray aripen to a propeta.” (Amos 3:7) Diad saray siglo kayari na sayan panangiyabawag et nanggawa si Jehova na dakel a makapanyarin gawa. Alimbawa, nen 607 K.K.P., pirmi impanisiplina to ed apilin totoo to lapud rebelyoso ra tan nankasalanan-ed-dala. Dinusa to met so kabangibang iran nasyon a nanliketan day impanirap na Israel. (Jeremias, kapitulo 46-49) Insan, nen 539 K.K.P., intarok nen Jehova so kabagbag na pakayari mundon Babilonia, tan bilang resulta nen 537 K.K.P., sakey a nakdaan na Israel so pinmawil ed dalin da pian ipaalagey lamet so templo.—2 Awaran 36:22, 23.
3 Saraya so makatantandan ebento, tan mitunosan ed saray salita nen Amos, akauna lan imparungtal nen Jehova iratan ed saray propeta a nanserbi bilang mensaheros, a nampasakbay ed Israel no antoy onsabi. Diad kapegleyan na koma-walon siglo K.K.P., pinatalindeg to si Isaias. Diad kapegleyan na koma-piton siglo K.K.P., pinatalindeg to si Jeremias. Insan, diad pansamposampot na satan a siglo, pinatalindeg to si Ezequiel. Saraya tan arum a matoor a propeta so angiter na pirmin impantasi nipaakar ed saray gagala nen Jehova.
Panangipabidbir ed Mensaheros na Dios Natan
4. Anto so mangidedemostra ed pankaukolan na mundo ed mensaheros na kareenan?
4 Komusta met natan? Dakel ed mundo so kasiporan a makakaliknay sesga sano nanenengneng da so kipapaabeba na atooan a sosyedad. Saramay walaan na aro ed inkatunong so naeermenan sano nanenengneng da so pansimpisimpitan tan mapatpatnag ya inkarelmeng na Kakristianoan. Singa impasakbay nen Jehova ed panamegley nen Ezequiel, sikaray “mansibek tan manakis lapu ed amin a kadimlaan a nagagawa ed kapegleyan to.” (Ezequiel 9:4) Balet, dakel so agmakakamoria ed saray gagala nen Jehova. Kaukolan a napasakbayan ira.
5. Panon ya impanengneng nen Jesus a walaray mensahero ed agew tayo?
5 Wala ta natan so mansasalita ya andiay-takot a singa ed awawey di Isaias, Jeremias, tan Ezequiel? Impabidbir nen Jesus a wala. Sanen ipapasakbay toray ebento ed agew tayo, inkuanto: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi anggaan.” (Mateo 24:14) Siopa natan so manusumpal ed satan a propesiya, a manlilingkor bilang mensahero, managpulong na maong a balita? Say panpadparaan na agew tayo tan ed panaon na kadaanan ya Israel so ontulong ed sikatayo pian ebatan itan a tepet.
6. (a) Diskribien iray eksperiensia na “say Israel na Dios” legan na inmunan guerra mundial. (b) Panon ya asumpal so Ezequiel 11:17 ed kadaanan ya Israel?
6 Legan na makapataktakot iran agew na Guerra Mundial I, say modernon-agew a totoo nen Jehova, say nakdaan na alanaan ya “Israel na Dios,” so akautibo a singa met ed Israel nensaman diad Babilonia. (Galacia 6:16) Sikaray anagmak na espiritual ya inkadakep ed Babilonian Baleg, say sankamundoan a tugyop na palso iran relihyon, a say Kakristianoan so sankaprominentian tan natetel a tuloy. Anggaman kuan, impanengneng na saray salita nen Jehova ed Ezequiel a sikaray ag-inkaindan. Inkuanto: “Siak tiponen takayo naani a manlapu ed saray balbaley, tan tiponen takayo naani manlapu ed saray dalin a nikayatan yo tan iter ko ed sikayo so dalin ya Israel.” (Ezequiel 11:17) Ta pian nasumpal itan a sipan parad kadaanan ya Israel, pinatalindeg nen Jehova si Ciron Persiano, ya angigeba ed Sankamundoan a Pakayari na Babilonia tan angilukas na dalan parad saray nakdaan na Israel pian ompawil ed dalin da. Komusta met natan?
7. Anton ebento nen 1919 so angipanengneng a kinmiwas si Jesus sumpad Babilonian Baleg? Isalaysay.
7 Asasakbay ed sayan siglo, wala so mabiskeg ya ebidensya ya onkikiwas so Babaleg a Ciro. Siopa itan? Anggapoy arum noagta si Jesu-Kristo, a nitrono nanlapulad nen 1914 ed mangatatawen a Panarian. Sayan matalonggaring ya Ari so angipanengneng na maong-a-linawa ed alanaan ya agagi to ed dalin sanen, diad taon 1919 et nibulos iray alanaan a Kristianos manlapud espiritual ya inkakautibo tan pinmawil ed “dalin” da, say espiritual a kipapasen da. (Isaias 66:8; Apocalipsis 18:4) Kanian say Ezequiel 11:17 so walaan na modernon-agew a kasumpalan. Diad inmuna iran panaon kinaukolan so inkaplag na Babilonia pian nilukas so dalan parad Israelitas pian makapawil ed dalin da. Say panangipawil ed modernon-agew ya Israel na Dios so ebidensia a say Babilonian Baleg so managmak na kapelag ed lima na Babaleg a Ciro. Sayan inkaplag so inyanunsio na komaduan anghil ed Apocalipsis kapitulo 14, sanen inkelyaw to: “Naplag, naplag so Babilonia saman so baleg, ta sikato pinainum to so saray nasyon ed alak na petang na impilawan to!” (Apocalipsis 14:8) Agaylan impanguman parad Babilonian Baleg, nagkalalo la parad Kakristianoan! Tan agaylan bendisyon parad tuan Kristianos!
8. Panon a say libro na Ezequiel so manidiskribi ed liket na totoo na Dios kayari na inkibulos da nen 1919?
8 Diad Ezequiel 11:18-20, nabasa tayo so impaniskribi na propeta ed liket na totoo na Dios kayari na inkipawil da. Say inmunan kasumpalan na saray salita to so mankabaliksan na pakalinis ed Israel ed saray agew nen Esdras tan Nehemias. Mipadpara met itan ed modernon-agew a kasumpalan. Nengnengen tayo no panon. Inkuan nen Jehova: “Onla ra naanid’man [ed dalin da] tan ekalen da naani ray makaingongot a bengatla ed sikato tan saray amin a makadimla ed sikato a manlapu’d man.” Unong a singa nipropesiya, ginmapo nen 1919, nilinisan nen Jehova so totoo to tan pinabiskeg to ra lamet a manlingkor ed sikato. Ginapoan dan inekal so amin a Binababilonian agagamil tan saray doktrina manlapud espiritual a kaliberliber da a manudutak ed sikara ed imaton to.
9. Antoran makatantandan bendisyon so initer nen Jehova ed totoo to nen 1919?
9 Insan, unong ed bersikulo 19, intuloy nen Jehova ya inkuan: “Et iter ko naani ed sikara so sakey a puso, tan iyan ko naani ed dalem yo so sakey ya espiritu a balo; et ekalen ko naani ed laman da so ginmibato a puso, tan iter ko naani ed sikara so puso a laman.” Mitunosan ed sarayan salita, nen 1919, impankakasakey nen Jehova so alanaan ya ariripen to, inikdan to ra na “sakey a puso” a singa panangibaga, ta pian sikaray manlingkor ed sikato a “benebenek.” (Sofonias 3:9) Sakey ni, inter nen Jehova ed totoo to so masanton espiritu pian pabiskegen ira ed panagtasin kimey tan pian napatnagan ed sikara so maabig iran bunga ya adiskribi diad Galacia 5:22, 23. Tan imbes a puson ag-onkiwas tan singa-bato, inikdan ira nen Jehova na anlemek, maabuloy, matulok a puso, sakey a puso ya onkiwas unong ed linawa to.
10. Akin a benindisionan nen Jehova so nipawil a totoo to manlapud 1919 a manpatuloy?
10 Akin a ginawa to’ya? Impaliwawa a mismo nen Jehova. Nabasa tayo diad Ezequiel 11:20: “[Ta] pian manakar ira komon ed pananontonan ko, tan unoren day panguksoyan ko, tan gawaen da ra: et sikara naani baley ko, tan siak naani Dios da.” Say Israel na Dios so akaaral ya ontulok ed ganggan nen Jehova imbes a tumbokey dili ran ideya. Naaralan dan gawaen so linawa na Dios ya anggapoy takot ed too. Sirin, sikaray nidumaduma manlapud alig-alig a Kristianos na Kakristianoan. Sikaray totoo nen Jehova. Bilang ontan et akaparaan si Jehova a mangusar ed sikara bilang mensahero to, say “matoor tan makabat ya aripen” to.—Mateo 24:45-47.
Say Liket na Mensaheros na Dios
11. Panon so panidiskribi na libroy Isaias ed liket na totoo nen Jehova?
11 Kasin nilitrato yo so liket da sanen amoria ran agaylan apribilihyoan a betang so panggagayagaan da? Bilang sakey a grupo, inyaniweng daray salita na Isaias 61:10: “Siak manliket ak naani balbaleg ed Jehova, say kamarerwak manggayaga naani ed Dios ko.” Say sipan diad Isaias 35:10 so asumpal ed sikara: “Saray dinondon nen Jehova ompawil ira naani, tan onla ra dia ed Sion a tekep na pankankanta; tan naynay a liket so wala naani ed tapew na kauloan da. Narapat da naani inkagayaga tan liket, tan say ermen tan paney-ey onandi ra.” Ontan so liket na mensaheros nen Jehova na maridios a kareenan nen 1919 legan ya igagapo ray pangipulong ed maong a balita ed amin a katooan. Nanlapulad saman ya anggad natan, sikaray agtinmundan manusumpal ed sayan kimey, tan say liket da so apadaak. Diad Sermon to ed Palandey, onia so imbaga nen Jesus: “Maliket iray managgawa na kareenan, lapud satan sikara so natawag ya ‘ananak na Dios.’” (Mateo 5:9, NW, paimano’d-leksab) Say inkamatua na satan a panangiyabawag so naeeksperiensia la na nakdaan ya alanaan na “ananak na Dios” nanlapud 1919 ya anggad natan.
12, 13. (a) Siopa so akiulop ed Israel na Dios ed panaglingkor ed si Jehova, tan anton kimey so ginawa ra? (b) Anton baleg a gayaga so naeeksperiensia la na alanaan ya ariripen nen Jehova?
12 Diad ilalabas na saray taon et say bilang na say Israel na Dios so dinmaak ya anggad dekada na 1930 sanen say panagtipon ed saray nakekeraan ya alanaan so ngalngali la nakompleto. Kasin tinmunda so idaraak ed bilang na saray managpulong na maong a balita? Andin balot. Sakey a baleg ya ulop na Kristianos a walaan na mangaraldalin ya ilalo so pinmatnag la, tan saraya so miuulop ed alanaan ya agagi ra diad panagpulong. Anengneng nen apostol Juan iyan baleg ya ulop ed pasingawey, tan say paraan na impaniskribi to so makatantanda: “Wala ra ed arap na trono na Dios; tan sikato so panlingkoran da ed agew tan labi.” (Apocalipsis 7:15) On, say baleg ya ulop so okupado ed panaglingkor ed Dios. Bilang resulta, sanen say bilang na alanaan so ginmapon dinmaiset, kayari 1935, say panagtasin kimey so inmabanti tekep na baleg ya indaak na sarayan matoor a kakaiba.
13 Diad onian paraan et asumpal so Isaias 60:3, 4: “Saray nasyon ondago ra naani ed liwawam, tan saray ar-ari ed sinag na kapelnak mo. Itangay mo so saray matam ed liberliber et onnengneng ka! Sikara ya amin mantitipon ira, onla ra ed sika; saray anak mo a lalaki onsabi ra naani a manlapu ed arawi, et say anak mo a bibii niyakar ira naani ed saray taklay.” Say liket ya intarok na sarayan agawgawa ed say Israel na Dios so marakerakep ya adiskribi diad Isaias 60:5, ya onia so nabasa tayo: “Saman la nanengneng mo tan isinag mo, et say pusom omparok naani tan napabaleg, lapu ed inkadaakan na dayat ompawil naani ed sika; say kayamanan na saray nasyon onla ed sika.”
Onaabanti so Organisasyon nen Jehova
14. (a) Anton pasingawey na mangatatawen a bengatla so anengneng nen Ezequiel, tan anton ganggan so naawat to? (b) Anto so atebek na totoo nen Jehova ed modernon panaon, tan antoy liknaen dan obligasyon da?
14 Nen 613 K.K.P., anengneng nen Ezequiel ed pasingawey so mangatatawen, a singa-karwahen organisasyon nen Jehova ya onaabanti. (Ezequiel 1:4-28) Kayari na satan, inkuan nen Jehova ed sikato: “Anak na too, onla ka, onsabi ka ed abung na Israel, tan salitaen mo ed sikara so saray salitak.” (Ezequiel 3:4) Diad sayan taon na 1997, natetebek tayo a say mangatatawen ya organisasyon nen Jehova so siansian ag-ontutundan onkikiwas a manumpal ed saray gagala na Dios. Kanian, liknaen tayo ni inkapilitan a pangibaga ed saratan a gagala ed arum. Diad agew to, sinalita nen Ezequiel iray salita a direktan impuyan nen Jehova. Natan, sasalitaen tayoray manlalapud apuyanan a Salita nen Jehova, say Biblia. Tan agaylan walan mensahe na satan a libro parad katooan! Bangta panaaburidoan na dakel so nipaakar ed arapen, ipapanengneng na Biblia a saray bengatla so mas mauges ni—tan diad parihon bekta, mas magmaong—nen say naisip da.
15. Akin a say situasyon na mundo so mas pinmalalo ni nen say iisipen na dakel natan?
15 Ompapalalo iray bengatla lapud, singa naamtaan tayo ed akauna iran artikulo, say Kakristianoan tan amin niran palson relihyon so magano lan sigpot a naderal a singa ed Jerusalem nen 607 K.K.P. Niarum ni, say intiron sankagloboan a mapolitika a nilitrato ed libro na Apocalipsis bilang atap ya ayep a walaan na pitoran ulo tan samploran saklor so magano lan punasen a singa agawa ed dakel a paganon kakaabay na Jerusalem. (Apocalipsis 13:1, 2; 19:19-21) Diad agew nen Ezequiel, mabitabitar so impaniskribi nen Jehova ed makapakebbiew ya impuyan na manasingger a kadederal na Jerusalem. Balet say salita to so nawalaan na lalon kabaliksan sano natebek na totoo so manasingger a kadederal na sayan mundo. Inkuan nen Jehova ed si Ezequiel: “Mansibek ka sirin, sika anak a laki na too; lapu ed kabetag na saray banel mo tan mansibek ka naani ya ampaipait ed arap na saray mata ra. Et nagawa naani, no kuanda ed sika, ‘Akin et mansibek ka?’ Sika kuan mo naani, ‘Lapu ed saray balita.’ Ta sikara so onsabi; et amin a puso natunaw naani, tan amin a lima onkapuy naani, tan amin ya espiritu napunaw naani, tan amin a pueg onkapuy naani a singa danum. Nia onsabi, tan nagawa naani,’ kuan nen Katawan a Jehova.” (Ezequiel 21:6, 7; Mateo 24:30) Paganigani lan nagaway makapataktakot iran ebento. Say pirmin panangiyansakit tayo ed kaparan totoo so mamakiwas ed sikatayo a mangipaknol ed pasakbay, pian ibaga so “balita” na onsabin sanok nen Jehova.
16. Parad saray mauyamo, akin a say kipapasen et magmaong nen say isipen na dakel?
16 Diad parihon bekta, parad saray matuan-impanpuso, saray bengatla so mas magmaong nen say naisip na maslak a totoo. Diad anton dalan? Lapud satan et inatey si Jesu-Kristo parad saray kasalanan tayo tan manuuley la natan bilang Ari ed Panarian na Dios. (1 Timoteo 1:15; Apocalipsis 11:15) Saray problema na katooan ya ontanlan agnaresolbi so magano lan naresolbi diad panamegley na mangatatawen a Panarian. Say ipapatey, sakit, kaugsan, eras, krimen, tan polusyon ed kaliberliber so magmaliw a bengabengatlan apalabas, tan say Panarian na Dios so manguley ed paraison dalin. (Apocalipsis 21:3, 4) Panggayagaan na katooan so maridios a kareenan—sakey a mareen a siglaotan ed si Jehova a Dios tan ed sakey tan sakey.—Salmo 72:7.
17. Antoran idaraak so mamapagayaga ed kapusoan na mensaheros na maridios a kareenan?
17 Diad arum a parti na mundo, sankapatnagan so ulop na saray mauyamon onkikiwas ed sayan mensahe na maridios a kareenan. Diad panalambit ed pigaran alimbawa, nen imbeneg a taon say Ukraine so angireport na 17-porsienton indaak na manangipalapag. Say Mozambique so angireport na 17-porsienton indaak, say Lithuania et 29-porsienton indaak. Say Russia so awalaan na 31-porsienton indaak, bangta say Albania so akaeksperiensia na 52-porsienton indaak na saray manangipalapag. Sarayan indaak so mangirerepresinta na sinamplon nilibon matuan-impanpuson indibidual a labay dan panggayagaan so maridios a kareenan tan ondadapag ed inkatunong. Say ontan a maples ya ibubulaslas so mangitatarok na gayaga ed intiron Kristianon impanaagi.
18. Balanglan ontalineng man odino andi so totoo, anto so nepeg ya awawey tayo?
18 Kasin ontan kapeles so ikikiwas na totoo ed teritorya yo? No ontan, migayaga kami ed sikayo. Anggaman ontan, diad arum a teritorya et mankakaukolan na dakel ya oras na impasyan kimey sakbay a naromog so anggan sakey ya interesadon too. Kasin saramay manlilingkor ed ontan iran teritorya et onkakapoy so kalimaan da odino nadidismaya? Andi. Nononoten na Tastasi nen Jehova iray salita na Dios ed si Ezequiel sanen Sikatoy inmunan angiganggan ed malangwer a propeta pian manpulong ed Judion kabaleyan to: “Et sikara, anggan ondengel ira naani, odino ag-ira ondengel (ta sikara so matunganga ya abung), anggan ontan amta ra naani a wala nensaman so propeta ed sikara.” (Ezequiel 2:5) Singa si Ezequiel, mantultuloy itayon mangipasabi ed totoo so nipaakar ed maridios a kareenan ontalineng man ira odino andi. No ontatalineng ira, naliliketan itayo. Balet anggaman ipupulisay, luludlureyen, papasegsegangen da itayo ni ingen, siansian mantultuloy tayo. Inaro tayo si Jehova, tan kuan na Biblia: “Say aro . . . amin itepel to.” (1 Corinto 13:4, 7) Lapud manpupulong tayo tekep na panagsungdo, kabat na totoo no sioparay Tastasi nen Jehova. Kabat day mensahe tayo. Sano onsabi so anggaan, naamtaan da a saray Tastasi nen Jehova so nanggunaet a tinmulong ed sikara pian panggayagaan so maridios a kareenan.
19. Bilang ariripen na tuan Dios, anton baleg a pribilihyo so nepeg a pablien tayo?
19 Wala ta ni so babaleg a pribilihyo nen say panlingkor ed si Jehova? Anggapo la! Say sankabalgan a liket tayo et say pakawalaan na pisisiglaotan tayo ed Dios tan say pikakabat a gagawaen tayo so linawa to. “Mapalar so katooan ya amta to so mandayew ed sikan magaygayaga: manakar ira, O Jehova, ed liwawa na lupam.” (Salmo 89:15) Komon ta lawas tayon pilien so gayaga ed pagmamaliw a mensahero na Dios ed kareenan ed katooan. Komon ta sikukulin gawaen tayoy betang tayo ed sayan kimey anggad pangibaga nen Jehova ya asumpal la.
Kasin Nanonotan Yo?
◻ Sioparay mensahero na kareenan na Dios natan?
◻ Panoy pakaamta tayo a naeksperiensia na Babilonia a Baleg so inkaplag nen 1919?
◻ Anto so manunan kapagaan na “baleg ya ulop”?
◻ Akin a say arapen so mas mauddiem nen say iisipen na maslak a totoo natan?
◻ Parad saray maptek impanpuso, akin a say arapen so magmaliw a magmaong nen say isipen da?
[Saray litrato ed pahina 21]
Sano nanenengneng day kadederal na atooan a sosyedad, liknaen na dakel a walay onsabin mauges
[Saray litrato ed pahina 23]
Saray mensahero na maridios a kareenan so sankaliketan a totoo ed dalin natan